HEBREOS 3:14 - Chatino Zona Alta Occidental

¹⁴ Taꞌaan, ti ndiꞌin chaꞌ ꞌñaan loꞌo Krixtu xa nu ti nxñiin suꞌwean chaꞌ ꞌin Ni sa ñaꞌan bra nsuꞌwian chalyuu, ti kwiꞌ sa ñaꞌan nu ndyaa ñaꞌan tianꞌ ꞌin Ni nu ngwa ti kulo.

HEBREOS 3:14 ပူးပေါင်းရင်းမြစ်များ

ROMANOS 11:17

Wa lka neꞌ judío sa ñaꞌan lka ska yka nu ndyoꞌo mta nu xi nchku, ñaꞌan tiꞌ ska yka olivo ni. Wa msiꞌyu Ndiose tyun stanꞌ yka olivo kanꞌ, mxkwan Ni ꞌin ran bra kanꞌ; loꞌo ni, ti kwiꞌ seꞌen msiꞌyu loo yka kanꞌ, nde kwa mskanꞌ kaꞌan Ni tyun la stanꞌ yka nu nsuꞌwi niꞌ kixinꞌ, chaꞌ xñi kaꞌan stanꞌ yka kixinꞌ kanꞌ ꞌin yka nu nda mta nu xi nchku. Sa ñaꞌan lka stanꞌ yka nu nsuꞌwi niꞌ kixinꞌ kanꞌ, ngwañaꞌan lka wan, neꞌ xka laꞌa tsuꞌ, chaꞌ wa mjwi ꞌwan nchga chaꞌ suꞌwe, sa ñaꞌan chaꞌ suꞌwe nu wa mda Ndiose ꞌin neꞌ judío. Lka wan loꞌo neꞌ judío sa ñaꞌan lka tukwa yka nu ska ti suun loꞌo ska ti siꞌye, ngwañaꞌan lka wan loꞌo neꞌ kanꞌ.

ROMANOS 11:22

Kiꞌya wan kwenta sikwa, chaꞌ ka ꞌin Ndiose kuꞌni suꞌwe Ni loꞌo nten, kwiꞌ ngwañaꞌan xka la tyempu ngiꞌni tlá Ni ꞌin nten, si ngwañaꞌan nchka tiꞌ Ni. Lye ꞌa yꞌni tlá Ni ꞌin neꞌ kanꞌ, chunꞌ nu ja ynan ꞌa neꞌ chaꞌ nu nchkwiꞌ Ni; kwiꞌ ngwañaꞌan, suꞌwe ti kuꞌni Ni loꞌo wan, si ñaꞌan ti kunan wan chaꞌ nu nchkwiꞌ ti kwiꞌ Ndiose Sti wan nu ngiꞌni ꞌa chaꞌ suꞌwe loꞌo wan. Loꞌo si ja kunan wan chaꞌ nchkwiꞌ Ni, kwiꞌ ngwañaꞌan kulaa yaꞌ Ni ꞌwan bra kanꞌ.

1 CORINTIOS 1:30

Nde lka chaꞌ sikwa: Wa ykwiꞌ Ndiose chaꞌ ka suꞌwa chaꞌ ꞌñaan loꞌo Jesucristo, bra nu msuꞌwa Ni ꞌin Jesucristo chaꞌ yan Ni lo chalyuu. Ni siya ja ska chaꞌ nchka ꞌñaan, loꞌo Jesucristo ni, nchga chaꞌ nchka ꞌin Ni siyaꞌ ti. Chunꞌ tñan nu yꞌni Krixtu nchka suꞌwe kasiya ꞌñaan, ni siya ti kulo ngwaan nten nu kuxi ꞌa tloo Ndiose; chunꞌ tñan nu yꞌni Krixtu kaan nten ꞌin Ndiose, chaꞌ Krixtu lka nu kulaa ꞌñaan ꞌin nchga chaꞌ xaꞌan.

1 CORINTIOS 10:17

Ska ti jaxlya ndukwa lo msaa seꞌen nchkuan suꞌwa ti; bra nu ndyuꞌwe jaxlya kanꞌ, bra kanꞌ taꞌaan ndyiji nan kuan, ni siya tyuan lkaan. Sa tlyu ti ndiꞌian chaꞌ lkaan nten ꞌin Jesús bra kanꞌ.

1 CORINTIOS 9:23

Ngwañaꞌan ngiꞌniǐn nchga seꞌen ndaꞌaǎn, chaꞌ nchkwiǐnꞌ loꞌo nten chaꞌ suꞌwe ꞌin Jesús. Nchka tiǎnꞌ chaꞌ sa ñaꞌan nchka suꞌwe niꞌ kasiya ꞌñaǎn xa wa ynaǎn chaꞌ kanꞌ, kwiꞌ ngwañaꞌan ka suꞌwe niꞌ kasiya ꞌin nchga nten.

EFESIOS 3:6

Ja ya kunan nten chalyuu chaꞌ nu wa ytsaꞌ Ni ꞌñaǎn. Nde ñaꞌan ndyoꞌo chaꞌ kanꞌ: Nten nu ja lka neꞌ judío ni, ka neꞌ kanꞌ ti kwiꞌ sa ñaꞌan lka neꞌ judío nu ndiꞌin chaꞌ ꞌin loꞌo Ndiose, bra nu ka biyaꞌ tiꞌ neꞌ chaꞌ ꞌin Krixtu; si xñi neꞌ kanꞌ chaꞌ ꞌin Jesucristo, loꞌo neꞌ kanꞌ ka suꞌwe kasiya ꞌin neꞌ tloo Ndiose bra kanꞌ. Ka suꞌwa chaꞌ ꞌin taꞌa tyukwaa ta nten bra kanꞌ, bra nu xñi neꞌ sa tlyu ti chaꞌ ꞌin Krixtu. Loꞌo nten nu ja lka neꞌ judío, kaja nchga chaꞌ nu wa ykwiꞌ Ndiose chaꞌ kaja ꞌin neꞌ loꞌo Jesucristo.

1 TIMOTEO 6:2

ꞌWan nu lka wan msu nu wa msiꞌi nten, si nu lka taꞌa nten ꞌin Jesucristo nu wa msiꞌi ꞌwan sꞌni, ja suꞌwe si kuꞌni siyeꞌ wan ꞌin xꞌnan wan, chaꞌ ska ti chaꞌ ndiꞌin ꞌwan loꞌo xꞌnan wan ni chabiyaꞌ ꞌin Jesucristo; ndiꞌin chaꞌ lye la kuꞌni tlyu wan ꞌin xꞌnan wan ni, chaꞌ lka wan msu ꞌin neꞌ, suꞌwe la kuꞌni wan tñan ꞌin xꞌnan wan, chaꞌ taꞌa msñi wan chaꞌ ꞌin Jesús lka neꞌ ni, kwiꞌ ngwañaꞌan suꞌwe la ka tiye wan ñaꞌan wan ꞌin taꞌa wan ni. Suꞌwa ti msñi neꞌ kanꞌ chaꞌ ꞌin Jesucristo loꞌo wan. Kanꞌ chaꞌ ni, Timu, kwaꞌuu chaꞌ re ꞌin neꞌ, kwiꞌ ngwañaꞌan, kuloo tñan ꞌin neꞌ chaꞌ kuꞌni neꞌ nchga loo tñan nu ngwaꞌaǎn lo kityi re.

HEBREOS 11:1

Bra nu chañi chaꞌ ndyaa ñaꞌan tianꞌ ska chaꞌ, bra kanꞌ ndiꞌin taan chaꞌ chañi ka chaꞌ kanꞌ, kwiꞌ ngwañaꞌan jlyo tianꞌ chaꞌ ka chaꞌ kanꞌ ꞌñaan, ni siya ti ji ñaꞌaan ꞌin ran.

HEBREOS 12:10

Wa lka ti bra nu nda stian nu tiꞌí ꞌñaan lo chalyuu re, sa ñaꞌan nu suꞌwe chaꞌ ꞌñaan skaan ngiꞌni neꞌ kula kanꞌ, chaꞌ kuꞌniin xaꞌaan, nka tiye neꞌ kula ꞌñaan; ti kwiꞌ ti chaꞌ, nchka tiꞌ Ndiose chaꞌ ka suꞌwe chaꞌ ꞌñaan, kanꞌ chaꞌ nda Ni nu tiꞌí ꞌñaan ngwañaꞌan. Xa wa ngutin kiꞌya nu ndukwian, ka suꞌwa chaꞌ ꞌñaan loꞌo Ndiose Stian, nu ja nsuꞌwi chaꞌ kuxi ꞌin siyaꞌ ti bra kanꞌ.

HEBREOS 3:1

ꞌWan taꞌa msñian chaꞌ ꞌin Krixtu, ꞌwan nu wa ngulo suwi Ndiose ꞌwan, tyaꞌan chaꞌ tiye wan sa ñaꞌan ndiꞌin chaꞌ ꞌin Jesucristo. Nan wa ngulo Ndiose Sti yu tñan ꞌin yu chaꞌ kan yu lo chalyuu re, loꞌo ni, lka Ni ñaꞌan tiꞌ xꞌnan sti joꞌo nu nduun loo la ꞌñaan, chaꞌ wa msñian chaꞌ ꞌin Ni.

HEBREOS 3:6

Loꞌo Krixtu ni, suꞌwe la ti tñan nu yꞌni yu, chunꞌ lka yu Sñiꞌ ykwiꞌ Ndiose, lka yu ndloo ꞌin nchga nten nu ndiꞌin chaꞌ ꞌin Ni. Loꞌo nan, ti kwiꞌ nten ꞌin Ndiose lkaan, xa nu ja ntsean ꞌaan tyukwi tyempu nu nsuꞌwian chalyuu, bra nu ti ndyaa ñaꞌan suꞌween tianꞌ ꞌin Ni chaꞌ ndiꞌin taan ꞌin Krixtu chaꞌ kulaa ji Ni ꞌñaan.

HEBREOS 6:11

Loꞌo nchka tiꞌ ba chaꞌ ti kuꞌni wan ngwañaꞌan tyukwi tyempu nde loo la, laja nu ndiꞌin ta wan ꞌin Ndiose sa ñaꞌan bra nu tsaa toꞌo nchga chaꞌ nu wa ykwiꞌ Ni loꞌoan bra kanꞌ.

HEBREOS 6:4

Ja kaja ñaꞌan kuꞌnian loꞌo nten nu mdoꞌo ntan ꞌin chaꞌ kanꞌ siyaꞌ ti. Wa jlyo tiꞌ neꞌ kanꞌ sa ñaꞌan ngwa bra wa yten xaa ꞌin Ndiose niꞌ kasiya ꞌin neꞌ. Kwiꞌ ngwañaꞌan, wa jlyo tiꞌ neꞌ kanꞌ chaꞌ suꞌwe ꞌa nchga chaꞌ nu nda Ndiose ꞌin neꞌ. Loꞌo neꞌ kanꞌ, wa yꞌni Tyiꞌi Ndiose tñan niꞌ kasiya ꞌin neꞌ.

1 SAN PEDRO 4:13

Tyaa yuꞌwi tiꞌ wan sa ñaꞌan nu tiꞌí tiꞌ nten ꞌin Krixtu, loꞌo bra kanꞌ ka suꞌwe tiye wan chaꞌ ngwañaꞌan tiꞌí tiꞌ nten ꞌwan ni. Tnun ꞌa nchka Krixtu kwenta ꞌin Ndiose, loꞌo lye ꞌa xuꞌwi xaa ꞌin Ni bra nu kan Krixtu xiyaꞌ chunꞌ ndiꞌin la; bra kanꞌ ka suꞌwe la tiye wan.

1 SAN PEDRO 5:1

Ska yu kula nu nka ndloo lkaǎn, loꞌo ni, nchka tiǎnꞌ chkwiǐnꞌ ska chaꞌ loꞌo wan yu kula taꞌaan. Loꞌoǔn, wa naꞌaǎn ꞌin Krixtu bra nu mda neꞌ nu tiꞌí ꞌin yu, kanꞌ chaꞌ jlyo tiǎnꞌ chaꞌ suꞌwa ti tyiꞌian taꞌaan nde seꞌen ndiꞌin Ndiose, chaꞌ ñaꞌaan chaꞌ tnun nu ka nde kwa bra kanꞌ.

1 SAN JUAN 1:3

Loꞌo ni, kwaꞌu ba ꞌwan nchga chaꞌ nu wa naꞌan ba, kwaꞌu ba nchga chaꞌ nu wa ynan ba. Chañi lka chaꞌ suꞌwa ti ka kasiya ꞌñaan loꞌo Ndiose Stian, ngwañaꞌan loꞌo Jesucristo ska ti nu lka Sñiꞌ ykwiꞌ Ni. Loꞌo ni, nchka tiꞌ ba chaꞌ suꞌwa ti ka tiye wan loꞌo ba;