EL APOCALIPSIS 12:4 - Chatino Zona Alta Occidental

⁴ Mjiꞌin jyeꞌen iꞌ ꞌin kwii kulasiin nu ndukwi niꞌ kwan bra kanꞌ; mslu iꞌ ñaꞌaan ska yuꞌwe nchga kwii kulasiin kanꞌ, ngalu ran lo chalyuu bra kanꞌ. Kwiꞌ mdyituun kunan kanꞌ tloo nu kunaꞌan nu wa kala ti sñiꞌ kanꞌ; bra nu wa ngala kuwiꞌ, bra ti ku kunan ꞌin kuwiꞌ kanꞌ, nka tiye iꞌ bra kanꞌ.

EL APOCALIPSIS 12:4 ပူးပေါင်းရင်းမြစ်များ

SAN JUAN 8:44

Ti kwiꞌ kuneꞌ xaꞌan lka sti wan, loꞌo nchka tiꞌ wan kuꞌni wan ti kwiꞌ tñan nu ngulo nu kanꞌ ꞌwan. Ti bra nu mdyisnan chalyuu, ti bra kanꞌ mdyisnan nu kanꞌ ngiꞌni ñuꞌun ꞌin nten ―ndukwin Jesús―. Ja mdoꞌo nu kanꞌ seꞌen ndukwa kiyaꞌ chaꞌ nu ñi, kanꞌ chaꞌ ja siyaꞌ ndiya chaꞌ nu ñi ꞌin nu kanꞌ ―ndukwin―. Xa nu kwiñi lyoꞌo nu kanꞌ ꞌin nten, chaꞌ ꞌin ti ykwiꞌ ti lka chaꞌ kwiñi nu nchkwiꞌ loꞌo neꞌ. Ska nu kwiñi tnun lka kuneꞌ xaꞌan, ti kwiꞌ kanꞌ lka sti nchga nu kwiñi.

1 SAN PEDRO 5:8

¡Chaꞌ tiya ti tiꞌ wan tyiꞌin wan lo chalyuu! Ja kajaꞌ wan, chaꞌ ykwiꞌ kuneꞌ xaꞌan lka nu nxuun loꞌo wan, ngwañaꞌan kwiꞌ seꞌen ꞌa nduun yu kanꞌ seꞌen ndiꞌin wan. Ñaꞌan tiꞌ ska kwichi nu tlá ꞌa nu ndaꞌan naan ꞌin ska nten chaꞌ ku, kwiꞌ ngwañaꞌan sa ti ndaꞌan kuneꞌ xaꞌan kanꞌ tyukwi ñaꞌaan chalyuu.

EL APOCALIPSIS 12:7

Chunꞌ ndiꞌin la mdyisnan chaꞌ kusuun la seꞌen nka Ndiose ndloo bra kanꞌ. Mduun Kee nu nka xꞌnan angajle ꞌin Ndiose, mduun loꞌo angajle nu lka sndaru ꞌin; kwiꞌ ngwañaꞌan, mduun kunan tnun loꞌo sndaru ꞌin iꞌ bra kanꞌ. Lye ꞌa msuun taꞌa angajle bra kanꞌ.

EL APOCALIPSIS 12:9

wa ngulo Ni ꞌin angajle nu mduun chaꞌ ꞌin kunan kanꞌ bra kanꞌ. Sꞌni ndaꞌan kunan kanꞌ lo chalyuu re, ti kwiꞌ kuneꞌ xaꞌan lka nu kunan kanꞌ; kwiꞌ nu naan Satanás. Xkwiꞌ nan nñi lyoꞌo yu ꞌin nten tyukwi ñaꞌaan chalyuu bra kanꞌ. Nan wa ngulo Ndiose ꞌin kunan kanꞌ loꞌo sndaru ꞌin iꞌ nu ngwa sꞌni, mdiyan iꞌ lo chalyuu re bra kanꞌ.

EL APOCALIPSIS 13:2

Ñaꞌan tiꞌ kwichi ngatsiin, ngwañaꞌan ñaꞌan iꞌ, mskeꞌ tiǎnꞌ; tlá ꞌa kiyaꞌ iꞌ, tukwin ꞌa stanꞌ kiyaꞌ iꞌ ñaꞌan tiꞌ stanꞌ kiyaꞌ oso. Loꞌo tuꞌwa iꞌ, ñaꞌan tiꞌ tuꞌwa kwichi la saꞌa, ngwañaꞌan tuꞌwa iꞌ bra kanꞌ. Mda kunan kanꞌ tñan ndloo ꞌin ꞌni chen ñaꞌan kanꞌ, chaꞌ ka iꞌ ndloo ꞌin nten chalyuu, sa ñaꞌan lka ykwiꞌ ndloo. Loꞌo mda kunan chabiyaꞌ kuꞌni ꞌni kanꞌ tñan, chaꞌ ka iꞌ ndloo la seꞌen nu nchka ti tiꞌ iꞌ bra kanꞌ.

EL APOCALIPSIS 13:4

Ngiꞌni tnun nchga nten ꞌin kunan kanꞌ bra kanꞌ, chaꞌ wa mda iꞌ chabiyaꞌ ka tnun ꞌni chen ñaꞌan kanꞌ; kwiꞌ ngwañaꞌan, ngiꞌni tnun neꞌ ꞌin ti kwiꞌ ꞌni chen ñaꞌan kanꞌ. Nchkwiꞌ neꞌ loꞌo taꞌa neꞌ bra kanꞌ: ―Ja tukwin ndiꞌin chalyuu nu suꞌwa loꞌo ꞌni kwa. Ja ka ꞌin nten xuun loꞌo iꞌ ―ndukwin neꞌ.

EL APOCALIPSIS 16:13

Chunꞌ ndiꞌin la naꞌaǎn mdoꞌo tukwa snan kuneꞌ xaꞌan; ñaꞌan tiꞌ kwityiꞌ, ngwañaꞌan ñaꞌan kuneꞌ xaꞌan kanꞌ. Wa mdoꞌo ran nde tu tuꞌwa kunan tnun kanꞌ, loꞌo tu tuꞌwa ꞌni chen ñaꞌan kanꞌ, loꞌo tu tuꞌwa nten nu nchkwiꞌ chaꞌ kwiñi chaꞌ ꞌin Ndiose; la kwa mdoꞌo kwiꞌin kuxi kanꞌ ndijyan bra kanꞌ.

EL APOCALIPSIS 17:18

Nu kunaꞌan nu wa naꞌaan ni, kanꞌ nka ñaꞌan tiꞌ kichen tnun nu nka ndloo la kanꞌ, ngwañaꞌan lka nu kunaꞌan kanꞌ; kanꞌ nu ndlo tñan ꞌin nchga nten nu nka ndloo lo chalyuu.

EL APOCALIPSIS 20:2

Kwiꞌ msñi angajle kanꞌ kunan tnun, ti kwiꞌ kunan lka nu ndiꞌin lo chalyuu, ti kwiꞌ kuneꞌ xaꞌan nu naan Satanás lka iꞌ. Tsaa mskanꞌ angajle kanꞌ ꞌin kuneꞌ xaꞌan loꞌo karenan sa yaꞌ nu taꞌa ska mi yijan bra kanꞌ.

EL APOCALIPSIS 8:10

Bra nu ngwaꞌa angajle nu nchka snan kuwi chkwan, bra ti mdiyuu ska kwii kulasiin tnun nu nsuꞌwi niꞌ kwan, nchkin ran ñaꞌan tiꞌ nchkin kityee skan bra kanꞌ. Mdiyuu kwii kulasiin kanꞌ lo tyiꞌa chku tyukwi ñaꞌaan chalyuu. Kanꞌ chaꞌ mnuꞌun sa yuꞌwe tyiꞌa luwi nu nsuꞌwi ñaꞌaan lo chalyuu bra kanꞌ.

EL APOCALIPSIS 8:11

Kwii Kulasiin Kixinꞌ Tlyaaꞌ naan kwii kulasiin tnun kanꞌ, chaꞌ ngwa tlyaaꞌ sa yuꞌwe tyiꞌa nu ndiꞌyo nten. Kaꞌan ꞌa nten ngujwi chunꞌ yiꞌo neꞌ tyiꞌa kanꞌ, chaꞌ tlyaaꞌ ꞌa tyiꞌa kanꞌ bra kanꞌ.

EL APOCALIPSIS 8:12

Bra nu ngwaꞌa angajle nu nchka jakwa kuwi chkwan, kanꞌ mnuꞌun nchga xaa tnun nu nsuꞌwi niꞌ kwan, sa yuꞌwe ti ran ndyuwiꞌ ran bra kanꞌ; loꞌo xaa kwichaa, loꞌo xaa koꞌ, loꞌo xaa kwii kulasiin, sa yuꞌwe xaa ndyuwiꞌ bra kanꞌ. Sa jluꞌwe tsan, sa jluꞌwe tla, ja yuꞌwi ꞌa xaa bra kanꞌ.

EL APOCALIPSIS 8:7

Bra nu ngwaꞌa angajle nu nchka kulo kuwi chkwan ꞌin, bra ti ngalu tyoo kee loꞌo kiiꞌ mxtiyaaꞌ loꞌo tnen lyuu bra kanꞌ. Sa yuꞌwe chalyuu mdyii mkin bra kanꞌ, loꞌo ngwañaꞌan mkin sa yuꞌwe yka, mkin ñaꞌaan kixinꞌ ngaꞌá bra kanꞌ.

EL APOCALIPSIS 8:8

Bra nu ngwaꞌa angajle nu nchka tukwa kuwi chkwan; bra ti ngutin ska kiꞌya kwan, ñaꞌaan ska chunꞌ kiꞌya kanꞌ nchkin sa ñaꞌan mbiꞌya lo tyiꞌa tujoꞌo. Sa yuꞌwe tyiꞌa tujoꞌo ngwa tnen bra kanꞌ,

EL APOCALIPSIS 8:9

sa yuꞌwe ti nan luꞌu nu nsuꞌwi lo tyiꞌa tujoꞌo ngujwi ran, sa yuꞌwe nchga yka naꞌan nu ndaꞌan lo tyiꞌa mdyii ran ngutin ran bra kanꞌ.

EL APOCALIPSIS 9:10

Loꞌo ndukwa jyeꞌen iꞌ sa ñaꞌan ndukwa jyeꞌen seꞌen; ti kwiꞌ ti chaꞌ, ndukwa mtsuꞌ lo jyeꞌen iꞌ, chaꞌ loꞌo jyeꞌen iꞌ ta iꞌ nu tiꞌí ꞌin nten chalyuu sa yaꞌ kiꞌyu koꞌ ti bra kanꞌ.

EL APOCALIPSIS 9:19

Nde tu tuꞌwa iꞌ, kwiꞌ lo jyeꞌen iꞌ, nde kwa ndyiji jwersa ꞌin iꞌ chaꞌ kuꞌni iꞌ chaꞌ kuxi kanꞌ; ka ꞌin iꞌ ta iꞌ nu tiꞌí ꞌin nten loꞌo jyeꞌen iꞌ, chaꞌ ndukwa mtsuꞌ lo jyeꞌen iꞌ; loꞌo ke iꞌ loꞌo jyeꞌen iꞌ, ñaꞌan tiꞌ ke kunan ngwañaꞌan lka ke iꞌ bra kanꞌ.