FILIPENSES 2:22 - Chatino Zona Alta Occidental

²² Loꞌo ꞌwan, wa jlyo tiꞌ wan chaꞌ luwi ꞌa tñan nu ngiꞌni Timu kanꞌ. Suꞌwa ti ngiꞌni yu tñan loꞌoǔn sa ñaꞌan si wa lka yu sñiěnꞌ, suꞌwa ti ndaꞌan ba nchkwiꞌ ba chaꞌ suꞌwe ꞌin Jesús loꞌo neꞌ xka kichen.

FILIPENSES 2:22 ပူးပေါင်းရင်းမြစ်များ

LOS HECHOS 16:2

Nchga nten ꞌin Jesucristo nu ndiꞌin kichen Listra loꞌo kichen Iconio, suꞌwe ꞌa ykwiꞌ neꞌ chaꞌ ꞌin Timu kanꞌ.

ROMANOS 5:4

Xa wa mdaloan nu tiꞌí kanꞌ ꞌñaan, jlyo tianꞌ chaꞌ wa yꞌni biyaꞌ Ndiose ꞌñaan ngwañaꞌan. Loꞌo kanꞌ si ñaꞌan ti suꞌwe kasiya ꞌñaan loꞌo Ndiose, bra kanꞌ tsaa ñaꞌan la tianꞌ chaꞌ ka suꞌwe chaꞌ ꞌñaan nde loo la.

1 CORINTIOS 16:10

Bra nu tiyan Timu nde kwa, chkwiꞌ suꞌwe wan loꞌo yu, chaꞌ ja ka xiꞌin tiꞌ yu bra nu tyiꞌin yu loꞌo wan. Loo tñan ꞌin ykwiꞌ Xꞌnaan ndaꞌan yu; ti kwiꞌ taꞌa tñan nu ndaꞌaǎn, ndaꞌan yu.

1 CORINTIOS 4:17

Loꞌo kityi re nsuꞌwaǎn ꞌin Timu chaꞌ tsaa yu seꞌen ndiꞌin wan, chaꞌ lka yu kanꞌ sa ñaꞌan lka ska sñiěnꞌ, chaꞌ ndiya ꞌa tiǎnꞌ ꞌin yu, loꞌo suꞌwe ꞌa msñi yu chaꞌ ꞌin Jesucristo. Nchga kichen seꞌen ndaꞌaǎn, seꞌen ndiꞌin ska ta nten ꞌin Jesús, la kanꞌ nduꞌuǔn nchga chaꞌ suꞌwe nu ndiꞌin chaꞌ kuꞌnian lo chalyuu bra nu wa msñian chaꞌ ꞌin Jesucristo; kwiꞌ ngwañaꞌan ngiꞌniǐn tyukwi tyempu chabiyaꞌ ꞌin Jesucristo. Loꞌo Timu katsaꞌ yu ꞌwan chaꞌ ngwañaꞌan ngiꞌniǐn.

2 CORINTIOS 2:9

Wa ngwaꞌaǎn kityi kanꞌ, chaꞌ tsaa seꞌen ndiꞌin wan, chaꞌ ngwa tiǎnꞌ tyija lyo chaꞌ ꞌñaǎn si chañi chaꞌ ꞌwan chaꞌ kuꞌni wan sa ñaꞌan nu niǐn ꞌwan bra kanꞌ; ja jlyo tiǎnꞌ nu ngwa xkanꞌ, si xlyaa wan kuꞌni wan ngwañaꞌan.

2 CORINTIOS 8:22

Kwiꞌ ngwañaꞌan, ti msuꞌwa ba xka yu taꞌa ndiꞌin chaꞌ ꞌñaan loꞌo Krixtu chaꞌ suꞌwa ti kan yu loꞌo taꞌa tyukwaa yu taꞌaan kanꞌ. Kaꞌan ꞌa tñan wa yꞌni yu chaꞌ ꞌin Xꞌnaan, kanꞌ chaꞌ jlyo tiꞌ ba chaꞌ ndiya tiꞌ yu kuꞌni yu tñan loꞌoǔn. Ni siya ni, ka biyaꞌ suꞌwe tiꞌ wan chaꞌ ndyuꞌwi ꞌa tiꞌ yu ꞌwan.

2 CORINTIOS 8:24

Kanꞌ chaꞌ chkwiꞌ suꞌwe wan loꞌo neꞌ kanꞌ sikwa, chaꞌ ka biyaꞌ tiꞌ xka ta yu taꞌaan chaꞌ chañi chaꞌ suꞌwe nka tiye wan ñaꞌan wan ꞌin Tito loꞌo taꞌa ndaꞌan yu. Loꞌo ngwañaꞌan, suꞌwe ꞌa ka tiye ba bra nu ñaꞌan ba sa ñaꞌan nu ngiꞌni wan loꞌo neꞌ kanꞌ. Chunꞌ ndiꞌin la kanen chaꞌ kanꞌ seꞌen ndiꞌin nchga ta nten nu ndiꞌin chaꞌ ꞌin Krixtu kanꞌ.

2 CORINTIOS 8:8

Siꞌi nan ndloǔn tñan re ꞌwan; ni siya bra nu ñaꞌan wan ꞌin xka ta taꞌaan, chaꞌ nchka ꞌa tiꞌ neꞌ tayaꞌ neꞌ ꞌin taꞌa nten neꞌ nu ngiꞌni tnun ꞌin Krixtu, bra kanꞌ ka ñaꞌan biyaꞌ wan ꞌwan, ti ykwiꞌ ti wan, si chañi ka chaꞌ suꞌwe nsuꞌwi tiye wan ñaꞌan wan ꞌin taꞌa nten wan.

FILIPENSES 1:12

ꞌWan taꞌa msñian chaꞌ ꞌin Krixtu, nchka tiǎnꞌ chaꞌ ka biyaꞌ suꞌwe tiꞌ wan chaꞌ wa ynen la chaꞌ suꞌwe ꞌin Jesús lo kichen re, chunꞌ nu tiꞌí nu ndijiǐn re.

FILIPENSES 1:16

Suꞌwe ꞌa nka tiye neꞌ kanꞌ ñaꞌan neꞌ ꞌin Ndiose, loꞌo ngwañaꞌan jlyo tiꞌ neꞌ chaꞌ wa nda Ni tñan ꞌñaǎn chaꞌ xkweěn ꞌin nten nu nxuun loꞌoan chaꞌ suꞌwe nu ꞌin Krixtu. Nten nu chen nka tiye ni, siꞌi tyukwi ti tiye neꞌ nchkwiꞌ neꞌ chaꞌ ꞌin Krixtu; nchka tiꞌ neꞌ tyijin lyo neꞌ ꞌin taꞌa nten neꞌ. Loꞌo ngwañaꞌan, nchka ꞌa tiꞌ neꞌ kanꞌ ta la neꞌ nu tiꞌí ꞌñaǎn laja nu nsuꞌwiǐn niꞌ ñaꞌan chkwan re.

FILIPENSES 1:5

Ti bra nu ynan wan chaꞌ suꞌwe ꞌin Krixtu ti kulo, ñaꞌan ti ja ya tyii chaꞌ ndayaꞌ wan ꞌñaǎn chaꞌ chkwiǐnꞌ chaꞌ kanꞌ loꞌo xka ta nten nu ndiꞌin tijyuꞌ la;

FILIPENSES 1:7

Suꞌwe chaꞌ ngwañaꞌan ndaꞌan chaꞌ tiyeěn chaꞌ ꞌwan, chaꞌ nchga tsan suꞌwe ꞌa nka tiyeěn naꞌaǎn ꞌwan; suꞌwa ti nka tiye wan loꞌoǔn, suꞌwe ꞌa ngiꞌni wan loꞌoǔn chaꞌ ngiꞌnian tñan ꞌin Jesucristo. Lye ꞌa ndayaꞌ wan ꞌñaǎn nu ngwa xkanꞌ bra nu mdiꞌiǐn tloo neꞌ nu nka ndloo, chaꞌ mdoꞌoǔn luwiǐn tloo neꞌ kanꞌ. Bra kanꞌ ykwiǐnꞌ loꞌo neꞌ chaꞌ suꞌwe ꞌa lka chaꞌ nu wa ytsaꞌ Ndiose ꞌñaǎn, loꞌo ngwañaꞌan ytsaǎnꞌ ñi ꞌin neꞌ sa ñaꞌan lka chaꞌ nu ñi kanꞌ. Loꞌo ni, ti ndayaꞌ ꞌa wan ꞌñaǎn, ni siya nsuꞌwiǐn niꞌ ñaꞌan chkwan chunꞌ chaꞌ nchkwiǐnꞌ chaꞌ ꞌin Jesús loꞌo nten.

FILIPENSES 2:20

Ska ti yu kanꞌ lka nu chañi chaꞌ suꞌwa ti nka tiye yu loꞌoǔn, nu chañi chaꞌ suꞌwe nka tiye yu ñaꞌan yu ꞌwan;

1 TIMOTEO 1:18

Kuloǔn tñan ꞌiin ni, Timu, chaꞌ ñaꞌan tiꞌ sñiěnꞌ, ngwañaꞌan nka nuꞌwin, nxkeꞌ tiǎnꞌ: Ti kuꞌnii la tñan ꞌin Ndiose sa ñaꞌan nu ndukwin neꞌ ꞌiin, ti kwiꞌ neꞌ nu nchkwiꞌ chaꞌ ꞌin Ndiose; tyuꞌwi tiiꞌ chaꞌ nu ykwiꞌ neꞌ kanꞌ loꞌoo nu ngwa ti kulo, chaꞌ ka ngula la tiyee. Bra kanꞌ sa ñaꞌan lka ꞌin ska sndaru suꞌwe, kwiꞌ ngwañaꞌan taloo xuun loꞌo chaꞌ kuxi nu ndiꞌin chalyuu. Ka ꞌiin xuun loꞌo chaꞌ kuxi kanꞌ si xñii suꞌwe chaꞌ ꞌin Jesucristo, si xkwiꞌ chaꞌ suꞌwe kuꞌnii loꞌo nten.

1 TIMOTEO 1:2

Ndaꞌaǎn kityi re chaꞌ tsaa seꞌen ndiꞌin nuꞌwin, Timu, chaꞌ ñaꞌan tiꞌ sñiěnꞌ, ngwañaꞌan lka nuꞌwin, chaꞌ msñii chaꞌ ꞌin Jesucristo ti xa nu ngwaꞌuǔn chaꞌ kanꞌ ꞌiin. Nde tñan nchka tiǎnꞌ chaꞌ ka ꞌiin, chaꞌ ti kuꞌni Ndiose Stian chaꞌ suꞌwe loꞌoo, chaꞌ chka tꞌnan tiꞌ Ni ꞌiin, chaꞌ ngwañaꞌan kuꞌni Ni chaꞌ tiin ti tyiꞌin kasiya ꞌiin chunꞌ Jesucristo nu nka Xꞌnaan.

1 TIMOTEO 4:6

Loꞌo nuꞌwin Timu, kwaꞌuu nchga chaꞌ nu ndaꞌaǎn lo kityi re ꞌin taꞌa nten ꞌin Jesucristo nde kwa, chaꞌ ka nuꞌwin ska nten nu suꞌwe ꞌa ngiꞌni tñan ꞌin Jesucristo. Tyuꞌwi suꞌwe tiiꞌ nchga chaꞌ nu wa msñii, kwiꞌ chaꞌ ꞌin Ndiose; loꞌo ti xñii suꞌwe tuwiin ꞌin Xꞌnaan bra kanꞌ, sa ñaꞌan nu ngiꞌnii ni.

2 TIMOTEO 1:2

Loꞌo naꞌ ndaꞌaǎn kityi re chaꞌ tsaa seꞌen ndiꞌiin, Timu, chaꞌ suꞌwa ñaꞌan nchka tiꞌ sñiěnꞌ, ngwañaꞌan lkaa, nxkeꞌ tiǎnꞌ; kwiꞌ ngwañaꞌan suꞌwe ꞌa nka tiyeěn naꞌaǎn ꞌiin. Nde lka tñan nu nchka tiǎnꞌ chaꞌ ka ꞌiin, chaꞌ ñaꞌan ti kuꞌni Ndiose chaꞌ suꞌwe loꞌoo, chaꞌ chka tꞌnan tiꞌ Ni ꞌiin, chaꞌ loꞌo kuꞌni Ni chaꞌ tiin ti tyiꞌin niꞌ kasiya ꞌiin chunꞌ tñan nu yꞌni Jesucristo nu nka Xꞌnaan.

2 TIMOTEO 3:10

Loꞌo ni, Timu, jlyo tiǎnꞌ chaꞌ suꞌwa ti nka tiyee loꞌoǔn, kanꞌ chaꞌ ngiꞌnii sa ñaꞌan nu ngwaꞌuǔn ꞌiin; nuꞌwin ngiꞌnii tñan sa ñaꞌan nu ngiꞌniǐn tñan, chaꞌ ndyaa ñaꞌan tiiꞌ chaꞌ ꞌin Jesús sa ñaꞌan nu ndyaa ñaꞌan tiǎnꞌ ꞌin Ni. Wa naꞌaan chaꞌ ndaloǔn ꞌaǎn ꞌin nten, chaꞌ suꞌwe ꞌa nka tiyeěn naꞌaǎn ꞌin nten, chaꞌ ndaloǔn,

TITO 1:4

Ndaꞌaǎn kityi re chaꞌ tsaa seꞌen ndiꞌin nuꞌwin, Tito, chaꞌ ñaꞌan tiꞌ sñiěnꞌ, ngwañaꞌan nka tiyeěn naꞌaǎn ꞌiin, chaꞌ ska ti ñaꞌan msñian chaꞌ ꞌin Ndiose. Loꞌo ni, nchka tiǎnꞌ chaꞌ ñaꞌan ti kuꞌni Ndiose Stian chaꞌ suꞌwe loꞌoo, chaꞌ ñaꞌan ti chka tꞌnan tiꞌ Jesucristo ꞌiin, chaꞌ kuꞌni Ni chaꞌ tiin ti tyiꞌin niꞌ kasiya ꞌiin bra kanꞌ.