1 CORINTIOS 4:15 - Chatino Zona Alta Occidental

¹⁵ Ndiya kaꞌan ꞌa taꞌa ndiꞌin chaꞌ ꞌñaan loꞌo Krixtu nu ka kwaꞌu la chaꞌ kanꞌ ꞌwan, ni siya skaǎn tiǎn nu ngiꞌniǐn loꞌo wan sa ñaꞌan si lkaǎn sti wan, chaꞌ wa mdyii ytsaǎnꞌ ꞌwan nchga chaꞌ suꞌwe nu wa ykwiꞌ Jesucristo loꞌoǔn; chunꞌ chaꞌ nu wa ykwiǐnꞌ loꞌo wan, yten wan chaꞌ ꞌin Jesús.

1 CORINTIOS 4:15 ပူးပေါင်းရင်းမြစ်များ

ROMANOS 15:20

Lye ꞌa yꞌniǐn tñan, chaꞌ ndaꞌan naǎn nchga kichen seꞌen nu ti ji kunan neꞌ chaꞌ ꞌin Krixtu. Kanꞌ ti kichen nganuǔn ngwaꞌuǔn chaꞌ suꞌwe kanꞌ ꞌin nten, chaꞌ ja nchka tiǎnꞌ steěn yuꞌwiǐn lo tñan nu ngiꞌni xka ta nten ꞌin Krixtu.

1 CORINTIOS 1:30

Nde lka chaꞌ sikwa: Wa ykwiꞌ Ndiose chaꞌ ka suꞌwa chaꞌ ꞌñaan loꞌo Jesucristo, bra nu msuꞌwa Ni ꞌin Jesucristo chaꞌ yan Ni lo chalyuu. Ni siya ja ska chaꞌ nchka ꞌñaan, loꞌo Jesucristo ni, nchga chaꞌ nchka ꞌin Ni siyaꞌ ti. Chunꞌ tñan nu yꞌni Krixtu nchka suꞌwe kasiya ꞌñaan, ni siya ti kulo ngwaan nten nu kuxi ꞌa tloo Ndiose; chunꞌ tñan nu yꞌni Krixtu kaan nten ꞌin Ndiose, chaꞌ Krixtu lka nu kulaa ꞌñaan ꞌin nchga chaꞌ xaꞌan.

1 CORINTIOS 15:1

ꞌWan taꞌa msñian chaꞌ ꞌin Jesús, nchka tiǎnꞌ chaꞌ tyaa yuꞌwi tiꞌ wan chaꞌ nu wa ytsaǎnꞌ ꞌwan ti kulo, chaꞌ nu ti kwiꞌ Jesús ndlaa ꞌñaan ꞌin nchga chaꞌ kuxi; kanꞌ lka chaꞌ nu wa ynan wan ti kulo, loꞌo ni, wa nganun suꞌwe chaꞌ kanꞌ niꞌ kasiya ꞌwan.

1 CORINTIOS 3:10

loꞌo naꞌ ni, ñaꞌan tiꞌ nten nu nñan naꞌan kanꞌ chaꞌ ꞌin Ndiose, ngwañaꞌan lkaǎn loꞌo wan, chunꞌ nduꞌuǔn chaꞌ ꞌin Ndiose ꞌwan. Xka chaꞌ ni: sa ñaꞌan lka si wa mstyaǎn suꞌwe ska kiyaꞌ naꞌan, loꞌo kanꞌ mdiyan xka ta yu nu kwiñan ji naꞌan kanꞌ, ngwañaꞌan lka taꞌa ndaꞌaǎn tñan nu ngwaꞌu la chaꞌ kanꞌ ꞌwan. Nchga nten nu nñan naꞌan ndiꞌin chaꞌ tyaꞌan suꞌwe chaꞌ tiye neꞌ kulo ndukwa la sa ñaꞌan tyisnan tyaꞌ naꞌan; kwiꞌ ngwañaꞌan nchga taꞌa ngiꞌni ba tñan, ndiꞌin chaꞌ kiꞌya suꞌwe ba kwenta sa ñaꞌan nu ka kwaꞌu suꞌwe la ba chaꞌ kanꞌ ꞌin nten.

1 CORINTIOS 3:6

Ñaꞌan tiꞌ ska nten nu kata ska loo nan, loꞌo kanꞌ xka nten nsuꞌwa tyiꞌa suun nan kwiñii kanꞌ, ngwañaꞌan ngiꞌni bare loꞌo wan; naꞌ lkaǎn nu yiꞌaǎn ytsaǎnꞌ chaꞌ kanꞌ ꞌwan kulo ndukwa la, loꞌo chunꞌ ndiꞌin la yaa Polo chaꞌ kwaꞌu la chaꞌ kanꞌ ꞌwan. Loꞌo ska ti Ndiose ngiꞌni Ni chaꞌ kaluu suꞌwe chaꞌ kanꞌ niꞌ kasiya ꞌwan.

1 CORINTIOS 3:8

Suꞌwa ti ngiꞌni ba tñan loꞌo taꞌa ndaꞌan ba, ni siya ykwiꞌ ba loꞌo wan kulo ndukwa la, ni siya nduꞌu suꞌwe la ba chaꞌ kanꞌ ꞌwan chunꞌ ndiꞌin la. Loꞌo Ndiose ni, kanꞌ nu tya chaꞌ suꞌwe ꞌwa, sa ñaꞌan tñan suꞌwe nu ngiꞌni skaa ba chaꞌ ꞌin Ni.

1 CORINTIOS 9:12

Xka la taꞌa ngiꞌni ba tñan ndyiji nan lka nu lyiji ꞌin neꞌ bra nu nda wan chinꞌ siyaꞌ neꞌ kanꞌ. ¿Ta ja suꞌwe si ti kwiꞌ ti chaꞌ kaja ꞌwa, sa ñaꞌan nu ndyiji ꞌin neꞌ kanꞌ a? Sa kanꞌ ti chaꞌ, ja ska bra mjñan ba chaꞌ suꞌwe kanꞌ ꞌwan. Ndalo ꞌa ba nchga nu tiꞌí nu ndijin ba chaꞌ ja siyaꞌ nchka tiꞌ ba tukunꞌ ba chaꞌ suꞌwe ꞌin Krixtu nu nchkwiꞌ ba loꞌo wan; nchka tiꞌ ba chaꞌ kunan wan chaꞌ kanꞌ.

1 CORINTIOS 9:14

Loꞌo bare, kichen seꞌen nu ndaꞌan ba tijyuꞌ, suꞌwe si ta neꞌ chinꞌ nan nu tyijin yuꞌwi ꞌwa, chaꞌ ndaꞌan ba nduꞌu ba chaꞌ ꞌin Ndiose ꞌin neꞌ.

1 CORINTIOS 9:16

Ja suꞌwe si kuꞌniǐn siyeěnꞌ loꞌo wan chunꞌ ndaꞌaǎn nduꞌuǔn chaꞌ suꞌwe ꞌin Jesús ꞌin nten; ti kwiꞌ Ndiose, ndaꞌan tñan Ni ꞌñaǎn chaꞌ kuꞌniǐn tñan kanꞌ. Loꞌo tlyu ꞌa nu tiꞌí ka ꞌñaǎn si ja chkwiǐnꞌ chaꞌ ꞌin Jesús loꞌo nten.

1 CORINTIOS 9:18

¿Ta ja kaja liyaꞌ ꞌñaǎn loo tñan nu ngiꞌniǐn bra kanꞌ a? Chañi chaꞌ kaja ran ꞌñaǎn, ni siya xka ñaꞌan chaꞌ suꞌwe kaja ꞌñaǎn, chaꞌ nu suꞌwe ꞌa ka tiyeěn chaꞌ nchkwiǐnꞌ chaꞌ suꞌwe ꞌin Jesús loꞌo nten. Kanꞌ chaꞌ suꞌwe ꞌa nxkeꞌ tiǎnꞌ, ni siya ja ta neꞌ liyaꞌ ꞌñaǎn. Ja nchka tiǎnꞌ jñaǎn ran ꞌwan, ni siya ndiꞌin chabiyaꞌ ꞌñaǎn, chaꞌ ngiꞌniǐn tñan ꞌin Ndiose.

1 CORINTIOS 9:23

Ngwañaꞌan ngiꞌniǐn nchga seꞌen ndaꞌaǎn, chaꞌ nchkwiǐnꞌ loꞌo nten chaꞌ suꞌwe ꞌin Jesús. Nchka tiǎnꞌ chaꞌ sa ñaꞌan nchka suꞌwe niꞌ kasiya ꞌñaǎn xa wa ynaǎn chaꞌ kanꞌ, kwiꞌ ngwañaꞌan ka suꞌwe niꞌ kasiya ꞌin nchga nten.

2 CORINTIOS 4:5

Chaꞌ nu nchkwiꞌ ba loꞌo nten ni, siꞌi chaꞌ ꞌwa ti ykwiꞌ ti ba nchkwiꞌ ba. Nde ndiya chaꞌ nu nchkwiꞌ ba loꞌo neꞌ: Jesucristo lka Xꞌnan tyukwi ñaꞌaan nde niꞌ kwan, kwiꞌ ngwañaꞌan nka Ni ndloo tyukwi ñaꞌaan lo chalyuu. Kanꞌ chaꞌ nchkwiꞌ ba chaꞌ chabiyaꞌ ꞌin Jesús nu nka Xꞌnaan ngiꞌni ba tñan chaꞌ ꞌwan.

GÁLATAS 3:24

Chaꞌ kula kanꞌ ngwa ndloo ꞌñaan sa ñaꞌan si lkaan ska nu xuwe; ngwaꞌu chinꞌ chaꞌ kula kanꞌ chaꞌ nu ñi ꞌñaan laja nu ti ji kan Krixtu. Loꞌo Krixtu ni, suwi Ni kasiya ꞌñaan siyaꞌ ti chabiyaꞌ ꞌin Ndiose bra nu tsaa ñaꞌan tianꞌ ꞌin Ni.

GÁLATAS 3:25

Loꞌo ni, ka tsaa ñaꞌan suꞌwe tianꞌ ꞌin Ndiose chunꞌ tñan nu yꞌni Jesucristo, loꞌo siꞌi chaꞌ kula nu nka ndloo la ꞌñaan ni.

GÁLATAS 4:19

Xiyaꞌ tiꞌí ꞌa nka tiyeěn chaꞌ ꞌwan, chaꞌ sa ñaꞌan nchka tiǎnꞌ loꞌo sñiěnꞌ, ngwañaꞌan ndaꞌan chaꞌ tiyeěn chaꞌ ꞌwan; ñaꞌan tiꞌ ska nu kunaꞌan nu tiꞌí ꞌa chaꞌ kala sñiꞌ, ngwañaꞌan ndaꞌan chaꞌ tiyeěn. Taloǔn nchga nu tiꞌí kanꞌ sa ñaꞌan yaꞌ nu kanun tyukwi chaꞌ ꞌin Krixtu niꞌ kasiya wan.

2 TIMOTEO 4:3

Chaꞌ nu tyempu nde loo la, ja xlyaa nten kunan chaꞌ suꞌwe kanꞌ bra kanꞌ; tyaꞌan naan la neꞌ ꞌin tyun nten nu kwaꞌu ꞌin neꞌ nchga chaꞌ kuxi nu ndiya la tiꞌ neꞌ kanꞌ kunan neꞌ.

TITO 1:4

Ndaꞌaǎn kityi re chaꞌ tsaa seꞌen ndiꞌin nuꞌwin, Tito, chaꞌ ñaꞌan tiꞌ sñiěnꞌ, ngwañaꞌan nka tiyeěn naꞌaǎn ꞌiin, chaꞌ ska ti ñaꞌan msñian chaꞌ ꞌin Ndiose. Loꞌo ni, nchka tiǎnꞌ chaꞌ ñaꞌan ti kuꞌni Ndiose Stian chaꞌ suꞌwe loꞌoo, chaꞌ ñaꞌan ti chka tꞌnan tiꞌ Jesucristo ꞌiin, chaꞌ kuꞌni Ni chaꞌ tiin ti tyiꞌin niꞌ kasiya ꞌiin bra kanꞌ.

FILEMÓN 1:19

Tyaǎn tñi kanꞌ ꞌiin, kanꞌ chaꞌ nsuꞌwaǎn niǐn nde re: Palyu. Ja chkwiǐnꞌ ꞌaǎn chaꞌ ndiya nan nu ndukwii ꞌñaǎn, ni siya kaꞌan ꞌa chaꞌ ndukwii, chaꞌ kwiꞌ chalyuu nu ja tsaa tii ꞌa ꞌiin wa mjwi ꞌiin chunꞌ chaꞌ nu wa ykwiǐnꞌ loꞌoo.

SANTIAGO 1:18

Nchga chaꞌ nu ñi lka chaꞌ ꞌin Ndiose, wa ngwaꞌu Ni ꞌñaan chaꞌ kaan nten ꞌin Ni, chaꞌ ngwañaꞌan ngwa tiꞌ Ni chaꞌ ka; nchka tiꞌ Ni chaꞌ kulo ndukwa la kaan nten ꞌin Ni, chaꞌ kaan tlyu la ꞌin nchga lo nan nu wa mñan Ni, ngwañaꞌan nchka tiꞌ Ni.

1 SAN PEDRO 1:23

Wa ngula wan xiyaꞌ ni, loꞌo siꞌi sa ñaꞌan nu ndlyaan ꞌin jyaꞌaan, chaꞌ bra kanꞌ ndiꞌin chaꞌ kajaan. Nan wa ngwa kwi kasiya ꞌwan chunꞌ chaꞌ nu ynan wan chaꞌ nu nchkwiꞌ Ndiose loꞌo wan; kwiꞌ Ndiose nu nchga bra luꞌu, nu ja ndiꞌin chaꞌ kaja siyaꞌ ti.