Romanos 16:18 - Porciones del Nuevo Testamento

¹⁸ Mawũã bꞌebara aribꞌae duanu ẽã dazhirã Nokꞌo Jesucristodꞌera, awuarabʉrʉ aribꞌae bꞌea ãzha krĩñata. Aramaʉ̃ne bedꞌea bia nʉmeba zhãrã sota sewa bꞌea borekea zhi sewabi bꞌeta.

Romanos 16:18 ပူးပေါင်းရင်းမြစ်များ

Mateo 24:11

Sewata Daizezeba bedꞌeata jarabibaridꞌe duanaĩta bio piradrʉdꞌaya, aramaʉ̃ne bio sewadꞌaya.

Mateo 24:24

Nʉmʉne zhãrã sewata zhãrã ẽdrʉbita duaneña, sewata Daizezeba bedꞌeata jarabibaridꞌe duaneña, ũdudꞌakꞌa zromata okuabʉdaba zhãrã sewadꞌaya, sewaita obꞌedꞌara Daizezeba zhi jʉrʉmata bꞌesidꞌa sewadꞌaya.

Mateo 6:24

Miõba zhãrã ũme aribꞌae nʉma bꞌe ẽã. Manebʉrʉ abꞌa jurape abꞌa kʉãgꞌaya, o abꞌa zhi zromane edape abꞌa zhi zroma ẽãne edaya. Aramaʉ̃ kĩrãkꞌa Daizezedꞌebema aribꞌae ẽã platadꞌebemata aribꞌae nʉmʉbara.

Mateo 7:15

Kĩrãkuita bꞌeaudua sewata Daizezeba bedꞌeata jarabibaridꞌe bꞌe kꞌarea, marãma zedꞌaya oveja zhãrã zuburia odꞌakꞌa kĩrãkꞌa, mawũãmina sodꞌera usa pãne kĩrãkꞌa zhãrã warrea ẽãta bꞌea.

Juan 12:26

Iabꞌaʉba mʉ bedꞌeata aribꞌae nʉmʉbara mʉta pẽwãdua, mawũãrã mʉ bꞌʉ maẽ bꞌaya mʉ bedꞌeata aribꞌae bꞌʉra. Iabꞌaʉba mʉ bedꞌeata aribꞌae bꞌʉra mʉ Zezebara bia edaya.

Romanos 14:18

Aramaʉ̃ne Cristoba jara bꞌʉta aribꞌae bꞌʉra Daizezema biga, zhãrãma biga.

Romanos 16:19

Cristodꞌe bedꞌea biara marãbara aribꞌae bꞌeta jõmaʉ̃ba kꞌawua bꞌeba mʉrã sobia bꞌʉa marã kꞌarea. Mawũãmina mʉã krĩña bꞌʉa marã krĩcha banata bꞌeaita biata oita, bia ẽãta o ẽbaita.