TITO 1:9 - Chatino Tataltepec

⁹ Tso'o tsa ñati̱ nu cua ngui'i̱ tsa ji'i̱ cha' liñi nu ngulu'u na ji'i̱, ñati̱ nu nchca ji'i̱ culu'u cha' liñi bi' ji'i̱ tya'a ñati̱, ñati̱ nu nchca ji'i̱ tacu̱' tsiya' ti cha' ji'i̱ ngu' cuiñi.

TITO 1:9 ပူးပေါင်းရင်းမြစ်များ

LOS HECHOS 18:28

Ngulu'u nu Apolos bi' ji'i̱ lcaa ngu' cha' cuiñi tsa laca cha' nu nda nu ngu' judío bi', masi ñati̱ tya'a yu laca ngu'; jua'a̱ ngulu'u yu cha' ji'i̱ ycui' Ndyosi nu nscua lo quityi tya sa'ni la, nu nchcui' cha' ji'i̱ nu Cristo nu ntajatya tsa ngu' ji'i̱ bi'. Cristo laca Jesús, nacui̱ yu. Tso'o tsa nchcui' yu, bi' cha' ná tucui ngua ji'i̱ tacu̱' cha' ji'i̱ yu.

1 CORINTIOS 14:24

Xa' ña'a̱ caca si xcui' cha' nu cua nda ycui' Ndyosi lo'o ma̱ laca cha' nu chcui' ma̱ lo'o tya'a ma̱; nu lo'o tyalaa ngu' su ndyu'u ti'i̱ ma̱, si ngu' nu bilya xñi cha' ji'i̱ Jesús, nu si'i tya'a ndyu'ni tlyu ma̱ ji'i̱ ycui' Ndyosi laca ngu', li' ca tyuju'u ti' ngu' bi' ji'i̱ qui'ya nu ntsu'u ji'i̱ ngu', nu lo'o cuna ngu' cha' nu nchcui' ma̱. Li' caca cuayá' ti' ngu' cha' cuxi tsa laca ycui' ngu',

1 TESALONICENSES 5:21

pana cua'ni cuayá' ma̱ ji'i̱ cua ña'a̱ ca cha' nu nchcui' ngu' bi', si tso'o ndyu'u cha', si ná tso'o. Li' xñi ma̱ cha' tso'o bi',

2 TESALONICENSES 2:15

Cu'ma̱ ngu' tya'a na, juani tyi'u tso'o ti' ma̱ lcaa cha' nu ngulu'u ya ji'i̱ ma̱; cua'ni ma̱ cha' caca cuayá' tso'o ti' ma̱ lcaa cha' nu cua nchcui' ya lo'o ma̱, lcaa cha' nu cua nguscua ya lo quityi cha' ca̱a̱ ca slo ma̱.

1 TIMOTEO 1:10

xqui'ya ñati̱ nu ndu'ni suba' lo'o nu cuna'a̱, xqui'ya nu cuna'a̱ nu ndu'ni suba' lo'o nu qui'yu, xqui'ya nu qui'yu nu ndu'ni suba' lo'o tya'a qui'yu ti, xqui'ya ñati̱ nu ntucuaana ji'i̱ tya'a ñati̱ cha' tsalo'o ji'i̱ ngu' jua'a̱ ti, xqui'ya nu cuiñi, xqui'ya ñati̱ nu nchcui' cha' cuiñi slo ngu' tisiya. Nda ycui' Ndyosi cha' cusu' bi', cha' jua'a̱ ca cuayá' ti' lcaa ñati̱ nu ná nti' taquiya' ji'i̱ cua ña'a̱ ca cha' nu liñi ca nu nclu'u na cuentya ji'i̱ ycui' Ndyosi.

1 TIMOTEO 1:15

Taca xñi tso'o ngu' cha' nu nchcui' ndi'ya̱: Cua ya̱a̱ Jesucristo nde chalyuu cha' cua'ni lyaá Ni ji'i̱ ñati̱ chalyuu nu ntsu'u qui'ya ji'i̱. Lo'o na', tlyu la xqui'ya na' que xa' la ñati̱, cha' cuxi tsa cña nu ngua'ni na' lo'o ñati̱ ji'i̱ Jesucristo nu ngua sa'ni la.

1 TIMOTEO 1:19

taca xu̱u̱ tya'a nu'u̱ lo'o nu cuxi bi' si xñi tso'o nu'u̱ cha' ji'i̱ Jesucristo, si xcui' cha' tso'o cua'ni nu'u̱ lo'o ñati̱. Ntsu'u ngu' nu ngua jlo ti' ñi'ya̱ laca sca cha' liñi, pana nga'aa ndyu'ni ngu' cha' liñi bi' juani; cua ndya'a̱chu̱' ngu' bi' ji'i̱ ycui' Ndyosi, cha' nguxtyanu ngu' cha' tso'o bi'.

1 TIMOTEO 4:9

Chañi tsa cha' nu nscua na' nde, jua'a̱ ntsu'u cha' xñi tso'o na cha' bi'.

1 TIMOTEO 6:3

Liñi tsa cha' ji'i̱ ycui' Jesucristo nu Xu'na na; cua ña'a̱ ca ñati̱ nu nclu'u xi xa' la cha' ji'i̱ ma̱, ná liñi ndyu'ni nu ñati̱ bi', ná ntaja'a̱ ngu' tsiya' ti taquiya' ngu' ji'i̱ cha' liñi bi'.

2 TIMOTEO 1:13

Ña'a̱ ti tya tyi'u ti' nu'u̱ lcaa cha' nu cua ngulu'u na' jinu'u̱ lacua. Cha' liñi laca bi', jua'a̱ tso'o tsa si xñi tso'o nu'u̱ cha' bi'. Tso'o ti tyu'u tyiquee nu'u̱ ña'a̱ nu'u̱ ji'i̱ ñati̱, xqui'ya cha' ntsu'u cha' jinu'u̱ lo'o Jesucristo.

2 TIMOTEO 2:2

Cua ndyuna nu'u̱ lcaa cha' nu ngulu'u na' ji'i̱ tyu̱u̱ tya'a ñati̱; nu juani la cui' ñi'ya̱ nu ngulu'u na', jua'a̱ culu'u nu'u̱ ji'i̱ ñati̱ nu tyucui tyiquee nti' ngu' culu'u ngu' cha' bi' ji'i̱ xi xa' la ñati̱, cha' ca tsa'a̱ tso'o nu xa' la ngu' bi' cha' ji'i̱ ycui' Ndyosi.

2 TIMOTEO 2:25

jua'a̱ ji'i̱ ñati̱ nu ñasi̱' ji'i̱ ngu'. Tso'o ti chcui' ngu' bi' lo'o ñati̱ nu ñasi̱', cha' jua'a̱ taca cua'ni ycui' nu Xu'na na cña ne' cresiya ji'i̱ ñati̱ nu ñasi̱' bi', cha' taca culu'u Ni ji'i̱ ngu' ñi'ya̱ laca lo'o cha' liñi bi'. Tso'o tsa si culochu̱' ñati̱ nu ñasi̱' bi' lcaa cha' cuxi nu ndyu'ni ngu',

2 TIMOTEO 3:14

Pana nu'u̱ ni, ña'a̱ ti xñi tso'o nu'u̱ lcaa cha' nu ngua tsa'a̱ nu'u̱; na cua ngua cuayá' ti' nu'u̱ ji'i̱ cha' bi', cha' liñi laca bi'. Cua jlo ti' nu'u̱ tilaca laca nu ngulu'u cha' bi' jinu'u̱ tya clyo.

2 TIMOTEO 4:3

cha' ca nde loo la nga'aa tyaja'a̱ ngu' cuna ngu' cha' tso'o bi' li'; culana ngu' ji'i̱ quiña'a̱ xa' la ñati̱ nu culu'u ji'i̱ ngu' lcua ti cha' cuxi nu ndiya la ti' ngu' bi' cuna ngu'.

TITO 1:11

Nga'a̱ cha' tacu̱' ma̱ tu'ba ngu' cuiñi bi', cha' ná tacu̱' ngu' cha' ji'i̱ quiña'a̱ ñati̱, ña'a̱ tya'a nga'a̱ ni'i̱ ti ngu' nu cua ngusñi cha' liñi bi'. Nclyu'u ngu' cuiñi bi' cha' ji'i̱ tya'a na; pana na cuiñi ngu' bi', cha' cua nti' ngu' caja cñi ji'i̱ ngu'.

TITO 2:1

Lo'o nu'u̱ ni, Tito, xcui' cha' liñi culu'u nu'u̱ ji'i̱ ñati̱.

JUDAS 1:3

Cu'ma̱ ngu' tya'a tso'o na nu tyaca'a tsa ma̱ 'na, nti' tsa na' scua na' quityi cha' tsaa ca slo ma̱, sca quityi nu chcui' ji'i̱ cha' tlyu nu ngua'ni Jesús cha' taca clyaá na ji'i̱ nu cuxi; pana ná ngua scua na' ji'i̱ yala ti. Lo'o nu juani nga'a̱ cha' scua na' quityi re cha' tsaa ca slo ma̱, cha' ta na' sca cui̱i̱ lo'o ma̱; nga'a̱ cha' cua'a ma̱ ji'i̱ cua ña'a̱ ca ngu' cuiñi, xqui'ya cha' ná jlya ti' ngu' ji'i̱ cha' liñi nu cua nda ycui' Ndyosi nu Xu'na na lo'o na, lcaa na nu ntsu'u cha' ji'na lo'o Jesucristo. Ná cua'a̱ jyaca̱ ma̱ tsiya' ti ji'i̱ cha' nu nchcui' ngu' cuiñi bi'.

APOCALIPSIS 2:25

masi sca ti cha' chcui' na' lo'o ma̱, cha' ña'a̱ ti tya tyanu tso'o cha' ne' cresiya ji'i̱ ma̱, lcaa cha' nu cua ndyuna ma̱ tya tsubi' la; tyanu cha' bi' ña'a̱ cuayá' nu ca̱a̱ na', nacui̱ Jesús.

APOCALIPSIS 3:11

Cua tya̱a̱ ti na'. Ná ta ma̱ chacuayá' cha' culiji yu'u jua'a̱ ti cha' tso'o nu ntsu'u ne' cresiya ji'i̱ ma̱, tya cua'ni ma̱ ñi'ya̱ nu ngua'ni ma̱ tya sa'ni la. Tii ti ti' tyi'i̱ ma̱ cha' caja chalyuu tso'o nu ta ycui' Ndyosi ji'i̱ ma̱ lo'o tye chalyuu re.

APOCALIPSIS 3:3

Tyi'u ti' ma̱ cha' tso'o tsa ngusñi ma̱ cha' 'na nu lo'o ngulu'u ngu' cha' ji'i̱ ma̱ tya clyo; taquiya' ma̱ ji'i̱ cha' bi' chaca quiya', pana culochu̱' ma̱ cha' cuxi nu ndyu'ni ma̱ juani, nacui̱ Jesús. Si ná tyaja'a̱ ma̱ taquiya' ma̱ cha' 'na, li' tsiya' ca tyu'u tucua na' ca̱a̱ na' slo cu'ma̱, ñi'ya̱ nti' lijya̱ sca nu cuaana; ca̱a̱ na' cha' xcube' na' ji'i̱ ma̱ lo'o ná ca tii ma̱ ni hora laca nu ca̱a̱ na', nacui̱ Ni.