FILIPENSES 3:10 - Chatino Zona Alta Occidental

¹⁰ Loꞌo ni, sa kanꞌ ti chaꞌ nchka tiǎnꞌ, chaꞌ xuꞌwi lyoǔn jiǐn ꞌin Krixtu, chaꞌ ka jlyo tiǎnꞌ chaꞌ ti ngiꞌni Ndiose tñan loꞌoǔn loꞌo ti kwiꞌ jwersa nu wa yuꞌwi ꞌin Ni bra nu yꞌni Ni chaꞌ ndyuꞌu Jesús xiyaꞌ. Ja nꞌni chaꞌ ni siya ngwañaꞌan tyijiǐn nu tiꞌí sa ñaꞌan nu wa mdijin Jesús nu tiꞌí, ni siya kanaꞌ chalyuu ꞌñaǎn kajaǎn sa ñaꞌan nu ngujwi Krixtu lo wsi.

FILIPENSES 3:10 ပူးပေါင်းရင်းမြစ်များ

SAN MATEO 20:23

―Chañi chaꞌ loꞌo wan koꞌo wan rmiyu tlyaaꞌ kanꞌ nu ndiꞌin chaꞌ koꞌoǔn, kwiꞌ tyijin wan nu tiꞌí sa ñaꞌan nu tyijiǐn nu tiꞌí ―ndukwin Jesús ꞌin neꞌ―. Loꞌo ni, ja ndiya chabiyaꞌ ꞌñaǎn chaꞌ taǎn ska seꞌen nde siǐnꞌ seꞌen tyukwa wan nde loo la, chaꞌ wa lka ngulo suwi Stiǐn Ndiose ꞌin nten nu tyukwa nde siǐnꞌ bra kanꞌ.

SAN JUAN 10:18

Ja tukwin ka kujwi ꞌñaǎn, ti ykwiǐnꞌ tiǎn xlyaǎn kajaǎn ―ndukwin Jesús―. Ka kuꞌniǐn ngwañaꞌan, chaꞌ wa nda Stiǐn Ndiose chabiyaꞌ kajaǎn; kwiꞌ ngwañaꞌan, nda Ni chabiyaꞌ chaꞌ tyuꞌuǔn xiyaꞌ.

SAN JUAN 17:3

Chalyuu kwi nu taǎn ꞌin neꞌ kanꞌ ni, kanꞌ lka chaꞌ xuꞌwi lyo neꞌ ꞌiin, chaꞌ nuꞌwin lkaa ska ti nu nka Ndiose ykwiꞌ nu ndiꞌin niꞌ kwan; kwiꞌ ngwañaꞌan, xuꞌwi lyo neꞌ ꞌñaǎn, chaꞌ lkaǎn Jesucristo nu msuꞌwaa ꞌñaǎn bra nu mdiyaǎn lo chalyuu.

ROMANOS 8:17

Chaꞌ nu lkaan sñiꞌ Ndiose ni, ndiꞌin chaꞌ kaja nchga chaꞌ suꞌwe nu ta Ni ꞌñaan bra kanꞌ, nchga chaꞌ nu wa nda Ni ꞌin Krixtu. Loꞌo ni, si nchka tianꞌ chaꞌ suꞌwa tyiꞌian loꞌo Krixtu nde seꞌen tlyu la seꞌen ndiꞌin Ni, bra kanꞌ ndiꞌin chaꞌ taloan xa nu ta neꞌ nu tiꞌí ꞌñaan lo chalyuu re, ti kwiꞌ ngwañaꞌan ndalo ykwiꞌ Krixtu bra nu mda neꞌ nu tiꞌí ꞌin yu.

ROMANOS 8:29

Ni siya ti la mdyisnan chalyuu, ti bra kanꞌ jlyo tiꞌ Ndiose sa ñaꞌan nten nu xlyaa xñi chaꞌ ꞌin Ni nde loo la. Loꞌo nchka tiꞌ Ni chaꞌ kaan sa ñaꞌan lka Jesús, Sñiꞌ ykwiꞌ Ni, nchka tiꞌ Ni chaꞌ ka Jesús taꞌaan; kaꞌan ꞌa nu lkaan sñiꞌ Ndiose bra kanꞌ, loꞌo ndloo la lka Jesús.

ROMANOS 8:36

Nde ndiya ska chaꞌ nu ndukwa lo kityi ꞌin Ndiose: Chunꞌ nu ytean chaꞌ ꞌin Ndiose, nchga bra ndujwi neꞌ ꞌñaan. Ngiꞌni neꞌ loꞌoan sa ñaꞌan si lkaan slyaꞌ, ti kwiꞌ slyaꞌ nu ndaꞌan loꞌo nten ꞌin iꞌ seꞌen ndiꞌin nu ndujwi ꞌin iꞌ.

2 CORINTIOS 1:10

Wa ngulaa Ndiose ꞌwa bra kanꞌ, ja ngujwi ba, ni siya kuxi ꞌa ngwa chaꞌ bra kanꞌ; loꞌo ngwañaꞌan, ti kulaa la Ni ꞌwa nde loo la. Wa msñi ba chaꞌ ꞌin Ndiose, kanꞌ chaꞌ ndyaa ñaꞌan tiꞌ ba ꞌin Ni, chaꞌ ñaꞌan ti kulaa Ni ꞌwa.

2 CORINTIOS 1:5

Sa ñaꞌan ngwa bra nu tiꞌí tiꞌ nten ꞌin Krixtu ti sꞌni, kwiꞌ ngwañaꞌan lye ꞌa nda neꞌ nu tiꞌí ꞌñaan ni, chaꞌ nchkwianꞌ chaꞌ ꞌin Krixtu; kwiꞌ ngwañaꞌan, ñaꞌan ti lye ꞌa ndayaꞌ Krixtu ꞌñaan, bra nu ndijian nu tiꞌí.

2 CORINTIOS 13:4

Chañi ꞌa chaꞌ ngwa naꞌan tiꞌ Krixtu bra nu yjwi neꞌ ꞌin yu, bra nu mstya neꞌ ꞌin yu lo wsi; chunꞌ ndiꞌin la tnun ꞌa chaꞌ yꞌni Ndiose Sti yu chaꞌ ꞌin yu, kanꞌ chaꞌ ti luꞌu Ni ni. Ñaꞌan tiꞌ Krixtu, chaꞌ ngwa naꞌan ꞌa tiꞌ yu bra nu yjwi neꞌ ꞌin yu, kwiꞌ ngwañaꞌan bare, naꞌan chinꞌ tiꞌ ba bra nu ngulo ba tñan ꞌwan nu ngwa xkanꞌ; loꞌo ni, ka biyaꞌ tiꞌ wan chaꞌ ti luꞌu ba chinꞌ, chaꞌ ti kwiꞌ chabiyaꞌ ꞌin Ndiose ndaꞌan loꞌo ba ndijyan ba, ti kwiꞌ taꞌa chabiyaꞌ nu ndiya ꞌin Krixtu.

GÁLATAS 2:20

Kwenta ꞌin chaꞌ kula kanꞌ lkaǎn ñaꞌan tiꞌ ska yu nu wa ngujwi, ñaꞌan tiꞌ si suꞌwa ngaꞌaǎn lo wsi loꞌo Jesús; loꞌo ni, ja ndloǔn tñan niꞌ kasiya ꞌñaǎn ti ykwiǐnꞌ tiǎn, chaꞌ Krixtu nu ndiya niꞌ kasiya ꞌñaǎn kanꞌ nu ndlo tñan ꞌñaǎn. Ndiꞌiǐn suꞌweěn tiǎn lo chalyuu ni, ska ti chaꞌ nu ndyaa ñaꞌan tiǎnꞌ ꞌin tñan nu wa yꞌni Jesús, ska ti nu lka Sñiꞌ Ndiose; kanꞌ lka nu suꞌwe nka tiye loꞌoǔn, kanꞌ lka nu mda chabiyaꞌ ꞌin nten chaꞌ kujwi neꞌ ꞌin ykwiꞌ yu chaꞌ katin kiꞌya ꞌñaǎn.

GÁLATAS 6:17

Nu ngwa sꞌni ni, tnun ꞌa tñan nda wan ꞌñaǎn, chaꞌ ja ndukwa ꞌa wan chaꞌ nu nchkwiǐnꞌ loꞌo wan; kanꞌ chaꞌ ni, ja kuꞌni wan chaꞌ wsuun loꞌoǔn xiyaꞌ. Wa lka nsuꞌwi biyaꞌ chuǔnꞌ, kanꞌ lka biyaꞌ seꞌen mda neꞌ nu tiꞌí ꞌñaǎn chunꞌ chaꞌ ngiꞌniǐn tñan ꞌin Jesús.

EFESIOS 4:13

Loꞌo ngwañaꞌan taꞌaan, ska ñaꞌan ti ka xñian chaꞌ ꞌin Krixtu, ska ñaꞌan ti ka xuꞌwi lyoan ꞌin Jesús nu lka ska ti Sñiꞌ Ndiose. Bra kanꞌ kaan nten nu tyukwi ti tiye, kaan sa ñaꞌan nu nchka tiꞌ Krixtu chaꞌ kaan.

FILIPENSES 3:8

Loꞌo ngwañaꞌan, ni siya kanaꞌ nchga chaꞌ nu ndiya ꞌa tiǎnꞌ lo chalyuu, ja nduwe tiǎnꞌ; tlyu la lka chaꞌ suꞌwe nu wa mjwi ꞌñaǎn ni, chaꞌ nsuꞌwi lyoǔn ꞌin Jesucristo nu nka Xꞌnaǎn. Wa yꞌni Krixtu chaꞌ wa ngulaa yaǎnꞌ nchga chaꞌ kula kanꞌ; loꞌo ja suꞌwe chaꞌ kula kanꞌ siyaꞌ ti, nxkeꞌ tiǎnꞌ ni. Sa kanꞌ ti chaꞌ nchka tiǎnꞌ, chaꞌ sñiǐn suꞌweěn chaꞌ ꞌin Krixtu,

COLOSENSES 1:24

Suꞌwe nxkeꞌ tiǎnꞌ ni siya wa mdijiǐn chinꞌ nu tiꞌí chaꞌ ꞌwan; suꞌwe nxkeꞌ tiǎnꞌ chaꞌ ndijiǐn nu tiꞌí chaꞌ ka suꞌwe chaꞌ ꞌin nchga ta nten nu msñi chaꞌ ꞌin Krixtu nchga kichen. Loꞌo Krixtu ni, mdijin ꞌa Ni nu tiꞌí lo chalyuu chaꞌ ꞌñaan, chaꞌ kaan nten ꞌin ykwiꞌ Ni; kwiꞌ ngwañaꞌan naꞌ, ndijiǐn nu tiꞌí, chaꞌ nu ndiꞌin chaꞌ ka suꞌwa chaꞌ ꞌñaan taꞌaan loꞌo ykwiꞌ Krixtu bra nu mdijian nu tiꞌí lo chalyuu re chaꞌ wa ytean chaꞌ ꞌin Krixtu.

COLOSENSES 2:13

Ñaꞌan tiꞌ si wa ngujwi wan, ngwañaꞌan ndyoꞌo chaꞌ ꞌwan, chaꞌ nu mdiꞌin ꞌa kiꞌya ꞌwan loꞌo Ndiose. Kanꞌ chaꞌ ja mjwi ñaꞌan nu lkwan Ndiose ꞌwan bra kanꞌ, chaꞌ ja mdiꞌin chaꞌ ꞌwan siyaꞌ ti loꞌo Ni nu ngwa bra kanꞌ. Loꞌo ni, wa yꞌni Ni chaꞌ ndyuꞌu wan xiyaꞌ sa ñaꞌan nu ndyuꞌu Krixtu. Wa yꞌni Ni chaꞌ tlyu tiꞌ ꞌñaan ꞌin nchga kiꞌya nu ndukwian ꞌin Ni.

COLOSENSES 3:1

ꞌWan ni, wa mjwi xka chalyuu kwi ꞌwan chunꞌ wa ngwa suꞌwa chaꞌ ꞌwan loꞌo Krixtu; kanꞌ chaꞌ sikwa, lye tyaꞌan chaꞌ tiye wan nchga chaꞌ suꞌwe nu ndiꞌin ꞌin Krixtu, chaꞌ ndukwa Krixtu laꞌa seꞌen kwin ꞌin Ndiose.

1 SAN PEDRO 1:3

Kuꞌniin tnuan ꞌin Ndiose, ti kwiꞌ nu lka Sti Jesucristo nu nka Xꞌnaan. Nchka tꞌnan ꞌa tiꞌ Ni ꞌñaan, kanꞌ chaꞌ yꞌni kwi Ni kasiya ꞌñaan; loꞌo ni, nsuꞌwi chalyuu kwi ꞌñaan, chunꞌ chaꞌ ndyuꞌu Jesucristo xiyaꞌ xa wa ngujwi yu. Loꞌo ni, ndiꞌin taan ꞌaan chaꞌ kaja chalyuu nu ja tsaa tii ꞌa ꞌñaan,

2 SAN PEDRO 1:13

Laja nu ti luꞌuǔn, kuꞌniǐn chaꞌ ja kjlyaa tiꞌ wan chaꞌ nu ñi kanꞌ. Suꞌwe la si kuꞌniǐn ngwañaꞌan, nxkeꞌ tiǎnꞌ,

1 SAN JUAN 2:3

Bra nu nchka tianꞌ tukwaan nchga tñan nu nchka tiꞌ Ni chaꞌ kuꞌnian, bra kanꞌ ka jlyo tianꞌ chaꞌ chañi chaꞌ ndiꞌin chaꞌ ꞌñaan loꞌo Jesucristo.

1 SAN JUAN 2:5

Si chañi chaꞌ ndukwaan nchga chaꞌ nu nchkwiꞌ Jesucristo loꞌoan, bra kanꞌ chañi chaꞌ suꞌwe ꞌa nka tiyean ñaꞌaan ꞌin Ndiose Sti yu; ngwañaꞌan ka biyaꞌ tianꞌ chaꞌ chañi chaꞌ lkaan nten ꞌin Jesucristo ni siya ti ndiꞌian lo chalyuu re.

EL APOCALIPSIS 1:18

Naꞌ lkaǎn Ndiose ykwiꞌ ―ndukwin Ni―. Wa ngujwiǐn ska yaꞌ bra kanꞌ, loꞌo wa ndyuꞌuǔn xiyaꞌ, loꞌo ni, ja tyii ꞌa chaꞌ luꞌuǔn. Naꞌ kuloǔn tñan ñaꞌan bra nu kaja nten, kwiꞌ ngwañaꞌan, naꞌ kuloǔn tñan la nde seꞌen tyaa kasiya ꞌin neꞌ.