1 SAN PEDRO 1:3 - Chatino Zona Alta Occidental3 Kuꞌniin tnuan ꞌin Ndiose, ti kwiꞌ nu lka Sti Jesucristo nu nka Xꞌnaan. Nchka tꞌnan ꞌa tiꞌ Ni ꞌñaan, kanꞌ chaꞌ yꞌni kwi Ni kasiya ꞌñaan; loꞌo ni, nsuꞌwi chalyuu kwi ꞌñaan, chunꞌ chaꞌ ndyuꞌu Jesucristo xiyaꞌ xa wa ngujwi yu. Loꞌo ni, ndiꞌin taan ꞌaan chaꞌ kaja chalyuu nu ja tsaa tii ꞌa ꞌñaan, အခန်းကိုကြည့်ပါ။ |
Ndyaa ñaꞌan tianꞌ chaꞌ ngulaa Ni ꞌñaan, ni siya ndiꞌin chaꞌ kataan sa ñaꞌan bra tiya tsan tlyu kanꞌ, chaꞌ kuꞌni tyii Ni tñan nu ngiꞌni Ni. Ska nan nu chan ꞌa ndiꞌin taan ni, bra wa naꞌaan chaꞌ mdoꞌo tukwa chaꞌ kanꞌ, ja ndiꞌin chaꞌ ti kataan laan ꞌin ran bra kanꞌ; ja tyiꞌin ta ꞌaan ꞌin ran, chaꞌ wa naꞌaan ꞌin ran bra kanꞌ.
Chañi ꞌa chaꞌ wa ndyuꞌu Krixtu xiyaꞌ sikwa. Loꞌo chunꞌ ndiꞌin la, bra kanꞌ tyuꞌu kaꞌan la nten xiyaꞌ, nchga nten nu ndiꞌin chaꞌ ꞌin neꞌ loꞌo Krixtu; tyoꞌo ayman kanꞌ seꞌen mtsiꞌ neꞌ nu ngwa sꞌni, tyuꞌu neꞌ xiyaꞌ, bra kanꞌ tsaa neꞌ tyiꞌin neꞌ loꞌo Krixtu. Kanꞌ chaꞌ wa ndyuꞌu Krixtu xiyaꞌ ndla la chaꞌ ka kiꞌyaan kwenta sa ñaꞌan ka chaꞌ kanꞌ nde loo la.
Suꞌwe sikwa. Chkwianꞌ chaꞌ tlyu ꞌa lka Ndiose. Nchka ꞌa ꞌin Ni, ngiꞌni Ni kwenta ꞌin nchga chaꞌ nu njñaan ꞌin Ni, ni siya ti ji chkwianꞌ loꞌo Ni; ja nchka ka biyaꞌ tianꞌ sa ñaꞌan ngiꞌni Ni nchga chaꞌ kanꞌ. Ti kwiꞌ Ndiose ngiꞌni tñan loꞌoan, la niꞌ kasiya ꞌñaan siyaꞌ ti, chaꞌ kuꞌni Ni nchga tñan nu nchka tiꞌ Ni kuꞌni Ni loꞌoan.
Ñaꞌan ti ndloo ꞌa chaꞌ ꞌwan chaꞌ lye la kanun tsaa chaꞌ ꞌin Krixtu niꞌ kasiya ꞌwan, chaꞌ Krixtu lka seꞌen ndukwa kiyaꞌ nchga chaꞌ kanꞌ. Ja ta wan chabiyaꞌ chaꞌ kwiñi lyoꞌo nten ꞌwan. Si xñi wan chaꞌ nu nchkwiꞌ neꞌ kanꞌ, ja ka ꞌa tyaꞌan chaꞌ tiye wan ꞌin chaꞌ suꞌwe nu kaja ꞌwan nde loo la, ti kwiꞌ chaꞌ nu wa ynan wan ti kulo. Chunꞌ chaꞌ suꞌwe ꞌin Krixtu kanꞌ, kanꞌ chaꞌ ndaꞌan nten tyukwi ñaꞌaan chalyuu nchkwiꞌ neꞌ chaꞌ kanꞌ loꞌo xka ta nten. Loꞌo ngwañaꞌan naꞌ, Palyu, ndaꞌaǎn ꞌaǎn lo tñan kanꞌ.
Ska chaꞌ tnun nu suꞌwe ꞌa lka chaꞌ re, ska chaꞌ nu ndiꞌin chaꞌ kunan nchga lo nten chalyuu lka chaꞌ ꞌin Ndiose re; ja mjwi chabiyaꞌ chaꞌ ka biyaꞌ tiꞌ nten chaꞌ re nu ngwa sꞌni. Nde lka chaꞌ nu ja ya kunan nten: Ka tyiꞌin Krixtu loꞌoan lo chalyuu, ni siya ni ti; loꞌo ngwañaꞌan chunꞌ ndiꞌin la ka tyiꞌin chaꞌ ꞌñaan loꞌo Ndiose la seꞌen tlyu nu xaa ꞌa seꞌen ndiꞌin Ni.
Ndyuꞌwi tiꞌ ba chaꞌ kaꞌan ꞌa chaꞌ suꞌwe ngiꞌni wan, chaꞌ suꞌwe ꞌa nka tiye wan ñaꞌan wan ꞌin taꞌa wan, chaꞌ wa msñi wan chaꞌ ꞌin Jesucristo. Ndalo ꞌa wan chaꞌ jlyo tiꞌ wan chaꞌ ndukwa Jesucristo nu nka Xꞌnaan kwiꞌ seꞌen ndiꞌin Ndiose Stian; kanꞌ chaꞌ xkwiꞌ suꞌwe ꞌa ngiꞌni wan, ni siya ndyijin ꞌa wan nu tiꞌí.
Loꞌo ni, ꞌwan taꞌa msñi wan chaꞌ ꞌin Jesús, chkwiꞌ ba chinꞌ loꞌo wan chaꞌ ꞌin taꞌaan nu wa ngujwi, chaꞌ ka biyaꞌ tiꞌ wan chaꞌ sa ñaꞌan lka si wa lajaꞌ neꞌ, ngwañaꞌan lka ꞌin ayman kanꞌ. Ja ka xiꞌin tiꞌ wan chaꞌ ꞌin ayman taꞌa wan nu wa ngujwi; ja kuꞌni wan sa ñaꞌan ngiꞌni nten nu ja ya kunan chaꞌ ꞌin Krixtu.
Ngwañaꞌan nchka tiǎnꞌ chaꞌ kuꞌni Ni loꞌo wan, ni siya Jesucristo nu nka Xꞌnaan, ni siya Ndiose Stian: kuꞌni Ni chaꞌ ka ngula la tiꞌ niꞌ kasiya wan, chaꞌ talo wan kuꞌni wan nchga chaꞌ suꞌwe, chaꞌ xkwiꞌ chaꞌ suꞌwe chkwiꞌ wan loꞌo taꞌa wan. Suꞌwe ꞌa nka tiye Ndiose ñaꞌan Ni ꞌñaan, kanꞌ chaꞌ suꞌwe ꞌa ngiꞌni Ni loꞌoan, chaꞌ tiin ti tyiꞌian nchga bra, bra nu ndiꞌin taan chaꞌ kan Jesús xiyaꞌ.
Loꞌo Krixtu ni, suꞌwe la ti tñan nu yꞌni yu, chunꞌ lka yu Sñiꞌ ykwiꞌ Ndiose, lka yu ndloo ꞌin nchga nten nu ndiꞌin chaꞌ ꞌin Ni. Loꞌo nan, ti kwiꞌ nten ꞌin Ndiose lkaan, xa nu ja ntsean ꞌaan tyukwi tyempu nu nsuꞌwian chalyuu, bra nu ti ndyaa ñaꞌan suꞌween tianꞌ ꞌin Ni chaꞌ ndiꞌin taan ꞌin Krixtu chaꞌ kulaa ji Ni ꞌñaan.
Chunꞌ tñan nu yꞌni Krixtu, kanꞌ chaꞌ ndyaa ñaꞌan tiꞌ wan ꞌin Ndiose, chaꞌ wa yꞌni Ni chaꞌ ndyuꞌu Krixtu xiyaꞌ xa wa ngujwi yu. Loꞌo bra kanꞌ mda Ndiose ska seꞌen suꞌwe seꞌen tyiꞌin Krixtu, nde seꞌen tlyu seꞌen ndukwa ykwiꞌ Ni. Yꞌni Krixtu tñan nu tnun kanꞌ, chaꞌ ka xñi wan chaꞌ ꞌin Ndiose, loꞌo kanꞌ ka jlyo tiꞌ wan chaꞌ ka nchga chaꞌ nu ndukwin Ni chaꞌ ka chunꞌ ndiꞌin la.
Ñaꞌan tiꞌ ska kuwiꞌ kuneꞌ nu tka ngula ti, ngwañaꞌan lka wan chaꞌ ꞌin Ndiose, chaꞌ nu ngwa xkanꞌ ti msñi wan chaꞌ ꞌin Ni. Taꞌa ti ngatiꞌ kuwiꞌ kuneꞌ chaꞌ ngiteꞌ ꞌa tiꞌ; si ja katiꞌ taꞌa ti, ja kaluu ꞌa yu. Kwiꞌ ngwañaꞌan ꞌwan, suꞌwe la si lye kuꞌni wan tñan chaꞌ kuꞌni xaꞌan la wan chaꞌ ꞌin Ndiose, chaꞌ ñaꞌan tiꞌ styiꞌ, ngwañaꞌan lka chaꞌ ꞌin Ndiose chaꞌ ꞌwan. Ngiꞌni ran chaꞌ ka ngula la tiꞌ niꞌ kasiya ꞌwan, chaꞌ ka tyoꞌo laa wan ꞌin chaꞌ kuxi.
Tyukwi ti tiye wan kuꞌni tnun wan ꞌin Krixtu, chaꞌ chañi lka Ni Xꞌnaan. Kwiꞌ ngwañaꞌan, kuwe chinꞌ tiꞌ wan sa ñaꞌan xkwen wan ꞌin nten bra nu kunichaꞌ neꞌ ꞌwan ñaꞌan tiꞌ chaꞌ re: “¿Ni chaꞌ lka ndyaa ñaꞌan ꞌa tiꞌ wan chaꞌ ti kan Krixtu xiyaꞌ a?” Suꞌwe ti xkwen wan ꞌin neꞌ kanꞌ, ja chkwiꞌ wan chaꞌ kuxi loꞌo neꞌ kanꞌ.
Sa ñaꞌan nu ngulaa Ni ꞌin neꞌ nu mdiꞌin niꞌ yka naꞌan kanꞌ lo tyiꞌa nu ngwa sꞌni, chaꞌ mdukwa neꞌ kanꞌ chaꞌ nu ykwiꞌ Ni; ngwañaꞌan tyoꞌo laa wan ni, chaꞌ ndukwa wan chaꞌ nu nchkwiꞌ Ni. Wa ndyaa wan lo tyiꞌa chaꞌ tyukwatya wan. Siꞌi nan kata tian chku ndyoꞌo chaꞌ kanꞌ, siꞌi chaꞌ kuuꞌ kunaanꞌ, kanꞌ chaꞌ ndyukwatyaan. Nde ndiya sa ñaꞌan ndyoꞌo chaꞌ kanꞌ: Nan njñaan ꞌin Ndiose chaꞌ xnun luwi Ni kasiya ꞌñaan chunꞌ ndyuꞌu Jesucristo xiyaꞌ, kanꞌ chaꞌ ndyukwatyaan.
ꞌWan neꞌ taꞌaan nu ndiya ꞌa tiǎnꞌ ꞌwan, ndiꞌin chaꞌ suꞌwe xuꞌwi tiyean ñaꞌaan ꞌin taꞌa ntean; Ndiose lka nu ndlo tñan chaꞌ xkwiꞌ suꞌwe ti xuꞌwi tiyean ñaꞌaan ꞌin taꞌa ntean. Loꞌo nchga nten nu suꞌwe nka tiye ñaꞌan ꞌin taꞌa nten, sñiꞌ Ndiose lka neꞌ kanꞌ, loꞌo ngwañaꞌan ndiꞌin chaꞌ ꞌin neꞌ kanꞌ loꞌo Ndiose.