1 TIMOTEO 3:16 - Chatino Zona Alta Occidental16 Chañi chaꞌ tnun ꞌa chaꞌ suꞌwe ꞌin Jesucristo nu wa msñian. Nde ndukwa chaꞌ kanꞌ: Nu ngwa sꞌni, ja tukwin ngwa biyaꞌ tiꞌ sa ñaꞌan nu kulaa Ndiose ꞌin nten; loꞌo ni, jlyo tianꞌ, chaꞌ ngula Jesucristo yan Ni chalyuu, chaꞌ ngwa Ni nten. Kwiꞌ ngwañaꞌan nchkwiꞌ Tyiꞌi Ndiose chaꞌ ꞌin Ni, chaꞌ ska nten nu luwi ꞌa lka Ni; wa naꞌan angajle ꞌin Jesús, yu nu luwi kanꞌ. Loꞌo ni, nduꞌu nten chaꞌ ꞌin Jesucristo ꞌin nten nu ndiꞌin tyukwi ñaꞌaan chalyuu; loꞌo nxñi neꞌ nchga kichen chaꞌ nu nchkwiꞌ neꞌ bra kanꞌ. Chunꞌ ndiꞌin la ndyaa Jesús nde seꞌen ndiꞌin Ndiose Stian nde niꞌ kwan, loꞌo ni, tlyu ꞌa lka Jesús seꞌen ndiꞌin Ni nde kwa. အခန်းကိုကြည့်ပါ။ |
1 TIMOTEO 3:16
81 ပူးပေါင်းရင်းမြစ်များ
Mxkwen Jesús ꞌin neꞌ bra kanꞌ: ―Wa mda Ndiose chabiyaꞌ ꞌwan chaꞌ ka biyaꞌ tiꞌ wan ska chaꞌ nu yuꞌwi kutsiꞌ ꞌin ayman sꞌni, sa ñaꞌan ka xa nu ka Ndiose ndloo la niꞌ kasiya ꞌin nten. Nten nu ja msñi chaꞌ ꞌin Ndiose ni, ja kiꞌya neꞌ kwenta bra nu kunan neꞌ ska chaꞌ nu nchkwiǐnꞌ; tukwi ꞌa chaꞌ kanꞌ, xkeꞌ tiꞌ neꞌ.
’Chunꞌ ndiꞌin la suꞌwaǎn nu lka Tyiꞌi Ndiose chaꞌ kan Ni lo chalyuu, Tyiꞌi Ni ykwiꞌ, nu mdoꞌo seꞌen ndiꞌin Ndiose nde niꞌ kwan ―ndukwin Jesús―. Kanꞌ lka nu kwaꞌu ꞌwan nchga chaꞌ nu ñi, kanꞌ lka nu tayaꞌ ꞌwan nchga bra chabiyaꞌ ꞌñaǎn. Bra nu kan Ni kanꞌ lo chalyuu, bra kanꞌ kwaꞌu Ni nchga chaꞌ nu ñi ꞌwan, nchga chaꞌ nu nsuꞌwi ꞌñaǎn ―ndukwin Jesús―.
Loꞌo ni, ndiꞌin chaꞌ ñaꞌansiin wan ꞌwan, ti ykwiꞌ ti wan; kwiꞌ ngwañaꞌan, ñaꞌansiin wan ꞌin nchga nten ꞌin Jesucristo nde kichen tyi wan, chaꞌ wa nda Tyiꞌi Ndiose tñan ꞌwan chaꞌ ka wan ndloo ꞌin nchga ta nten kanꞌ. Tnun ꞌa tñan yꞌni Xꞌnaan chaꞌ katin kiꞌya nu ndiꞌin ꞌñaan bra nu ngujwi yu lo wsi, ngalu tnen ykwiꞌ yu.
Nchka tiǎnꞌ kunichaǎnꞌ ska chaꞌ ꞌwan: ¿Ta ja ya kunan neꞌ judío chaꞌ ꞌin Krixtu sikwa a? ¡Wa ynan neꞌ!, chaꞌ wa ndukwa ska chaꞌ lo kityi kula nu nchkwiꞌ re: Ñaꞌaan chalyuu wa ynen chaꞌ nu ykwiꞌ neꞌ loꞌo nten; nchga seꞌen ynen chaꞌ nu ykwiꞌ neꞌ, ni siya seꞌen wa tijyuꞌ la ynen chaꞌ kanꞌ. Ngwañaꞌan nchkwiꞌ kityi.
Kuꞌni tnuan ꞌin Ndiose sikwa. Ka ꞌin Ni kuꞌni Ni chaꞌ ngula tiye wan, chaꞌ tyiꞌin wan sa ñaꞌan nu ndiꞌin chaꞌ tyiꞌian lo chalyuu, xa nu yteen suꞌwean chaꞌ ꞌin Jesús. Chaꞌ suꞌwe nu ndiꞌin ꞌin Jesucristo ni, kanꞌ lka chaꞌ nu nchkwiǐnꞌ loꞌo nten, ni siya tyun ꞌa siyentu yijan yuꞌwi kutsiꞌ chaꞌ nu nchkwiꞌ sa ñaꞌan nu kuꞌni Ndiose nde loo la.
Loꞌo ni, wa ngwaꞌu suꞌwe Ni chaꞌ kanꞌ ꞌñaan. Kanꞌ chaꞌ ndiꞌin chaꞌ kanen chaꞌ ꞌin Krixtu ñaꞌaan chalyuu seꞌen ndiꞌin nten sa yaꞌ kunan nchga neꞌ xka laꞌa tsuꞌ, chaꞌ ka sten neꞌ chaꞌ ꞌin ska ti Ndiose, chaꞌ kunan neꞌ nchga chaꞌ nu nchkwiꞌ Ni. Ti kwiꞌ ti chaꞌ kanꞌ lka chaꞌ nu ngwaꞌan ayman kula lo kityi ꞌin Ndiose, sa ñaꞌan ka chaꞌ nde loo la. Ngulo Ndiose tñan chaꞌ kanen chaꞌ kanꞌ tijyuꞌ, kanꞌ chaꞌ ngwañaꞌan nchka ni; ti kwiꞌ Ndiose lka nu ja tsaa tii ꞌa chaꞌ ꞌin Ni.
¡Ja nchka tiꞌ Ni kuꞌni Ni ngwañaꞌan! Xkwiꞌ ñi ꞌa ngiꞌni Ndiose loꞌo nten ꞌin Ni, ni siya kwiñi ꞌa ngiꞌni nchga nten chalyuu. Nde ndukwa ska chaꞌ ꞌin Ndiose nu nchkwiꞌ: Bra nu chkwiiꞌ, bra kanꞌ ka biyaꞌ tiꞌ neꞌ chaꞌ ñi ꞌa ngiꞌnii; bra nu ka biyaꞌ ꞌiin tloo neꞌ nu nka tñan, ka kuloo luwi ꞌiin bra kanꞌ.
Wa yꞌni Ndiose ska chaꞌ tnun nu ja ngwa ꞌa kuꞌni chaꞌ kula nu ykwiꞌ ayman Moisés loꞌo nten nu ngwa sꞌni. Ja ngwa tñan chaꞌ kula kanꞌ, chunꞌ xaꞌan ꞌaan loꞌo taꞌaan ndiꞌian lo chalyuu; Ndiose ni, ngwa ꞌin Ni kuꞌni chaꞌ tnun kanꞌ, chunꞌ nu msuꞌwa Ni ꞌin Sñiꞌ ykwiꞌ Ni yan Ni lo chalyuu, chaꞌ ngwa Ni nten. Msuꞌwa Ni ꞌin Jesús yan, chaꞌ ngwa yu ska lomstan nu luꞌu; kanꞌ lka lomstan nu ngwa kuꞌni tyii kiꞌya nu ndukwian. Ngwa Jesús nten; ngwa yu sa ñaꞌan lka nchga nten chalyuu, chaꞌ ngwañaꞌan ngwa ꞌin yu kuꞌni tyii yu kiꞌya nu ndukwian taꞌaan nten chalyuu. Kanꞌ chaꞌ ngwa Ni nten.
Ngwaꞌu Ndiose chaꞌ suꞌwe kanꞌ ꞌñaǎn chaꞌ chkwiǐnꞌ loꞌo nten. Ja ya ka biyaꞌ tiꞌ nten chalyuu chaꞌ kanꞌ. Ti bra nu ja ya kwiñan Ni chalyuu, ti bra kanꞌ mskeꞌ tiꞌ Ni sa ñaꞌan nu kuꞌni Ni; ngwa tiꞌ Ndiose chaꞌ kulaa Ni ꞌñaan ꞌin chaꞌ xaꞌan xa nu xñian chaꞌ ꞌin Jesús. Tnun ꞌa chaꞌ suꞌwe ka ꞌñaan bra kanꞌ.
chaꞌ Jesucristo nu lka ska ti Sñiꞌ Ndiose ni, siꞌi tukwa chaꞌ ndaꞌan tiye Ni. Wa ykwiꞌ ba chaꞌ ꞌin Jesús seꞌen ndiꞌin wan, loꞌoǔn wa ykwiǐnꞌ loꞌo wan, loꞌo Silvano, loꞌo Timu, wa ykwiꞌ ba chaꞌ ꞌin Ni. Loꞌo ja siyaꞌ nchkwiꞌ Ni chaꞌ “siꞌi ngwañaꞌan lka ska chaꞌ” si wa ykwiꞌ Ni ska yaꞌ chaꞌ “ngwañaꞌan lka chaꞌ kanꞌ”. Ska ti Krixtu lka nu chañi chaꞌ nchkwiꞌ chaꞌ nu ñi,
Ñaꞌan ti ndloo ꞌa chaꞌ ꞌwan chaꞌ lye la kanun tsaa chaꞌ ꞌin Krixtu niꞌ kasiya ꞌwan, chaꞌ Krixtu lka seꞌen ndukwa kiyaꞌ nchga chaꞌ kanꞌ. Ja ta wan chabiyaꞌ chaꞌ kwiñi lyoꞌo nten ꞌwan. Si xñi wan chaꞌ nu nchkwiꞌ neꞌ kanꞌ, ja ka ꞌa tyaꞌan chaꞌ tiye wan ꞌin chaꞌ suꞌwe nu kaja ꞌwan nde loo la, ti kwiꞌ chaꞌ nu wa ynan wan ti kulo. Chunꞌ chaꞌ suꞌwe ꞌin Krixtu kanꞌ, kanꞌ chaꞌ ndaꞌan nten tyukwi ñaꞌaan chalyuu nchkwiꞌ neꞌ chaꞌ kanꞌ loꞌo xka ta nten. Loꞌo ngwañaꞌan naꞌ, Palyu, ndaꞌaǎn ꞌaǎn lo tñan kanꞌ.
Ska chaꞌ tnun nu suꞌwe ꞌa lka chaꞌ re, ska chaꞌ nu ndiꞌin chaꞌ kunan nchga lo nten chalyuu lka chaꞌ ꞌin Ndiose re; ja mjwi chabiyaꞌ chaꞌ ka biyaꞌ tiꞌ nten chaꞌ re nu ngwa sꞌni. Nde lka chaꞌ nu ja ya kunan nten: Ka tyiꞌin Krixtu loꞌoan lo chalyuu, ni siya ni ti; loꞌo ngwañaꞌan chunꞌ ndiꞌin la ka tyiꞌin chaꞌ ꞌñaan loꞌo Ndiose la seꞌen tlyu nu xaa ꞌa seꞌen ndiꞌin Ni.
Wa ndijyan nganen la chaꞌ suꞌwe ꞌin Jesús kanꞌ tyukwi ñaꞌaan chalyuu, loꞌo ngwañaꞌan nchka suꞌwe kasiya ꞌin nten bra nu nganan neꞌ chaꞌ kanꞌ. Kwiꞌ ngwañaꞌan ngwa bra nu ynan wan chaꞌ kanꞌ ti kulo; ti bra kanꞌ ynan wan chaꞌ ngiꞌni ꞌa Ndiose chaꞌ suꞌwe loꞌo nten, bra kanꞌ ngwa biyaꞌ tiꞌ wan chaꞌ chañi ꞌa lka chaꞌ kanꞌ.
Kanꞌ chaꞌ ngiꞌniǐn tñan, chaꞌ ka tukwi la tiye neꞌ chaꞌ ꞌin Ndiose, chaꞌ suꞌwa ka tiye neꞌ loꞌo xka ta taꞌa neꞌ. Bra kanꞌ ja kutsen neꞌ bra nu chkwiꞌ neꞌ chaꞌ ꞌin Krixtu, chaꞌ suꞌwe ꞌa nchka biyaꞌ tiꞌ neꞌ chaꞌ re. Ngwañaꞌan tyija lyo chaꞌ ꞌin neꞌ, chaꞌ kwiꞌ chaꞌ ꞌin Krixtu nchkwiꞌ chaꞌ re, ti kwiꞌ chaꞌ ꞌin Ndiose nu ja ya ka biyaꞌ tiꞌ nten nu ngwa sꞌni.
Ngwañaꞌan ta Ndiose nu tiꞌí ꞌin neꞌ kanꞌ bra nu kan Jesús xiyaꞌ. Si nu ndiꞌin chaꞌ ꞌñaan loꞌo Ni, bra kanꞌ kuꞌniin tnuan ꞌin Ni tsan kanꞌ; kwiꞌ ngwañaꞌan, suꞌwe ꞌa chkwianꞌ loꞌo Ni loꞌo taꞌaan bra nu tiya tsan kanꞌ, chunꞌ msñian chaꞌ ꞌin Ni. Loꞌo ꞌwan, suꞌwa ti tyoꞌ tiꞌin wan loꞌo ba seꞌen ndiꞌin Jesús tsan kanꞌ, chaꞌ msñi wan chaꞌ ꞌin Jesús bra nu ngwaꞌu ba chaꞌ kanꞌ ꞌwan ti kulo.
Nchga xaa tnun nu nsuꞌwi seꞌen ndiꞌin Ndiose nganun loꞌo Krixtu nu nka Sñiꞌ Ni xa nu mdiꞌin Ni lo chalyuu. Sa ñaꞌan lka Ndiose, kwiꞌ ngwañaꞌan lka Krixtu Ndiose; suꞌwe ꞌa ndlo Krixtu tñan ꞌin nchga chaꞌ nu ndiꞌin lo chalyuu siyaꞌ ti, kanꞌ chaꞌ suꞌwe ndiꞌin nchga nan bra kanꞌ. Bra wa mdyii yꞌni Krixtu tñan nu mdiꞌin chaꞌ kuꞌni Ni lo chalyuu re, chaꞌ yꞌni tyii Ni nchga kiꞌya nu ndukwi nten chalyuu, xiyaꞌ ndyaa Ni seꞌen ndiꞌin Ndiose Sti Ni, ndyaa tukwa Ni nde laꞌa seꞌen kwin seꞌen ndukwa Ndiose nde niꞌ kwan bra kanꞌ.
Tyaꞌan chaꞌ tiyean sa ñaꞌan nu yꞌni Jesús, chunꞌ Jesús lka suun nchga chaꞌ nu ndyaa ñaꞌan tianꞌ ni. Si ngwañaꞌan kuꞌnian, ka tsaa ñaꞌan tianꞌ ꞌin Ni sa yaꞌ nu tyii chalyuu ꞌñaan. Jesús ni, ja mxiꞌin chunꞌ yu ꞌin tñan nu mdiꞌin chaꞌ kuꞌni yu, ni siya jlyo tiꞌ yu chaꞌ wa kaja ti yu lo wsi. Chunꞌ ndiꞌin la xa wa mdijin lyoo yu ꞌin nu kuxi, suꞌwe ꞌa ngwa tiye yu bra kanꞌ; kanꞌ chaꞌ ja mjyuꞌu tiꞌ yu siyaꞌ ti, ni siya mda neꞌ nu tiꞌí ꞌin yu lo wsi. Loꞌo ni, wa ndyaa tukwa Jesús nde laꞌa seꞌen kwin seꞌen tnun seꞌen ndukwa Ndiose Stian.
Loꞌo ja ngwa biyaꞌ tiꞌ neꞌ bra kanꞌ; ska ti chaꞌ ykwiꞌ Ndiose loꞌo neꞌ, chaꞌ siꞌi ykwiꞌ neꞌ nu ndiꞌin chaꞌ ka biyaꞌ suꞌwe tiꞌ neꞌ sa ñaꞌan ka chaꞌ kanꞌ nu ndyaa nde loo la. ꞌWan ni, nu ndijyan chalyuu chunꞌ ndiꞌin la ꞌin ayman kanꞌ, nchka biyaꞌ tiꞌ wan ni, chaꞌ wa ynan wan nchga chaꞌ tnun nu yꞌni Jesucristo. Wa ytsaꞌ ñi ba chaꞌ kanꞌ ꞌwan; chabiyaꞌ ꞌin Tyiꞌi Ndiose ngwaꞌu ba chaꞌ kanꞌ ꞌwan, chaꞌ wa nda Ndiose Tyiꞌi ykwiꞌ Ni mdiyan niꞌ kasiya ꞌwa lo chalyuu re. Kwiꞌ ngwañaꞌan nchga angajle nu ndiꞌin seꞌen ndiꞌin Ndiose, nchka ꞌa tiꞌ ka biyaꞌ tiꞌ sa ñaꞌan ngwa nchga chaꞌ ꞌin Krixtu xa nu yan Ni lo chalyuu.
Chunꞌ tñan nu yꞌni Krixtu, kanꞌ chaꞌ ndyaa ñaꞌan tiꞌ wan ꞌin Ndiose, chaꞌ wa yꞌni Ni chaꞌ ndyuꞌu Krixtu xiyaꞌ xa wa ngujwi yu. Loꞌo bra kanꞌ mda Ndiose ska seꞌen suꞌwe seꞌen tyiꞌin Krixtu, nde seꞌen tlyu seꞌen ndukwa ykwiꞌ Ni. Yꞌni Krixtu tñan nu tnun kanꞌ, chaꞌ ka xñi wan chaꞌ ꞌin Ndiose, loꞌo kanꞌ ka jlyo tiꞌ wan chaꞌ ka nchga chaꞌ nu ndukwin Ni chaꞌ ka chunꞌ ndiꞌin la.
Ngujwi Krixtu siꞌya kiꞌya nu ndiꞌin ꞌñaan, ni siya luwi siyaꞌ ti kasiya ꞌin yu; mdijin yu nu tiꞌí siꞌyaan, chaꞌ kuxi ꞌa tiyean. Loꞌo ni, ka kalaan seꞌen ndiꞌin Ndiose chabiyaꞌ ꞌin Krixtu. Ska yaꞌ ti mda neꞌ nu tiꞌí ꞌin Krixtu, mdyii tñan ꞌin yu lo chalyuu bra kanꞌ. Yjwi nten ꞌin ñaꞌaan tijyan kunaꞌ Jesucristo, loꞌo Tyiꞌi Ndiose yꞌni chaꞌ ndyuꞌu yu xiyaꞌ.
Ngula Jesucristo lo chalyuu seꞌen ndiꞌin ba, wa naꞌan ba ꞌin yu; kanꞌ lka chaꞌ nu ngitsaꞌ ba ꞌwan ni, chaꞌ chañi ꞌa lka chaꞌ kanꞌ. Nduꞌu ba ꞌwan sa ñaꞌan lka chaꞌ tyukwi tyempu luꞌu Jesucristo, chaꞌ ti kulo ndiꞌin yu loꞌo Ndiose Stian; loꞌo nduꞌu ba ꞌwan sa ñaꞌan ngwa chaꞌ naꞌan ba ꞌin yu lo chalyuu re.
Chunꞌ ndiꞌin la naꞌaǎn sa tlyu ti nduun nten nu wa ngulaa Jesús ꞌin; kaꞌan ꞌa nten ndiꞌin, kanꞌ chaꞌ ja tukwin ngwa kwa ꞌin neꞌ kanꞌ. Tyukwi ñaꞌaan chalyuu la seꞌen ndiꞌin nten mdoꞌo neꞌ kanꞌ mdiyan neꞌ; nchga lo nten chalyuu mdiyan, chaꞌ nchga kichen tyi neꞌ mdoꞌo neꞌ, nchga lo chaꞌ nu nchkwiꞌ nten chalyuu nchkwiꞌ neꞌ kanꞌ bra kanꞌ. Nduun neꞌ nde loo seꞌen ndukwa yka xlya tnun, nde loo seꞌen nduun nu lka ñaꞌan tiꞌ slyaꞌ kanꞌ. Teꞌ ngaten kanꞌ lkuꞌ neꞌ, ndukwi lkaꞌ kiñan yaꞌ neꞌ nduun neꞌ bra kanꞌ.
ကြော်ငြာတွေ