FILIPENSES 1:20 - Chatino Zona Alta Occidental

²⁰ Nde lka tñan nu nchka tiǎnꞌ kuꞌniǐn: Nchka ꞌa tiǎnꞌ chaꞌ ja ka jyuꞌu tiǎnꞌ chkwiǐnꞌ chaꞌ ꞌin Jesús loꞌo nten; ni siya tyempu nu ndijyan nde loo la, ni siya bra ni, ja ka jyuꞌu tiǎnꞌ bra kanꞌ, nka tiyeěn. Nchka tiǎnꞌ chaꞌ ka ngula la tiyeěn chaꞌ chkwiǐnꞌ chaꞌ ꞌin Jesús loꞌo nten. Ngwañaꞌan nchka tiǎnꞌ kuꞌniǐn, chaꞌ ñaꞌan ti kuꞌniǐn tnuǔn ꞌin Krixtu, ni siya ti luꞌuǔn, ni siya wa ngujwiǐn.

FILIPENSES 1:20 ပူးပေါင်းရင်းမြစ်များ

SAN JUAN 21:19

Ngwañaꞌan ykwiꞌ Jesús chaꞌ ka biyaꞌ tiꞌ Tyu sa ñaꞌan kujwi neꞌ ꞌin yu nde loo la; loꞌo lye la kuꞌni tnun nchga nten ꞌin Ndiose chunꞌ nu kaja yu ngwañaꞌan. ―¡Tyaꞌaan loꞌoǔn sikwa! ―ndukwin Jesús ꞌin Tyu bra kanꞌ.

LOS HECHOS 20:24

Ja ntseěn ꞌin chaꞌ nu nchkwiꞌ neꞌ kanꞌ, ja nꞌni chaꞌ ꞌñaǎn ni siya kujwi neꞌ ꞌñaǎn. Ska ti chaꞌ nchka tiǎnꞌ, chaꞌ suꞌwe ti tyii tñan nu mda Ni Jesús ꞌñaǎn, chaꞌ chkwiǐnꞌ chaꞌ suꞌwe ꞌin Ndiose loꞌo nten chalyuu, chaꞌ suꞌwe ꞌa nka tiye Ndiose ñaꞌan Ni ꞌin nchga nten ―ndukwin Palyu.

LOS HECHOS 21:13

―¿Ni chaꞌ lye ꞌa nganan wan a? ―ndukwin Palyu ꞌwa bra kanꞌ―. ¿Ni chaꞌ ngiꞌni wan chaꞌ ka xiꞌin tiǎnꞌ a? ―ndukwin―. Wa nka chaꞌ tsaꞌaǎn Jerusalén; nka tiyeěn tsaꞌaǎn, ni siya skanꞌ neꞌ ꞌñaǎn, ni siya kujwi neꞌ ꞌñaǎn nde kwa chunꞌ nchkwiǐnꞌ chaꞌ ꞌin Jesucristo nu nka Xꞌnaan.

LOS HECHOS 4:31

Xa wa mdyii ykwiꞌ neꞌ chaꞌ loꞌo Ndiose, bra kanꞌ mñan naꞌan seꞌen ndiꞌin neꞌ kanꞌ. Kanꞌ chaꞌ jlyo tiꞌ neꞌ chaꞌ chañi chaꞌ nganun Tyiꞌi Ndiose niꞌ kasiya ꞌin taꞌa neꞌ, loꞌo ja ytsen ꞌa neꞌ chkwiꞌ neꞌ chaꞌ ꞌin Ndiose loꞌo xka la nten bra kanꞌ.

ROMANOS 12:1

ꞌWan taꞌa ndiꞌin chaꞌ ꞌñaan loꞌo Krixtu, chaꞌ lye ꞌa nchka tꞌnan tiꞌ Ni ꞌñaan, kanꞌ chaꞌ nchkwiǐnꞌ loꞌo wan ni. Ta wan tyukwi ñaꞌaan wan ꞌin Ndiose, chaꞌ kuꞌni wan nchga tñan nu nchka tiꞌ Ni chaꞌ kuꞌni wan lo chalyuu; ta wan tyukwi ñaꞌaan wan ꞌin Ndiose chaꞌ xkwiꞌ chaꞌ ꞌin Ni tyiꞌin wan lo chalyuu, chaꞌ wa lka wan sa ñaꞌan lka ska lomstan nu luꞌu. Ndiya tiꞌ Ndiose chaꞌ kuꞌni wan ngwañaꞌan; chaꞌ nu lka wan nten ꞌin Ni, ndiꞌin chaꞌ kuꞌni wan ngwañaꞌan.

ROMANOS 5:5

Loꞌo ngwañaꞌan, siꞌi ska chaꞌ nu ndloun keen tian lka chaꞌ kanꞌ, ska chaꞌ chañi lka chaꞌ kanꞌ; kuꞌni Ni chaꞌ kanꞌ. Loꞌo ngiꞌni Ni chaꞌ ndii tianꞌ niꞌ kasiya ꞌñaan, chaꞌ suꞌwe ꞌa nka tiye Ndiose ñaꞌan Ni ꞌñaan; ngwañaꞌan ngiꞌni Ndiose bra nu nda Ni Tyiꞌi ykwiꞌ Ni ꞌñaan.

ROMANOS 6:13

Ja ta wan ska laꞌa yaꞌ wan, ni ska laꞌa kiyaꞌ wan, chaꞌ kuꞌni wan tñan ꞌin nten nu ngiꞌni chaꞌ xaꞌan; ja ka wan msu ꞌin neꞌ kanꞌ, ja kuꞌni wan chaꞌ kuxi loꞌo neꞌ. Xka ñaꞌan ndiꞌin chaꞌ tyaꞌan chaꞌ tiye wan ni. Ta wan tyukwi ñaꞌaan wan chaꞌ ka wan nten ꞌin Ndiose, sa ñaꞌan lka si ngujwi wan ska yaꞌ, loꞌo kanꞌ ndyuꞌu wan xiyaꞌ. Kanꞌ chaꞌ ni, ndiꞌin chaꞌ ta wan tyukwi ñaꞌan wan chaꞌ kuꞌni wan tñan ꞌin Ndiose, chaꞌ xkwiꞌ chaꞌ suꞌwe kuꞌni wan seꞌen ndiꞌin wan.

ROMANOS 6:19

(Ngwañaꞌan nchkwiǐnꞌ loꞌo wan, chaꞌ ka biyaꞌ la tiꞌ wan ni ñaꞌan nu nka ndloo la ꞌwan.) Ti ngwa sꞌni la mda wan tyukwi ñaꞌaan wan chaꞌ kuꞌni wan chaꞌ chen ñaꞌan, chaꞌ kuꞌni wan chaꞌ kuxi, loꞌo ngwañaꞌan lye ꞌa yꞌni chaꞌ xaꞌan kanꞌ loꞌo wan bra kanꞌ; loꞌo ni, ndiꞌin chaꞌ ta wan tyukwi ñaꞌaan wan chaꞌ xkwiꞌ tñan suꞌwe kuꞌni wan, chaꞌ xkwiꞌ chaꞌ ꞌin Ndiose tyiꞌin wan lo chalyuu.

ROMANOS 8:19

Nchga nan luꞌu nu wa ngwiñan Ndiose lo chalyuu, ndiꞌin ta nan kanꞌ ꞌin Ndiose, sa ñaꞌan bra nu kwaꞌu Ni ꞌin nten chalyuu sa ñaꞌan nten nu chañi chaꞌ lka sñiꞌ Ndiose.

ROMANOS 9:33

Chaꞌ ꞌin kee kanꞌ ndukwa chaꞌ re lo kityi kula: Xtyaǎn ska kee nu xtyi tuwiin seꞌen ndaꞌan neꞌ Israel, neꞌ kichen Sión kanꞌ, ndukwin Ndiose. Loꞌo Jesús lka sa ñaꞌan lka kee kanꞌ. Kwiꞌ ngwañaꞌan, ta Jesús ska chaꞌ wjyuꞌu ꞌin neꞌ kanꞌ; tyun neꞌ kanꞌ ka jyuꞌu tiꞌ neꞌ chaꞌ ꞌin Jesús kanꞌ. Kanꞌ chaꞌ nan ni, ja ndiꞌin chaꞌ ka jyuꞌu tianꞌ ꞌin Jesús, bra wa ytean chaꞌ ꞌin Ni.

1 CORINTIOS 15:31

Loꞌoǔn, nchga tsan wa kajaǎn tiǎn lo tñan ꞌin Krixtu; ja taloǔn ꞌaǎn kuꞌniǐn tñan kanꞌ si ja ndyuꞌu Jesús xiyaꞌ. Loꞌo ni, suꞌwe ꞌa nka tiyeěn chaꞌ msñi wan chaꞌ ꞌin Xꞌnaan Jesucristo, tyun ꞌa ꞌwan neꞌ Corinto.

1 CORINTIOS 7:34

Kwiꞌ ngwañaꞌan ꞌwan neꞌ kunaꞌan nu ndukwa ska ti ni, loꞌo ꞌwan nu kunaꞌan kuneꞌ nu ja ya kaja kwilyoꞌo wan, ka laja la ꞌwan chaꞌ kuꞌni wan ska loo ti tñan ꞌin Ndiose Xꞌnaan; loꞌo kanꞌ ka wan nten ꞌin Ndiose tyukwi ñaꞌaan ska wan, tyukwi ti tiye wan. ꞌWan nu nsuꞌwi kwilyoꞌo wan ni, wa ndiꞌin ꞌa chaꞌ nduwe tiꞌ wan chaꞌ kaja ñaꞌan nu tyijin yuꞌwi ꞌwan lo chalyuu, chaꞌ kuꞌni wan nchga chaꞌ nu suꞌwe la nchka tiꞌ kwilyoꞌo wan.

2 CORINTIOS 10:8

Wa ykwiǐnꞌ ꞌaǎn loꞌo wan chaꞌ wa nda ykwiꞌ Xꞌnaan chabiyaꞌ ꞌwa, chaꞌ tyaꞌan ba seꞌen ndiꞌin wan; loꞌo ngwañaꞌan, ja njyuꞌu ꞌa tiǎnꞌ ni siya chkwiǐnꞌ ngwañaꞌan loꞌo wan. Wa loꞌo chabiyaꞌ ꞌin Ndiose ndaꞌan ba, chaꞌ ka sten la wan chaꞌ ꞌin Ni; ja nchka tiꞌ ba kuꞌni ñuꞌun ji ba kasiya ꞌwan.

2 CORINTIOS 3:12

Kanꞌ chaꞌ ni, ja ntsean chkwianꞌ loꞌo nten, chunꞌ jlyo tianꞌ chaꞌ suꞌwe ꞌa lka chaꞌ ꞌin Jesús nu nchkwianꞌ re.

2 CORINTIOS 4:10

Nchga seꞌen ndaꞌan ba lo chalyuu, taꞌa ti ndijin ba nu tiꞌí; nsuꞌwi ꞌa nu tiꞌí nu ngiꞌni nten loꞌo ba, sa ñaꞌan nu tiꞌí nu mdijin Krixtu xa nu yan yu lo chalyuu, bra nu yjwi nten ꞌin yu. Kanꞌ chaꞌ ni, ka jlyo tiꞌ xka la nten chaꞌ ti luꞌu ykwiꞌ Krixtu, xa nu ñaꞌan neꞌ ꞌwa chaꞌ ti luꞌu ba.

2 CORINTIOS 5:15

Siꞌya nchga nten, kanꞌ chaꞌ mslyaa Krixtu ngujwi lo wsi. Loꞌo ni, nchka tiꞌ Ni chaꞌ ja tyiꞌin ꞌa nten chalyuu chaꞌ ꞌin neꞌ, ti ykwiꞌ ti neꞌ; xkwiꞌ chaꞌ ꞌin Krixtu tyiꞌin neꞌ ni, chaꞌ kanꞌ nu wa ngujwi chaꞌ ꞌin neꞌ, kanꞌ nu wa ndyuꞌu xiyaꞌ chaꞌ ꞌin neꞌ.

2 CORINTIOS 7:14

Xa nu ti mdiꞌin yu seꞌen ndiꞌiǐn, wa ytsaǎnꞌ ꞌin yu chaꞌ suꞌwe ꞌa msñi wan chaꞌ ꞌin Jesús, loꞌo ngwañaꞌan chañi ꞌa chaꞌ kanꞌ. Nchga yaꞌ nu ykwiꞌ ba loꞌo wan, chañi ꞌa ngwa chaꞌ ꞌin Jesús nu ykwiꞌ ba; kwiꞌ ngwañaꞌan, chañi ngwa chaꞌ nu ytsaǎnꞌ ꞌin Tito, chaꞌ suꞌwe nka tiye ykwiꞌ ba ñaꞌan ba ꞌwan.

2 CORINTIOS 7:4

Suꞌwe ꞌa nka tiyeěn xa nu ndyuꞌwi tiǎnꞌ ꞌwan, kwiꞌ ngwañaꞌan nka tiyeěn bra nu nchkwiǐnꞌ chaꞌ ꞌwan loꞌo xka ta nten. Ñaꞌan ti ngula tiꞌ kasiya ꞌñaǎn, ñaꞌan ti suꞌwe nka tiyeěn seꞌen ndiꞌiǐn, ni siya ndijin ba nchga nu tiꞌí kanꞌ.

FILIPENSES 1:14

Loꞌo ngwañaꞌan nchga taꞌa msñian chaꞌ ꞌin Jesús, suꞌwe la ndyaa ñaꞌan tiꞌ neꞌ chaꞌ ꞌin Xꞌnaan ni, ngwa ngula la chinꞌ tiye neꞌ ni; ja ntsen neꞌ chkwiꞌ neꞌ chaꞌ ꞌin Ndiose loꞌo xka la nten, chaꞌ loꞌo naꞌ ja ntseěn laja nu nsuꞌwiǐn niꞌ ñaꞌan chkwan re.

FILIPENSES 2:17

Jlyo tiǎnꞌ chaꞌ siꞌi chinꞌ ti tñan yꞌni wan bra nu msñi wan chaꞌ ꞌin Ndiose; kaꞌan ꞌa nan nu mxnun wan, tyun yaꞌ nda wan tyukwi ñaꞌaan wan chaꞌ ka wan tñan ꞌin Krixtu, chunꞌ nu wa msñi wan chaꞌ ꞌin Ni. Loꞌoǔn kujwi neꞌ ꞌñaǎn ni, nxkeꞌ tiǎnꞌ; kanaꞌ chalyuu ꞌñaǎn ni chaꞌ ꞌwan. Loꞌo ja ntseěn; ni siya ngwañaꞌan ka ꞌñaǎn, suꞌwe ꞌa ka tiyeěn seꞌen ndiꞌiǐn. Kwiꞌ ngwañaꞌan nxkeꞌ tiǎnꞌ chaꞌ ka suꞌwe tiye wan, chaꞌ suꞌwa ti ka suꞌwe tiyeěn loꞌo wan.

COLOSENSES 1:24

Suꞌwe nxkeꞌ tiǎnꞌ ni siya wa mdijiǐn chinꞌ nu tiꞌí chaꞌ ꞌwan; suꞌwe nxkeꞌ tiǎnꞌ chaꞌ ndijiǐn nu tiꞌí chaꞌ ka suꞌwe chaꞌ ꞌin nchga ta nten nu msñi chaꞌ ꞌin Krixtu nchga kichen. Loꞌo Krixtu ni, mdijin ꞌa Ni nu tiꞌí lo chalyuu chaꞌ ꞌñaan, chaꞌ kaan nten ꞌin ykwiꞌ Ni; kwiꞌ ngwañaꞌan naꞌ, ndijiǐn nu tiꞌí, chaꞌ nu ndiꞌin chaꞌ ka suꞌwa chaꞌ ꞌñaan taꞌaan loꞌo ykwiꞌ Krixtu bra nu mdijian nu tiꞌí lo chalyuu re chaꞌ wa ytean chaꞌ ꞌin Krixtu.

1 TESALONICENSES 5:23

Ngiꞌni Ndiose chaꞌ tiin ti tyiꞌian lo chalyuu. Kanꞌ chaꞌ ni, kuꞌni wan chaꞌ ka wan nten nu ñi siyaꞌ ti; kuꞌni suꞌwe tiye wan, kuꞌni luwi kasiya ꞌwan, kuꞌni wan chaꞌ ka wan nten nu tyukwi ti tiye siyaꞌ ti. Si luwi kasiya ꞌwan bra nu kan Jesucristo nu nka Xꞌnaan xiyaꞌ, ja ndiꞌin chaꞌ xtya Ni kiꞌya ꞌwan bra kanꞌ.

1 SAN PEDRO 4:16

ꞌWan ni, ja ndiꞌin chaꞌ ka jyuꞌu tiꞌ wan si ta neꞌ nu tiꞌí ꞌwan chaꞌ lka wan nten ꞌin Jesucristo; kuꞌni tnun wan ꞌin Ndiose chaꞌ ngwañaꞌan nchka ꞌwan bra kanꞌ.

1 SAN JUAN 2:28

ꞌWan sñiěnꞌ, xñi suꞌwe wan chaꞌ ꞌin Jesucristo ni. Loꞌo bra kanꞌ, xa nu kan Jesucristo lo chalyuu xiyaꞌ, ja ndiꞌin chaꞌ ka jyuꞌu tianꞌ bra nu ñaꞌaan ꞌin Ni chaꞌ ndijyan Ni; tyukwi ti tiyean tyukwa taꞌaan loꞌo Ni bra kanꞌ.