ROMANOS 1:6 - Chatino Zona Alta Occidental

⁶ Loꞌo ꞌwan ni, wa ngulo suwi Ndiose ꞌwan chaꞌ ka wan nten ꞌin Jesucristo.

ROMANOS 1:6 ပူးပေါင်းရင်းမြစ်များ

ROMANOS 9:24

Nten ꞌin Ndiose lkaan; loꞌo suꞌwa ngulo suwi Ni ꞌñaan taꞌaan, ni siya lkaan neꞌ judío, ni siya lkaan neꞌ xka laꞌa tsuꞌ.

1 CORINTIOS 1:9

Ndiose ngiꞌni tñan, nchga tñan nu ndukwin Ni chaꞌ kuꞌni Ni; ti kwiꞌ Ni ngulo suwi Ni ꞌwan chaꞌ ka suꞌwa chaꞌ ꞌwan loꞌo Jesucristo nu nka Xꞌnaan, nu lka ska ti Sñiꞌ Ni.

GÁLATAS 1:6

Nduwe ꞌa tiǎnꞌ chaꞌ ndla ꞌa mdaꞌan chunꞌ wan chaꞌ ꞌin Ndiose, ni siya ngulo suwi Ni ꞌwan chaꞌ suꞌwe ꞌa nka tiye Krixtu ñaꞌan ꞌñaan; nduwe tiǎnꞌ chaꞌ ndaꞌan naan wan xka chaꞌ nu nchkwiꞌ nten chaꞌ ka kulaa ꞌñaan yaꞌ neꞌ xaꞌan, nu siꞌi chaꞌ ꞌin Ndiose.

EFESIOS 1:11

Nchga chaꞌ nu nchka lo chalyuu, nchka ran chunꞌ chaꞌ nchka tiꞌ Ndiose chaꞌ ka ran ngwañaꞌan. Kwiꞌ ngwañaꞌan nan ni, ti kulo ngulo suwi Ni ꞌñaan chaꞌ kaan nten ꞌin Ni, chaꞌ ka suꞌwa chaꞌ ꞌñaan loꞌo Krixtu, chaꞌ loꞌoan kaja nchga chaꞌ suꞌwe nu ta Ni ꞌñaan, chunꞌ chaꞌ ngwañaꞌan nchka tiꞌ Ndiose chaꞌ ka.

COLOSENSES 1:21

Nu ngwa sꞌni la, tijyuꞌ ꞌa mdaꞌan wan ꞌin Ndiose; taꞌa wsuun Ndiose ngwa wan bra kanꞌ siꞌya chaꞌ kuxi nu mdaꞌan chaꞌ tiye wan, siꞌya chaꞌ kuxi nu yꞌni wan. Loꞌo ni, wa yꞌni Ni chaꞌ katin kiꞌya nu ndukwi wan ꞌin Ndiose,

COLOSENSES 1:6

Wa ndijyan nganen la chaꞌ suꞌwe ꞌin Jesús kanꞌ tyukwi ñaꞌaan chalyuu, loꞌo ngwañaꞌan nchka suꞌwe kasiya ꞌin nten bra nu nganan neꞌ chaꞌ kanꞌ. Kwiꞌ ngwañaꞌan ngwa bra nu ynan wan chaꞌ kanꞌ ti kulo; ti bra kanꞌ ynan wan chaꞌ ngiꞌni ꞌa Ndiose chaꞌ suꞌwe loꞌo nten, bra kanꞌ ngwa biyaꞌ tiꞌ wan chaꞌ chañi ꞌa lka chaꞌ kanꞌ.

1 TESALONICENSES 2:12

Ndayaꞌ ba ꞌwan chaꞌ tyukwi ti tiye wan kuꞌni wan nchga chaꞌ suꞌwe nu nchka tiꞌ Ndiose chaꞌ kuꞌnian lo chalyuu, nan nu wa msñian chaꞌ ꞌin Ni. Wa ngulo suwi Ni ꞌwan chaꞌ tsaa wan la seꞌen tlyu seꞌen xaa ꞌa seꞌen nka Ni ndloo.

2 TESALONICENSES 2:14

Wa ngulo suwi Ni ꞌwan, kanꞌ chaꞌ ynan wan chaꞌ suꞌwe ꞌin Jesucristo nu ngwaꞌu ba ꞌwan; nchka tiꞌ Ni chaꞌ suꞌwa ti tyiꞌin wan loꞌo Jesucristo nu nka Xꞌnaan la seꞌen tlyu seꞌen ndukwa ykwiꞌ Ni, seꞌen nu xaa ꞌa.

2 TIMOTEO 1:9

chaꞌ kanꞌ lka nu ndlaa ꞌñaan; wa ngulo suwi Ni ꞌñaan chaꞌ kuꞌnian tñan nu nchka tiꞌ Ni chaꞌ ka lo chalyuu. Nxlyaa Ni kulaa Ni ꞌñaan chaꞌ suꞌwe ti nka tiye Ni, siꞌi chaꞌ suꞌwe nu ꞌñaan tian. Suꞌwe ꞌa nka tiye Ni ñaꞌan Ni ꞌñaan; kanꞌ lka chaꞌ nu nduꞌu Jesucristo ꞌñaan, chaꞌ nchka tiꞌ Ndiose kuꞌni chaꞌ suꞌwe loꞌoan bra nu ti ji kwiñan Ni chalyuu.

HEBREOS 3:1

ꞌWan taꞌa msñian chaꞌ ꞌin Krixtu, ꞌwan nu wa ngulo suwi Ndiose ꞌwan, tyaꞌan chaꞌ tiye wan sa ñaꞌan ndiꞌin chaꞌ ꞌin Jesucristo. Nan wa ngulo Ndiose Sti yu tñan ꞌin yu chaꞌ kan yu lo chalyuu re, loꞌo ni, lka Ni ñaꞌan tiꞌ xꞌnan sti joꞌo nu nduun loo la ꞌñaan, chaꞌ wa msñian chaꞌ ꞌin Ni.

1 SAN PEDRO 2:21

Ti bra nu ngulo suwi Ni ꞌwan, ti bra kanꞌ jlyo tiꞌ Ni chaꞌ ngwañaꞌan ta nten nu tiꞌí ꞌwan, sa ñaꞌan nu mda neꞌ nu tiꞌí ꞌin Krixtu ti kulo la chaꞌ ꞌwan. Kwiꞌ ngwañaꞌan yꞌni Krixtu, chaꞌ kwaꞌu Ni ꞌwan sa ñaꞌan ka talo wan bra nu ta neꞌ nu tiꞌí ꞌwan.

1 SAN PEDRO 2:9

ꞌWan ni, wa ngulo suwi Ndiose ꞌwan chaꞌ ka wan ska ta nten nu ngiꞌni tnun ꞌin Ni. Lka wan ñaꞌan tiꞌ ska ta sti joꞌo nu chaꞌ ꞌin Ndiose nu nka ndloo siyaꞌ ti; ñaꞌan tiꞌ ska ta nten luwi, ngwañaꞌan lka wan, chaꞌ ka kuꞌni tnun wan ꞌin Ndiose nchga tsan. Nchkwiꞌ Ni loꞌo wan: “Nten ꞌñaǎn lka wan” ndukwin Ni. Kanꞌ chaꞌ nchka ꞌa tiꞌ Ni chaꞌ chkwiꞌ wan loꞌo nchga nten nchga chaꞌ suꞌwe nu ngiꞌni Ndiose loꞌo wan; wa ngulaa Ni ꞌwan ꞌin chalyuu kuxi seꞌen tla ꞌa, chaꞌ kaja chalyuu kwi ꞌwan nu xaa ꞌa chaꞌ ꞌin Ndiose.

2 SAN PEDRO 1:10

Kanꞌ chaꞌ ti kuꞌni la wan nchga chaꞌ suꞌwe kanꞌ, sa ñaꞌan chaꞌ ngwaꞌaǎn lo kityi ti kulo; kwiꞌ ngwañaꞌan, tyuꞌwi la tiꞌ wan chaꞌ wa ngulo suwi Ndiose ꞌwan, chaꞌ ka wan nten ꞌin Ni. Loꞌo bra kanꞌ ja ndiꞌin chaꞌ kanaꞌ kasiya ꞌwan, si ngwañaꞌan kuꞌni wan nchga lo chaꞌ suꞌwe kanꞌ.

SAN JUDAS 1:1

Juda naǎn, ti kwiꞌ taꞌa Santiago lkaǎn; ndaꞌaǎn lo tñan ꞌin Jesucristo. Ndaꞌaǎn kityi re chaꞌ tsaa seꞌen ndiꞌin nchga wan nu ndyaa ñaꞌan tiꞌ wan chaꞌ nchkwiꞌ Ndiose Stian, chunꞌ wa ngulo suwi Ni ꞌwan. Ndiose lka nu yꞌni luwi kasiya ꞌwan, loꞌo ñaꞌan ti ngiꞌni Ni kwenta ꞌwan ni, chabiyaꞌ ꞌin Jesucristo.

EL APOCALIPSIS 17:14

Xkwiꞌ xuun neꞌ loꞌo Ndiose, xuun neꞌ loꞌo nu lka ñaꞌan tiꞌ slyaꞌ kanꞌ; loꞌo nu lka ñaꞌan tiꞌ slyaꞌ kanꞌ tyijin lyo Ni ꞌin ꞌni kanꞌ, ti kwiꞌ ti tyijin lyo Ni ꞌin nten nu ndaꞌan loꞌo iꞌ, chaꞌ Ndiose lka Xꞌnan nchga nten chalyuu, Ndiose lka ndloo la ꞌin nchga nten nu nka ndloo lo chalyuu. Loꞌo ngwañaꞌan, nu lka nten ꞌin Ndiose ni, wa ngulo suwi Ni ꞌin neꞌ kanꞌ; nan wa ngulo Ni tñan ꞌin neꞌ kanꞌ, loꞌo suꞌwe ꞌa ndyaa ñaꞌan tiꞌ neꞌ chaꞌ ꞌin Ndiose ―ndukwin angajle ꞌñaǎn.