Ешая 1:29 - Мукъаддес Китап

²⁹ – Сиз истеген эмен тереклеринъизден утанаджакъсынъыз, сиз сайлагъан багъчаларынъыз ичюн бетлеринъиз къызараджакъ.

Ешая 1:29 ပူးပေါင်းရင်းမြစ်များ

Ешая 30:22

Сонъ кумюшнен къаплангъан путларынъызны, алтыннен къаплангъан путларынъызны арам деп саяджакъсынъыз, пис шей киби, котерип атаджакъсынъыз, «Кет мындан», – айтаджакъсынъыз.

Ешая 31:7

О куню сиз эпинъиз кумюш ве алтын бош путларынъызны котерип атаджакъсынъыз. Къолларынъызнен япылгъан путлар сизни ёлдан урдылар.

Ешая 42:17

О заман путларгъа ишангъанлар, оларгъа: «Сиздир бизим аллаларымыз», – дегенлер арткъа чекиледжеклер, буюк масхаралыкъкъа огърайджакълар.

Ешая 45:16

Олар эписи бирликте масхара олып, утанаджакълар, пут ясагъанларнынъ эписи айып олып, узакълашаджакълар.

Ешая 57:5

Эр бир даллы терекнинъ тюбюнде, эменлернинъ арасында истекнен янып туташасынъыз; къая чатлакъларында, асылып тургъан къаяларнынъ этеклеринде балаларны къурбан чаласынъыз.

Ешая 65:3

О халкъ козюме бакъып, Мени эр вакъыт ачувландыра, багъчаларында къурбанлар чала, кирпичлерде къокъулы отларны якъа,

Ешая 66:17

– Озьлерини «эляллап ве темизлеп», багъчаларгъа бирер-бирер киргенлер, домуз этини, джиренч шейлерни ве сычанларны ашагъан эр кес гъайып оладжакълар, – дей РАББИ.

Йирмея 2:20

Боюндырыгъынъны чокътан парчаладым, багълавларынъны къопардым, сен де: «Ибадет этмейджегим», – дединъ. Эр юксек байырда ве эр даллы терек тюбюнде ороспуландынъ.

Йирмея 3:6

Ёшия падишалыкъ эткенде, РАББИ манъа бойле деди: – Имансыз Исраиль къызы нелер эткенини корьдинъми? Эр юксек байыргъа котерилип, эр даллы терек тюбюне барып, анда ороспулыкъ этти.

Ехезкель 16:63

О заман сен эр шейни хатырлап утанаджакъсынъ. Мен сенинъ эписи япкъанларынъны багъышлагъан сонъ, сен айыбынъдан бир даа агъзынъны ачмайджакъсынъ, – дей РАББИ-ТААЛЯ.

Ехезкель 36:31

О заман яман ёлларынъызны, ярамай ишлеринъизни хатырлайджакъсынъыз, озь къабаатларынъыз ве пис ишлеринъиз ичюн озюнъизден джиренеджексинъиз.

Ехезкель 6:13

О заман Мен РАББИ олгъанымны билирсинъиз! О заман путларнынъ арасында, къурбан ерлеринъизнинъ чевресинде, эр бир юксек байырда, эр бир дагънынъ тёпесинде, эр бир ешиль терекнинъ тюбюнде ве даллы эменнинъ тюбюнде, эписи путларына къокъулы отлар якъкъан эр бир ерде олю ятаджакъсынъыз.

Хошеа 14:3

РАББИге къайтынъыз, Оны чагъырынъыз, Онъа айтынъыз: «Бутюн къабаатларымызны багъышла, эйиликнен бизни къабул эт, ве биз тиллеримизнен Санъа шукюр этеджекмиз».

Хошеа 14:8

Бир даа адамлар кольгесинде яшайджакъ ве чокъ богъдай берекетини джыяджакъ. Олар, юзюм чубугъы киби, чечек ачаджакъ, Ливан шарабы киби, нам къазанаджакъ.

Хошеа 4:13

Олар дагъ тёпелеринде къурбан чалалар, эр бир байыр устюнде, эмен, сельби, эр бир буюк терек тюбюнде, кольгелери яхшы олгъаны ичюн, къокъулы отларны якъалар. Шунынъ ичюн къызларынъыз ороспулана, келинлеринъиз де къоранта садыкълыгъыны боза.

Хошеа 4:19

Ель оларны учурып кетеджек, олар путларгъа кетирильген къурбанларындан утанаджакъ.

Римлилерге 6:21

Лякин о вакъыт не ишлер япа эдинъиз? Шимди олардан озюнъиз утанасыз. О ишлернинъ сонъу – олюмдир.