2 CORINTIOS 11:23 - Chatino Zona Alta Occidental

²³ Ndukwin neꞌ kanꞌ, chaꞌ tñan ꞌin Krixtu ngiꞌni neꞌ; ti kwiꞌ tñan kanꞌ ngiꞌniǐn. Ni siya ja nsuꞌwi ꞌa chaꞌ tiya ꞌñaǎn chaꞌ chkwiǐnꞌ ngwañaꞌan, suꞌwe la tñan ngiꞌniǐn ke tñan nu ngiꞌni neꞌ kanꞌ; lye la yꞌniǐn tñan, taꞌa ti msuꞌwa neꞌ ꞌñaǎn niꞌ ñaꞌan chkwan, tyun yaꞌ wa mjiꞌin neꞌ ꞌñaǎn loꞌo kijin, taꞌa ti nchka chaꞌ wa kajaǎn tiǎn chaꞌ ꞌin Krixtu.

2 CORINTIOS 11:23 ပူးပေါင်းရင်းမြစ်များ

LOS HECHOS 14:19

Chunꞌ ndiꞌin la mdiyan la chinꞌ neꞌ judío nu xaꞌan ꞌa tiye, neꞌ nu mdoꞌo kichen Antioquía kanꞌ; loꞌo xka ta neꞌ nu mdoꞌo kichen Iconio mdiyan neꞌ. Ykwiꞌ neꞌ kanꞌ loꞌo neꞌ kichen chaꞌ kasinꞌ tiꞌ neꞌ ꞌin Palyu. Bra kanꞌ nguun neꞌ kichen kee ꞌin Palyu chaꞌ ngwa tiꞌ neꞌ kujwi neꞌ ꞌin yu kanꞌ. Mskeꞌ tiꞌ neꞌ kichen chaꞌ ngujwi yu, kanꞌ mjwakii suweꞌ neꞌ ꞌin yu ndyaa loꞌo neꞌ ꞌin yu la tuꞌwa kichen.

LOS HECHOS 20:23

Sa kanꞌ ti chaꞌ jlyo tiǎnꞌ, chaꞌ nchga kichen seꞌen ndaꞌaǎn nchkwiꞌ neꞌ chaꞌ xñi nten xaꞌan ꞌñaǎn, chaꞌ suꞌwa neꞌ ꞌñaǎn niꞌ ñaꞌan chkwan; nchkwiꞌ neꞌ chaꞌ lye ꞌa tyijiǐn nu tiꞌí nde kichen Jerusalén kanꞌ. Sa kwa ti chaꞌ jlyo tiǎnꞌ, chaꞌ ngwañaꞌan lka chaꞌ nu ytsaꞌ Tyiꞌi Ndiose ꞌñaǎn.

LOS HECHOS 21:11

Xa nu mdiyan yu seꞌen ndiꞌin ba, bra kanꞌ mxtiꞌ yu kijin nchkanꞌ siꞌ Palyu, loꞌo ti ykwiꞌ ti yu mskanꞌ yu yaꞌ yu loꞌo kiyaꞌ yu loꞌo kijin kanꞌ. Kanꞌ nu ykwiꞌ Agabo loꞌo ba: ―Wa ytsaꞌ Tyiꞌi Ndiose ꞌñaǎn ―ndukwin Agabo ꞌwa― chaꞌ kwiꞌ ngwañaꞌan skanꞌ nten ꞌin yu nu nka xꞌnan kijin re; sa ñaꞌan nu nchkaǎnꞌ ykwiǐnꞌ, ngwañaꞌan skanꞌ neꞌ judío taꞌaan ꞌin yu re nde Jerusalén ―ndukwin Agabo ꞌwa―. Tsaa loꞌo neꞌ ꞌin yu re seꞌen ndiꞌin neꞌ xka laꞌa tsuꞌ chaꞌ ta neꞌ nu tiꞌí ꞌin yu ―ndukwin.

LOS HECHOS 25:14

Tyun tsan nganun neꞌ seꞌen ndiꞌin Festo. Laja tsan kanꞌ ykwiꞌ Festo chaꞌ ꞌin Palyu loꞌo neꞌ: ―Nde ndiya ska nten nu msuꞌwa Félix niꞌ ñaꞌan chkwan ―ndukwin Festo ꞌin neꞌ―.

LOS HECHOS 27:1

Loꞌo ngwa suꞌwa chaꞌ ꞌin neꞌ loꞌo taꞌa neꞌ chaꞌ suꞌwa neꞌ ꞌin Palyu tsaa yu la lo yuu Italia bra kanꞌ. Loꞌoǔn nu ndaꞌaǎn kityi re, mdaꞌaǎn loꞌo neꞌ bra kanꞌ. Ngulo neꞌ tñan ꞌin ska capitán ꞌin sndaru nu naan Julio chaꞌ tsaa loꞌo ꞌin Palyu loꞌo xka ta presu. Julio lka capitán ꞌin ska ta sndaru nu ꞌin Augusto.

LOS HECHOS 28:16

Ngala ba kichen tlyu nu naan Roma bra kanꞌ, mdiyan loꞌo capitán ꞌin nchga presu kanꞌ seꞌen ndiꞌin xꞌnan xka ta sndaru nu ndiꞌin kwan nde kanꞌ. Loꞌo mda neꞌ chabiyaꞌ ꞌin Palyu chaꞌ tyiꞌin yu xka tuꞌwa naꞌan bra kanꞌ, ni siya ñaꞌan ti ndiꞌin ska sndaru kwan ꞌin yu nchga bra.

LOS HECHOS 28:30

Tukwa yijan nganun Palyu nde kichen Roma kwa, mdiꞌin yu ska niꞌ ñaꞌan nu mjñan ti yu. Suꞌwe nka tiye yu ñaꞌan yu ꞌin nchga nten nu mdaꞌan seꞌen ndiꞌin yu,

LOS HECHOS 9:16

Kwaꞌuǔn ꞌin yu sa ñaꞌan nu tiꞌí nu tyijin yu laja nu chkwiꞌ yu chaꞌ ꞌñaǎn loꞌo nten.

ROMANOS 8:36

Nde ndiya ska chaꞌ nu ndukwa lo kityi ꞌin Ndiose: Chunꞌ nu ytean chaꞌ ꞌin Ndiose, nchga bra ndujwi neꞌ ꞌñaan. Ngiꞌni neꞌ loꞌoan sa ñaꞌan si lkaan slyaꞌ, ti kwiꞌ slyaꞌ nu ndaꞌan loꞌo nten ꞌin iꞌ seꞌen ndiꞌin nu ndujwi ꞌin iꞌ.

1 CORINTIOS 15:10

Ni siya kuxi ꞌa yꞌniǐn nu ngwa sꞌni, lye ꞌa nchka tꞌnan tiꞌ Ndiose ꞌñaǎn, chunꞌ suꞌwe ꞌa nka tiye Ni ñaꞌan Ni ꞌñaǎn; yꞌni Ni chaꞌ ndaꞌaǎn tñan ꞌin Ni bra kanꞌ. Loꞌo ja yꞌniǐn ñuꞌuǔn nchga chaꞌ suꞌwe nu wa yꞌni Ni loꞌoǔn. Ni siya xka neꞌ taꞌa ba ngiꞌni neꞌ ti kwiꞌ tñan nu ngiꞌniǐn, lye la yꞌniǐn tñan ke neꞌ kanꞌ. Loꞌo siꞌi nan nchka la ꞌñaǎn; Ndiose ndiꞌin loꞌoǔn chaꞌ ka chkwiǐnꞌ loꞌo nten, chaꞌ suꞌwe ꞌa nka tiye Ni ñaꞌan Ni ꞌñaǎn.

1 CORINTIOS 3:5

¿Ti ka nu lka Polo kanꞌ sikwa a? ¿Ti ka nu lkaǎn sikwa a? ¿Ta siꞌi tñan ꞌin Ndiose ngiꞌni taꞌa ba a? Chunꞌ chaꞌ nu ykwiꞌ ba loꞌo wan, kanꞌ chaꞌ msñi wan chaꞌ ꞌin Krixtu nu nka Xꞌnaan bra kanꞌ. Wa lka tñan ngiꞌni skaa ba, ti kwiꞌ tñan nu nda Xꞌnaan ꞌwa chaꞌ kuꞌni ba.

1 CORINTIOS 4:1

Ndiꞌin chaꞌ tyuꞌwi tiꞌ wan chaꞌ kwiꞌ tñan ꞌin Krixtu ngiꞌni ba. Ndiꞌin chaꞌ kwaꞌu ba ꞌin nten nchga chaꞌ nu wa ngwaꞌu Ndiose ꞌwa; ska chaꞌ nu ja ya kunan nten chalyuu siyaꞌ ti, kanꞌ lka chaꞌ nu kwaꞌu ba ꞌin neꞌ.

1 CORINTIOS 4:11

Ni siya kwiꞌ ñaꞌan bra ni, ti ndiya bra nu ja ndyiji nan ku ba, ja ndyiji nan koꞌo ba; ni siya teꞌ kusun nchkuꞌ ba, ndiꞌin bra. Njyiꞌin neꞌ ꞌwa, loꞌo ja ndukwa naꞌan tyi ba, xkwiꞌ ndaꞌan yuꞌwi ti ba.

1 CORINTIOS 4:9

Nxkeꞌ tiǎnꞌ chaꞌ wa mxnun tijyuꞌ Ndiose ꞌwa loꞌo taꞌa ndaꞌan ba. Kulo ndukwa la ngulo Ni tñan ꞌwa chaꞌ tsaa ba tijyuꞌ chaꞌ chkwiꞌ ba chaꞌ ꞌin Ni loꞌo nten; loꞌo ni, nganun chunꞌ la ba ꞌin taꞌaan, ñaꞌan tiꞌ presu nu ngita chaꞌ kujwi nten ꞌin. Wa lka ba ska nan nu naꞌan kwiꞌya nten ꞌin, ni siya nten chalyuu ñaꞌan kwiꞌya ꞌwa, ni siya angajle nu ndiꞌin loꞌo Ndiose nde niꞌ kwan ñaꞌan kwiꞌya ꞌwa.

2 CORINTIOS 10:7

Ndla ꞌa tiꞌ wan nchkwiꞌ wan chaꞌ ꞌwa. Suꞌwe la si kuwe chinꞌ tiꞌ wan ti kulo la sa ñaꞌan ndyoꞌo skaa chaꞌ nu ñi; nchga nten nu nxkeꞌ tiꞌ chaꞌ lka neꞌ chaꞌ ꞌin Krixtu, nꞌni chaꞌ kuwe suꞌwe la tiꞌ neꞌ kanꞌ, chaꞌ ka biyaꞌ tiꞌ neꞌ bra kanꞌ, chaꞌ loꞌo bare lka ba chaꞌ ꞌin Krixtu.

2 CORINTIOS 11:5

Siꞌi nan kuxi la chaꞌ nu nchkwiǐnꞌ, kwiꞌ siꞌi nan suꞌwe la chaꞌ nu nchkwiꞌ xka ta nten kanꞌ; nan wa mñi lyoꞌo neꞌ ꞌwan seꞌen nchkwiꞌ neꞌ chaꞌ lka neꞌ tñan ꞌin Krixtu, kanꞌ chaꞌ xka ñaꞌan chaꞌ ndaꞌan tiye wan ni.

2 CORINTIOS 3:6

Wa mdiya ska chaꞌ kwi re nu tka nchkwiꞌ Ndiose loꞌoan, ska tñan nu ngiꞌni Tyiꞌi Ndiose lka chaꞌ re. Ja lka ran ñaꞌan tiꞌ ska tñan nu ndatsaa kityi kula kanꞌ ꞌñaan chaꞌ kuꞌnian. Wa mdyii chaꞌ ꞌñaan siyaꞌ ti siꞌya yuweꞌ nu ndiꞌin ꞌñaan chunꞌ tñan nu ndlo kityi kula kanꞌ ꞌñaan, loꞌo ni, wa mjwi chalyuu kwi ꞌñaan chunꞌ tñan nu ngiꞌni Tyiꞌi Ndiose.

2 CORINTIOS 4:11

Nchga bra nu ndiꞌin ba lo chalyuu ndiꞌin ꞌa chaꞌ kuxi nu ka kujwi ꞌwa, chaꞌ kaꞌan ꞌa chaꞌ tukwi ndyukwa ba nchga seꞌen ndaꞌan ba lo tñan ꞌin Jesús. Ngwañaꞌan ka ñaꞌan nten chaꞌ ti ndiꞌin Jesús loꞌo ba; kanꞌ chaꞌ ti nsuꞌwi ba chalyuu, ni siya tiꞌí ti ñaꞌan ndaꞌan ba.

2 CORINTIOS 6:9

Ndiya bra ngiꞌni neꞌ chaꞌ nsuꞌwi lyo neꞌ ꞌwa; xka bra ngiꞌni neꞌ chaꞌ ja siyaꞌ nsuꞌwi lyo neꞌ ꞌwa. Ndiya bra ndaꞌan ba seꞌen kuxi, seꞌen nu wa kaja ti ba, loꞌo ti luꞌu ba; lye ꞌa nda neꞌ nu tiꞌí ꞌwa, loꞌo ja nchka kujwi neꞌ ꞌwa.

GÁLATAS 6:17

Nu ngwa sꞌni ni, tnun ꞌa tñan nda wan ꞌñaǎn, chaꞌ ja ndukwa ꞌa wan chaꞌ nu nchkwiǐnꞌ loꞌo wan; kanꞌ chaꞌ ni, ja kuꞌni wan chaꞌ wsuun loꞌoǔn xiyaꞌ. Wa lka nsuꞌwi biyaꞌ chuǔnꞌ, kanꞌ lka biyaꞌ seꞌen mda neꞌ nu tiꞌí ꞌñaǎn chunꞌ chaꞌ ngiꞌniǐn tñan ꞌin Jesús.

EFESIOS 3:1

Siꞌya chaꞌ nu nchkwiǐnꞌ loꞌo wan re, kanꞌ chaꞌ kaꞌan chaꞌ njñaǎn ꞌin Krixtu chaꞌ ꞌwan. Ti kwiꞌ Palyu lkaǎn; nsuꞌwiǐn niꞌ ñaꞌan chkwan ni, chunꞌ nchkwiǐnꞌ chaꞌ ꞌin Jesucristo loꞌo nten, chunꞌ ndayaǎnꞌ ꞌwan ni siya ja lka wan neꞌ judío.

EFESIOS 4:1

Presu lkaǎn ni, chaꞌ nchkwiǐnꞌ chaꞌ ꞌin nu nka Xꞌnaan loꞌo nten. Nchkwiǐnꞌ loꞌo wan ni, chaꞌ suꞌwe ti kuꞌni wan loꞌo xka ta nten; sa ñaꞌan nchkwiꞌ chaꞌ ꞌin Ndiose nu yꞌni xaꞌan wan ti kulo, bra nu ngulo suwi Ni ꞌwan, ti kwiꞌ ngwañaꞌan kuꞌni wan loꞌo xka ta nten.

EFESIOS 6:20

Wa ngulo suwi Ni ꞌñaǎn chaꞌ tsaꞌaǎn tijyuꞌ, chaꞌ chkwiǐnꞌ chaꞌ kanꞌ loꞌo nten; kanꞌ chaꞌ lkaǎn presu ni. Chkwiꞌ wan loꞌo Ndiose chaꞌ ꞌñaǎn sikwa, chaꞌ ka chkwiǐnꞌ ñi chaꞌ kanꞌ loꞌo nten, sa ñaꞌan nu ndiꞌin chaꞌ chkwiǐnꞌ.

FILIPENSES 1:13

Nsuꞌwiǐn niꞌ ñaꞌan chkwan ni, kanꞌ chaꞌ jlyo tiꞌ nchga nten nu ndiꞌin naꞌan tnun ꞌin gobierno re, chaꞌ wa msuꞌwa neꞌ ꞌñaǎn niꞌ ñaꞌan chkwan chunꞌ chaꞌ ndaꞌaǎn lo tñan ꞌin Krixtu; ni siya nchga sndaru nu ndiꞌin nde re, ni siya xka ta nten, jlyo tiꞌ neꞌ chaꞌ kanꞌ.

FILIPENSES 2:17

Jlyo tiǎnꞌ chaꞌ siꞌi chinꞌ ti tñan yꞌni wan bra nu msñi wan chaꞌ ꞌin Ndiose; kaꞌan ꞌa nan nu mxnun wan, tyun yaꞌ nda wan tyukwi ñaꞌaan wan chaꞌ ka wan tñan ꞌin Krixtu, chunꞌ nu wa msñi wan chaꞌ ꞌin Ni. Loꞌoǔn kujwi neꞌ ꞌñaǎn ni, nxkeꞌ tiǎnꞌ; kanaꞌ chalyuu ꞌñaǎn ni chaꞌ ꞌwan. Loꞌo ja ntseěn; ni siya ngwañaꞌan ka ꞌñaǎn, suꞌwe ꞌa ka tiyeěn seꞌen ndiꞌiǐn. Kwiꞌ ngwañaꞌan nxkeꞌ tiǎnꞌ chaꞌ ka suꞌwe tiye wan, chaꞌ suꞌwa ti ka suꞌwe tiyeěn loꞌo wan.

COLOSENSES 1:24

Suꞌwe nxkeꞌ tiǎnꞌ ni siya wa mdijiǐn chinꞌ nu tiꞌí chaꞌ ꞌwan; suꞌwe nxkeꞌ tiǎnꞌ chaꞌ ndijiǐn nu tiꞌí chaꞌ ka suꞌwe chaꞌ ꞌin nchga ta nten nu msñi chaꞌ ꞌin Krixtu nchga kichen. Loꞌo Krixtu ni, mdijin ꞌa Ni nu tiꞌí lo chalyuu chaꞌ ꞌñaan, chaꞌ kaan nten ꞌin ykwiꞌ Ni; kwiꞌ ngwañaꞌan naꞌ, ndijiǐn nu tiꞌí, chaꞌ nu ndiꞌin chaꞌ ka suꞌwa chaꞌ ꞌñaan taꞌaan loꞌo ykwiꞌ Krixtu bra nu mdijian nu tiꞌí lo chalyuu re chaꞌ wa ytean chaꞌ ꞌin Krixtu.

COLOSENSES 1:29

Kanꞌ chaꞌ lye ꞌa ngiꞌniǐn tñan; ngula ꞌa tñan ngiꞌniǐn, loꞌo ngwañaꞌan tlyu ꞌa jwersa nda ykwiꞌ Krixtu ꞌñaǎn chaꞌ xuꞌwi niꞌ kasiya ꞌñaǎn, chaꞌ taloǔn kuꞌniǐn tñan re.

1 TIMOTEO 4:6

Loꞌo nuꞌwin Timu, kwaꞌuu nchga chaꞌ nu ndaꞌaǎn lo kityi re ꞌin taꞌa nten ꞌin Jesucristo nde kwa, chaꞌ ka nuꞌwin ska nten nu suꞌwe ꞌa ngiꞌni tñan ꞌin Jesucristo. Tyuꞌwi suꞌwe tiiꞌ nchga chaꞌ nu wa msñii, kwiꞌ chaꞌ ꞌin Ndiose; loꞌo ti xñii suꞌwe tuwiin ꞌin Xꞌnaan bra kanꞌ, sa ñaꞌan nu ngiꞌnii ni.

2 TIMOTEO 1:16

Ska ti Onesíforo ni, lye ꞌa mdayaꞌ yu kanꞌ ꞌñaǎn; loꞌo ja mjyuꞌu tiꞌ yu chaꞌ nsuꞌwiǐn niꞌ ñaꞌan chkwan, taꞌa ti ndaꞌan naꞌan yu ꞌñaǎn nde re. Kanꞌ chaꞌ nchka tiǎnꞌ chaꞌ chka tꞌnan tiꞌ Ndiose ꞌin yu, loꞌo nchga nten nu ndiꞌin seꞌen ndiꞌin yu kanꞌ.

2 TIMOTEO 1:8

Ja ka jyuꞌu tiiꞌ sikwa; katsaaꞌ chaꞌ re ꞌin nten, sa ñaꞌan nka nchga chaꞌ ꞌin Xꞌnaan. Kwiꞌ ngwañaꞌan, ja ka jyuꞌu tiiꞌ chaꞌ nsuꞌwiǐn niꞌ ñaꞌan chkwan. Nda neꞌ nu tiꞌí ꞌñaǎn chaꞌ nchkwiǐnꞌ chaꞌ ꞌin Xꞌnaan, kanꞌ chaꞌ ja tyaꞌan chaꞌ tiyee lye ꞌa si loꞌoo ta neꞌ nu tiꞌí ꞌiin chaꞌ nchkwiiꞌ chaꞌ suꞌwe ꞌin Jesucristo loꞌo nten. Ta Ndiose jwersa ꞌñaan chaꞌ taloan,

2 TIMOTEO 2:9

kanꞌ chaꞌ tiꞌí tiꞌ nten ꞌñaǎn ni. Sa ñaꞌan nu nda neꞌ nu tiꞌí ꞌin ska nten nu ndiꞌin kiꞌya ꞌin, ngwañaꞌan mskanꞌ neꞌ ꞌñaǎn niꞌ ñaꞌan chkwan ni. Chañi chaꞌ msuꞌwa neꞌ ꞌñaǎn niꞌ ñaꞌan chkwan, ni siya ja nchka ꞌin neꞌ suꞌwa nchkunꞌ neꞌ chaꞌ suꞌwe ꞌin Ndiose ngwañaꞌan;

2 TIMOTEO 3:11

ni siya lye ꞌa tiꞌí tiꞌ nten ꞌñaǎn, ni siya lye ꞌa ndijiǐn nu tiꞌí. Wa jlyo tiiꞌ sa ñaꞌan chaꞌ kuxi ngwa ꞌñaǎn nde kichen Antioquía, nde kichen Iconio, nde kichen Listra, bra nu ngwa tiꞌí tiꞌ neꞌ ꞌñaǎn la kanꞌ; loꞌo nu nka Xꞌnaan ngulaa ꞌñaǎn ꞌin nchga chaꞌ kuxi kanꞌ.

HEBREOS 10:34

Kwiꞌ ngwañaꞌan, ndyaa naꞌan wan ꞌin neꞌ taꞌa wan bra nu yuꞌwi neꞌ niꞌ ñaꞌan chkwan, suꞌwe ꞌa mdayaꞌ wan ꞌin neꞌ kanꞌ bra kanꞌ. Ni siya yꞌni nten kunan nchga chaꞌ suꞌwe nu mdiꞌin ꞌwan, mdalo wan bra kanꞌ. Suꞌwe ꞌa ngwa tiye wan, chaꞌ wa jlyo tiꞌ wan chaꞌ suꞌwe la siyaꞌ ti chaꞌ ꞌin Jesús nu wa msñi wan kanꞌ; jlyo tiꞌ wan chaꞌ ja tsaa tii ꞌa chaꞌ kanꞌ, ti kwiꞌ chaꞌ nu wa ynan wan ꞌin Jesús.