3 Падишалар 20:1 - Мукъаддес Китап

¹ Арамнынъ падишасы Бен-Хадад бутюн ордусыны топлады. Онъа 32 падиша озь атлары ве дженк арабаларынен берабер къошулгъан эди. Бен-Хадад кетип, Самарие шеэрини алкъагъа алды ве онъа къаршы уджюм этти.

3 Падишалар 20:1 ပူးပေါင်းရင်းမြစ်များ

3 Падишалар 15:18

Шу себептен Аса, РАББИнинъ Сарайы хазинелеринде ве падиша сарайынынъ хазинесинде къалгъан кумюшни ве алтынны алып, хызметчилерине берди ве оларны Дамаскта яшагъан Арамнынъ падишасы олгъан Бен-Хададгъа йиберди. Бен-Хадад – Хезион огълу Тавриммоннынъ эвляды эди. Аса онъа:

3 Падишалар 15:20

Бен-Хадад Аса падишаны динъледи ве Исраиль шеэрлерине къаршы озь орду башлыкъларыны ёллады. Олар Иён, Дан, Авел-Бет-Маакъа шеэрлерине, Нафталий топракъларына ве бутюн Киннеретке уджюм этти.

3 Падишалар 16:24

Омрий Шемерден Самарие байырыны эки чувал кумюшке сатын алды. Бу ерде шеэр къурды, шеэрнинъ адыны дагънынъ эвельки саибининъ адынен Самарие деп адландырды.

3 Падишалар 20:16

Уйле вакътында ёлгъа чыкътылар. Бен-Хадад онъа ярдым эткен 32 падишанен берабер ичип, зиль сархош олды.

3 Падишалар 20:2

О, шеэрге, Исраиль падишасы Ахавгъа хаберджилер йиберип:

3 Падишалар 20:24

Шимди, падиша, бойле яп: падишаларны озь еринден алып ташла да, оларнынъ ерине башлыкъларны къой.

3 Падишалар 22:31

Арам падишасы исе озюнинъ 32 дженк арабалары башлыкъларына шойле эмир этти: – Исраиль падишасындан башкъа, буюк олсун, кучюк олсун, кимсенен дженклешменъиз.

4 Падишалар 6:8

Бир кунь Арамнынъ падишасы исраиллилерге къаршы дженкке чыкъты. Озь хызметчилеринен акъыл танышты ве: – Озь ордуларымны фелянча ерде ерлештиририм, – деди.

4 Падишалар 8:5

Гехазий падишагъа Эль-Ясанынъ ольген адамны тирильткени акъкъында айтаяткъанда, тамам огълу тирильген къадын келип, озь эви ве тарласыны сорады. Гехазий: – Падиша-эфендим, мына айны шу къадын. Эль-Яса айны шу къадыннынъ огълуны тирильткен эди, – деди.

Узеир 7:12

«Падишаларнынъ падишасы олгъан Артахшастадан Узеир руханийге, коклердеки мукеммель Алласынынъ къануныны огреткен кятипке…» ве иляхре.

Чыкъыш 14:7

Алты юз дане энъ яхшы арабаларны ве Мысырдаки эписи арабаларны, оларнынъ эписи башлыкъларыны да алды.

Ешая 10:8

– Башлыкъларымнынъ эписи падишалар киби дегиллерми? – дей.

Ешая 37:24

Къулларынънен Раббини ашаладынъ ве: «Чокътан-чокъ арабаларымнен дагъларнынъ тёпесине, Ливаннынъ къаяларына чыкътым, юксек кедр тереклерини кестим, энъ яхшы кипарислерини кестим. Онынъ энъ юксек тёпелерине кельдим, багъынынъ гурь ерине кирдим.

Йирмея 49:27

– Дамаскнынъ диварларыны якъаджагъым, атеш Бен-Хададнынъ сарайларыны ёкъ этеджек.

Ехезкель 26:7

РАББИ-ТААЛЯ шойле дей: Бакъынъыз, Мен шимальден Тирге къаршы падишаларнынъ падишасыны, Вавилон падишасы Невукъаднеццарны алып келеджегим, атларны ве дженк арабаларыны, атлыларынен ордусыны ве чокътан-чокъ аскерлерни кетиреджегим.

Даниял 2:37

Сен – падишасынъ, падишаларнынъ падишасысынъ! Коклердеки Алла санъа падишалыкъ, акимиет, къудрет ве шурет берди.

Левийлилер 26:25

Башынъызгъа васиет ичюн джезалайджакъ къылыч кетирип тюшюреджегим. Сиз шеэрлеринъизде сакъланаджакъсынъыз, Мен сизинъ аранъызгъа веба хасталыгъыны ёллайджагъым, ве сиз душман къолларына тюшеджексинъиз.

Амос 1:4

Хазаэлнинъ эвине атеш ёллайджагъым, о, Бен-Хададнынъ къавийлештирильген сарайларыны якъып ташлайджакъ.

Къануннынъ текрары 20:1

Сен душманларынъа къаршы дженк этмек ичюн чыкъып, онынъ атлары, дженк арабалары ве ордусы сенинъкиден чокъ олгъаныны корьсенъ, олардан къоркъма. Сени Мысыр топрагъындан чыкъаргъан Алланъ олгъан РАББИ сеннендир.

Къануннынъ текрары 28:52

Бутюн топрагъынъда сен юксек ве пекитильген диварларгъа умют эткенсинъ. Олар эписи яшагъан ерлеринъни сарып аладжакъ ве бу диварларны йыкъаджакълар. Алланъ олгъан РАББИ санъа берген бутюн топрагъынъда яшагъан ерлеринъни сарып аладжакълар.

Къадылар 1:7

О заман Адоний-Безек: – Аякъларынынъ ве къолларынынъ баш пармакълары кесик етмиш падиша меним софрам тюбюнде отьмек уфакъларыны топлай эдилер. Мен япкъанымны энди Алла манъа япты, – деди. Сонъ оны Ерусалимге кетирдилер, ве о, анда ольди.

Къадылар 4:3

Исраиллилер кене къычырып, РАББИден ярдым сорадылар. Сисеранынъ 900 демир дженк арабасы бар эди, ве о, исраиллилерни 20 йылдан берли мушкюль эзиетлей эди.

1 Падишалар 13:5

Фелестинлилер Исраильге къаршы дженк этмеге топландылар: 30 000 дженк арабасы ве 6 000 атлы, денъиз ялысындаки къум киби чокъ адам топланды. Келип, Микмаста, Бет-Авеннинъ шаркъ тарафында, ордунен ерлештилер.