TITO 2:2 - Chatino Tataltepec

² Culu'u nu'u̱ ji'i̱ ngu' nu cusu' la cha' ná caca cu'bi ngu', cha' xcui' cha' liñi jlya ti' ngu', cha' cua'a ngu' ji'i̱ ycui' ca ngu', cha' xcui' cha' tso'o cua'ni ngu' li'; culu'u nu'u̱ ji'i̱ ngu' bi' cha' jlya tso'o ti' ngu' lcaa cha' liñi, cha' tyu'u tyiquee ngu' ña'a̱ ngu' ji'i̱ tya'a ñati̱ ngu', cha' talo tyiquee ngu' lo'o ndyu'ni lya' ti' ñati̱ ji'i̱ ngu'.

TITO 2:2 ပူးပေါင်းရင်းမြစ်များ

SAN MARCOS 5:15

Nu lo'o ngulaa ngu' slo Jesús, li' na'a̱ ngu' ji'i̱ nu qui'yu nu ngua quicha bi'; na'a̱ ngu' cha' ti̱ ti nga'a̱ nu qui'yu bi', lacu' ste', cha' cua ndyaca tso'o. Nga'aa nxalú cui'i̱ xña'a̱ bi' ji'i̱. Ndyutsi̱i̱ tsa ngu' li'.

SAN LUCAS 8:35

Li' ndu'u ngu' quichi̱ bi', ndyaa na'a̱ ngu' xi ji'i̱, na ca ngua. Lo'o ndyalaa ngu' su nga'a̱ Jesús, li' na'a̱ ngu' ji'i̱ nu qui'yu nu ntsu'u cui'i̱ xña'a̱ ji'i̱ tsa̱ la, cha' juani tso'o ti yu; lacu' yu ste' yu, ti̱ ti ntucua yu nde slo quiya' Jesús. Ndyutsi̱i̱ tsa ngu' li'.

LOS HECHOS 24:25

Li' ngulu'u Pablo ji'i̱ ngu' cha' nti' ycui' Ndyosi cha' xcui' cha' liñi ti cua'ni ñati̱ chalyuu, cha' cua'a ngu' ji'i̱ ycui' ca ngu' cha' nga'aa cua'ni ngu' cha' cuxi, bi' laca cña nu nti' ycui' Ndyosi; jua'a̱ ngulu'u yu cha' ntsu'u cha' cua'ni cuayá' Ni ji'i̱ lcaa ñati̱ nu lo'o cua ndye chalyuu. Ndyutsi̱i̱ xi Félix li'. ―Tyaa nu'u̱ juani ―nacui̱ nu cusu' bi' ji'i̱ Pablo―. Xi'ya na' jinu'u̱ chaca quiya' si ntsu'u sca hora nu laja xi jna'.

ROMANOS 12:3

Tlyu tsa cha' tso'o nu ngua'ni ycui' Ndyosi lo'o na', nu lo'o nda Ni cña jna'; bi' cha' nchcui' tsa na' lo'o ma̱ juani, cha' nga'aa cua'ni tyucuaa ti' ma̱ lo'o xa' ñati̱. Nga'a̱ cha' culacua ti' ma̱ cha' lcaa cña nu cua nchca ji'i̱ ma̱ juani, Cristo ngua'ni cha' caca ji'i̱ ma̱, nu lo'o ngusñi ma̱ cha' ji'i̱ Ni.

1 CORINTIOS 15:34

Nga'a̱ cha' xtyanu ma̱ ji'i̱ cha' cuxi nu ndyu'ni ma̱, xana culacua tso'o ti' ma̱ li'; tso'o ti cua'ni ma̱ lo'o tya'a ma̱. Nti' na' cha' ntsu'u xi cu'ma̱ nu bilya ca cuayá' tso'o ti' ma̱ cha' ji'i̱ ycui' Ndyosi, bi' cha' nchcui' na' lo'o ma̱ jua'a̱ cha' caca tyuju'u ti' ma̱.

1 CORINTIOS 9:25

Lo'o cua xna ti ngu' sca posta ni, ná taquiya' ngu' ji'i̱ sca cha' nu cua'a ji'i̱ ngu' cha' ná xna tso'o ngu'; talo ngu' ña'a̱ cuayá' nu tyiji̱loo ngu' ji'i̱ tya'a ngu', cha' cua'ni ngu' ngana. Su cua ndye, li' caja xi cha' tso'o ji'i̱ ngu' nu ngua'ni ngana bi', masi xti ti tyempo talo cha' bi', pana xa' ña'a̱ cha' ndyaca lo'o na. Lye tsa ndyu'ni cña ti' na lcaa hora, ña'a̱ cuayá' ta Ni sca cha' tso'o ji'na, sca cha' nu ná nga'a̱ cha' tye tsiya' ti.

2 CORINTIOS 5:13

Ná ndu'ni cha' masi ñacui̱ ngu' bi' cha' tonto tsa ya; jua'a̱ laca ya tu'ni, xqui'ya cha' ndyu'ni ya cña ji'i̱ ycui' Ndyosi. Masi jua'a̱ laca ya nti' ngu' bi', pana tyucui tyiquee ya taca xtyucua ya ji'i̱ cu'ma̱ li'.

GÁLATAS 5:23

jua'a̱ ndu'ni Xtyi'i ycui' Ndyosi lo'o na cha' ná quiña'a̱ cha' ntsu'u tyiquee na cuentya ji'i̱ ycui' ca na, ndu'ni Ni cha' taca ji'na cua'a na ji'i̱ ycui' ca na li'. Nga'aa ntsu'u cha' sta ycui' Ndyosi qui'ya ji'na, si cua'ni na jua'a̱.

FILIPENSES 4:8

Cu'ma̱ tya'a ngusñi na cha' ji'i̱ Cristo, ndi'ya̱ ti culacua ti' ma̱ tyucui tyempo nu ndi'i̱ ma̱ chalyuu: Cua ña'a̱ ca cha' nu chañi tsa cha' jua'a̱ laca, bi' laca nu nga'a̱ cha' tyu'u tyiquee ma̱ ji'i̱; jua'a̱ lcaa cha' nu cua'ni chi̱ ngu' loo, lcaa cha' nu liñi ca, lcaa cha' su lubii ntsu'u tyiquee na, lcaa cha' nu tso'o tsa ña'a̱, lcaa cha' nu tso'o tsa nti' ngu' ña'a̱ ngu' ji'i̱, masi lcaa cha' tso'o bi', nu jua'a̱ tso'o tsa nchcui' ngu' ji'i̱, bi' laca nu nga'a̱ cha' tyu'u tyiquee ma̱ ji'i̱.

1 TESALONICENSES 5:6

Bi' cha' tii ti ti' na tyi'i̱ na chalyuu; si'i ñi'ya̱ nti' si xcui' na laja' ti na tyi'i̱ na chalyuu, masi jua'a̱ ndu'ni xa' la ñati̱ nu ná ndaquiya' ji'i̱ Jesucristo tsiya' ti. Lo'o jua'a̱ ña'a̱si̱i̱ na ji'i̱ ycui' ca na cha' ná caca cu'bi na.

1 TESALONICENSES 5:8

Pana nu na ni, ntsu'u xee ji'i̱ ycui' Ndyosi ne' cresiya' ji'na, bi' cha' tii ti ti' na tyi'i̱ na chalyuu; cua ngusñi na cha' ji'i̱ ycui' Ni, na cua ntsu'u tyiquee na ña'a̱ na ji'i̱ tya'a ñati̱ na xqui'ya Ni, lo'o jua'a̱ nga'a̱ cha' cua'a na ji'i̱ ycui' ca na cha' ná cua'ni na cha' cuxi nu nti' cua'ni ñu'u̱ ji'i̱ cresiya ji'na. Na ndu̱ ti' na ji'i̱ ycui' Ndyosi, ni jacua' tye cuityi̱ Ni ji'i̱ lcaa cha' cuxi nu ntsu'u ji'na, bi' cha' nga'a̱ cha' ña'a̱si̱i̱ na ji'i̱ ycui' ca na.

1 TIMOTEO 1:10

xqui'ya ñati̱ nu ndu'ni suba' lo'o nu cuna'a̱, xqui'ya nu cuna'a̱ nu ndu'ni suba' lo'o nu qui'yu, xqui'ya nu qui'yu nu ndu'ni suba' lo'o tya'a qui'yu ti, xqui'ya ñati̱ nu ntucuaana ji'i̱ tya'a ñati̱ cha' tsalo'o ji'i̱ ngu' jua'a̱ ti, xqui'ya nu cuiñi, xqui'ya ñati̱ nu nchcui' cha' cuiñi slo ngu' tisiya. Nda ycui' Ndyosi cha' cusu' bi', cha' jua'a̱ ca cuayá' ti' lcaa ñati̱ nu ná nti' taquiya' ji'i̱ cua ña'a̱ ca cha' nu liñi ca nu nclu'u na cuentya ji'i̱ ycui' Ndyosi.

1 TIMOTEO 1:14

Ntsu'u tsa tyiquee nu Xu'na na ña'a̱ Ni 'na, bi' cha' ngusñi na' cha' ji'i̱ ycui' Jesucristo li'; lo'o nu juani ntsu'u tyiquee na' ña'a̱ na' ji'i̱ Jesús, lo'o jua'a̱ ntsu'u tyiquee na' ña'a̱ na' ji'i̱ tya'a ñati̱ na'.

1 TIMOTEO 1:2

Nscua na' quityi re cha' ca̱a̱ slo nu'u̱, Timoteo, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' ngusñi nu'u̱ cha' ji'i̱ Jesucristo tya lo'o ngulu'u na' cha' bi' jinu'u̱. Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o nu'u̱, cha' cua'ni tya'na ti' Ni jinu'u̱, cha' jua'a̱ cua'ni Ni cha' ti̱ ti tyi'i̱ cresiya jinu'u̱ xqui'ya Jesucristo nu Xu'na na.

1 TIMOTEO 1:5

Culo nu'u̱ cña ji'i̱ ngu' cha' tso'o tsa tyu'u tyiquee ngu' ña'a̱ ngu' ji'i̱ tya'a ngu', cha' bi' laca cña nu ndu'ni ñati̱ nu ngua lubii cresiya ji'i̱ cuentya ji'i̱ ycui' Ndyosi; jlo ti' ñati̱ bi' ñi'ya̱ laca cña tso'o, lo'o jua'a̱ ndyu'ni ngu' bi' cña tso'o bi' li'. Chañi cha' ngusñi ngu' bi' cha' ji'i̱ ycui' Ndyosi si ntsu'u tyiquee ngu' ña'a̱ ngu' ji'i̱ tya'a ngu'.

1 TIMOTEO 3:11

Lo'o nu ngu' cuna'a̱ ni, ntsu'u cha' cua'ni ngu' xcui' cha' tso'o nu lo'o caca ngu' cña cha' xtyucua ngu' ji'i̱ ña'a̱ taju ngu' nu ngusñi cha' ji'i̱ Jesús; ná tso'o cha' chcui' nu cuna'a̱ bi' cuentyu ji'i̱ tya'a ngu' lo'o xa' ñati̱. Nga'a̱ cha' culacua tso'o ti' nu cuna'a̱ bi', cha' talo ji'i̱ cña nu nda ngu' ji'i̱.

1 TIMOTEO 3:2

Si laca sca ñati̱ loo ji'i̱ ña'a̱ taju tya'a ñati̱ ji'i̱ Jesucristo, li' ntsu'u cha' cua'ni yu xcui' cha' tso'o lo'o ñati̱, cha' ná caja ñi'ya̱ jña ngu' qui'ya ji'i̱ yu li'. Caja clyo'o yu bi' lo'o sca ti nu cuna'a̱; jua'a̱ ntsu'u cha' culacua tso'o ti' yu, cha' cua'a yu ji'i̱ cha' cuxi nu ntsu'u tyiquee ycui' ca yu, cha' tso'o ti tyi'i̱ yu lo'o tya'a ñati̱. Ntsu'u cha' ta yu ni'i̱ ji'i̱ yu lo'o jña ñati̱ nu lijya̱ tyijyu', jua'a̱ ntsu'u cha' ta yu na cacu ngu' bi'. Ntsu'u cha' culu'u yu cha' ji'i̱ ycui' Ndyosi ji'i̱ ñati̱, bi' cha' ná tso'o si ná nchca ji'i̱ yu.

1 TIMOTEO 3:4

Ntsu'u cha' culo tso'o yu bi' cña ji'i̱ ngu' tya'a ndi'i̱ ti yu, cha' jua'a̱ taquiya' sñi' yu cña nu nclyo yu ji'i̱ ngu', cha' cua'ni chi̱ sñi' yu loo yu.

1 TIMOTEO 3:8

Lo'o jua'a̱ ñati̱ nu laca cña ji'i̱ ngu' tya'a ngusñi na cha' ji'i̱ Jesús ni, lo'o ngu' bi' ntsu'u cha' cua'ni ngu' xcui' cha' tso'o. Ná tso'o si tucua cha' ntsu'u tyiquee ngu' bi' lo'o ndu'ni ngu' cña bi'; ná tso'o si cu'bi ngu' bi', ni ná tso'o si jña ngu' bi' cñi ji'i̱ tya'a ñati̱ cha' caca culiya' tsa ycui' ca ngu'.

1 TIMOTEO 5:1

Ná cua'ni tyaala nu'u̱ ji'i̱ sca ngu' cusu' si ngua'ni cuxi yu; ta nu'u̱ sca cui̱i̱ lo'o yu ñi'ya̱ lo'o nchcui' na lo'o sti na. La cui' ti cha' lo'o nu ngu' qui'yu cuañi' ni, ta sca cui̱i̱ lo'o ngu' ñi'ya̱ lo'o nclu'u na ji'i̱ tya'a na.

TITO 1:13

Chañi cha' nu nchcui' jyo'o bi'; bi' cha' lye chcui' nu'u̱ lo'o ngu' bi', cha' tso'o ti xñi ngu' lcaa cha' ji'i̱ Jesús nu nchcui' na lo'o ngu',

TITO 1:8

clyana nu'u̱ ji'i̱ ngu' nu nda su tyi'i̱ ñati̱ nu lijya̱ tyijyu', ngu' nu ndiya ti' cua'ni xcui' cha' tso'o, ngu' nu tso'o ti nchcui' lo'o ñati̱, ngu' nu sca ti cha' ji'i̱ Jesús ntsu'u tyiquee ngu', nu ndu'ni cua ña'a̱ ca cha' nu nti' ycui' Ndyosi cha' cua'ni na, ngu' nu nchca ji'i̱ cua'a ji'i̱ ycui' ca ngu'.

TITO 2:7

Xcui' tso'o ti cua'ni nu'u̱, cha' jua'a̱ ca tsa'a̱ nu ngu' cuañi' bi' lcaa cha' tso'o lo'o ña'a̱ ngu' cua ña'a̱ ca cha' nu ndyu'ni nu'u̱; lcaa cha' liñi culu'u tso'o nu'u̱ ji'i̱ ngu' bi', si'i cha' laja ti chcui' nu'u̱ lo'o ngu'.

1 PEDRO 1:13

Bi' cha' culacua xi ti' ma̱, tii ti' ma̱ tyi'i̱ ma̱ chalyuu, cha' lcaa tsa̱ jatya ma̱ ji'i̱ cha' tso'o nu cua tlyu xi, nu cua'ni Ni lo'o ma̱ lo'o cua'ni lyaá lyiji Ni ji'i̱ ma̱; jua'a̱ caca nu lo'o tyu'u tucua Jesucristo chaca quiya'.

1 PEDRO 4:7

Cua tye ti cha' ji'i̱ lcaa na nu ntsu'u chalyuu; bi' cha' tso'o la si cua'a ma̱ ji'i̱ ycui' ca ma̱, tii ti ti' ma̱ tyi'i̱ ma̱ chalyuu cha' taca cua'ni ma̱ cña tso'o, cha' lu'ba ti taca chcui' ma̱ lo'o ycui' Ndyosi.

1 PEDRO 5:8

¡Tii ti ti' ma̱ tyi'i̱ ma̱ chalyuu! Ná caja' ma̱, cha' tya'a cusu̱u̱ ma̱ laca ycui' nu xña'a̱, lo'o jua'a̱ cacua tsa ndu̱ bi' slo ma̱. Ñi'ya̱ nti' sca cuichi nu tyaala tsa nu nclyana ji'i̱ sca ñati̱ cha' cacu ni', jua'a̱ nti' ndya'a̱ yu'u nu xña'a̱ bi' chalyuu.

2 PEDRO 1:6

Ntsu'u cha' ca cuayá' la ti' ma̱ ñi'ya̱ ntsu'u cha' ji'i̱ ycui' Ndyosi; li' taca cua'a tso'o ma̱ ji'i̱ ycui' ca ma̱, cha' nga'aa cua'ni nu cuxi ngana ji'i̱ ma̱. Si taca cua'a tso'o ma̱ ji'i̱ ycui' ca ma̱, li' talo tsa ma̱ ji'i̱ nu cuxi. Nu lo'o taca talo ma̱ ji'i̱ lcaa cha' cuxi, li' taca tyi'i̱ ma̱ ñi'ya̱ nti' ycui' Ni cha' tyi'i̱ ma̱ nde chalyuu.