HEBREOS 10:32 - Chatino Zona Alta Occidental

³² Tyaa yuꞌwi tiꞌ wan sikwa, sa ñaꞌan ngwa wan nu ngwa sꞌni, bra nu tka yten xaa ꞌin Ndiose ke wan chaꞌ kunan suꞌwe wan chaꞌ ꞌin Ni bra kanꞌ. Kaꞌan ꞌa nu tiꞌí wa mdijin wan lo chalyuu bra kanꞌ. Loꞌo mdalo ꞌa wan bra kanꞌ, ja ngwa ꞌin neꞌ kuxi tyijin lyo ꞌwan bra kanꞌ.

HEBREOS 10:32 ပူးပေါင်းရင်းမြစ်များ

LOS HECHOS 26:18

chunꞌ ñaꞌan tiꞌ nten nu kwityiinꞌ, ngwañaꞌan ndiꞌin neꞌ kanꞌ lo chalyuu; ñaꞌan tiꞌ si xkwiꞌ tla ꞌa seꞌen ndiꞌin neꞌ, ngwañaꞌan ngiꞌni neꞌ kanꞌ chaꞌ xaꞌan. Kanꞌ chaꞌ ndiꞌin chaꞌ kwaꞌuu chaꞌ ꞌñaǎn ꞌin neꞌ kanꞌ, chaꞌ sten neꞌ chaꞌ ꞌñaǎn. Ja tyiꞌin ꞌa neꞌ seꞌen tla bra kanꞌ, sa ñaꞌan lka si kwityiinꞌ neꞌ; ka tyaꞌan neꞌ tuwiin ꞌin Ndiose seꞌen nu xaa ꞌa, ka biyaꞌ tiꞌ neꞌ nchga chaꞌ ꞌin Ni bra kanꞌ. Satanás lka nu ndlo tñan ꞌin neꞌ kanꞌ ni, loꞌo chunꞌ ndiꞌin la ka neꞌ kanꞌ nten ꞌin Ndiose. Ndiꞌin chaꞌ sten neꞌ kanꞌ chaꞌ ꞌñaǎn, chaꞌ ka kuꞌni Ndiose chaꞌ tlyu tiꞌ ꞌin neꞌ ꞌin chaꞌ kuxi nu ndiꞌin ꞌin neꞌ kanꞌ. Bra kanꞌ ka suꞌwa chaꞌ ꞌin neꞌ kanꞌ loꞌo nchga nten nu ka luwi kasiya ꞌin neꞌ chunꞌ ngujwiǐn lo wsi” ndukwin Jesús kanꞌ ꞌñaǎn.

ROMANOS 12:12

Kuꞌni wan chaꞌ suꞌwe ꞌa ka tiye wan xa nu ndiꞌin ta wan ꞌin Ndiose chaꞌ kan Ni xiyaꞌ, chaꞌ kulaa ji Ni ꞌwan. Ja xiꞌin chunꞌ wan chaꞌ kanꞌ, ni siya lye ꞌa ta neꞌ nu tiꞌí ꞌwan seꞌen ndiꞌin wan lo chalyuu. Nchga tsan chkwiꞌ wan loꞌo Ndiose Stian; ja kulaa yaꞌ wan chaꞌ nchkwiꞌ wan loꞌo Ni.

2 CORINTIOS 4:6

Ti kwiꞌ Ndiose lka nu msuꞌwa xaa luwi ꞌin Ni nu nganun niꞌ kasiya ꞌñaan; kanꞌ chaꞌ ka biyaꞌ tianꞌ nchga chaꞌ tnun nu suꞌwe ꞌa nu nsuꞌwi seꞌen ndiꞌin Ni, ti kwiꞌ ti chaꞌ ndii tianꞌ chaꞌ ngiꞌni Ni tñan niꞌ kasiya ꞌñaan bra nu stean chaꞌ ꞌin Krixtu. Ti kwiꞌ Ndiose lka nu ngulo tñan chaꞌ xuꞌwi xaa la seꞌen ngwa chalyuu tla nu ngwa ti sꞌni.

FILIPENSES 3:16

Suꞌwe sikwa, ti kuꞌniin laan ti kwiꞌ taꞌa chaꞌ, sa ñaꞌan nu ngwa biyaꞌ suꞌwe tianꞌ ti kulo.

COLOSENSES 2:1

Chkwiǐnꞌ ska chaꞌ loꞌo wan ni, chaꞌ ka biyaꞌ tiꞌ wan chaꞌ lye ꞌa ngiꞌniǐn tñan chaꞌ ꞌwan, loꞌo chaꞌ ꞌin neꞌ kichen Laodicea, loꞌo chaꞌ ꞌin tyun ꞌa nten, ni siya ti ji xuꞌwi lyo neꞌ ꞌñaǎn.

HEBREOS 12:4

Ni siya lye ꞌa nxuun wan loꞌo nchga chaꞌ kuxi, ja ya kujwi neꞌ ꞌin ska wan chaꞌ ꞌin Jesús.

HEBREOS 5:12

Wa sꞌni ꞌa ynan wan chaꞌ ꞌin Krixtu ti kulo; loꞌo wa mdijin ꞌa tyempu ni. Ja chan wa lka wan mstru chaꞌ ꞌin Krixtu ni, loꞌo ngwa ti ñaꞌan ndiꞌin wan. Ti ndiꞌin chaꞌ kwaꞌu la neꞌ ꞌwan xiyaꞌ sa ñaꞌan ndiꞌin kiyaꞌ chaꞌ ꞌin Ndiose, ti kwiꞌ chaꞌ nu ngwa tiꞌ Ni katsaꞌ Ni ꞌin nten chalyuu nu ngwa ti kulo. Sa ñaꞌan nu ngiꞌni ska kuwiꞌ nu ti ngatiꞌ, nu ja ya ku tyaja, kwiꞌ ngwañaꞌan ngiꞌni wan, chaꞌ ja nchka ꞌa kuꞌni xaꞌan wan chaꞌ ꞌin Ndiose.

HEBREOS 6:10

Loꞌo ngwañaꞌan, ñi ꞌa chaꞌ ngiꞌni Ndiose loꞌo nten chalyuu. Ja kjlyaa ꞌa tiꞌ Ni nchga chaꞌ suꞌwe nu wa yꞌni wan, chaꞌ ndayaꞌ ꞌa wan ꞌin neꞌ taꞌa msñian chaꞌ ꞌin Jesús; wa kaꞌan ꞌa tñan yꞌni wan chaꞌ ꞌin neꞌ kanꞌ. Chaꞌ nu wa yꞌni wan ngwañaꞌan, kanꞌ chaꞌ jlyo tiꞌ xka ta nten chaꞌ suꞌwe ꞌa nka tiye wan loꞌo Jesús, loꞌo ti ngiꞌni wan chaꞌ suꞌwe loꞌo neꞌ.

HEBREOS 6:4

Ja kaja ñaꞌan kuꞌnian loꞌo nten nu mdoꞌo ntan ꞌin chaꞌ kanꞌ siyaꞌ ti. Wa jlyo tiꞌ neꞌ kanꞌ sa ñaꞌan ngwa bra wa yten xaa ꞌin Ndiose niꞌ kasiya ꞌin neꞌ. Kwiꞌ ngwañaꞌan, wa jlyo tiꞌ neꞌ kanꞌ chaꞌ suꞌwe ꞌa nchga chaꞌ nu nda Ndiose ꞌin neꞌ. Loꞌo neꞌ kanꞌ, wa yꞌni Tyiꞌi Ndiose tñan niꞌ kasiya ꞌin neꞌ.

2 SAN JUAN 1:8

Kanꞌ chaꞌ, chaꞌ tiya ti tiꞌ tyiꞌin wan lo chalyuu, chaꞌ ja kjlyaa tiꞌ wan ngwa ti ñaꞌan nchga chaꞌ nu wa ynan wan bra nu mdiꞌin ba seꞌen ndiꞌin wan. Bra kanꞌ kaja nchga chaꞌ suꞌwe nu nchka tiꞌ Ndiose ta Ni ꞌwan bra nu tyii chalyuu.

EL APOCALIPSIS 2:5

Kanꞌ chaꞌ ni, tyaa yuꞌwi lya tiꞌ wan sa ñaꞌan nu yꞌni wan bra nu msñi wan chaꞌ ꞌñaǎn ti kulo, bra nu suꞌwe ꞌa ngwa tiye wan loꞌoǔn; loꞌo ni, ti kuꞌni wan ti kwiꞌ chaꞌ suꞌwe kanꞌ xiyaꞌ. Loꞌo si ja kulaa yaꞌ wan chaꞌ kuxi nu ndiꞌin ꞌwan ni, kaǎn chaꞌ kuloǔn ꞌin kandlyeru ꞌwan nde seꞌen ndukwa ran bra kanꞌ, tyaꞌaǎn loꞌoǔn ꞌin ran bra kanꞌ” ndukwin Ni.

EL APOCALIPSIS 3:3

“Tyaa yuꞌwi tiꞌ wan chaꞌ suꞌwe ꞌa msñi wan chaꞌ ꞌñaǎn bra nu ngwaꞌu neꞌ chaꞌ kanꞌ ꞌwan ti kulo; kanꞌ chaꞌ ni, kunan wan chaꞌ kanꞌ xiyaꞌ, kulaa yaꞌ wan chaꞌ kuxi nu ngiꞌni wan ni. Si nu ja xlyaa wan kunan wan chaꞌ ꞌñaǎn” ndukwin Jesús, “sa bra ti tyoꞌoǔn tukwaǎn seꞌen ndiꞌin wan, ñaꞌan tiꞌ si ndijyan ska nu kuꞌni kunan; kaǎn chaꞌ taǎn nu tiꞌí ꞌwan, loꞌo ja kii tiꞌ wan ñaꞌan bra nu kaǎn” ndukwin Ni.