Hechos 26:5 - Porciones del Nuevo Testamento

⁵ Ãzhara dewara kꞌawua bꞌea jara krĩñanarã jẽdeuba mʉãrã dazhirã ũrãgꞌata aribꞌae bꞌʉba mʉrã fariseota bꞌʉa.

Hechos 26:5 ပူးပေါင်းရင်းမြစ်များ

Hechos 15:5

Mawũãmina ʉ̃kʉrʉ fariseorãnebemaba Jesúsdꞌebema ĩjãnapeadꞌata piradrʉdꞌape mawũãsidꞌa: Judíorã ẽãta bꞌera zhũmakĩrã kꞌakua eta kꞌõĩbara, jaradꞌaibara aribꞌaedꞌamarẽã ũrãgꞌa Moisédꞌeta.

Hechos 22:3

Wãrãnebai mʉrã judíota tosia Tarso pʉwʉrʉdꞌe, maʉ̃ pʉwʉrʉra Cilicia druadꞌebema. Mawũãmina mʉrã warisia nama Jerusalén pʉwʉrʉdꞌe. Mʉãrã ũrãgꞌara kꞌawasia Gamalieldꞌeba, sãwũã kꞌawai bꞌʉdꞌe kꞌawasia Moisé ũrãgꞌa dazhirã zhibarirã bꞌeadꞌadꞌeta. Aramaʉ̃ne Daizezedꞌebema aribꞌae bꞌasia idꞌi ewade jõma marã bꞌe kĩrãkꞌa.

Hechos 22:5

Sacerdote wagꞌaubara kꞌawua bꞌʉa mʉ maʉ̃ kꞌaudꞌa bꞌadꞌara, kꞌawua bꞌea nokꞌorã jõmaʉ̃ba, ãzhara mʉãã kꞌarta diasidꞌa Jesúsdꞌebema ĩjã bꞌera mʉãrã jidasia bꞌʉta dazhirã ʉrerãta bꞌera. Mawũẽ mʉrã Damascoedꞌa wãsia mama bꞌesidꞌa Jerusalén pʉwʉrʉedꞌa jidakua weita, aramaʉ̃ne pua kꞌawua odꞌamarẽã.

Hechos 23:6

Pablobara kꞌawuasia ʉ̃kʉrʉ saduceorãta, ʉ̃kʉrʉ fariseorãta, mawũẽ nemi jĩgua nokꞌorã wagꞌaurãã mawũãsia: Mʉ ʉrerã, mʉrã fariseoa, mawũẽ mʉrã fariseorãnebema. Beukuadꞌata piradrʉdꞌaita mʉã ĩjã bꞌʉdꞌeba mʉrã kꞌãwũã jirpanʉã.

Hechos 24:14

Mawũãmina mʉã naʉ̃ta bʉaa jaraya: Mʉãrã pẽwã bꞌʉa Jesúsdꞌebema ota ãzha jãpe bꞌʉa abꞌeta, mʉãrã aramaʉ̃ne bedꞌeata aribꞌae bꞌʉa mʉ zhibarirã bꞌeadꞌa Zhibaridꞌeta. Mʉãrã jõma ĩjã bꞌʉa Moisé ũrãgꞌadꞌe bꞌʉ tabꞌeta, Daizezeba bedꞌeata jarabibarirãne bꞌʉ tabꞌeta.

Hechos 24:5

Daibara kꞌawuasidꞌa ũmakĩrã naʉ̃ ne kꞌazhiruata, ẽjũã jõmaʉ̃ maẽ judíorã jõma kĩrũbiga bꞌʉa, Nazaredꞌebema ũrãgꞌadꞌe bꞌe nokꞌoa.