ROMANOS 7:4 - Chatino Zona Alta Occidental

⁴ Ngwañaꞌan lkaan ni loꞌo chaꞌ kula nu mdukwaan ꞌaan ti ngwa sꞌni: sa ñaꞌan lka ska nu kunaꞌan nu ja luꞌu ꞌa kwilyoꞌo, ngwañaꞌan lka taꞌaan nu ndiꞌin chaꞌ ꞌñaan loꞌo Krixtu. Wa ngujwi Krixtu lo wsi, kanꞌ chaꞌ ni, ja ndiꞌin chaꞌ ꞌñaan loꞌo chaꞌ kula kanꞌ. Wa ngwa suꞌwa chaꞌ ꞌñaan loꞌo Krixtu bra nu ndyuꞌu yu xiyaꞌ xa wa ngujwi yu, kanꞌ chaꞌ ni, ka ꞌñaan kuꞌnian tñan ꞌin Ndiose laja nu ti ndiꞌian lo chalyuu.

ROMANOS 7:4 ပူးပေါင်းရင်းမြစ်များ

SAN MATEO 26:26

Laja nu nchku neꞌ, bra kanꞌ msñi Jesús ska jaxlya, ndya xuꞌwe ꞌin Ndiose, msuꞌwe jaxlya kanꞌ. Mda yu yuꞌwe jaxlya kanꞌ ꞌin neꞌ nu ngiꞌni xaꞌan chaꞌ ꞌin yu bra kanꞌ. ―Ku wan jaxlya re, chaꞌ ñaꞌan tiꞌ kunaǎnꞌ, ngwañaꞌan lka re ―ndukwin Jesús ꞌin neꞌ kanꞌ.

SAN MARCOS 4:20

Loꞌo seꞌen ngalu mta lo yuu suꞌwe ni, mtsu mta kanꞌ, suꞌwe ꞌa nguluu kala, mdoꞌo ꞌa mta lo ran bra kanꞌ; ngwañaꞌan lka nten nu wa ynan chaꞌ suꞌwe kanꞌ, loꞌo suꞌwe ꞌa ynan neꞌ chaꞌ kanꞌ. Sa kalatyii yaꞌ, sa kwa chaꞌ suꞌwe kuꞌni neꞌ kanꞌ xa wa ynan neꞌ chaꞌ ꞌin Ndiose, ta snan yla yaꞌ chaꞌ suꞌwe kuꞌni neꞌ, ta ska siyentu yaꞌ chaꞌ suꞌwe kuꞌni neꞌ.

SAN JUAN 15:8

Kuꞌni tnun nten ꞌin Stiǐn Ndiose, bra nu ñaꞌan neꞌ chaꞌ suꞌwe ꞌa ngiꞌni wan loꞌo xka ta nten. Ka biyaꞌ tiꞌ neꞌ chaꞌ nten nu ngiꞌni xaꞌan chaꞌ ꞌñaǎn lka wan bra kanꞌ―ndukwin―.

SAN JUAN 3:29

Ñaꞌan tiꞌ xa wa mjwi kwilyoꞌo neꞌ, ska ti yu kiꞌyu kanꞌ, kanꞌ nu lka kwilyoꞌo kuxiin; loꞌo taꞌa suꞌwe nsuꞌwi nu kiꞌyu kanꞌ, suꞌwe ꞌa nka tiye yu kunan yu chaꞌ nu nchkwiꞌ yu kanꞌ. Sa ñaꞌan suꞌwe nka tiye taꞌa suꞌwe nsuꞌwi yu ndiꞌin yu xa wa mjwi kwilyoꞌo neꞌ, ngwañaꞌan naꞌ suꞌwe ꞌa nka tiyeěn chaꞌ ñaꞌaǎn ꞌin neꞌ nu nnan chaꞌ nu nduꞌu Jesús ―ndukwin Xuwa―.

SAN JUAN 6:51

Naꞌ lkaǎn chaꞌ suꞌwe kanꞌ nu kaja ꞌin nten ―ndukwin Jesús―. Mdoꞌoǔn seꞌen ndiꞌin Ndiose ndijyaǎn lo chalyuu chaꞌ kaǎn nten, chaꞌ kaja chalyuu kwi ꞌin nten ñaꞌaan chalyuu. Bra nu ku neꞌ ꞌñaǎn tyukwi ñaꞌaǎn, ja tsaa tii ꞌa chalyuu ꞌin neꞌ kanꞌ bra kanꞌ.

ROMANOS 6:11

Kwiꞌ ngwañaꞌan ꞌwan, tyaꞌan chaꞌ tiye wan chaꞌ kuꞌni tyii wan siyaꞌ ti ꞌin nchga chaꞌ kuxi nu nsuꞌwi niꞌ kasiya ꞌwan. Xkwiꞌ kuꞌni wan tñan ꞌin Ndiose suꞌwa ti loꞌo Jesucristo nu nka Xꞌnaan, sa ñaꞌan si wa ndyuꞌu wan xiyaꞌ, ngwañaꞌan tyaꞌan chaꞌ tiye wan.

ROMANOS 6:14

Siꞌi chaꞌ xaꞌan nu nsuꞌwi chalyuu ka ndloo la ꞌwan ni. Siꞌi xkwiꞌ chaꞌ kutsen wan tyiꞌin wan lo chalyuu, sa ñaꞌan lka si ndatsaa ꞌa chaꞌ kula kanꞌ ꞌwan; ka tyiꞌin suꞌwe wan lo chalyuu, chaꞌ xkwiꞌ chaꞌ suꞌwe nu tnun ꞌa ngiꞌni Ndiose loꞌo wan.

ROMANOS 6:2

¡Ja suꞌwe siyaꞌ ti kuꞌnian sa ñaꞌan nu yꞌnian sꞌni la! Wa lkaan ni sa ñaꞌan lka si wa ngujwian loꞌo Krixtu, chaꞌ xka tuwiin tsaan ni; ja suꞌwe ꞌa si ñaꞌan ti kuꞌnian chaꞌ xaꞌan kanꞌ.

ROMANOS 6:22

Loꞌo ni, ja ka ꞌa ꞌin chaꞌ xaꞌan kanꞌ kulo tñan ꞌwan, chaꞌ wa yten wan tñan ꞌin Ndiose. Ka suꞌwe ka tiye wan ni, chaꞌ ngiꞌni wan tñan ꞌin Ni, chaꞌ xkwiꞌ ndiꞌin wan lo chalyuu chaꞌ ꞌin Ndiose; bra kanꞌ ja tyii ꞌa chalyuu nu ta Ni ꞌwan xa wa mdyii nchga chaꞌ.

ROMANOS 7:3

Nde ñaꞌan lka chaꞌ re. Si tyiꞌin chaꞌ ꞌin nu kunaꞌan kanꞌ loꞌo xka nu kiꞌyu bra nu ti luꞌu kwilyoꞌo, chaꞌ kuxi ngiꞌni nu kunaꞌan kanꞌ bra kanꞌ. Xa wa ngujwi kwilyoꞌo nu kunaꞌan kanꞌ, ja tatsaa ꞌa chaꞌ kula ꞌin neꞌ; ka kaja kwilyoꞌo nu kunaꞌan kanꞌ xiyaꞌ loꞌo xka yu kiꞌyu; siꞌi chaꞌ chen ñaꞌan kuꞌni neꞌ bra kanꞌ, chunꞌ nu ja luꞌu ꞌa nu ngwa kwilyoꞌo nu kunaꞌan kanꞌ.

ROMANOS 7:6

Loꞌo ni, ndiꞌian laja tian ꞌin chaꞌ kula kanꞌ, ja ka ꞌa ꞌin ran kulo tñan ꞌñaan. Nchka laja ꞌñaan ni, chaꞌ kuꞌnian tñan nu nchka tiꞌ Ndiose chaꞌ kuꞌnian, chunꞌ wa mjwi xka chalyuu kwi nu nda Tyiꞌi Ndiose ꞌñaan.

ROMANOS 8:2

Bra nu lka Tyiꞌi Ndiose ndloo la ꞌñaan, bra kanꞌ kaja chalyuu kwi ꞌñaan chabiyaꞌ ꞌin Jesucristo, chaꞌ suꞌwa ndiꞌin chaꞌ ꞌñaan loꞌo Ni; wa ngulaa Ni ꞌñaan yaꞌ nu xaꞌan nu ngiꞌni chaꞌ kanaꞌ kasiya ꞌñaan.

1 CORINTIOS 10:16

Bra nu ndyoꞌ tiꞌian suꞌwa ti loꞌo neꞌ taꞌa msñian chaꞌ ꞌin Jesús ni, nchkuan loꞌo ndiꞌyoan bra kanꞌ; ngwañaꞌan ngiꞌnian chunꞌ chaꞌ nkwan Jesús nan nchkuan ti kulo. Kanꞌ chaꞌ kulo ndukwa la nchkwianꞌ ngwa xuꞌwe ꞌin Ndiose chaꞌ ꞌin tñan nu yꞌni Jesús kanꞌ. Bra nu koꞌoan mñun kanꞌ, bra kanꞌ suꞌwa ndiꞌin chaꞌ ꞌñaan loꞌo ti kwiꞌ Jesús loꞌo nchga neꞌ taꞌaan; ti kwiꞌ bra kanꞌ tyuꞌwi tianꞌ chaꞌ wa ngalu tnen ykwiꞌ Jesús chaꞌ ngujwi Ni lo wsi siꞌyaan. Bra nu nchkuan jaxlya kanꞌ, kwiꞌ ngwañaꞌan lka chaꞌ kanꞌ, suꞌwa ndiꞌin chaꞌ ꞌñaan loꞌo Jesús loꞌo nchga neꞌ taꞌaan; ti kwiꞌ bra kanꞌ tyuꞌwi tianꞌ chaꞌ mda Jesús tyukwi ñaꞌaan ykwiꞌ chaꞌ ngujwi Ni lo wsi siꞌyaan.

2 CORINTIOS 11:2

Ndiya ꞌa tiǎnꞌ ꞌwan. Loꞌo ja chan kwiꞌ ngwañaꞌan nka tiye Ndiose ñaꞌan Ni ꞌwan. Wa mskaǎnꞌ chaꞌ loꞌo Ni chaꞌ taǎn ꞌwan chaꞌ ka wan nten ꞌin Krixtu, nten nu luwi kasiya ꞌin, ñaꞌan tiꞌ ska nu kunaꞌan kuneꞌ nu kaja kwilyoꞌo loꞌo ska ti yu kiꞌyu;

GÁLATAS 3:13

Wa ngulo Krixtu nchga yuweꞌ nu msuꞌwa Ndiose chunꞌ nten, chaꞌ ja ngwa ꞌñaan kuꞌniin ñian nchga tñan nu ykwiꞌ Ni loꞌoan; yuweꞌ nu ndukwa chuanꞌ, kanꞌ nganun chunꞌ Jesús bra kanꞌ. Nde lka chaꞌ nu ndukwa lo kityi ꞌin Ndiose: “Tnun ꞌa yuweꞌ ndukwa chunꞌ ñaꞌan nten nu xtya neꞌ ꞌin, ñaꞌan luꞌu ti, lo wsi chaꞌ kaja.”

GÁLATAS 5:18

Bra nu kunan wan nchga chaꞌ nu nchkwiꞌ Tyiꞌi Ndiose loꞌo wan niꞌ kasiya ꞌwan, siꞌi chaꞌ kula nu nchkwiꞌ nten ti nu ka ndloo ꞌwan bra kanꞌ.

EFESIOS 2:15

Ti kwiꞌ chaꞌ kula nu ndyaa ñaꞌan ꞌa tiꞌ neꞌ judío taꞌa ba, kanꞌ lka nu mñi lyoꞌo ꞌwa chaꞌ ja ka tiin chaꞌ wsuun kanꞌ, chaꞌ nsuꞌwi ꞌa ñaꞌan ndatsaa chaꞌ kanꞌ ꞌwa. Wa yꞌni tyii Jesús ꞌin chaꞌ kula kanꞌ ni, chunꞌ wa ngujwi yu lo wsi; kanꞌ chaꞌ taꞌa tyukwaa ta nten taꞌaan, wa lkaan ska nten kwi ni, chaꞌ ngwa suꞌwa chaꞌ ꞌñaan loꞌo Ndiose. Kwiꞌ ngwañaꞌan yꞌni Jesús chaꞌ kaja ñaꞌan tyiꞌin suꞌwean loꞌo Ni, ngwañaꞌan loꞌo taꞌa ntean.

FILIPENSES 1:11

Kaꞌan ꞌa chaꞌ suꞌwe ka kuꞌni wan nchga seꞌen ndiꞌin wan lo chalyuu chunꞌ Jesucristo, chaꞌ ngiꞌni Krixtu tñan niꞌ kasiya ꞌwan; kanꞌ chaꞌ ka kuꞌni tnun wan ꞌin Ndiose, bra nu tyuꞌwi tiꞌ wan chaꞌ tnun nu ngiꞌni Ni.

FILIPENSES 4:17

Loꞌo siꞌi nan nka tiyeěn chaꞌ kaja ska chaꞌ suꞌwe ꞌñaǎn, suꞌwe la nka tiyeěn ni siya kanun suꞌwe chaꞌ ꞌin Ndiose niꞌ kasiya ꞌwan.

COLOSENSES 1:10

Kanꞌ chaꞌ nchga tsan nu ndiꞌin wan lo chalyuu ka kuꞌni wan tñan, ti kwiꞌ tñan nu nchka tiꞌ Ndiose chaꞌ kuꞌni wan; ka kuꞌni wan nchga lo tñan nu suꞌwe chaꞌ ꞌin Ndiose bra kanꞌ, ka ka biyaꞌ la tiꞌ wan sa ñaꞌan ndiꞌin nchga chaꞌ ꞌin Ni.

COLOSENSES 1:22

chunꞌ chaꞌ nu mdijin tyukwi ñaꞌaan Krixtu Sñiꞌ Ni nu tiꞌí bra nu yjwi neꞌ ꞌin yu lo wsi. Ngwañaꞌan yꞌni Ni ti bra kanꞌ chaꞌ ka wan nten ꞌin Ndiose, chaꞌ nu ja tyiꞌin ꞌa yuweꞌ ꞌwan siyaꞌ ti. Kanꞌ chaꞌ ja tyiꞌin ꞌa kiꞌya ꞌwan tloo Ni, bra nu tyaan Ni tyaan yꞌya Ni ꞌñaan chaꞌ tsaa loꞌo Ni ꞌñaan nde seꞌen ndiꞌin Ni.

COLOSENSES 1:6

Wa ndijyan nganen la chaꞌ suꞌwe ꞌin Jesús kanꞌ tyukwi ñaꞌaan chalyuu, loꞌo ngwañaꞌan nchka suꞌwe kasiya ꞌin nten bra nu nganan neꞌ chaꞌ kanꞌ. Kwiꞌ ngwañaꞌan ngwa bra nu ynan wan chaꞌ kanꞌ ti kulo; ti bra kanꞌ ynan wan chaꞌ ngiꞌni ꞌa Ndiose chaꞌ suꞌwe loꞌo nten, bra kanꞌ ngwa biyaꞌ tiꞌ wan chaꞌ chañi ꞌa lka chaꞌ kanꞌ.

COLOSENSES 2:14

Wa yꞌni tyii Ni ꞌin yuweꞌ nu nganun chuanꞌ chaꞌ ꞌin kiꞌya nu ndiꞌin ꞌñaan. Ti ngwa sꞌni wa nganun yuweꞌ kanꞌ chuanꞌ, chaꞌ ndukwa nchga tñan nu ndiꞌin chaꞌ kuꞌnian chaꞌ ꞌin Ndiose lo kityi kula kanꞌ. Loꞌo ni, ti bra nu mjiꞌin kaꞌan neꞌ ꞌin Krixtu lo wsi, ti bra kanꞌ wa yꞌni tyii Ni kiꞌya kanꞌ ꞌñaan siyaꞌ ti.

COLOSENSES 2:20

ꞌWan ni, wa mxnun wan ꞌin xka la joꞌo nu ngwa xꞌnan wan nu ngwa sꞌni la, wa mxnun wan ꞌin nchga chaꞌ nu ndyaa ñaꞌan ꞌa tiꞌ nten chalyuu. Ti bra nu ngujwi Krixtu lo wsi chaꞌ kuꞌni tyii ꞌin nchga chaꞌ kuxi kanꞌ, ti bra kanꞌ wa mxnun wan chaꞌ kuxi kanꞌ. Ja ndiꞌin chaꞌ ti kuꞌni wan sa ñaꞌan nu ngiꞌni xka ta nten chalyuu; ja ndiꞌin chaꞌ tukwa wan xka ta tñan nu ndlo neꞌ ꞌwan,

HEBREOS 10:10

Yꞌni Jesucristo nchga tñan nu ngwa tiꞌ Ndiose Sti yu chaꞌ kuꞌni yu, chaꞌ mda yu tyukwi ñaꞌaan yu ꞌin Ni chaꞌ xtya neꞌ ꞌin yu lo wsi; ykwiꞌ yu ngwa yu lomstan ska yaꞌ ti, ti kwiꞌ lomstan nu ngwa tiꞌ Ndiose Sti yu chaꞌ ka yu bra kanꞌ. Kanꞌ chaꞌ wa nganun luwi kasiya ꞌñaan tloo Ndiose ni, wa mdyii nchga kiꞌya nu ndukwian.

1 SAN PEDRO 2:24

Ti kwiꞌ Krixtu ngwiꞌya yu nchga yuweꞌ nu ndiꞌin ꞌñaan. Ska yaꞌ ti mstya neꞌ ꞌin yu lo wsi chaꞌ kuꞌni tyii kiꞌya nu ndiꞌin ꞌñaan taꞌaan, chaꞌ tyoꞌo laan ꞌin chaꞌ kuxi. Kanꞌ chaꞌ ka tyiꞌian lo chalyuu ni chaꞌ ꞌin Krixtu, chaꞌ ngwañaꞌan xlyaan kuꞌnian nchga chaꞌ suꞌwe nu nchka tiꞌ Xꞌnaan chaꞌ kuꞌnian. Chunꞌ nu tiꞌí nu mdijin Krixtu, kanꞌ chaꞌ tyii nchga chaꞌ kuxi nu nsuꞌwi niꞌ kasiya ꞌñaan, sa ñaꞌan nu nchkaa ska seꞌen nu tiꞌí ꞌñaan.

EL APOCALIPSIS 19:7

kanꞌ chaꞌ suꞌwe ꞌa ka tiyean, xiꞌyaan chaꞌ nu ndiya ꞌa tianꞌ ni, suꞌwe ꞌa chkwianꞌ chaꞌ ꞌin Ndiose. Wa mdiya tsan chaꞌ kaja kwilyoꞌo nu nka ñaꞌan tiꞌ slyaꞌ kanꞌ, ti kwiꞌ Ni nu ngujwi lo wsi siꞌyaan. Loꞌo nan ni, taꞌaan msñian chaꞌ ꞌin Ni lo chalyuu, wa lkaan ñaꞌan tiꞌ si lkaan kwilyoꞌo Ni, ni siya sa tlyu ti tyiꞌian loꞌo Ni bra kanꞌ. Wa lkaan ngwa tkaanꞌ ñaꞌan tiꞌ si kaja kwilyoꞌoan loꞌo Ni ni, ndukwin neꞌ bra kanꞌ.

EL APOCALIPSIS 21:9

Loꞌo kanꞌ mdiyan ska angajle seꞌen ndiꞌiǐn bra kanꞌ; ti kwiꞌ taꞌa ndaꞌan loꞌo taꞌa kati angajle nu ndiꞌya kaꞌnan oro seꞌen nsuꞌwi kati kicha kanꞌ, kicha nu kan xa wa tyii ti chalyuu. Ykwiꞌ angajle kanꞌ loꞌoǔn bra kanꞌ: ―Kaan lyaa nde re chaꞌ kwaꞌuǔn ꞌiin sa ñaꞌan ka kichen tnun kanꞌ, ti kwiꞌ nu suꞌwe ꞌa ngwa tkanꞌ ñaꞌan tiꞌ ska kuxiin. Kanꞌ lka seꞌen tyaa wan tyiꞌin wan loꞌo nu lka ñaꞌan tiꞌ slyaꞌ kanꞌ, ñaꞌan tiꞌ si lka wan kwilyoꞌo Ni, taꞌa wan nu ndiꞌin chaꞌ ꞌwan loꞌo Ni bra kanꞌ.