2 CORINTIOS 6:8 - Chatino Zona Alta Occidental

⁸ Ndiya bra nu ngiꞌni tnun nten ꞌwa; xka bra, nchkwiꞌ neꞌ chaꞌ tiꞌí ꞌwa. Nchkwiꞌ neꞌ chaꞌ suꞌwe ꞌwa, kwiꞌ ngwañaꞌan nchkwiꞌ neꞌ chaꞌ kuxi ꞌwa. Ndiya bra nchkwiꞌ neꞌ chaꞌ kwiñi ꞌa ba; xka bra, nchkwiꞌ neꞌ chaꞌ chañi ꞌa chaꞌ nu nchkwiꞌ ba.

2 CORINTIOS 6:8 ပူးပေါင်းရင်းမြစ်များ

SAN MATEO 10:25

Ska ti biyaꞌ tyijin neꞌ kuneꞌ kanꞌ nu tiꞌí bra kanꞌ, sa ñaꞌan nu nchka ꞌin mstru ꞌin neꞌ; ska ti biyaꞌ ka tñan tukwi ꞌin msu kanꞌ bra kanꞌ, sa ñaꞌan nu nchka ꞌin xꞌnan neꞌ. Wa ykwiꞌ neꞌ chaꞌ lkaǎn Beelzebú, kwiꞌ nu lka xꞌnan kuneꞌ xaꞌan, kanꞌ chaꞌ ka biyaꞌ tiꞌ wan chaꞌ tiꞌí ꞌa chkwiꞌ neꞌ ꞌwan nu ndiꞌin chaꞌ ꞌwan loꞌoǔn, chaꞌ naꞌ lkaǎn Xꞌnan wan.

SAN MATEO 22:16

Ngulo neꞌ kanꞌ tñan ꞌin chinꞌ yu kuneꞌ nu ngiꞌni xaꞌan chaꞌ ꞌin neꞌ fariseo bra kanꞌ, chaꞌ chkwiꞌ biyaꞌ yu kuneꞌ kanꞌ loꞌo Jesús, nka tiye neꞌ. Mdaꞌan yu kuneꞌ kanꞌ loꞌo xka ta nten nu chaꞌ ꞌin ree Herodes, ndyaa yu seꞌen ndiꞌin Jesús. ―Mstru ―ndukwin yu kuneꞌ kanꞌ ꞌin Jesús bra kanꞌ―, jlyo tiꞌ bare chaꞌ ñi ꞌa ngiꞌnii; ti kwiꞌ chaꞌ nu ñi nu nchkwiꞌ Ndiose, kanꞌ lka chaꞌ nu nduꞌuu ꞌin nten. Loꞌo ja nduwe tiiꞌ sa ñaꞌan nnen chaꞌ nu nchkwiꞌ nten ꞌiin; ska ti biyaꞌ ngiꞌnii loꞌo nchga nten, ni siya neꞌ tiꞌi, ni siya neꞌ nu tnun nchka.

SAN MATEO 27:63

Ykwiꞌ neꞌ loꞌo Pilato bra kanꞌ: ―Yu kula ―ndukwin neꞌ ꞌin Pilato―, nsuꞌwi tiꞌ bare chaꞌ nu ykwiꞌ yu kwiñi kanꞌ xa nu ti luꞌu yu: “Xa mdaꞌa snan tsan, bra kanꞌ tyuꞌuǔn xiyaꞌ” ndukwin yu.

SAN MARCOS 12:14

Bra wa mdiyan neꞌ kanꞌ seꞌen ndiꞌin yu, ykwiꞌ neꞌ loꞌo yu bra kanꞌ: ―Mstru ―ndukwin neꞌ ꞌin Jesús―, jlyo tiꞌ ba chaꞌ ñi ꞌa ngiꞌnii; ti kwiꞌ chaꞌ nu ñi nu wa ykwiꞌ Ndiose, kanꞌ lka chaꞌ nu nduꞌuu ꞌin nten. Ja nduwe tiiꞌ sa ñaꞌan lka chaꞌ nu chkwiꞌ nten chaꞌ ꞌiin. Ska ti biyaꞌ ñaꞌaan ꞌin nchga nten, ni siya neꞌ tiꞌi, ni siya neꞌ nu tnun nchka. Kuꞌnii chaꞌ tlyu tiꞌ ꞌwa, ¿ta suꞌwe chaꞌ ndaan tñi nu ndlo neꞌ nu ngiꞌni tñan ꞌin ree tlyu nu ndiꞌin xka laꞌa tsuꞌ kanꞌ a? ―ndukwin neꞌ ꞌin Jesús―. ¿Ta nꞌni ꞌa chaꞌ taan tñi kanꞌ ꞌin neꞌ kwa a? ¿O ta suꞌwe la ni siya ja taan ꞌaan tñi kanꞌ siyaꞌ ti a?

SAN JUAN 7:12

Kaꞌan ꞌa chaꞌ nchkwiꞌ neꞌ kichen kanꞌ loꞌo taꞌa neꞌ chaꞌ ꞌin Jesús. Ndiya neꞌ nu nchkwiꞌ: “Suꞌwe ꞌa nten lka yu kwa.” Loꞌo ndiya xka ta nten nu nchkwiꞌ: “Siꞌi. Xkwiꞌ chaꞌ kwiñi nchkwiꞌ yu kwa, nñi lyoꞌo ti yu ꞌin nten.”

LOS HECHOS 10:22

―Ngulo yu kula Cornelio tñan ꞌwa chaꞌ kan ba nde re ―ndukwin neꞌ ꞌin Tyu―. Suꞌwe ꞌa tiye Cornelio kanꞌ, ngiꞌni tnun yu ꞌin Ndiose nu tlyu la ti, loꞌo suꞌwe ꞌa nchkwiꞌ nchga neꞌ judío taꞌa wan chaꞌ ꞌin yu kula kanꞌ. Wa ykwiꞌ angajle loꞌo Cornelio chaꞌ suꞌwa yu ꞌwa kan ba nde re, kan yꞌya ba ꞌwan chaꞌ tsaan la seꞌen ndiꞌin yu kula kanꞌ, nde kichen Cesarea. Ndiꞌin chaꞌ kunan Cornelio kanꞌ nchga chaꞌ nu chkwiꞌ wan loꞌo yu.

LOS HECHOS 16:39

Bra ti ndyaa wse tuꞌ naꞌan chkwan bra kanꞌ: ―ꞌWan, yu kula ―ndukwin wse kanꞌ ꞌin Palyu loꞌo Sila―, kuꞌni wan chaꞌ tlyu tiꞌ ꞌwa ―ndukwin. Ngulaa neꞌ ꞌin Palyu loꞌo Sila bra kanꞌ. ―Kuꞌni wan chaꞌ suꞌwe tyaa wan xka kichen ―ndukwin neꞌ ꞌin Palyu loꞌo Sila.

LOS HECHOS 22:12

’Mdiꞌin ska yu kula nu naan Ananías kichen kanꞌ, mdukwa ꞌa yu nchga chaꞌ nu ngwaꞌan ayman Moisés lo kityi nu ngwa sꞌni. Nchga neꞌ judío taꞌaan nu ndiꞌin kichen Damasco, ykwiꞌ neꞌ chaꞌ suꞌwe ꞌa tiye Ananías kanꞌ.

LOS HECHOS 24:5

Wa mdiyan ba nde re chaꞌ katsaꞌ ñi ba ꞌwan nchga chaꞌ kuxi nu ngiꞌni yu re. Nsuꞌwi lyo ba ꞌin yu re chaꞌ xaꞌan ꞌa yu, liyeꞌ ꞌa tiꞌ yu. Nsuꞌwa yu chaꞌ wsuun ꞌin nten nchga kichen seꞌen ndaꞌan yu, seꞌen ndiꞌin neꞌ judío taꞌa ba, chaꞌ yu re lka ndloo ꞌin nchga ta neꞌ nazareno.

LOS HECHOS 28:22

Nchka tiꞌ ba kunan ba nchga chaꞌ nu ndiya chaꞌ chkwiiꞌ loꞌo ba chaꞌ ꞌin tuwiin kwi kanꞌ, chaꞌ jlyo tiꞌ ba chaꞌ nchga kichen ndiya nten nu msinꞌ ꞌa tiꞌ ꞌin neꞌ nu wa msñi tuwiin kanꞌ.

LOS HECHOS 4:21

Ngwa tiꞌ yu kula xitsen neꞌ ꞌin Tyu loꞌo Xuwa, kanꞌ chaꞌ xiyaꞌ lye la ykwiꞌ yu kula kanꞌ loꞌo yu. Chunꞌ ndiꞌin la mda yu kula chabiyaꞌ chaꞌ tyaa yu suꞌwe ti; ja ngwa ꞌin neꞌ nu lka ndloo la ta neꞌ nu tiꞌí ꞌin Tyu loꞌo Xuwa, chaꞌ ntsen yu kula kanꞌ ꞌin nten kichen, chaꞌ ndiya tiꞌ neꞌ chaꞌ wa nchkaa yu tiꞌí kiyaꞌ, kwiꞌ lye ꞌa ndya neꞌ kichen xuꞌwe ꞌin Ndiose.

LOS HECHOS 5:13

Xka ta neꞌ kanꞌ, ytsen ꞌa neꞌ; ja mdaꞌan ꞌa neꞌ seꞌen ndiꞌin neꞌ kanꞌ, ni siya suꞌwe ꞌa ykwiꞌ nten kichen chaꞌ ꞌin nchga neꞌ nu ndiꞌin chaꞌ ꞌin loꞌo Jesucristo.

LOS HECHOS 6:3

ꞌWan neꞌ taꞌaan, suꞌwe la si kulo suwi wan xa kati yu taꞌa wan nu ka tñan kanꞌ, chaꞌ suꞌwa ti tayaꞌ neꞌ ꞌin nchga neꞌ tiꞌi taꞌaan. Ndiꞌin chaꞌ ka yu kanꞌ nten nu suꞌwe ꞌa nchkwiꞌ xka ta nten chaꞌ ꞌin neꞌ, nten nu suꞌwe ndaꞌan chaꞌ tiye ꞌin nchga chaꞌ, nten nu nsuꞌwi Tyiꞌi Ndiose niꞌ kasiya ꞌin, chaꞌ ta la jwersa ꞌin yu; ska ti ngwañaꞌan ka ñaꞌansiin suꞌwe yu nchga chaꞌ nu ndiꞌin chaꞌ kuꞌnian. Suꞌwe si kwiꞌ ngwañaꞌan ka nten nu kulo suwi wan chaꞌ ka neꞌ tñan kanꞌ.

ROMANOS 3:8

Ti kwiꞌ ti chaꞌ ja suꞌwe lka si ti kuꞌnian laan chaꞌ kuxi chaꞌ ka suꞌwe la chaꞌ ꞌñaan loꞌo Ndiose nde loo la; ndiya nten nu kwiñi lyoꞌo neꞌ ꞌin taꞌa nten neꞌ ngwañaꞌan; ndukwin neꞌ chaꞌ nchkwiꞌ ba chaꞌ kuxi kanꞌ. Ñi ꞌa kuꞌni Ndiose bra nu ta Ndiose nu tiꞌí ꞌin neꞌ nu ngwañaꞌan nchkwiꞌ chaꞌ kanꞌ.

2 CORINTIOS 1:18

Jlyo tiꞌ Ndiose chaꞌ ja siyaꞌ nchkwiꞌ ba tukwa chaꞌ loꞌo wan, ñaꞌan tiꞌ si nchkwiꞌ ba chaꞌ “ngwañaꞌan lka ska chaꞌ”, loꞌo chunꞌ ndiꞌin la nchkwiꞌ ba chaꞌ “siꞌi ngwañaꞌan lka chaꞌ”. Ja ngiꞌni ba ngwañaꞌan,

2 CORINTIOS 11:21

Loꞌo bra kanꞌ ndukwin wan chaꞌ ja ngulo suꞌwe ba tñan ꞌwan. ¡Chañi chaꞌ ja ngiꞌni tlá ba ꞌwan sa ñaꞌan nu ngiꞌni nten kanꞌ! ¡Suꞌwe sikwa! Chkwiǐnꞌ chinꞌ chaꞌ ꞌñaǎn, ti ykwiǐnꞌ tiǎn, ni siya ja nsuꞌwi chaꞌ tiya ꞌñaǎn chaꞌ chkwiǐnꞌ chaꞌ re; siꞌi nten kwiñi ti kanꞌ nu ka chkwiꞌ chaꞌ ꞌin ykwiꞌ neꞌ.

2 CORINTIOS 12:16

Ja kaꞌan ꞌa tñi ngwiji wan loǔn bra kanꞌ, loꞌo ti nsuꞌwi chinꞌ neꞌ taꞌa wan nu nchkwiꞌ chaꞌ wa mñi lyoꞌoǔn ꞌwan chaꞌ kuꞌniǐn kanan ꞌwan.

2 CORINTIOS 4:2

Wa ngulaa yaꞌ ba nchga chaꞌ kuxi nu ngiꞌni nten mnan ti, ya ñaꞌan ti chaꞌ nu njyuꞌu ꞌa tiꞌ nten kuꞌni neꞌ. Ja nñilyoꞌo ba ꞌin nten, kwiꞌ ngwañaꞌan ja nxaꞌan ba chaꞌ ꞌin Ndiose loꞌo xka la chaꞌ, bra nu nchkwiꞌ ba chaꞌ kanꞌ loꞌo nten; suꞌwe ti nduꞌu ba nchga chaꞌ nu ꞌin Jesús ꞌin neꞌ. Loꞌo chañi ꞌa chaꞌ kanꞌ, chaꞌ ngwañaꞌan ka biyaꞌ tiꞌ nchga nten chaꞌ tyukwi ti tiye ba ngiꞌni ba tñan ꞌin Ni, sa ñaꞌan lka si nduun ba tloo ykwiꞌ Ndiose.

1 TESALONICENSES 2:3

Siꞌi chaꞌ kwiñi ngwaꞌu ba ꞌwan bra kanꞌ, siꞌi chaꞌ kuxi nka tiye ba ñaꞌan ba ꞌwan, ni siꞌi chaꞌ mñi lyoꞌo ba ꞌwan.

1 TIMOTEO 3:7

Nten nu ka ndloo kanꞌ ni, suꞌwe si chkwiꞌ neꞌ taꞌa kichen tyi yu chaꞌ ꞌin yu chaꞌ suꞌwe ti ngiꞌni yu, ni siya nten nu ja ya xñi chaꞌ ꞌin Jesucristo chkwiꞌ neꞌ ngwañaꞌan ꞌin yu. Loꞌo kanꞌ ja ka chkwiꞌ neꞌ kwentu ꞌin yu kanꞌ, ja ka jwakii kuneꞌ xaꞌan ꞌin yu kanꞌ, chaꞌ kuꞌni yu chaꞌ kuxi.

1 TIMOTEO 4:10

Ndyaa ñaꞌan tianꞌ ꞌin Ndiose nu luꞌu; kanꞌ chaꞌ lye ꞌa kuꞌnian tñan ꞌin Ni, ni siya tiꞌí ꞌa tiꞌ nten ꞌñaan. Loꞌo Ndiose ni, kulaa Ni ꞌin nchga nten nu kunan chaꞌ ꞌin Ni. Bra nu xñian chaꞌ ꞌin Ni, bra kanꞌ ka biyaꞌ suꞌwe la tianꞌ chaꞌ kanꞌ.

HEBREOS 13:13

Loꞌo nan, suꞌwe si ja kutsean, ni siya tsaa loꞌo neꞌ ꞌñaan chaꞌ ta neꞌ nu tiꞌí ꞌñaan chaꞌ ꞌin Jesús, ñaꞌan tiꞌ si suꞌwa tsaan loꞌo Jesús.

1 SAN PEDRO 4:14

Bra nu chkwiꞌ nten chaꞌ tiꞌí ꞌwan chunꞌ nu lka wan nten ꞌin Krixtu, ka suꞌwe tiye wan chaꞌ ndiꞌin Tyiꞌi Ndiose loꞌo wan, kwiꞌ ngwañaꞌan tnun ꞌa chaꞌ suꞌwe ndiꞌin ꞌin Ndiose. Nchkwiꞌ neꞌ kanꞌ chaꞌ kuxi ꞌin Ndiose; ꞌwan ni, suꞌwe ꞌa ngiꞌni tnun wan ꞌin Ni.

3 SAN JUAN 1:12

Suꞌwe ꞌa nchkwiꞌ nchga nten chaꞌ ꞌin Demetrio. Loꞌo nan, xa nu ñaꞌaan ꞌin yu, nchka biyaꞌ tianꞌ chaꞌ suꞌwe ꞌa ngiꞌni yu loꞌo nchga nten. Ngwañaꞌan bare, nchkwiꞌ ba loꞌo wan ni, chaꞌ chañi ꞌa chaꞌ nu nchkwiꞌ neꞌ ꞌin yu chaꞌ suꞌwe ꞌa tiye yu. Wa jlyo suꞌwe tiꞌ wan chaꞌ nchkwiꞌ ba chaꞌ nu ñi loꞌo wan.

EL APOCALIPSIS 3:9

Loꞌo ndiya xka ta nten nde kwa nu nchkwiꞌ chaꞌ kwiñi loꞌo taꞌa wan chaꞌ nten ꞌñaǎn lka neꞌ, loꞌo ñi la nchkwianꞌ chaꞌ ndiꞌin chaꞌ ꞌin neꞌ kanꞌ loꞌo Satanás. Chunꞌ ndiꞌin la chinꞌ kuloǔn tñan ꞌin neꞌ kanꞌ, chaꞌ kan neꞌ seꞌen ndiꞌin wan, tyuun xtyinꞌ neꞌ tloo wan chaꞌ kuꞌni tnun neꞌ ꞌwan bra kanꞌ; ngwañaꞌan ka biyaꞌ tiꞌ neꞌ chaꞌ ndiya ꞌa tiǎnꞌ ꞌwan.