Малакий 3:10 - Мукъаддес Китап

¹⁰ Эвимде аш олсун деп, эпинъиз онда бир пайларынъызны анбар ханелерине кетиринъиз. Мени, ич олмагъанда, бунен сынанъыз, – дей Ордуларнынъ РАББИси. – Кореджексинъиз ки, коклернинъ къапуларыны сизге ачаджагъым, устьлеринъизге толып-ташкъан берекет ягъдыраджагъым.

Малакий 3:10 ပူးပေါင်းရင်းမြစ်များ

Башланув 28:22

мына бу мен абиде этип къойгъан таш Алланынъ Эви олур. Сен береджек эр бир шейинъден мен Санъа он пайда бир пайыны береджегим.

Башланув 7:11

Нух 600 яшыны толдургъан йылында, экинджи айнынъ 17-нджи кунюне ер ярылды да, буюк теренликтен сув урып ташты, кок къапулары да ачылды,

4 Падишалар 7:19

Везир исе Алланынъ адамына джевап берип: «Эгер РАББИ коклернинъ бутюн къапуларыны ачса биле, ойле шей ола билирми?» – деди. Эль-Яса исе: «Озь козюнънен кореджексинъ, амма бир шей ашап оламайджакъсынъ», – деди.

4 Падишалар 7:2

Падиша везирнинъ къолуна таянып тургъанда, везир Алланынъ адамына джевапланып: – РАББИ бутюн кок къапуларыны ачса биле, ойле шей ола билирми? – деп сорады. Эль-Яса исе: – Сен буны озь козьлеринънен кореджексинъ, амма бир шей ашап оламайджакъсынъ, – деди.

1 Тарих вакъиалары 26:20

Оларнынъ къардашлары левийлилер исе Алланынъ Сарайындаки хазинелерни ве айырылып азиз этильген шейлерни къаравуллай эдилер.

Нехемья 12:44

Шу куню бахшышлар, биринджи махсуллар ве онда бир пайлар ичюн ве анбарлар ичюн джевапкяр оладжакъ адамларны къойдылар. Анбарджылар шеэр дживарындаки тарлалардан руханийлер ве левийлилер ичюн къануний пайларны топлайджакъ эдилер. Ехуда халкъы хызмет эткен руханийлерге ве левийлилерге пек севине эди.

Нехемья 12:47

Зеруббавел заманында ве Нехемья заманында бутюн исраиллилер йырджыларгъа ве къапуджыларгъа эр куньлюк пайларны бере эдилер, левийлилерге азизликлерни айыра эдилер, левийлилер исе азизликлернинъ бир къысмыны Харун огъулларына бере эдилер.

Нехемья 13:5

ве буюк бир ханени онъа айырып берди. Шу ханеге исе эвель ашлыкъ бахшышларыны, темиз къокъулы майны ве савутларны, захиренинъ, янъы шарапнынъ ве зейтюн ягъынынъ онда бир пайыны къоя эдилер. Булар къанун боюнджа левийлилернинъ, йырджыларнынъ ве къапу къаравулларынынъ пайлары ве руханийлерге кетирильген бахшышлар эди.

Зебур 37:3

Сенинъ окъларынъ манъа санчылды, къолунъ устюме агъыр басып тюшти.

Джемаат башы 11:3

Булутлар сувгъа толса, ерге ягъмур ягъдырыр. Терек истер дженюп, истер шимальге йыкъылыр, йыкъылгъан еринде де къалыр.

Ехезкель 34:26

Оларны да, Меним дагъымнынъ чевресини де берекетли япаджагъым ве вакътында ягъмурларны ягъдыраджагъым. Ягъмурлар берекет кетиреджеклер.

Ехезкель 44:30

Эписи биринджи махсуллар ве чешит тюрлю котериледжек бахшышларнынъ эписи руханийлернинъки олсун. Янъы унунъыздан пиширильген пителерни де руханийлерге беринъиз. О вакъыт эвлеринъизде берекет оладжакъ.

Хошеа 2:21

– О куню, – дей РАББИ, – Мен джевап береджегим. Мен коклерге дейджегим, ве коклер ерге ягъмур ягъдыраджакъ.

Ёэль 2:19

РАББИ халкъына джевап береджек: – Мына, Мен сизге ашлыкъ, янъы шарап, зейтюн ягъыны береджегим, ве сиз оларгъа тояджакъсынъыз. Бир даа сизни ашаламагъа халкъларгъа ёл бермейджегим.

Ёэль 2:24

Арманлар ашлыкъкъа толаджакъ, юзюм ве зейтюн басылгъан ерлерден янъы шарап ве зейтюн ягъы тёкюлип ташаджакъ.

Левийлилер 26:10

Былтырдан къалма берекетинъизни ашайджакъ вакътында, янъы берекетке ер бермек ичюн, былтыркисини котерип атмагъа меджбур оладжакъсынъыз.

Левийлилер 26:3

Низамнамелериме коре яшасанъыз, эмирлеримни тутсанъыз ве беджерсенъиз,

Левийлилер 27:30

Топракъ берекетининъ он пайда бир пайы – ернинъ урлукъ берекетинден ве тереклерининъ мейваларындан онда бир пайы – РАББИнинъкидир. Бу, РАББИнинъ азизлигидир.

Хагъгъай 2:19

Анбарларынъызда аля даа ашлыкъ урлугъы къалдымы? Бугуньгедже не юзюм пытагъы, не инджир тереги, не нар тереги, не зейтюн тереги емиш бердилер. Амма бугуньден башлап, Мен сизлерге берекет береджегим.

Сайылар 18:21

Левий огъулларына, Корюшюв Чадырында беджерген хызметлери ичюн, Мен Исраильде бутюн олгъан барлыгъынынъ онда бир пайыны оларнынъ пайы оларакъ бердим.

Матта 6:33

Сиз башта Алланынъ Падишалыгъыны ве Онынъ инсафлыгъыны къыдырынъыз, сизге бу шейлернинъ эписи де бериледжек.

Къануннынъ текрары 12:6

Анда къурбан этип, айванларны бутюнлей якъынъыз, башкъа къурбанларынъызны чалынъыз, махсулларынъыздан он пайда бир пайыны кетиринъиз, шахсий бахшышларынъызны беринъиз, адакъларынъызны япынъыз, озь истегинъиз боюнджа бахшышларынъызны, туварлар ве къой-эчкилеринъизнинъ биринджи несилини кетиринъиз.

Къануннынъ текрары 14:22

Тарладан эр йыл джыйгъан берекетинъден он пайда бир пайыны мытлакъа айыр

Къануннынъ текрары 14:29

Сенинъ киби пайлары ве мал-мулькю олмагъан левийлилер кельсинлер. Сизинъ ерлеринъизде ят халкълардан олгъанлар, оксюзлер, тул апайлар да келип, тойгъандже ашасынлар. Сонъ Алланъ олгъан РАББИ санъа эр бир туткъан ишинъде берекет берер.

Къануннынъ текрары 28:12

РАББИ санъа Озь зенгин хазинесини, кок къапуларыны ачаджакъ, топрагъынъа вакъты-вакътына ягъмур ягъаджакъ ве къолунъ эр бир япкъан ишини берекетли япаджакъ. Сен чокъ миллетлерге борджкъа береджексинъ, озюнъ исе борджкъа алмайджакъсынъ.