1 SAN JUAN 2:20 - Chatino Zona Alta Occidental

²⁰ Wa nda Krixtu Tyiꞌi Ndiose chaꞌ kanun niꞌ kasiya ꞌin nchga neꞌ taꞌa msñi wan chaꞌ ꞌin Ni, kanꞌ chaꞌ wa nchka biyaꞌ suꞌwe tiꞌ taꞌa wan nchga chaꞌ nu nduꞌu Ndiose ꞌñaan.

1 SAN JUAN 2:20 ပူးပေါင်းရင်းမြစ်များ

SAN MATEO 13:11

Mxkwen Jesús ꞌin neꞌ bra kanꞌ: ―Wa mda Ndiose chabiyaꞌ ꞌwan chaꞌ ka biyaꞌ tiꞌ wan ska chaꞌ nu yuꞌwi kutsiꞌ ꞌin ayman sꞌni, sa ñaꞌan ka xa nu ka Ndiose ndloo la niꞌ kasiya ꞌin nten. Nten nu ja msñi chaꞌ ꞌin Ndiose ni, ja kiꞌya neꞌ kwenta bra nu kunan neꞌ ska chaꞌ nu nchkwiǐnꞌ; tukwi ꞌa chaꞌ kanꞌ, xkeꞌ tiꞌ neꞌ.

SAN MARCOS 1:24

―¿Ni sa ñaꞌan chaꞌ nchka tiiꞌ chkwiiꞌ loꞌoǔn?, Jesús Nazaret ―ndukwin yu tiꞌí kanꞌ―. ¿Ta wa nchka tiiꞌ kuꞌnii tyii chaꞌ ꞌñaǎn a? ―ndukwin―. Nsuꞌwi lyoǔn ꞌiin. Xkwiꞌ luwi lka nuꞌwin, loꞌo Ndiose msuꞌwa ꞌiin chaꞌ ndijyaan lo chalyuu re.

SAN LUCAS 4:18

Wa mkwan Ndiose nu nka Xꞌnaan ꞌñaǎn, ndukwin lo kityi kanꞌ. Wa ngwiꞌya Ndiose loǔn, wa ndiꞌin Tyiꞌi Ndiose loꞌoǔn, chaꞌ chkwiǐnꞌ chaꞌ suꞌwe loꞌo neꞌ tiꞌi. Wa msuꞌwa Ni ꞌñaǎn ndijyaǎn chaꞌ kuꞌni xuꞌweěn kasiya ꞌin nten chalyuu nu xiꞌin ꞌa tiꞌ, ndukwin lo kityi kanꞌ. Ndiꞌin chaꞌ chkwiǐnꞌ loꞌo nten nu lka presu ꞌin kuneꞌ xaꞌan; katsaǎnꞌ ꞌin neꞌ chaꞌ wa tyoꞌo ti neꞌ yaꞌ kuneꞌ xaꞌan kanꞌ. Taǎn xaa chaꞌ xuꞌwi niꞌ kasiya ꞌin nten chalyuu nu ja ya kunan chaꞌ ꞌin Ndiose, chaꞌ lka neꞌ sa ñaꞌan lka ska nu kwityiinꞌ. Bra nu ngiꞌni nten chaꞌ kuxi loꞌo neꞌ, bra kanꞌ taǎn chabiyaꞌ tyoꞌo laa neꞌ yaꞌ nu tiꞌí tiꞌ ꞌin neꞌ.

SAN LUCAS 4:34

―¿Ni sa ñaꞌan tñan kuꞌnii nde re, Jesús Nazaret? ―ndukwin yu tiꞌí kanꞌ―. ¿Ta wa nchka tiiꞌ chaꞌ kuꞌnii tyii ꞌñaǎn siyaꞌ ti a? Suꞌwe ꞌa nsuꞌwi lyoǔn ꞌiin, chaꞌ ykwiꞌ Ndiose nu luwi lkaa nu wa msuꞌwa Ni ꞌiin chaꞌ ndijyaan nde re.

SAN JUAN 14:26

Chunꞌ ndiꞌin la ka biyaꞌ la tiꞌ wan nchga chaꞌ kanꞌ; kwaꞌu Tyiꞌi Ndiose chaꞌ kanꞌ ꞌwan ―ndukwin Jesús―. Wa suꞌwa ti Stiǐn Ndiose Tyiꞌi Ni chaꞌ kan lo chalyuu chaꞌ tayaꞌ Ni ꞌwan nchga bra chabiyaꞌ ꞌñaǎn. Kuꞌni Ni chaꞌ tyuꞌwi tiꞌ wan nchga chaꞌ nu wa ykwiǐnꞌ loꞌo wan.

SAN JUAN 16:13

Bra nu kan Tyiꞌi Ndiose, ti kwiꞌ nu tyoꞌo nde seꞌen ndiꞌin Ndiose, bra kanꞌ kwaꞌu Ni kanꞌ nchga chaꞌ nu ñi ꞌwan; chkwiꞌ ñi Ni nchga chaꞌ ꞌñaǎn loꞌo wan bra kanꞌ ―ndukwin Jesús―. Ja chkwiꞌ Ni kanꞌ chabiyaꞌ ꞌin Ni, ti ykwiꞌ ti Ni; sa ñaꞌan chaꞌ nu wa ynan Ni nde seꞌen ndiꞌin Ndiose, kanꞌ lka chaꞌ nu chkwiꞌ Ni loꞌo wan ―ndukwin Jesús―. Loꞌo katsaꞌ Ni ꞌwan nchga chaꞌ nu ka ꞌñaǎn nde loo la bra kanꞌ.

LOS HECHOS 10:38

Jlyo tiꞌ wan sa ñaꞌan mdiꞌin Jesús lo chalyuu, ti kwiꞌ Jesús Nazaret. Wa ngulo suwi Ndiose Sti yu ꞌin yu, loꞌo ti mda la Ni jwersa ꞌin Jesús bra nu mdiyan Tyiꞌi Ndiose ñaꞌaan chunꞌ yu. Nchga seꞌen mdaꞌan yu yꞌni yu chaꞌ suꞌwe loꞌo nten; kwiꞌ ngwañaꞌan, yꞌni yu chaꞌ nchkaa neꞌ nu tiꞌí ꞌa, ni siya nten nu msñi kwiꞌin kuxi ꞌin. Ngwañaꞌan yꞌni Jesús tñan, chaꞌ mdayaꞌ ꞌa Ndiose ꞌin yu.

LOS HECHOS 3:14

Xkwiꞌ chaꞌ suꞌwe yꞌni Jesús kanꞌ, xkwiꞌ luwi kasiya ꞌin yu, loꞌo ja mda wan chabiyaꞌ tyoꞌo yu laja ti bra kanꞌ. Mjñan wan chabiyaꞌ ꞌin gobernador kanꞌ, chaꞌ tyoꞌo laja ti xka nu lka presu, nu wa yjwi ꞌin tyun nten.

1 CORINTIOS 2:15

Ka biyaꞌ tianꞌ sa ñaꞌan ndyoꞌo nchga chaꞌ ꞌin Ni bra nu ndiꞌin Tyiꞌi Ndiose niꞌ kasiya ꞌñaan, loꞌo ja ka ꞌa xkwen nten xka la chaꞌ ꞌñaan.

HEBREOS 1:9

Nuꞌwin ndiya ꞌa tiiꞌ nchga chaꞌ suꞌwe nu kuꞌni nten; kwiꞌ msinꞌ ꞌa tiiꞌ xa nu kuꞌni nten chaꞌ xaꞌan loꞌo Ndiose Stii. Kanꞌ chaꞌ ngulo suwiǐn ꞌiin chaꞌ kuꞌnii tñan ꞌñaǎn, ndukwin Ndiose. Ngwañaꞌan suꞌwe ꞌa nka tiyee ni, chaꞌ tnun la chabiyaꞌ wa ndaǎn ꞌiin ke xka la nu, ndukwin Ndiose.

HEBREOS 8:11

Nchga neꞌ kanꞌ ka xuꞌwi lyo neꞌ ꞌñaǎn bra kanꞌ, taꞌa neꞌ tnun loꞌo xuwe, nchga neꞌ xuꞌwi lyo neꞌ ꞌñaan bra kanꞌ. Tyempu kanꞌ ja nꞌni chaꞌ kunichaꞌ neꞌ ꞌin taꞌa neꞌ ti ka nu lkaǎn; ti kwiꞌ ti chaꞌ, ja nꞌni chaꞌ kwaꞌu neꞌ ꞌin taꞌa kichen tyi neꞌ chaꞌ naꞌ lkaǎn Ndiose Xꞌnan neꞌ.

1 SAN JUAN 2:27

ꞌWan ni, wa nganun Tyiꞌi Ndiose niꞌ kasiya ꞌwan, kanꞌ chaꞌ ja ndiꞌin chaꞌ kwaꞌu xka ta nten ꞌwan; Tyiꞌi Ndiose, kanꞌ lka nu kwaꞌu ꞌwan nchga chaꞌ nu ti ji kuꞌni xaꞌan wan chaꞌ ꞌin Ni. Bra nu nduꞌu Tyiꞌi Ndiose ꞌwan, ñi ꞌa lka chaꞌ kanꞌ; siꞌi chaꞌ kwiñi nduꞌu Ni. Kanꞌ chaꞌ sikwa, sa ñaꞌan nu nduꞌu Tyiꞌi Ndiose ꞌwan chaꞌ xñi wan chaꞌ ꞌin Jesús, kwiꞌ ngwañaꞌan ndiꞌin chaꞌ kuꞌni wan.

1 SAN JUAN 4:13

Wa nda Ndiose Tyiꞌi ykwiꞌ Ni chaꞌ kanun niꞌ kasiya ꞌñaan, kanꞌ chaꞌ ngwa jlyo tianꞌ chaꞌ suꞌwa nka tiyean loꞌo Ni, loꞌo ngwañaꞌan suꞌwa nka tiye Ni loꞌoan.

SAN JUDAS 1:5

Wa jlyo tiꞌ wan nchga chaꞌ nu ndukwa lo kityi ꞌin Ndiose nu ngwa sꞌni, loꞌo ni, katsaǎnꞌ chinꞌ chaꞌ kanꞌ ꞌwan xiyaꞌ. Wa ngulaa Xꞌnaan ꞌin ayman kula ꞌin neꞌ Israel, bra nu mdiꞌin neꞌ presu la lo yuu ꞌin Egipto; loꞌo chunꞌ ndiꞌin la yjwi Ndiose ꞌin nchga ayman kanꞌ nu ja ynan chaꞌ nu ykwiꞌ Ni.

EL APOCALIPSIS 3:7

’Loꞌo ngwañaꞌan, kwaꞌaan lyaa chaꞌ re chaꞌ tsaa seꞌen ndiꞌin nten nu nduꞌu chaꞌ ꞌin Ndiose chabiyaꞌ ꞌñaǎn nde kichen Filadelfia: “Nde ndiya chaꞌ nu nchkwiǐnꞌ loꞌo wan, skaǎn tiǎn nu lkaǎn Sñiꞌ Ndiose: Xkwiꞌ luwi ꞌa kasiya ꞌñaǎn, xkwiꞌ chaꞌ nu ñi ngiꞌniǐn. Naꞌ lkaǎn ndloo ꞌin nten ꞌñaǎn, ti kwiꞌ sa ñaꞌan nu ngwa ayman David ndloo nu ngwa sꞌni. Bra nu taǎn chabiyaꞌ chaꞌ kuꞌni nten ska tñan, ja tukwin ka ꞌin tukunꞌ chaꞌ ꞌin neꞌ kanꞌ bra kanꞌ; bra nu tukuǔnꞌ chaꞌ ꞌin nten chaꞌ ja kuꞌni neꞌ ska tñan, ja tukwin ka ꞌin kuꞌni tñan kanꞌ bra kanꞌ.

EL APOCALIPSIS 4:8

Skaa ꞌni kanꞌ nsuꞌwi skwa jlyuꞌwe iꞌ; ndukwa kiloo iꞌ ñaꞌaan chunꞌ jlyuꞌwe iꞌ, loꞌo ñaꞌaan niꞌ jlyuꞌwe iꞌ ndukwa kiloo iꞌ. Nchga bra ngala tuꞌwa iꞌ tsan loꞌo tla: Xkwiꞌ luwi ꞌa kasiya ꞌin Ndiose nu nchga tñan nchka ꞌin, ndukwin iꞌ xa nu ngala tuꞌwa iꞌ bra kanꞌ. Nu ngwa ti kulo luꞌu Ndiose, kwiꞌ ngwañaꞌan luꞌu Ni ni, loꞌo ti luꞌu la Ni tyempu nde loo la. Ngwañaꞌan ndukwin iꞌ xa nu ngala tuꞌwa iꞌ bra kanꞌ.