Ешая 47:6 - Мукъаддес Китап

⁶ Озь халкъыма ачувландым, Озь мульк-мирасымны ашаладым да, къолунъа бердим, амма сен оларны аджымадынъ, къарт адамларгъа биле агъыр боюндырыгъынъны такътынъ.

Ешая 47:6 ပူးပေါင်းရင်းမြစ်များ

2 Падишалар 24:14

Давут Гъадгъа: – Буюк белягъа огърадым. Адамнынъ къолуна тюшмеге Алла косьтермесин, яхшысы РАББИнинъ элине тюшейим, чюнки Онынъ мерамети буюктир, – деди.

2 Тарих вакъиалары 10:11

Меним бабам сизге буюк агъырлыкъ юклеген, мен исе бу агъырлыкъны даа да зияделештиреджегим. Меним бабам сизни къамчыларнен джезалагъан, мен исе сизни чаянларнен джезалайджагъым».

2 Тарих вакъиалары 28:9

Анда РАББИнинъ бир пейгъамбери бар эди. Онынъ ады – Одед. О, Самариеге келеяткъан ордунынъ огюне чыкъты да, шойле деди: – РАББИ, бабаларынъызнынъ Алласы, ехудалыларгъа пек ачувланып, оларны сизинъ къолунъызгъа берди. Сизлер исе оларны тап коклерге еткен гъазапнен ольдюрдинъиз.

2 Тарих вакъиалары 36:17

РАББИ оларгъа къасдийлилернинъ падишасыны ёллады. О, Азиз Ердеки Эвде бутюн йигитлерни къылычнен ольдюрди ве кимсени аджымады – йигитни де, къызны да, акъсакъалны да, хаста къартны да, – Алла онынъ къолуна эр бирини берди.

2 Тарих вакъиалары 36:20

Къылычнен ольдюрмегенлерни Вавилонгъа сюргюн этти, ве Фарс падишалыгъы мемлекетке кельмегендже, олар Вавилонда онынъ къуллары ве огъулларынынъ къуллары олдылар.

Узеир 5:12

Бизим баба-деделеримиз коклернинъ Алласыны ачувландыргъан сонъ, О, оларны къасдийли Невукъаднеццаргъа, Вавилон падишасынынъ къолуна берди. О, бу Эвни ёкъ этти, халкъны исе Вавилонгъа сюргюн этти.

Ешая 10:6

Оны имансыз миллетке, Мени ачувландыргъан халкъкъа къаршы ёллайджагъым; оны бутюнлей чайпамагъа, эр шейини тартып алмагъа, оны, сокъакътаки чамурны киби, таптамагъа буюраджагъым.

Ешая 13:16

Къундакъ балалары оларнынъ козьлери огюнде ташнен урулып ольдюриледжек, эвлери чайпаланаджакъ, апайларынынъ намусларына токъунаджакълар.

Ешая 14:17

дюньяны сахрагъа чевирген, шеэрлерини йыкъкъан, эсирлерини запт этип, эвлерине йибермеген адам бумы?»

Ешая 14:6

Падиша ачувында халкъларны токътамаздан ура, гъазабында миллетлерни даима чекиштире эди.

Ешая 43:28

Мукъаддес Ернинъ башлыкъларындан руханийликни алдым, Якъупны бутюнлей ёкъ этмеге, Исраильни яманламагъа ёл ачтым.

Йирмея 50:42

къолларында яй ве мызракъ туталар, олар шефкъатсыз ве мераметсиздир. Сеслери, денъиз киби, шамата къопаралар; аскерлер атларында секирелер, бир адам киби, сыра-сыра тизилелер, санъа къаршы, эй, Вавилон халкъы, дженкнен чыкъалар.

Агълав йырлары 1:14

Рабби Озь къолунен яманлыкъларымны боюндырыкъ киби, бойнума багълады; бири-бирине багъланып, бойнума асалар; Рабби такъатымны алды, ойле адамларнынъ къолуна берди ки, оларны енъип оламайым!

Агълав йырлары 1:21

Ич чеккенимни эшиттилер, амма гонъюль алыджым ёкъ; эписи душманларым белягъа огърагъанымны эшиттилер, буны манъа Сен япкъанынъа къувандылар. Сен эвельден айткъан кунь кельди, олар да мен киби олгъайды!

Агълав йырлары 2:2

Рабби Якъупнынъ яшагъан ерини гъайып этти, аджымады; гъазапнен Ехуда къызынынъ къавий къалелерини йыкъты; падишалыкъларнен башлыкъларыны да ерге урды, арам этти.

Агълав йырлары 4:16

РАББИ Озю оларны къачакъ этти, энди оларгъа бакъмайджакъ; олар руханийлерни урьмет этмедилер, къартларгъа мерамет косьтермедилер.

Агълав йырлары 5:12

Душманлар башлыкъларымны астылар, акъсакъалларны урьмет этмейлер.

Ехезкель 24:21

РАББИ-ТААЛЯ Исраиль халкъына шойле дей: «Бакъ, Мен бойле япаджагъым ки, Меним Азиз Еримни, кучюнъизнинъ къуванчыны, козь бебегинъизни, джанларынъызнынъ севинчини арамлайджакълар. Сизлерде къалгъан огъулларынъыз ве къызларынъыз исе къылычтан оледжеклер».

Ехезкель 28:16

Алыш-веришинънинъ чокълугъындан ичинъ залымгъа толу олды, ве сен гуна яптынъ. Шунынъ ичюн Мен сени, арам олгъанны киби, Алланынъ дагъындан къувдым, эй, къорчалайыджы Керув, янгъан ташларнынъ арасындан сени ёкъ эттим.

Овадья 1:10

Сен Якъуп къардашынъа яманлыкъ яптынъ. Шунынъ ичюн масхара оладжакъсынъ, эбедиен къырылып битеджексинъ.

Овадья 1:16

Азиз дагъымда ачувыма толу къадени насыл ичкен олсанъыз, бутюн халкълар да оны ичип-ичип, ичип битиреджеклер ве санки де асыл олмагъан киби оладжакълар.

Зекерья 1:12

Сонъ РАББИнинъ Мелеги: – Ордуларнынъ РАББИси! Ерусалимге ве Ехуданынъ шеэрлерине къаршы ачувлангъанынъ етмиш йылдыр. Оларгъа не вакъыт шефкъатлы бакъаджакъсынъ? – деди.

Зекерья 1:15

Тынч яшагъан халкъларгъа къаршы исе ачувым къайнай. Мен чокъ ачувланмагъанымда, олар яманлыкъкъа яманлыкъ къоштылар.

Матта 7:2

Насыл укюм этсенъиз, шойле де укюм этилирсиз. Насыл ольчювнен ольчесенъиз, ана шу ольчювни де алырсыз.

Къануннынъ текрары 28:50

Козьлери къан баскъан миллет къартларны урьмет этмейджек, яшларны аджымайджакъ.

Якъуп 2:13

Мерамет косьтермеген адам мераметсизликнен суд этиледжек. Мерамет исе укюмден устюн келе.