COLOSENSES 4:18 - Chatino Zona Alta Occidental

¹⁸ Xa wa mdyii kityi re, nde lka ska chaꞌ nu ndaꞌaǎn loꞌo yaǎnꞌ ykwiǐnꞌ: Palyu lkaǎn, naꞌ lkaǎn nu msuꞌwaǎn chaꞌ suꞌwe re nu kan seꞌen ndiꞌin wan; tyuꞌwi tiꞌ wan ꞌñaǎn chaꞌ nsuꞌwiǐn niꞌ ñaꞌan chkwan ni. Loꞌo ngwañaꞌan, ti kuꞌni la Ndiose chaꞌ suꞌwe loꞌo wan tyukwi tyempu nde loo la. Ngwañaꞌan ka sikwa.

COLOSENSES 4:18 ပူးပေါင်းရင်းမြစ်များ

ROMANOS 16:20

Ti chinꞌ ti tsan ti ji chaꞌ kuꞌni tyii Ndiose chaꞌ ꞌin kuneꞌ xaꞌan, chaꞌ ja ka tlyu la chaꞌ kuxi nu ngiꞌni nu xaꞌan kanꞌ. Tiin ti tyiꞌin wan sikwa, sa ñaꞌan ndiꞌin Ndiose; kwiꞌ ngwañaꞌan, ti kuꞌni la Jesucristo nu nka Xꞌnaan chaꞌ suꞌwe loꞌo nchga neꞌ taꞌa wan.

ROMANOS 16:22

Loꞌoǔn, scaranu ꞌin Palyu lkaǎn chaꞌ nu ndaꞌan ba kityi re, Tercio naǎn; loꞌoǔn nchka tiǎnꞌ taǎn kasiya ꞌwan chabiyaꞌ ꞌin Xꞌnaan.

ROMANOS 16:23

Loꞌo Gayu nchkwiꞌ yu loꞌoǔn chaꞌ chkwiǐnꞌ loꞌo wan chaꞌ ꞌin yu; kwiꞌ naꞌan tyi yu nda yu chaꞌ ndiꞌiǐn, loꞌo nda yu naꞌan tyi yu chaꞌ ndyoꞌ tiꞌin nchga neꞌ re nu ndiꞌin chaꞌ ꞌin loꞌo Krixtu. Bra kanꞌ loꞌo Rastu nu nka ndloo ꞌin tñi kichen re, nchka tiꞌ yu ta yu kasiya ꞌwan; ti kwiꞌ ti chaꞌ nchka tiꞌ Cuarto, yu taꞌaǎn.

1 CORINTIOS 16:21

Loꞌo naꞌ nchkwiǐnꞌ suꞌweěn loꞌo wan, ti kwiǐnꞌ ndaꞌaǎn niǐn lo kityi re, naꞌ lkaǎn Palyu.

2 CORINTIOS 13:14

Loꞌo ni, nchka ꞌa tiǎnꞌ chaꞌ ja tsaa tii chaꞌ suꞌwa yaꞌ Jesucristo nu nka Xꞌnaan ꞌin nchga wan, chaꞌ kaꞌan ꞌa chaꞌ suꞌwe ngiꞌni Ni loꞌoan nchga tsan. Kwiꞌ ngwañaꞌan nchka tiǎnꞌ chaꞌ nchga tsan kuwe tiꞌ wan chaꞌ suꞌwe ꞌa nka tiye Ni ñaꞌan Ni ꞌñaan. Kwiꞌ ngwañaꞌan, nchka tiǎnꞌ chaꞌ kanun Tyiꞌi Ndiose niꞌ kasiya ꞌwan, chaꞌ kwiꞌ Ni ngiꞌni Ni chaꞌ suꞌwa ndiꞌin chaꞌ ꞌñaan loꞌo Ni, loꞌo xka ta nten taꞌa msñian chaꞌ ꞌin Ndiose. Ngwañaꞌan ka sikwa.

FILIPENSES 1:7

Suꞌwe chaꞌ ngwañaꞌan ndaꞌan chaꞌ tiyeěn chaꞌ ꞌwan, chaꞌ nchga tsan suꞌwe ꞌa nka tiyeěn naꞌaǎn ꞌwan; suꞌwa ti nka tiye wan loꞌoǔn, suꞌwe ꞌa ngiꞌni wan loꞌoǔn chaꞌ ngiꞌnian tñan ꞌin Jesucristo. Lye ꞌa ndayaꞌ wan ꞌñaǎn nu ngwa xkanꞌ bra nu mdiꞌiǐn tloo neꞌ nu nka ndloo, chaꞌ mdoꞌoǔn luwiǐn tloo neꞌ kanꞌ. Bra kanꞌ ykwiǐnꞌ loꞌo neꞌ chaꞌ suꞌwe ꞌa lka chaꞌ nu wa ytsaꞌ Ndiose ꞌñaǎn, loꞌo ngwañaꞌan ytsaǎnꞌ ñi ꞌin neꞌ sa ñaꞌan lka chaꞌ nu ñi kanꞌ. Loꞌo ni, ti ndayaꞌ ꞌa wan ꞌñaǎn, ni siya nsuꞌwiǐn niꞌ ñaꞌan chkwan chunꞌ chaꞌ nchkwiǐnꞌ chaꞌ ꞌin Jesús loꞌo nten.

COLOSENSES 4:3

Ti kwiꞌ bra kanꞌ jñan wan chaꞌ tlyu tiꞌ ꞌin Ndiose chaꞌ ꞌwa chaꞌ kaja la jwersa ꞌwa, chaꞌ ti chkwiꞌ la ba chaꞌ suꞌwe ꞌin Krixtu loꞌo nchga nten, chaꞌ kunan neꞌ chaꞌ kanꞌ ni siya ja mjwi ñaꞌan kunan neꞌ chaꞌ kanꞌ ti sꞌni la; chunꞌ chaꞌ lye ꞌa ykwiǐnꞌ chaꞌ ꞌin Krixtu loꞌo nten, kanꞌ chaꞌ nsuꞌwiǐn niꞌ ñaꞌan chkwan ni.

2 TESALONICENSES 3:17

Nchga neꞌ taꞌa ba suꞌwe ꞌa nchkwiꞌ ba loꞌo wan. Palyu lkaǎn; ykwiǐnꞌ ndaꞌaǎn letra ni, chaꞌ ka biyaꞌ tiꞌ wan chaꞌ chañi chaꞌ naꞌ ngwaꞌaǎn kityi re nu ndijyan seꞌen ndiꞌin wan.

1 TIMOTEO 6:21

Wa ndiya taꞌaan nu ndyaa ñaꞌan tiꞌ chaꞌ nu nchkwiꞌ yu kwiñi kanꞌ, loꞌo ni, ja suꞌwa ndaꞌan neꞌ kanꞌ loꞌo taꞌa msñian chaꞌ ꞌin Ndiose. Ñaꞌan ti kuꞌni Ndiose chaꞌ suꞌwe loꞌo wan. Kwiꞌ ngwañaꞌan ka sikwa.

2 TIMOTEO 1:8

Ja ka jyuꞌu tiiꞌ sikwa; katsaaꞌ chaꞌ re ꞌin nten, sa ñaꞌan nka nchga chaꞌ ꞌin Xꞌnaan. Kwiꞌ ngwañaꞌan, ja ka jyuꞌu tiiꞌ chaꞌ nsuꞌwiǐn niꞌ ñaꞌan chkwan. Nda neꞌ nu tiꞌí ꞌñaǎn chaꞌ nchkwiǐnꞌ chaꞌ ꞌin Xꞌnaan, kanꞌ chaꞌ ja tyaꞌan chaꞌ tiyee lye ꞌa si loꞌoo ta neꞌ nu tiꞌí ꞌiin chaꞌ nchkwiiꞌ chaꞌ suꞌwe ꞌin Jesucristo loꞌo nten. Ta Ndiose jwersa ꞌñaan chaꞌ taloan,

2 TIMOTEO 4:22

Kanun Tyiꞌi ykwiꞌ Jesucristo loꞌoo, chaꞌ ka ngula la tiiꞌ niꞌ kasiya ꞌiin. Ñaꞌan ti kuꞌni Ndiose chaꞌ suꞌwe loꞌo nchga wan. Ngwañaꞌan ka sikwa.

TITO 3:15

Taꞌa ba ndiꞌin ba nde re nchka tiꞌ ba chkwiꞌ suꞌwe ba loꞌo wan. Kwiꞌ ngwañaꞌan nuꞌwin, suꞌwe ti chkwiiꞌ loꞌo taꞌa wan, kwiꞌ nu lka taꞌa suꞌwe nsuꞌwi ba nde kwa, chaꞌ lka neꞌ taꞌa msñian chaꞌ ꞌin Jesús. Loꞌo ñaꞌan ti kuꞌni Ndiose chaꞌ suꞌwe loꞌo nchga wan. Ngwañaꞌan ka sikwa.

HEBREOS 13:25

Loꞌo nchka tiǎnꞌ chaꞌ tyuꞌwi tiꞌ wan nchga bra chaꞌ xkwiꞌ suꞌwe ti ngiꞌni Ndiose loꞌoan taꞌaan.

HEBREOS 13:3

Tyaꞌan chaꞌ tiye wan sa ñaꞌan ka tayaꞌ wan ꞌin taꞌa msñian chaꞌ ꞌin Ndiose nu nsuꞌwi niꞌ ñaꞌan chkwan, ñaꞌan tiꞌ si ti kwiꞌ wan nsuꞌwi wan nde kwa loꞌo neꞌ. Kwiꞌ ngwañaꞌan, tayaꞌ wan ꞌin neꞌ taꞌaan nu lye ꞌa ndijin nu tiꞌí chunꞌ tiꞌí tiꞌ nten ꞌin neꞌ; tayaꞌ wan ꞌin neꞌ kanꞌ, ñaꞌan tiꞌ si ꞌwan, ti ykwiꞌ ti wan, ndijin wan nu tiꞌí loꞌo neꞌ.