TITO 3:8 - Chatino Tataltepec

⁸ Nga'a̱ cha' jlya tso'o ti' ma̱ cha' liñi nu nscua na' re, bi' cha' lye chcui' nu'u̱ cha' bi' lo'o lcaa ñati̱ nu ngusñi cha' ji'i̱ ycui' Ndyosi ca bi', cha' xcui' cha' tso'o cua'ni ma̱ li'. Tso'o tsa laca cha' liñi, taca xtyucua cha' bi' ji'i̱ cua ña'a̱ ca ñati̱;

TITO 3:8 ပူးပေါင်းရင်းမြစ်များ

SAN MATEO 20:4

Li' nchcui' yu lo'o ngu' bi': “Yaa clya ma̱, cua'ni ma̱ cña ne' lo'o 'na. Stu'ba cua'ni ma̱ cña lo'o msu 'na, cha' cua ntsu'u ngu' ndyu'ni ngu' cña 'na juani. Ta na' caya' tso'o ji'i̱ ma̱ li'”, nacui̱ yu. Hora ti ndyaa ngu' ne' xña ji'i̱ xu'na msu bi' li'.

SAN JUAN 12:44

Li' cui̱i̱ tsa nchcui' Jesús lo'o ngu': ―Nu lo'o ngusñi ñati̱ cha' jna' ni, si'i ji'i̱ sca ti na' jlya ti' ngu' bi' li'; lo'o ji'i̱ ycui' Ndyosi nu nda 'na lijya̱a̱ nde chalyuu xñi ngu' cha' li' ―nacui̱―.

SAN JUAN 5:24

’Liñi tsa cha' nu ta na' lo'o ma̱ juani: Cua ña'a̱ ca ñati̱ nu taquiya' ji'i̱ lcaa cha' nu chcui' na' lo'o ngu', lcaa ñati̱ nu jlya ti' ji'i̱ ycui' Ndyosi Sti na' nu nda jna' lijya̱a̱, bi' ngu' laca nu ná nga'a̱ cha' tye chalyuu tso'o nu ta ycui' Ndyosi ji'i̱ ngu' bi'. Ná cua'ni cuayá' Ni ji'i̱ ngu' bi', ná nscua cha' cajaa ngu' bi'; lcaa tyempo tyi'i̱ ngu' bi' lo'o ycui' Ndyosi ―nacui̱ Jesús ji'i̱ ngu'―.

LOS HECHOS 12:15

―Cua ngua tonto hique nu'u̱ ―nacui̱ ngu' ji'i̱ Rode li'. Pana lye la nchcui' nu cuna'a̱ bi' lo'o ngu' li', cha' chañi cha' Pedro laca nu ndu̱ toni'i̱ bi' nde liya'. ―Si'i ―nacui̱ ngu' li'―. ¿Ha si'i nu xca̱ ji'i̱ ycui' Ndyosi nu ña'a̱si̱i̱ ji'i̱ Pedro laca bi'? ―nacui̱ ngu' ji'i̱.

ROMANOS 4:5

Pana nu lo'o jlya ti ti' na ji'i̱ Jesús cha' ngulotsu' yu yabe' nu ntsu'u ji'na, li' taca xquiñi Ni cha' ji'i̱ Ni lo'o na cha' caca tso'o cresiya ji'na, masi ná sca na ndacui Ni ji'na.

2 CORINTIOS 4:13

Ntsu'u sca cha' nu nscua lo quityi cusu' su nchcui' ngu' ndi'ya̱: “Jlya ti' na' cha' chañi laca cha' bi', bi' cha' nchcui' na' cha' liñi bi' lo'o xa' ñati̱”, nacui̱ jyo'o cusu' bi'. Lo'o jua'a̱ cuare, nchcui' ya cha' ji'i̱ Jesús cha' cua ndyatí̱ tyiquee ya ji'i̱ yu, xqui'ya cha' ngusñi ya cha' ji'i̱ yu.

EFESIOS 4:28

Cu'ma̱ nu nguaana ma̱ na nu ntsu'u ji'i̱ ñati̱ tya tsubi' la, nga'a̱ cha' xtyanu ma̱ cña bi' ji'i̱ ma̱, clyana ma̱ cña tso'o la nu cua'ni ycui' ma̱; tso'o la si cua'ni ma̱ cña lo'o ya' ycui' ma̱, cha' jua'a̱ caja xi ñi'ya̱ nu xtyucua ma̱ ji'i̱ tya'a ma̱ nu lyiji tsa ji'i̱.

1 TIMOTEO 1:15

Taca xñi tso'o ngu' cha' nu nchcui' ndi'ya̱: Cua ya̱a̱ Jesucristo nde chalyuu cha' cua'ni lyaá Ni ji'i̱ ñati̱ chalyuu nu ntsu'u qui'ya ji'i̱. Lo'o na', tlyu la xqui'ya na' que xa' la ñati̱, cha' cuxi tsa cña nu ngua'ni na' lo'o ñati̱ ji'i̱ Jesucristo nu ngua sa'ni la.

1 TIMOTEO 2:8

Bi' cha' lacua, lcaa se'i̱ su ndyu'u ti'i̱ ngu' nu ntsu'u cha' ji'i̱ lo'o Jesucristo tsa tlyu ti, nti' na' cha' chcui' ngu' lo'o ycui' Ndyosi. Tso'o ti tyiquee ngu' ta ngu' cha' lo'o ycui' Ndyosi li', cha' ná tso'o chcui' ngu' lo'o Ni si ñasi̱' ngu', ni ná tso'o chcui' ngu' lo'o Ni laja lo'o nxu̱u̱ tya'a ngu'.

1 TIMOTEO 5:10

Scua ngu' xtañi ma' cusu' nu nchcui' ngu' ji'i̱ cha' tso'o tsa cña ndu'ni ma' cusu' bi': si cua ngua'ni cu'ú tso'o ma' ji'i̱ nu sube; si cua nda ma' su tyi'i̱ ñati̱ nu lijya̱ tyijyu'; si cua nguxtyucua ma' ji'i̱ tya'a ñati̱ ji'i̱ Jesucristo, masi tlyu cña ntsu'u cha' cua'ni ma'; si ngua tya'na ti' ma' ji'i̱ ñati̱ nu quicha ti'. Si jua'a̱ xcui' cña tso'o ndu'ni ma' cusu' bi', scua ngu' xtañi ma' lo quityi bi' lacua.

2 TIMOTEO 1:12

bi' cha' ndyiji cha' ti'í 'na juani. Pana ná tyuju'u ti' na', cha' cua jlo ti' na' tilaca laca nu ngusñi na' cha' ji'i̱ Ni. Jlo ti' na' cha' nchca ji'i̱ Ni ña'a̱si̱i̱ Ni 'na; nchca ji'i̱ Ni xtyucua Ni 'na lo'o ndyu'ni na' cña nu nda Ni 'na, cha' taca tyu'u tso'o cña 'na tsa̱ bi' lo'o tya̱a̱ Jesús nde chalyuu chaca quiya'.

TITO 1:9

Tso'o tsa ñati̱ nu cua ngui'i̱ tsa ji'i̱ cha' liñi nu ngulu'u na ji'i̱, ñati̱ nu nchca ji'i̱ culu'u cha' liñi bi' ji'i̱ tya'a ñati̱, ñati̱ nu nchca ji'i̱ tacu̱' tsiya' ti cha' ji'i̱ ngu' cuiñi.

TITO 2:14

Nu lo'o nda Jesús chacuayá' cha' ndyujuii ngu' ji'i̱, nda yu tyucui ña'a̱ ycui' ca yu cha' taca clyaá na ji'i̱ nu cuxi. Ngua'ni lubii Ni ji'i̱ cresiya ji'na li' cha' caca na ñati̱ ji'i̱ Ni, cha' tyaja'a̱ na cua'ni na xcui' cha' tso'o li'.

TITO 2:7

Xcui' tso'o ti cua'ni nu'u̱, cha' jua'a̱ ca tsa'a̱ nu ngu' cuañi' bi' lcaa cha' tso'o lo'o ña'a̱ ngu' cua ña'a̱ ca cha' nu ndyu'ni nu'u̱; lcaa cha' liñi culu'u tso'o nu'u̱ ji'i̱ ngu' bi', si'i cha' laja ti chcui' nu'u̱ lo'o ngu'.

TITO 3:1

Culu'u nu'u̱ ji'i̱ ngu' cha' taquiya' ngu' ji'i̱ lcaa ngu' nu laca loo, ji'i̱ lcaa ngu' tisiya; nga'a̱ cha' cua'ni ngu' lcaa lo cña tso'o nu culo ngu' bi' ji'i̱ ngu' cha' cua'ni ngu'.

TITO 3:14

Ntsu'u cha' ca tsa'a̱ ca ta'a ñati̱ ji'i̱ Jesucristo tya'a na cha' cua'ni ngu' lcaa lo cha' tso'o, cha' taca xtyucua ngu' ji'i̱ tya'a ñati̱ ngu' nu lyiji xi ji'i̱; ná tso'o si taja ti ndi'i̱ ngu' chalyuu.

FILEMÓN 1:11

Nu Onésimo bi' ni, ná tso'o ca ngua'nijo'o yu jinu'u̱ nu ngua tya sa'ni la. Pana juani xa' ña'a̱ cua'ni yu; masi cuentya jinu'u̱, masi cuentya jna', tso'o tsa ndu'ni yu cña juani.

HEBREOS 10:24

Culacua tso'o ti' na, cha' caja ñi'ya̱ xtyucua na ji'i̱ xa' la ngu' tya'a ngusñi na cha' ji'i̱ Jesús; xtyucua na ji'i̱ ngu' bi', cha' xcui' cha' tso'o ti cua'ni ngu' lo'o tya'a ngu', cha' jua'a̱ caca tso'o tyiquee ngu' ña'a̱ ngu' ji'i̱ tya'a ngu'.

1 PEDRO 1:21

Xqui'ya Cristo, bi' cha' jlya ti' ma̱ ji'i̱ ycui' Ndyosi, cha' cua ngua'ni ycui' Ni cha' ndyu'ú Cristo chaca quiya' lo'o cua ngujuii yu. Lo'o li' nda ycui' Ndyosi sca su tso'o su tyi'i̱ Cristo, ca su tlyu su ntucua ycui' Ni. Ngua'ni Cristo cña tonu bi', cha' taca xñi ma̱ cha' ji'i̱ ycui' Ndyosi, lo'o li' taca tyu̱ ti' ma̱ cha' caca lcaa ña'a̱ cha' nu nacui̱ Ni cha' caca.