1 Падишалар 2:6 - Мукъаддес Китап

⁶ Сен, РАББИ, эм джан бересинъ, эм джан аласынъ, адамларны о бир дюньягъа тюшюресинъ ве коклерге котересинъ.

1 Падишалар 2:6 ပူးပေါင်းရင်းမြစ်များ

3 Падишалар 17:22

РАББИ Ильяснынъ давушыны динъледи, огъланнынъ джаны беденине къайтты, ве о, тирильди.

4 Падишалар 5:7

Исраиль падишасы мектюпни алып окъуды да, устюндеки урбасыны йыртты ве: – Ёкъса, мен ольдюрмек ве олюлерни тирильтмек кучюне саип олгъан Алламмы?! Не ичюн манъа тери хасталыгъыны тедавийлемеге адамны йибере? Мына бакъынъыз да корюнъиз: о, къавгъа чыкъармакъ ичюн мана къыдыра! – деди.

Эюп акъкъында китап 5:18

О, эм яралар, эм яраларны сарар. Урса биле, къоллары шифа берер.

Зебур 30:4

Меним къаям ве сакълангъан ерим – Сенсинъ; Озь Адынъ ичюн мени етеклеп, манъа ёл косьтер!

Зебур 68:20

Озюнь билесинъ, башыма не къадар акъарет тюшти, не къадар утандым, масхара олдым. Душманларымнынъ эписи Сенинъ огюнъде.

Зебур 71:20

Шунынънен, Йишай огълу Давутнынъ дувалары битти.

Джемаат башы 3:3

ольдюрмек вакъты ве тедавийлемек вакъты; йыкъмакъ вакъты ве къурмакъ вакъты;

Ешая 26:19

Сенинъ олюлеринъ тириледжек, ольген беденлер тураджакъ. Топракъта яткъанлар, уянынъыз, къуванчнен къычырынъыз! Чыкъ откъа тюшкени дайын, Сенинъ мераметинъ олю рухларнынъ мемлекетине энеджек.

Ехезкель 37:12

Шунынъ ичюн пейгъамберлик эт де, оларгъа бойле айт: РАББИ-ТААЛЯ шойле дей: – Меним халкъым, бакъынъыз! Мен къабирлеринъизни ачаджагъым, сизлерни андан чыкъараджагъым, сизлерни Исраиль топрагъына алып келеджегим.

Ехезкель 37:3

РАББИ менден: – Инсан огълу! Шу кемиклер тирильмек мумкюнми? – деп сорады. Мен исе: – РАББИ-ТААЛЯ! Буны тек Сен билесинъ, – дедим.

Матта 12:40

Юнус учь кунь ве учь гедже буюк балыкънынъ къурсагъы ичинде олгъаны киби, Инсан Огълу да шойле учь кунь ве учь гедже топракънынъ юрегинде оладжакъ.

Юхан 11:25

Иса онъа шойле деди: – Мен тирилюв ве аят олам. Манъа иман эткен адам ольсе де, яшайджакъ.

Къануннынъ текрары 32:39

Энди корюнъиз: Керчектен де, Мен – Одыр! Менден гъайры алла ёкъ! Мен ольдюрем, Мен де яшайыш берем, Мен урам, Мен де тедавийлейим. Меним къолумдан кимсе къуртарып оламаз.

Сырларнынъ ачылувы 1:18

Мен тирим. Ольген эдим, амма бакъ, энди Мен эбедиен тирим. Менде олюлерни тирильтмеге кучю бар, Манъа олюлернинъ дюньясынынъ къапусыны ачып олгъан анахтарлары берильгендир.

1 Падишалар 20:3

Давут ант этип: – Бабанъ сенинъ манъа олгъан яхшы мунасебетинъ акъкъында яхшы биле, шунынъ ичюн озь-озюне: «Ёнатан къасевет этмесин деп, онынъ бир шейден хабери олмасын», – дей. Лякин РАББИ Адынен сенинъ огюнъде ант этем: меннен олюмнинъ арасында бир адым къалды, – деп айтты.