Йирмея 5:17 - Мукъаддес Китап

¹⁷ Олар бутюн берекетинъизни ве ашларынъызны ашайджакълар, огъулларынъызны ве къызларынъызны ольдюреджеклер, къой-эчкилеринъизни ве малынъызны ашап битиреджеклер, юзюм ве инджирлеринъизни ашап къояджакълар, сиз ишангъан къавийлештирильген шеэрлеринъизни къылычларнен йыкътыраджакълар.

Йирмея 5:17 ပူးပေါင်းရင်းမြစ်များ

Ешая 62:8

РАББИ кучьлю онъ къолуны котерип, ант этти: – Бир даа душманларынъ богъдайынъны ашамайджакъ, ябанджыларнынъ огъуллары сен япкъан тазе шарабынъны ичмейджеклер.

Ешая 62:9

Отьмекни богъдайны топлагъанлар ашайджакъ, шарапны юзюмни джыйгъанлар ичеджек ве Мукъаддес Еримнинъ азбарында РАББИни шуретлейджек.

Ешая 65:22

Олар къургъан эвлеринде башкъалар яшамайджакъ, сачкъанларынынъ берекетини башкъалар ашамайджакъ. Халкънынъ куньлери терекнинъ куньлери киби узун оладжакъ, сайлагъанларым япкъанларынен узун вакъыт къулланаджакълар.

Йирмея 1:15

Бакъ, Мен шималь падишалыкъларынынъ бутюн халкъларыны чагъыраджагъым, – дей РАББИ. – Олар келип, Ерусалим къапуларынынъ янында, диварларынынъ чевре-четинде, бутюн Ехуда шеэрлеринде тахтларыны къояджакълар.

Йирмея 25:37

РАББИнинъ алевли гъазабы тынч эвлерни гъайып эте.

Йирмея 4:26

Бакътым, берекетли топракъ сахрагъа чевирильген, РАББИнинъ къызгъын ачувындан бутюн шеэрлери харап олгъандыр.

Йирмея 4:7

Арслан ормандан еринден чыкъа, халкъларны харап этмеге келе, мемлекетинъизни бош ве бакъымсыз этмек ичюн, озь еринден чыкъа. Шеэрлеринъ йыкъыладжакъ, адамсыз къаладжакъ.

Йирмея 5:18

– Амма о куньлерде биле сизни бутюнлей ёкъ этмейджегим, – дей РАББИ.

Йирмея 50:17

Исраиль – дагъылгъан къойлар кибидир, оларны арсланлар къувалады. Эвель Ашшурнынъ падишасы оны ашай эди, бу сонъкиси исе, Вавилон падишасы Невукъаднеццар онынъ кемиклерини къырды.

Йирмея 50:7

Оларны тапкъан эр кес оларны ашай эди, оларны хорлагъанлар: «Бизлер къабаатлы дегильмиз! Олар озьлери РАББИнинъ огюнде гуна яптылар, адалет чокърагъы, баба-деделерининъ ишанчы огюнде, РАББИнинъ огюнде гуна ишледилер», – дей эдилер.

Йирмея 8:13

– Берекетлерини бутюнлей джыяджагъым, – дей РАББИ. Юзюм багъында бир юзюм данеси, инджир терегинде бир инджир къалмайджакъ, япракълары да солып къуруйджакъ. Оларгъа не берген олсам, гъайып оладжакъ.

Йирмея 8:16

Душман атларынынъ хырылдысы Дандан эшитиле, айгъырларнынъ кишнемесинден бутюн ер юзю титрей. Душманлар келеджек, эм мемлекетни ве устюндеки эр шейни, эм шеэрни ве анда эписи яшагъанларны ёкъ этеджек.

Агълав йырлары 2:12

«Ашлыкънен шарап къайда?» – деп сорайлар аналарындан; шеэр сокъакъларында яралылар киби яталар, аналарынынъ багърында сонъки нефес алалар.

Агълав йырлары 2:2

Рабби Якъупнынъ яшагъан ерини гъайып этти, аджымады; гъазапнен Ехуда къызынынъ къавий къалелерини йыкъты; падишалыкъларнен башлыкъларыны да ерге урды, арам этти.

Ехезкель 36:4

Шунынъ ичюн, Исраиль дагълары, РАББИ-ТААЛЯнынъ сёзюни динъленъиз! РАББИ-ТААЛЯ дагъларгъа ве байырларгъа, дере ве вадийлерге, бакъымсыз къалгъан йыкътырылгъан ерлерге, къомшу халкълар мыскъыллагъан ве ягъмалангъан бош шеэрлерге дей.

Хошеа 2:12

Бутюн юзюмликлерини ве инджир тереклерини бакъымсыз къалдыраджагъым, чюнки о: «Мен буларны къазандым, олар – ойнашларым манъа берген бахшышлардыр» – деди. Мен оларны орманлыкъкъа чевиреджегим, олар кийик айванларгъа аш оладжакъ.

Хошеа 8:14

Исраиль Яратыджысыны унутты, путларгъа ибадетханелерни ясады, Ехуда бир чокъ янына барылмаз шеэрни къурды. Амма Мен оларнынъ шеэрлерине атеш ёллайджагъым, ве о, къалелерини ашап битиреджек.

Ёэль 2:3

Оларнынъ огюнде атеш якъа, артында алев яндыра. Огдеки топракълар – Эдем багъчасы кибидир, артларындан исе бош чёллерге чевирилир. Ич бир шей олардан къуртулып оламаз.

Левийлилер 26:16

Мен сизге бойле япаджагъым: Мен сизге дешетли олюм кетириджи хасталыкъларны ве сыджакъларны ёллайджагъым, ве олардан козьлеринъизнинъ нуру сёнеджек ве джанларынъыз чекишеджек. Урлукъларынъызны бошуна сачаджакъсынъыз, чюнки берекетни душманларынъыз ашайджакъ.

Цефанья 3:6

Мен халкъларны ёкъ эттим, оларнынъ къалелерини йыкътым, сокъакъларыны бом-бош эттим, энди кимсе шу сокъакълардан юрмей. Оларнынъ шеэрлери виран этильди, бакъымсыз олды, анда яшагъан адам къалмады.

Малакий 1:4

Эдомлылар: «Душманлар шеэрлеримизни бозды, амма биз йыкътырмаларны гъайрыдан къураджакъмыз», – дейлер. Ордуларнынъ РАББИси исе бойле дей: – Олар къурарлар, Мен исе йыкъаджагъым. Оларнынъ топрагъыны «яман виляет» деп адландыраджакълар, халкъына «эр вакъыт РАББИнинъ къаргъышы астында яшагъан халкъ» дейджеклер.

Къануннынъ текрары 28:33

Топрагъынънынъ махсулыны ве ишлеринънинъ эписи берекетлерини сен бильмеген халкъ ашайджакъ, сени исе омюрбилля хорлап мазлум этеджеклер.