1 TESALONICENSES 1:5 - Chatino Zona Alta Occidental

⁵ chaꞌ msñi wan chaꞌ suꞌwe nu ykwiꞌ ba loꞌo wan, ti kwiꞌ chaꞌ tnun nu ytsaꞌ Tyiꞌi Ndiose ꞌwa chaꞌ chkwiꞌ ba loꞌo wan; Tyiꞌi Ni yꞌni tñan bra nu ykwiꞌ ba loꞌo wan, kanꞌ chaꞌ msñi wan chaꞌ kanꞌ. Kwiꞌ ngwañaꞌan, jlyo tiꞌ wan sa ñaꞌan tñan yꞌni ba bra nu mdiꞌin ba seꞌen ndiꞌin wan.

1 TESALONICENSES 1:5 ပူးပေါင်းရင်းမြစ်များ

SAN MARCOS 16:20

Loꞌo mdoꞌo neꞌ nu wa yꞌni xaꞌan chaꞌ ꞌin Jesús ndyaa neꞌ bra kanꞌ, nchga kichen ykwiꞌ neꞌ chaꞌ ꞌin Ni loꞌo nten. Lye ꞌa mdayaꞌ Xꞌnaan ꞌin neꞌ, chaꞌ ngwa biyaꞌ suꞌwe tiꞌ nten nchga kichen seꞌen ndyaa neꞌ kanꞌ, chaꞌ chañi ꞌa chaꞌ ꞌin Ndiose nu ngwaꞌu neꞌ; ngwa biyaꞌ tiꞌ nten kichen kanꞌ xa nu naꞌan neꞌ chaꞌ tnun nu yꞌni neꞌ kanꞌ chabiyaꞌ ꞌin Ndiose. Ngwañaꞌan ka chaꞌ.

SAN LUCAS 1:1

Wa kaꞌan nten ngwaꞌan lo kityi sa ñaꞌan nu ngwa nchga chaꞌ ꞌin Jesús nde seꞌen ndiꞌin ba, kityi historia lka kanꞌ.

LOS HECHOS 11:21

Tnun ꞌa chabiyaꞌ nsuꞌwi ꞌin neꞌ kanꞌ chabiyaꞌ ꞌin Jesús nu nka Xꞌnaan, kanꞌ chaꞌ yten kaꞌan nten chaꞌ ꞌin Ndiose, ngulaa yaꞌ neꞌ chaꞌ kuxi nu lye ꞌa nsuꞌwi tiye neꞌ nu ngwa xkanꞌ bra kanꞌ.

LOS HECHOS 16:14

Lidia naan ska nu kunaꞌan kanꞌ; neꞌ Tiatira lka Lidia kanꞌ, loꞌo ndujwiꞌ teꞌ lo kichen Filipos, ska lo teꞌ nu kolo kwaa, teꞌ jwñun lka kanꞌ. Ngiꞌni tnun neꞌ kula kanꞌ ꞌin Ndiose nu tlyu la ti, loꞌo suꞌwe ꞌa ynan chaꞌ ꞌin Ndiose nu lka Xꞌnaan nu ngwaꞌu Palyu ꞌin neꞌ; kanꞌ mdayaꞌ Ndiose ꞌin chaꞌ ka biyaꞌ tiꞌ chaꞌ nu nchkwiꞌ Palyu, loꞌo msñi chaꞌ kanꞌ.

LOS HECHOS 2:33

Bra kanꞌ mdiyan yꞌya Ndiose ꞌin Jesús, ndyaa yu seꞌen ndiꞌin Ni bra kanꞌ. Nde kwa ndiꞌin Jesús laꞌa seꞌen kwin seꞌen ndukwa Ndiose ni. Wa mda Ndiose Sti yu Tyiꞌi Ni nu tyuꞌwi niꞌ kasiya ꞌin yu, chaꞌ kwiꞌ ngwañaꞌan ykwiꞌ Ni nu ngwa sꞌni; loꞌo ni, wa msuꞌwa Jesús Tyiꞌi Ndiose kanꞌ, chaꞌ kan Ni lo chalyuu re. Nchga chaꞌ nu ynan wan, nchga chaꞌ nu naꞌan wan tsan ni, kanꞌ lka tñan nu yꞌni ykwiꞌ Jesús.

ROMANOS 1:16

Ja njyuꞌu tiǎnꞌ siyaꞌ ti chaꞌ kwaꞌuǔn ꞌin nten chaꞌ suꞌwe nu nchkwiꞌ ꞌin Jesús. Ndijyan chaꞌ kanꞌ loꞌo nchga chabiyaꞌ ꞌin Ndiose, chaꞌ kulaa Ni ꞌin nchga chaꞌ kuxi nchga nten nu xñi chaꞌ ꞌin Ndiose. Ti kulo ytsaꞌ Ndiose chaꞌ suꞌwe kanꞌ ꞌin neꞌ judío ti, bra kanꞌ loꞌo ytsaꞌ Ni chaꞌ suꞌwe kanꞌ ꞌin neꞌ xka laꞌa tsuꞌ.

ROMANOS 15:13

Kanꞌ chaꞌ ni, nchka tiǎnꞌ chaꞌ kuꞌni Ndiose chaꞌ sten suꞌwe la wan chaꞌ ꞌin Ni, chaꞌ ka suꞌwe ꞌa ka tiye wan, chaꞌ ka tyiꞌin tiin wan bra kanꞌ. Bra nu kanun Tyiꞌi Ndiose niꞌ kasiya ꞌñaan, bra kanꞌ ja ka ndaja ꞌa tianꞌ chaꞌ tyiꞌin taan sa ñaꞌan bra nu tiyan Ndiose.

ROMANOS 2:16

Ngwañaꞌan ka sikwa, bra nu kuꞌni biyaꞌ Ni ꞌin nchga nten. Tyoꞌo loo nchga chaꞌ nu nsuꞌwi mnan niꞌ kasiya ꞌin neꞌ, bra kanꞌ kulo Ni tñan ꞌin Jesucristo chaꞌ kuꞌni biyaꞌ Ni ꞌin neꞌ. Ngwañaꞌan lka chaꞌ nu nchkwiǐnꞌ loꞌo nten laja nu nduꞌuǔn chaꞌ suꞌwe ꞌin Ndiose ꞌin neꞌ.

1 CORINTIOS 1:24

Loꞌo nan ni, xka ñaꞌan nka tiyean xa nu ngulo suwi Ndiose ꞌñaan, ni siya lkaan neꞌ judío, ni siya lkaan neꞌ xka laꞌa tsuꞌ. Ska ti chaꞌ ꞌin Krixtu nchkwianꞌ. Ska ti Krixtu ndiya nchga chabiyaꞌ, nchga chaꞌ suꞌwe nu nchka tiꞌ Ndiose chaꞌ ka biyaꞌ tianꞌ.

1 CORINTIOS 10:33

Nchga seꞌen ngiꞌniǐn tñan nduwe tiǎnꞌ ꞌin xka ta nten, si ka suꞌwe kasiya ꞌin neꞌ bra nu kuꞌniǐn tñan kanꞌ. Ni siya ja kaja chaꞌ suꞌwe ꞌñaan ti ykwiǐnꞌ tiǎn, nchka tiǎnꞌ chaꞌ ka suꞌwe kasiya ꞌin nchga nten, chaꞌ kaja ñaꞌan lyaa neꞌ ꞌin chaꞌ kuxi bra kanꞌ.

1 CORINTIOS 3:16

Loꞌo laa tnun seꞌen ngiꞌni tnun neꞌ judío ꞌin Ndiose ni, ndiya ꞌa tiꞌ Ndiose ꞌin laa kanꞌ, chaꞌ ꞌin Ni ndyaꞌ naꞌan kanꞌ; tlá ꞌa Ndiose si kuꞌni ñuꞌun nten ꞌin laa kanꞌ. Loꞌo ꞌwan ni, nchga ta wan nu msñi wan chaꞌ ꞌin Krixtu, lka wan sa ñaꞌan lka laa tnun kanꞌ, chaꞌ ndiya ꞌa tiꞌ Ndiose ꞌwan; kwiꞌ ngwañaꞌan wa nganun Tyiꞌi Ndiose niꞌ kasiya ꞌwan. Kuꞌni tyii Ndiose ꞌin nchga nten nu kuꞌni ñuꞌun ꞌwan taꞌa msñian chaꞌ ꞌin Jesús.

1 CORINTIOS 3:6

Ñaꞌan tiꞌ ska nten nu kata ska loo nan, loꞌo kanꞌ xka nten nsuꞌwa tyiꞌa suun nan kwiñii kanꞌ, ngwañaꞌan ngiꞌni bare loꞌo wan; naꞌ lkaǎn nu yiꞌaǎn ytsaǎnꞌ chaꞌ kanꞌ ꞌwan kulo ndukwa la, loꞌo chunꞌ ndiꞌin la yaa Polo chaꞌ kwaꞌu la chaꞌ kanꞌ ꞌwan. Loꞌo ska ti Ndiose ngiꞌni Ni chaꞌ kaluu suꞌwe chaꞌ kanꞌ niꞌ kasiya ꞌwan.

1 CORINTIOS 4:20

Ja ka sten yuꞌwian chaꞌ ꞌin Ndiose chaꞌ ka Ni ndloo niꞌ kasiya ꞌñaan chaꞌ nu nchkwiinꞌ tian chaꞌ ꞌin Ni; nchka tiꞌ Ndiose chaꞌ kuꞌnian tñan ꞌin Ni, sa ñaꞌan tñan nu ngiꞌni Ni.

1 CORINTIOS 9:14

Loꞌo bare, kichen seꞌen nu ndaꞌan ba tijyuꞌ, suꞌwe si ta neꞌ chinꞌ nan nu tyijin yuꞌwi ꞌwa, chaꞌ ndaꞌan ba nduꞌu ba chaꞌ ꞌin Ndiose ꞌin neꞌ.

2 CORINTIOS 3:6

Wa mdiya ska chaꞌ kwi re nu tka nchkwiꞌ Ndiose loꞌoan, ska tñan nu ngiꞌni Tyiꞌi Ndiose lka chaꞌ re. Ja lka ran ñaꞌan tiꞌ ska tñan nu ndatsaa kityi kula kanꞌ ꞌñaan chaꞌ kuꞌnian. Wa mdyii chaꞌ ꞌñaan siyaꞌ ti siꞌya yuweꞌ nu ndiꞌin ꞌñaan chunꞌ tñan nu ndlo kityi kula kanꞌ ꞌñaan, loꞌo ni, wa mjwi chalyuu kwi ꞌñaan chunꞌ tñan nu ngiꞌni Tyiꞌi Ndiose.

GÁLATAS 2:2

Yaa ba Jerusalén, chaꞌ wa yꞌni Ndiose chaꞌ mbiꞌya ska chaꞌ tiyeěn, kanꞌ chaꞌ yaa ba; xa wa mdiyan ba kichen kanꞌ, bra kanꞌ yiꞌaǎn seꞌen ndiꞌin neꞌ nu nka ndloo la ꞌin nchga ta nten ꞌin Krixtu bra kanꞌ. Yiꞌaǎn seꞌen ndukwa neꞌ ykwiꞌ ti neꞌ, ykwiǐnꞌ loꞌo neꞌ bra kanꞌ. Ytsaǎnꞌ ꞌin neꞌ kanꞌ ni ñaꞌan chaꞌ nchkwiǐnꞌ loꞌo neꞌ xka laꞌa tsuꞌ chaꞌ ꞌin Krixtu, chaꞌ nu kulaa Krixtu ꞌñaan ꞌin chaꞌ kuxi nu ndiꞌin ꞌñaan. Kanꞌ lka chaꞌ nu ykwiǐnꞌ loꞌo neꞌ Jerusalén kanꞌ, chaꞌ ja ngwa tiǎnꞌ chaꞌ tyaꞌan chaꞌ kuxi tiye neꞌ kanꞌ chaꞌ ꞌñaǎn; ja ngwa tiǎnꞌ chaꞌ chkwiꞌ neꞌ chaꞌ ja suꞌwe chaꞌ nu ykwiǐnꞌ loꞌo wan neꞌ xka laꞌa tsuꞌ nu ngwa xkanꞌ, kwiꞌ ja ngwa tiǎnꞌ chaꞌ chkwiꞌ neꞌ kanꞌ chaꞌ ja suꞌwe tñan nu ngiꞌniǐn ni.

GÁLATAS 5:5

Nan ni, ndiꞌiin taan ꞌaan ñaꞌan bra nu kuꞌni Ni chaꞌ ka suꞌwe ji kasiya ꞌñaan tloo Ndiose, bra nu tyaan chaꞌ tyiꞌian loꞌo Ni. Kanꞌ lka tñan nu ngiꞌni Tyiꞌi Ndiose niꞌ kasiya ꞌñaan, chaꞌ wa msñian chaꞌ ꞌin Krixtu.

EFESIOS 2:10

Ndiose ngwiñan Ni ꞌñaan taꞌaan, kwiꞌ Ni yꞌni suꞌwa Ni chaꞌ ꞌñaan loꞌo Jesucristo; loꞌo ni, nchka tiꞌ Ni chaꞌ xkwiꞌ chaꞌ suꞌwe ti kuꞌnian xa nu tyiꞌian lo chalyuu, chaꞌ wa lka nda Ni ska tñan suꞌwe nu ka kuꞌnian kwenta skaan lo chalyuu re.

EFESIOS 3:20

Suꞌwe sikwa. Chkwianꞌ chaꞌ tlyu ꞌa lka Ndiose. Nchka ꞌa ꞌin Ni, ngiꞌni Ni kwenta ꞌin nchga chaꞌ nu njñaan ꞌin Ni, ni siya ti ji chkwianꞌ loꞌo Ni; ja nchka ka biyaꞌ tianꞌ sa ñaꞌan ngiꞌni Ni nchga chaꞌ kanꞌ. Ti kwiꞌ Ndiose ngiꞌni tñan loꞌoan, la niꞌ kasiya ꞌñaan siyaꞌ ti, chaꞌ kuꞌni Ni nchga tñan nu nchka tiꞌ Ni kuꞌni Ni loꞌoan.

FILIPENSES 2:13

Tyuꞌwi tiꞌ wan chaꞌ nchga tsan ngiꞌni Ndiose tñan niꞌ kasiya ꞌwan, chaꞌ ka kuꞌni wan tñan ꞌin Ni; ngwañaꞌan ngiꞌni Ni chaꞌ xlyaa wan kuꞌni wan nchga tñan nu nchka tiꞌ Ndiose chaꞌ kuꞌni wan.

FILIPENSES 4:9

Tyuꞌwi tiꞌ wan nchga chaꞌ nu wa yꞌni xaꞌan wan ꞌñaǎn, ni siya ska chaꞌ nu wa ynan wan ti bra nu wa ykwiǐnꞌ chaꞌ kanꞌ loꞌo wan, ni siya ska chaꞌ nu wa naꞌan wan ngiꞌniǐn; kanꞌ lka chaꞌ nu ndiꞌin chaꞌ kuꞌni wan, loꞌo kuꞌni Ndiose chaꞌ tiin ti tyiꞌin niꞌ kasiya ꞌwan bra kanꞌ.

COLOSENSES 2:2

Kanꞌ chaꞌ ngiꞌniǐn tñan, chaꞌ ka tukwi la tiye neꞌ chaꞌ ꞌin Ndiose, chaꞌ suꞌwa ka tiye neꞌ loꞌo xka ta taꞌa neꞌ. Bra kanꞌ ja kutsen neꞌ bra nu chkwiꞌ neꞌ chaꞌ ꞌin Krixtu, chaꞌ suꞌwe ꞌa nchka biyaꞌ tiꞌ neꞌ chaꞌ re. Ngwañaꞌan tyija lyo chaꞌ ꞌin neꞌ, chaꞌ kwiꞌ chaꞌ ꞌin Krixtu nchkwiꞌ chaꞌ re, ti kwiꞌ chaꞌ ꞌin Ndiose nu ja ya ka biyaꞌ tiꞌ nten nu ngwa sꞌni.

1 TESALONICENSES 2:13

Kanꞌ chaꞌ nchga bra ndya ba xuꞌwe ꞌin Ndiose chaꞌ ꞌwan, chaꞌ bra ti ndyaa ñaꞌan tiꞌ wan chaꞌ suꞌwe ꞌin Ndiose, xa wa ynan wan chaꞌ kanꞌ, ti kwiꞌ chaꞌ nu wa ykwiꞌ ba loꞌo wan. Ngwa biyaꞌ tiꞌ wan chaꞌ nu ñi ꞌin Ndiose lka chaꞌ kanꞌ, siꞌi chaꞌ nu ndlo ke ti nten; msñi wan chaꞌ kanꞌ bra kanꞌ, kanꞌ chaꞌ ngiꞌni Ndiose tñan niꞌ kasiya ꞌwan sa bra ni.

2 TESALONICENSES 2:14

Wa ngulo suwi Ni ꞌwan, kanꞌ chaꞌ ynan wan chaꞌ suꞌwe ꞌin Jesucristo nu ngwaꞌu ba ꞌwan; nchka tiꞌ Ni chaꞌ suꞌwa ti tyiꞌin wan loꞌo Jesucristo nu nka Xꞌnaan la seꞌen tlyu seꞌen ndukwa ykwiꞌ Ni, seꞌen nu xaa ꞌa.

2 TIMOTEO 2:10

kanꞌ chaꞌ ndaloǔn ꞌin neꞌ, ni siya lye ꞌa nda neꞌ nu tiꞌí ꞌñaǎn. Taloǔn ꞌin chaꞌ kuxi kanꞌ chaꞌ ꞌin taꞌa nten nu ngulo suwi Ndiose ꞌin, chaꞌ loꞌo kulaa Jesucristo ꞌin neꞌ, chaꞌ kaja chalyuu nu ja tsaa tii ꞌa ꞌin neꞌ. Loꞌo bra kanꞌ ka tyiꞌin neꞌ nde seꞌen ndiꞌin Ndiose, seꞌen suꞌwe ꞌa ñaꞌan nchga nan.

2 TIMOTEO 2:8

Tyuꞌwi tiiꞌ ꞌin Jesucristo, chaꞌ kanꞌ lka nu ndyuꞌu xiyaꞌ bra nu ngujwi yu. Ti kwiꞌ nten ꞌin ayman David ngwa Ni kanꞌ. Ti kwiꞌ chaꞌ suꞌwe ꞌin Jesús nu luꞌu, kanꞌ lka chaꞌ nu nchkwiǐnꞌ loꞌo nten,

HEBREOS 10:22

Tsaan seꞌen ndiꞌin Ndiose sikwa; tyukwi ti tiyean kuꞌnian chaꞌ ka ska ti chaꞌ ꞌñaan loꞌo Ndiose Stian, chaꞌ xñiin suꞌwean chaꞌ ꞌin Ni bra kanꞌ. Wa yꞌni tyii Ni nchga chaꞌ kuxi nu yꞌnian, kwiꞌ nu lye ꞌa mda chaꞌ jyuꞌu ꞌñaan; loꞌo luwi kasiya ꞌñaan ni, ñaꞌan tiꞌ si wa ytaan chku loꞌo tyiꞌa nu luwi ꞌa.

HEBREOS 6:11

Loꞌo nchka tiꞌ ba chaꞌ ti kuꞌni wan ngwañaꞌan tyukwi tyempu nde loo la, laja nu ndiꞌin ta wan ꞌin Ndiose sa ñaꞌan bra nu tsaa toꞌo nchga chaꞌ nu wa ykwiꞌ Ni loꞌoan bra kanꞌ.

1 SAN PEDRO 1:12

Loꞌo ja ngwa biyaꞌ tiꞌ neꞌ bra kanꞌ; ska ti chaꞌ ykwiꞌ Ndiose loꞌo neꞌ, chaꞌ siꞌi ykwiꞌ neꞌ nu ndiꞌin chaꞌ ka biyaꞌ suꞌwe tiꞌ neꞌ sa ñaꞌan ka chaꞌ kanꞌ nu ndyaa nde loo la. ꞌWan ni, nu ndijyan chalyuu chunꞌ ndiꞌin la ꞌin ayman kanꞌ, nchka biyaꞌ tiꞌ wan ni, chaꞌ wa ynan wan nchga chaꞌ tnun nu yꞌni Jesucristo. Wa ytsaꞌ ñi ba chaꞌ kanꞌ ꞌwan; chabiyaꞌ ꞌin Tyiꞌi Ndiose ngwaꞌu ba chaꞌ kanꞌ ꞌwan, chaꞌ wa nda Ndiose Tyiꞌi ykwiꞌ Ni mdiyan niꞌ kasiya ꞌwa lo chalyuu re. Kwiꞌ ngwañaꞌan nchga angajle nu ndiꞌin seꞌen ndiꞌin Ndiose, nchka ꞌa tiꞌ ka biyaꞌ tiꞌ sa ñaꞌan ngwa nchga chaꞌ ꞌin Krixtu xa nu yan Ni lo chalyuu.

1 SAN PEDRO 1:3

Kuꞌniin tnuan ꞌin Ndiose, ti kwiꞌ nu lka Sti Jesucristo nu nka Xꞌnaan. Nchka tꞌnan ꞌa tiꞌ Ni ꞌñaan, kanꞌ chaꞌ yꞌni kwi Ni kasiya ꞌñaan; loꞌo ni, nsuꞌwi chalyuu kwi ꞌñaan, chunꞌ chaꞌ ndyuꞌu Jesucristo xiyaꞌ xa wa ngujwi yu. Loꞌo ni, ndiꞌin taan ꞌaan chaꞌ kaja chalyuu nu ja tsaa tii ꞌa ꞌñaan,

1 SAN PEDRO 5:3

Ja lka wan xꞌnan taꞌa wan, kanꞌ chaꞌ suꞌwe ti kuꞌni wan seꞌen ndiꞌin neꞌ, chaꞌ ka biyaꞌ tiꞌ xka ta taꞌa wan sa ñaꞌan ndiꞌin chaꞌ kuꞌni neꞌ lo chalyuu.

2 SAN PEDRO 1:10

Kanꞌ chaꞌ ti kuꞌni la wan nchga chaꞌ suꞌwe kanꞌ, sa ñaꞌan chaꞌ ngwaꞌaǎn lo kityi ti kulo; kwiꞌ ngwañaꞌan, tyuꞌwi la tiꞌ wan chaꞌ wa ngulo suwi Ndiose ꞌwan, chaꞌ ka wan nten ꞌin Ni. Loꞌo bra kanꞌ ja ndiꞌin chaꞌ kanaꞌ kasiya ꞌwan, si ngwañaꞌan kuꞌni wan nchga lo chaꞌ suꞌwe kanꞌ.

2 SAN PEDRO 1:19

Ngwañaꞌan ka biyaꞌ tianꞌ chaꞌ ñi ꞌa lka nchga chaꞌ nu ykwiꞌ ayman nu ykwiꞌ chaꞌ ꞌin Ndiose loꞌo nten nu ngwa sꞌni. Suꞌwe la si tukwaan chaꞌ kanꞌ, chaꞌ ñaꞌan tiꞌ ska xaa luwi nu suꞌwe ꞌa njyiꞌin la seꞌen tla ꞌa, kwiꞌ ngwañaꞌan lka chaꞌ ꞌin Jesús kanꞌ. Kwaꞌu xaa kanꞌ tuwiin suꞌwe seꞌen tsaan bra wa kiꞌya ti xaa xa wa mdiya tsan kanꞌ. Bra kanꞌ tyoꞌo tukwa ska kwi kulasiin tnun ñaꞌan tiꞌ nu ndyukwa xa wa kiꞌya ti xaa; kanꞌ lka ñaꞌan tiꞌ Krixtu, chaꞌ nda yu xaa nu xuꞌwi niꞌ kasiya ꞌñaan.