HEBREOS 11:16 - Chatino Zona Alta Occidental

¹⁶ Loꞌo siꞌi ngwañaꞌan mdaꞌan chaꞌ tiye neꞌ, chaꞌ nu yaa ñaꞌan tiꞌ neꞌ chaꞌ ta Ndiose ska seꞌen suꞌwe la siyaꞌ ti seꞌen tyiꞌin neꞌ; ngwa tiꞌ neꞌ kanꞌ kala neꞌ ti kwiꞌ seꞌen ndiꞌin Ndiose. Kanꞌ chaꞌ ja njyuꞌu tiꞌ Ni chaꞌ nchkwiꞌ neꞌ chaꞌ Ndiose nka Xꞌnan neꞌ; nan wa yꞌni xuꞌwe Ni ska seꞌen tyiꞌin neꞌ nde seꞌen ndiꞌin Ni.

HEBREOS 11:16 ပူးပေါင်းရင်းမြစ်များ

SAN MATEO 25:34

Bra nu kaǎn ndloǔn la ti, chkwiǐnꞌ loꞌo nchga nten nu ndiꞌin laꞌa seꞌen kwin ꞌñaǎn: “Kan wan nde seꞌen ndiꞌin Ndiose nu lka ndloo la ti, nchga wan nu suꞌwe ꞌa nka tiye Stiǐn Ndiose ñaꞌan Ni ꞌwan, chaꞌ wa yꞌni xuꞌwe Ni seꞌen tyiꞌin wan seꞌen ndiꞌin ykwiꞌ Ni, ti bra nu mñan Ni chalyuu.

SAN MARCOS 12:26

¿Ta ja ya tsaa ñaꞌan tiꞌ wan chaꞌ tyuꞌu ayman xiyaꞌ a? ¿Ta ja ya chkwiꞌ wan lo kityi nu ngwaꞌan ayman Moisés nu ngwa sꞌni a? Suꞌwe la si chkwiꞌ wan lo kityi kanꞌ sa ñaꞌan ndukwa chaꞌ ꞌin yka kicheꞌ kanꞌ, seꞌen nu ykwiꞌ Ndiose loꞌo Moisés: “Ndiose Xꞌnan Abraham lkaǎn” ndukwin Ni ꞌin Moisés, “kwiꞌ Ndiose Xꞌnan Isaac lkaǎn, kwiꞌ Ndiose Xꞌnan Jacob lkaǎn” ndukwin Ni.

SAN MARCOS 8:38

Naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten, ka jyuꞌu tiǎnꞌ bra nu ñaꞌaǎn ꞌin ska nten chalyuu nu jyuꞌu tiꞌ ꞌñaǎn, ni siya jyuꞌu tiꞌ yu ꞌin chaꞌ suꞌwe nu nchkwiǐnꞌ. Chaꞌ nchka jyuꞌu tiꞌ neꞌ kanꞌ ꞌñaǎn tloo neꞌ xaꞌan lo chalyuu ni, tloo neꞌ nu chen ñaꞌan ngiꞌni lo chalyuu re, loꞌo naꞌ, ka jyuꞌu tiǎnꞌ ꞌin neꞌ kanꞌ bra nu kaǎn lo chalyuu xiyaꞌ nde loo la. Lye ꞌa ñaꞌan xaa bra nu kaǎn xiyaꞌ chabiyaꞌ ꞌin Stiǐn. Kaǎn loꞌo angajle nu kti ꞌa tiꞌ, chaꞌ luwi siyaꞌ ti angajle kanꞌ ―ndukwin Jesús ꞌin neꞌ.

SAN LUCAS 12:32

’Ja kutsen wan. Nten ꞌñaǎn lka wan, ni siya chinꞌ ti neꞌ taꞌa wan nu lka wan nten ꞌin Ndiose; wa mjwi chalyuu suꞌwe ꞌwan chaꞌ Ndiose Stiǐn lka ndloo la ꞌwan, chaꞌ ngwañaꞌan nchka tiꞌ Ni.

SAN LUCAS 20:37

Ayman Moisés ytsaꞌ ꞌñaan chaꞌ chañi chaꞌ tyuꞌu nchga ayman xiyaꞌ. Lo kityi kanꞌ ngwaꞌan Moisés sa ñaꞌan ngwa la nu naꞌan yu yka xuwe ti, seꞌen nu mdyituun kiiꞌ tyukwi ñaꞌaan lo yka kanꞌ, loꞌo ja nchkin ran. Bra kanꞌ ynen ykwiꞌ Ndiose laja kiiꞌ kanꞌ, ndukwin Ni chaꞌ Xꞌnan ayman Abraham lka Ni, Xꞌnan ayman Isaac lka Ni, Xꞌnan ayman Jacob lka Ni. Ngwañaꞌan ndukwin Ndiose laja kiiꞌ kanꞌ, chaꞌ nten taꞌaan nu mdiꞌin lo chalyuu nu ngwa sꞌni ngwa ayman kanꞌ.

SAN JUAN 14:2

Kaꞌan ꞌa seꞌen suꞌwe ndiya seꞌen ndiꞌin Ndiose Stiǐn. Tlyu naꞌan ndiya seꞌen tyiꞌin wan nde kwa. Tsaꞌaǎn la kanꞌ chaꞌ kuꞌniǐn xuꞌweěn seꞌen tyiꞌin wan. Ja chkwiǐnꞌ loꞌo wan ngwañaꞌan, si siꞌi chaꞌ nu ñi nchkwiǐnꞌ loꞌo wan ―ndukwin Jesús―.

LOS HECHOS 7:32

“Ndiose lkaǎn” ndukwin Xꞌnaan. “Ti kwiǐnꞌ lkaǎn. Ayman kula ꞌiin yꞌni tnun neꞌ ꞌñaǎn nu ngwa sꞌni” ndukwin Ndiose ꞌin yu. “Loꞌo ayman Abraham, loꞌo ayman Isaac, loꞌo ayman Jacob yꞌni tnun neꞌ ꞌñaǎn.” Ytsen ꞌa Moisés bra kanꞌ, mchkwan ti yu ndiꞌin yu; ja ngwa ñaꞌan kwiꞌya yu kiiꞌ kanꞌ siyaꞌ ti.

FILIPENSES 3:20

Nan ni, nde seꞌen ndiꞌin Ndiose siyaꞌ ti, nde kwa ndiꞌin kichen tyian nu chañi ka. Loꞌo ni, suꞌwe ꞌa nka tiyean ndiꞌin taan ꞌin Xꞌnaan Jesucristo, ñaꞌan bra tyoꞌo Ni niꞌ kwan kwiꞌ seꞌen nu ka kichen tyian, chaꞌ kan yꞌya Ni ꞌñaan lo chalyuu, chaꞌ kulaa ji Ni ꞌñaan.

2 TIMOTEO 4:18

Kwiꞌ ngwañaꞌan, ti kulaa la Ni ꞌñaǎn ꞌin nchga loo chaꞌ kuxi nu tyukwaǎn; jlyo tiǎnꞌ chaꞌ ñaꞌan ti ti xñi la Ni kwenta ꞌñaǎn, chaꞌ suꞌwe ti kalaǎn la seꞌen ndlo Ndiose tñan. Loꞌo ja tyii ꞌa tsan nu kuꞌniǐn tnuǔn ꞌin Ndiose la kanꞌ. Kwiꞌ ngwañaꞌan ka sikwa.

HEBREOS 10:34

Kwiꞌ ngwañaꞌan, ndyaa naꞌan wan ꞌin neꞌ taꞌa wan bra nu yuꞌwi neꞌ niꞌ ñaꞌan chkwan, suꞌwe ꞌa mdayaꞌ wan ꞌin neꞌ kanꞌ bra kanꞌ. Ni siya yꞌni nten kunan nchga chaꞌ suꞌwe nu mdiꞌin ꞌwan, mdalo wan bra kanꞌ. Suꞌwe ꞌa ngwa tiye wan, chaꞌ wa jlyo tiꞌ wan chaꞌ suꞌwe la siyaꞌ ti chaꞌ ꞌin Jesús nu wa msñi wan kanꞌ; jlyo tiꞌ wan chaꞌ ja tsaa tii ꞌa chaꞌ kanꞌ, ti kwiꞌ chaꞌ nu wa ynan wan ꞌin Jesús.

HEBREOS 11:10

Yaa ñaꞌan tiꞌ Abraham chaꞌ nde loo la kuꞌni xuꞌwe Ndiose xka seꞌen suꞌwe la seꞌen tyiꞌin yu, nu ja tsaa tii ꞌa siyaꞌ ti ꞌin yu; kwiñan Ndiose ñaꞌaan kichen la kanꞌ.

HEBREOS 11:14

Yaa ñaꞌan tiꞌ neꞌ chaꞌ nsuꞌwi ska seꞌen suꞌwe la seꞌen kala neꞌ chunꞌ ndiꞌin la, kanꞌ chaꞌ ngwa tiye neꞌ ngwañaꞌan.

HEBREOS 11:40

Suꞌwe la chaꞌ nu mdaꞌan tiye ykwiꞌ Ni chaꞌ kuꞌni Ni loꞌo taꞌaan ni, chaꞌ loꞌo chaꞌ ꞌñaan mdaꞌan chaꞌ tiye Ni. Ngwa tiꞌ Ni chaꞌ kaan nten nu tyukwi ti tiye suꞌwa ti loꞌo neꞌ kanꞌ. Taꞌaan loꞌo ayman kula kanꞌ ꞌñaan, kaan sa ñaꞌan nu ngwa tiꞌ Ni chaꞌ kaan bra kanꞌ.

HEBREOS 12:22

Loꞌo siꞌi ngwañaꞌan nchka ꞌwan ni, chaꞌ xka chalyuu kwi tsaa wan ni, ti kwiꞌ seꞌen ndiꞌin Ndiose ykwiꞌ nde niꞌ kwan. La kanꞌ ndiꞌin Ndiose loꞌo tyun ꞌa mi angajle ꞌin Ni. Suꞌwe ꞌa ñaꞌan la kanꞌ; ñaꞌan tiꞌ si wa ndukwa xka kiꞌya Sión nde niꞌ kwan, ñaꞌan tiꞌ si nde kwa nskwa xka kichen Jerusalén nu suꞌwe la ñaꞌan, ngwañaꞌan lka la kanꞌ.

HEBREOS 13:14

Lo chalyuu re ja ndiya seꞌen suꞌwe seꞌen kanuan; xkwiꞌ nan ndiꞌiin taan ñaꞌan bra nu tyaan la xka seꞌen nu suꞌwe la ti, seꞌen tsaan xa wa mdyii chalyuu re.

HEBREOS 2:11

Wa msuwi Jesús kasiya ꞌin nten chalyuu, kanꞌ chaꞌ Ndiose lka Stian ni; loꞌo taꞌaan nu ngwa luwi kasiya ꞌñaan chunꞌ Jesús, ska ti Stian loꞌo Jesús, chaꞌ Ndiose lka Stian ni. Loꞌo ngwañaꞌan, ja njyuꞌu ꞌa tiꞌ Jesús chkwiꞌ Ni chaꞌ lka Ni taꞌaan.

EL APOCALIPSIS 21:2

Ti kwiꞌ Xuwa lkaǎn, naꞌ lkaǎn nu naꞌaǎn xka kichen Jerusalén nu kwi. Luwi ꞌa ñaꞌan kichen kwi kanꞌ ni; nde seꞌen ndiꞌin Ndiose mdoꞌo kichen kanꞌ, mbiꞌya lo chalyuu kwi. Ñaꞌaan kichen wa suꞌwe ꞌa ngwa tkanꞌ; suꞌwe ꞌa ñaꞌan ran, xaa ꞌa ran bra kanꞌ. Ñaꞌan tiꞌ ska kuxiin ꞌin nten, nu suꞌwe ꞌa ñaꞌan steꞌ, suꞌwe ꞌa nchka tkanꞌ, ngwañaꞌan suꞌwe ꞌa ñaꞌan kichen kwi kanꞌ bra kanꞌ.