1 CORINTIOS 3:16 - Chatino Zona Alta Occidental

^16-17 Loꞌo laa tnun seꞌen ngiꞌni tnun neꞌ judío ꞌin Ndiose ni, ndiya ꞌa tiꞌ Ndiose ꞌin laa kanꞌ, chaꞌ ꞌin Ni ndyaꞌ naꞌan kanꞌ; tlá ꞌa Ndiose si kuꞌni ñuꞌun nten ꞌin laa kanꞌ. Loꞌo ꞌwan ni, nchga ta wan nu msñi wan chaꞌ ꞌin Krixtu, lka wan sa ñaꞌan lka laa tnun kanꞌ, chaꞌ ndiya ꞌa tiꞌ Ndiose ꞌwan; kwiꞌ ngwañaꞌan wa nganun Tyiꞌi Ndiose niꞌ kasiya ꞌwan. Kuꞌni tyii Ndiose ꞌin nchga nten nu kuꞌni ñuꞌun ꞌwan taꞌa msñian chaꞌ ꞌin Jesús.

1 CORINTIOS 3:16 ပူးပေါင်းရင်းမြစ်များ

SAN JUAN 14:17

Ja ka kanun Tyiꞌi Ndiose niꞌ kasiya ꞌin nten xaꞌan, chaꞌ ja nchka ñaꞌan neꞌ kanꞌ ꞌin Ni, ja nsuꞌwi lyo neꞌ ti ka nu lka Ndiose. Loꞌo ꞌwan, nsuꞌwi lyo wan ꞌin Ni chunꞌ chaꞌ ndiꞌin Tyiꞌi Ni loꞌo wan, loꞌo ngwañaꞌan wa kanun ti Ni niꞌ kasiya ꞌwan ―ndukwin Jesús ꞌin neꞌ―.

ROMANOS 6:16

Bra nu ndaꞌaan tñan ꞌin ska nten ni, ngiꞌnian nchga tñan nu kulo nten kanꞌ ꞌñaan bra kanꞌ; jlyo tianꞌ chaꞌ nten kanꞌ lka xꞌnaan, loꞌo ngwañaꞌan, ndiꞌin chaꞌ tukwaan chaꞌ nu nchkwiꞌ xꞌnaan. Loꞌo kiꞌya nu ndukwian ni, lka ran ñaꞌan tiꞌ xꞌnaan. Bra nu ka ndloo la ran ꞌñaan, ngiꞌni ran chaꞌ ti kuꞌnian chaꞌ kuxi, bra kanꞌ ndiꞌin chaꞌ kajaan siyaꞌ ti. Loꞌo ni, si Ndiose lka xꞌnaan, tukwaan chaꞌ nu nchkwiꞌ Ni bra kanꞌ, ka suꞌwe ka kasiya ꞌñaan bra kanꞌ.

ROMANOS 6:3

Bra nu mdukwatya neꞌ ꞌñaan chaꞌ nu tka mdyisnan tyiꞌin chaꞌ ꞌñaan loꞌo Jesucristo, bra kanꞌ ngwa ꞌñaan sa ñaꞌan lka si suꞌwa ngujwian loꞌo Jesús, ngwañaꞌan nchka chaꞌ.

ROMANOS 8:11

Ti kwiꞌ Tyiꞌi Ndiose lka nu ngulo ꞌin ayman Jesús nde seꞌen ysu yu mtsiꞌ yu, loꞌo yꞌni Ni chaꞌ ndyuꞌu yu xiyaꞌ bra kanꞌ. Kwiꞌ ngwañaꞌan, wa mda Ndiose Tyiꞌi ykwiꞌ Ni chaꞌ kanun niꞌ kasiya ꞌwan, chaꞌ bra nu kaja wan, kanꞌ kuꞌni Ni chaꞌ tyuꞌu wan xiyaꞌ chabiyaꞌ ꞌin Tyiꞌi Ndiose.

ROMANOS 8:9

ꞌWan, siꞌi ngwañaꞌan ndiꞌin wan ni; ja ndiya ꞌa tiꞌ wan chaꞌ xaꞌan nu nsuꞌwi chalyuu. Suꞌwa ndiꞌin chaꞌ ꞌwan loꞌo Ndiose ni, chaꞌ mda Ndiose Tyiꞌi ykwiꞌ Ni chaꞌ kanun niꞌ kasiya ꞌwan. Loꞌo ja ndiꞌin chaꞌ ꞌñaan loꞌo Krixtu siyaꞌ ti si ja ya kanun Tyiꞌi Ndiose niꞌ kasiya ꞌñaan, ti kwiꞌ Tyiꞌi nu mdoꞌo ꞌin Krixtu.

1 CORINTIOS 3:9

Taꞌa ngiꞌni ba tñan ꞌin Ndiose lka bare; loꞌo ꞌwan, ngiꞌni Ni tñan niꞌ kasiya ꞌwan, ti kwiꞌ tñan ꞌin Ndiose lka kanꞌ. Nchka tiǎnꞌ chkwiǐnꞌ ska chaꞌ tiya loꞌo wan ni: ñaꞌan tiꞌ ska naꞌan tnun nu ndyaꞌ chaꞌ ꞌin Ndiose, ngwañaꞌan lka wan;

1 CORINTIOS 5:6

Siꞌi chaꞌ suꞌwe ngiꞌni wan bra nu ngiꞌni siyeꞌ wan loꞌo taꞌa wan. ¿Ja jlyo tiꞌ wan sa ñaꞌan ngiꞌni skwan tiyeꞌ a? Ni siya chinꞌ ti skwan tiyeꞌ xuꞌwi lo kata jaxlya, loꞌo kuꞌni ran chaꞌ skwen kaꞌan ꞌa skwan bra kanꞌ.

1 CORINTIOS 6:16

¿Ja jlyo tiꞌ wan chaꞌ ka ska ti tiyean, ka ska ti tnean loꞌo nu kunaꞌan kanꞌ, xa nu tyiꞌin chaꞌ ꞌñaan loꞌo neꞌ, ni siya ska nu kunaꞌan tsaa tiꞌ a? Ti kwiꞌ ti chaꞌ ndukwa lo kityi chaꞌ ꞌin Ndiose nu nchkwiꞌ: “Taꞌa tyukwaa neꞌ ka neꞌ sa ñaꞌan lka ska ti nten.” Ngwañaꞌan nchkwiꞌ kityi kanꞌ.

1 CORINTIOS 6:19

¿Ja ndiꞌya wan kwenta chaꞌ ndiya ꞌa tiꞌ Ndiose ꞌwan, chunꞌ wa nda Ni Tyiꞌi Ni chaꞌ kanun Ni niꞌ kasiya ꞌwan a? Loꞌo ni, siꞌi ti ykwiꞌ ti wan ndlo wan tñan ꞌwan, Ndiose ndlo Ni tñan ꞌwan. Kaꞌan ꞌa chaꞌ suꞌwe yꞌni Ni loꞌo wan chaꞌ mdoꞌo laa wan ꞌin chaꞌ kuxi, chaꞌ lka wan nten ꞌin Ndiose; kanꞌ chaꞌ kuꞌni tnun wan ꞌin Ndiose nchga seꞌen ndiꞌin wan, tyuꞌwi tiꞌ wan ꞌin Ni, kwiꞌ ngwañaꞌan tyukwi ti tiye wan kuꞌni wan nchga tñan nu kulo Ndiose ꞌwan.

1 CORINTIOS 6:9

Jlyo tianꞌ chaꞌ ja ka sten nten kuxi seꞌen tlyu seꞌen nka Ndiose ndloo la. Suꞌwe si ñi ꞌa ka biyaꞌ tiꞌ wan chaꞌ ja tsaa neꞌ kuxi seꞌen nu suꞌwe kanꞌ. Nten nu chen ꞌa ñaꞌan ngiꞌni loꞌo taꞌa, nten nu ngiꞌni tnun ꞌin nkwin joꞌo, nten nu ndiꞌin chaꞌ ꞌin loꞌo kwilyoꞌo xka nten, ni siya yu kiꞌyu nu ngiꞌni chaꞌ chen ñaꞌan loꞌo taꞌa kiꞌyu yu,

1 CORINTIOS 9:13

Ja chan wa jlyo tiꞌ wan sa ñaꞌan nu nchka ꞌin nchga nten nu nka tñan niꞌ lyaa tlyu ꞌin neꞌ judío. ¿Ta siꞌi ti kwiꞌ niꞌ lyaa kanꞌ ndyiji nan nchku neꞌ kanꞌ a? Ndyiji nan ku sti joꞌo niꞌ lyaa kanꞌ nu sa kuꞌ ti nxñi lomstan nu ndaꞌan loꞌo neꞌ niꞌ lyaa, chaꞌ tikin ji neꞌ ꞌin ran lo msaa ꞌin Ndiose; sa yuꞌwe ti lomstan kanꞌ kaja ꞌin sti joꞌo kanꞌ, chaꞌ ku yu.

1 CORINTIOS 9:24

Nde ñaꞌan tñan nu mda Ndiose ꞌñaan, sa ñaꞌan lka bra nu tsaa neꞌ kanan loꞌo ska kare. Tyun nten xnan suꞌwa ti bra kanꞌ, ni siya ska ti yu tyijin lyo yu ꞌin taꞌa yu seꞌen nu tsaa tii kare kanꞌ. Kwiꞌ ngwañaꞌan ka loꞌoan, ndiꞌin chaꞌ sa kuꞌ ti kuꞌnian tñan sa ñaꞌan yaꞌ nu tyii chalyuu ꞌñaan.

2 CORINTIOS 6:16

Ñaꞌan tiꞌ ꞌwan nu ndiya ꞌa tiꞌ Ndiose ꞌwan, ja ka suꞌwa chaꞌ ꞌwan loꞌo xka ta nten nu msñi chaꞌ ꞌin ya ñaꞌan ti joꞌo; kwiꞌ Ndiose nu luꞌu ndiya ꞌa tiꞌ ꞌñaan chunꞌ nganun Tyiꞌi Ni niꞌ kasiya ꞌñaan. Nde ndiya ska chaꞌ nu ykwiꞌ Ndiose: Tyiꞌiǐn nde seꞌen ndiꞌin nten kanꞌ, ndukwin Ni, kwiꞌ ngwañaꞌan tyaꞌaǎn loꞌo nten kanꞌ; kaǎn Ndiose chaꞌ ꞌin neꞌ kanꞌ, kanꞌ chaꞌ ka neꞌ kanꞌ nten ꞌñaǎn. Ngwañaꞌan ndukwin Ni.

2 TIMOTEO 1:14

Xñii suꞌwe kwenta ꞌin chaꞌ suꞌwe nu wa ykwiꞌ Ndiose loꞌoan; loꞌo Tyiꞌi Ni tayaꞌ Ni ꞌiin chaꞌ kuꞌnii tñan kanꞌ, kanꞌ chaꞌ nganun Tyiꞌi Ni niꞌ kasiya ꞌñaan.

HEBREOS 3:6

Loꞌo Krixtu ni, suꞌwe la ti tñan nu yꞌni yu, chunꞌ lka yu Sñiꞌ ykwiꞌ Ndiose, lka yu ndloo ꞌin nchga nten nu ndiꞌin chaꞌ ꞌin Ni. Loꞌo nan, ti kwiꞌ nten ꞌin Ndiose lkaan, xa nu ja ntsean ꞌaan tyukwi tyempu nu nsuꞌwian chalyuu, bra nu ti ndyaa ñaꞌan suꞌween tianꞌ ꞌin Ni chaꞌ ndiꞌin taan ꞌin Krixtu chaꞌ kulaa ji Ni ꞌñaan.

SANTIAGO 4:4

¡Wa ngulaa yaꞌ wan ꞌin Ndiose, wa ndiꞌin chaꞌ ꞌwan loꞌo ska chaꞌ nu kuxi ꞌa, si ngwañaꞌan ngiꞌni wan! ¿Ja nchka biyaꞌ tiꞌ wan chaꞌ nu nxuan loꞌo Ndiose si xkwiꞌ chaꞌ ꞌñaan, ti ykwiinꞌ tian, ndaꞌan chaꞌ tiyean a? Nan nxuan loꞌo Ndiose, si kuꞌnian ska ti chaꞌ loꞌo chaꞌ kuxi nu nsuꞌwi lo chalyuu.

1 SAN PEDRO 2:5

chaꞌ loꞌo wan ka wan ñaꞌan tiꞌ tyuu chaꞌ tyaꞌ ska naꞌan ꞌin Ndiose, ni siya ñaꞌan luꞌu ti wan. Bra kanꞌ xñi Ndiose tyuu kanꞌ, chaꞌ kwiñan Ni ska naꞌan nu kti ꞌa chaꞌ ꞌin Ni. Ti kwiꞌ ti chaꞌ, nchga wan lka wan ñaꞌan tiꞌ sti joꞌo nu luwi ꞌa kasiya ꞌin, chaꞌ ka ꞌwan xtya wan lomstan tloo Ndiose seꞌen ndukwa Ni nde niꞌ kwan chunꞌ Jesucristo; lomstan kanꞌ lka wan, ti ykwiꞌ ti wan, si chañi chaꞌ tyukwi ti tiye wan nchka tiꞌ wan tukwa wan chaꞌ nu nchkwiꞌ Ni.

1 SAN JUAN 4:12

Ja ya ñaꞌan nten chalyuu ꞌin Ndiose; sa kanꞌ ti chaꞌ, bra nu ni ka biyaꞌ tianꞌ chaꞌ suꞌwa nka tiyean loꞌo Ni, bra nu ñaꞌaan ꞌin taꞌaan, chaꞌ suꞌwe ꞌa nka tiyean ñaꞌaan ꞌin taꞌa ntean. Sa ñaꞌan nu suꞌwe ꞌa nka tiye Jesucristo ñaꞌan Ni ꞌin nten chalyuu, kwiꞌ ngwañaꞌan ndiꞌin chaꞌ kuꞌnian loꞌo taꞌa ntean bra kanꞌ.