SANTIAGO 3:2 - Chatino Tataltepec

² Chañi laca cha' ntsu'u quiya' lcaa na ndyu'u tsaa tu'ba na lo'o nchcui' na lo'o tya'a ñati̱ na; ná ntsu'u ni sca ñati̱ nu bilya tyu'u tsaa tu'ba tsiya' ti, nu lo'o nchcui' ngu' lo'o tya'a ñati̱ ngu'. Si ntsu'u ñati̱ nu nchca ji'i̱ cua'a ji'i̱ cha' nu nchcui' ycui' ca ngu', ñati̱ nu tyucui tyiquee tsiya' ti laca ngu' bi'. Ná tyiquee' taca cua'a ngu' bi' ji'i̱ ña'a̱ tsaca ngu', si jua'a̱; pana tucui tsa laca cha' cua'a na ji'i̱ ycui' ca na, cha' ná chcui' na cha' cuxi.

SANTIAGO 3:2 ပူးပေါင်းရင်းမြစ်များ

SAN MATEO 12:34

Pana, ¡ñi'ya̱ nti' cuaña tyaala, jua'a̱ nti' cu'ma̱! Ná nchca chcui' ma̱ cha' tso'o laja lo'o ntsu'u tsa cha' cuxi tyiquee ma̱; ñi'ya̱ nu ntsu'u tyiquee scaa na, jua'a̱ ndyu'u cha' nu nchcui' na.

SAN MATEO 12:37

Li' cui'ya Ni cuentya ji'i̱ lcaa cha' nu cua nchcui' ma̱ chalyuu; ñacui̱ Ni ji'i̱ ma̱ si ntsu'u qui'ya ji'i̱ ma̱ lo'o ycui' Ni, jua'a̱ si ná ntsu'u qui'ya ji'i̱ ma̱.

ROMANOS 3:10

La cui' cha' nscua lo quityi ji'i̱ ycui' Ndyosi nu nchcui' ndi'ya̱: Ni tsaca ngu' ná ntsu'u nu xcui' cha' tso'o ndu'ni;

ROMANOS 7:21

Lo'o li' ndi'ya̱ ndyaca cha' 'na lacua: Masi nti' tsa na' cua'ni na' sca cha' tso'o nquicha', nchca cuayá' ti' na' cha' xcui' cha' cuxi ntsu'u ne' cresiya jna'.

1 CORINTIOS 9:27

Nchcube' na' ji'i̱ ycui' ca na', cha' talo chalyuu 'na, cha' ná xtyanu ti'i̱ Ni 'na tsiya' ti. Quiña'a̱ tsa cha' cua ngulu'u na' ji'i̱ xa' ñati̱ cuentya ji'i̱ ycui' Ni, lo'o jua'a̱ ntsu'u cha' taquiya' ycui' na' ji'i̱ cha' bi'.

GÁLATAS 3:22

Cua nchcui' quityi ji'i̱ ycui' Ndyosi cha' nu cuxi laca loo la ji'i̱ lcaa ñati̱ chalyuu, ñi'ya̱ si na cua laca na preso ji'i̱. Si jlo ti' na cha' nu cuxi laca loo ji'na, li' taca ji'i̱ Ni cua'ni lyaá Ni ji'na; ta Ni chalyuu cucui ji'na li', nu lo'o xñi na cha' ji'i̱ ycui' Jesucristo. Bi' laca nu cha' tso'o nu cua ngüiñi ji'i̱ ycui' Ni lo'o na.

GÁLATAS 5:17

Nu cha' cuxi nu ndiya ti' na ni, nxu̱u̱ tya'a cha' bi' lo'o cha' nu nda Xtyi'i ycui' Ndyosi cha' tyanu ne' cresiya ji'na. Lo'o jua'a̱ Xtyi'i ycui' Ndyosi ni, bi' laca nu nxu̱u̱ tya'a lo'o cha' cuxi nu ndiya ti' na cha' cua'ni na, cha' laca na ñati̱ chalyuu. Ná stu'ba cha' bi' tsiya' ti; bi' cha' nga'aa caca cua'ni ma̱ cua ña'a̱ ca cha' cuxi nu ndiya ti' ma̱, nu ngua'ni ma̱ cua tsubi' la.

COLOSENSES 1:28

Bi' cha' lye tsa nchcui' ya cha' ji'i̱ Cristo lo'o lcaa ñati̱; tso'o ti, qui'i ti nclyu'u ya cha' bi' ji'i̱ ngu', ndacane ya ji'i̱ ngu' cha' nga'aa cua'ni ngu' cha' cuxi. Cua nti' tsa ya cha' tso'o tsa caca tyucui ti' tyiquee scaa ngu' cuentya ji'i̱ Cristo nu lo'o tyalaa ngu' ca slo ycui' Ni.

COLOSENSES 4:12

Lo'o yu Epafras tya'a quichi̱ tyi ma̱, nda yu xlyo ni'i̱ ji'i̱ ma̱; stu'ba ti ndya'a̱ yu lo cña ji'i̱ Jesucristo lo'o ya. Lcaa tsa̱ ndijña tsa yu cha' clyu ti' ji'i̱ ycui' Ndyosi cuentya ji'i̱ cu'ma̱, ndijña yu chacuayá' ji'i̱ ycui' Ni cha' ná tya'a̱chu̱' ma̱ tsiya' ti cha' ji'i̱ Ni. Ndi'ya̱ nti' yu, cha' tyucui tyiquee ma̱ tsiya' ti cua'ni ma̱ na laca nu nti' Ni cha' cua'ni ma̱ nde lo yuu chalyuu.

HEBREOS 13:21

Ycui' Ndyosi ndu'ni cha' ti̱ ti tyi'i̱ tyiquee na, lo'o juani nti' na' cha' xtyucua Ni ji'i̱ ma̱ lo'o cua ña'a̱ ca cha' nu lyiji ji'i̱ ma̱, cha' taca cua'ni ma̱ lcaa cña, ñi'ya̱ nu nti' Ni cha' cua'ni ma̱; nti' na' cha' cuentya ji'i̱ ma̱ cua'ni Ni na laca nu tso'o la nti' Ni, chacuayá' ji'i̱ Jesucristo. Lo'o jua'a̱ ná nga'a̱ cha' tye cha' cua'ni tlyu Ni ji'i̱ Cristo. ¡Jua'a̱ caca cha' lacua!

SANTIAGO 1:26

Ná tyiquee' ntsu'u xi ngu' tya'a ma̱ nu nti' cha' tacati tsa ndu'ni ycui' ca ngu'. Pana laja ti ndu'ni ngu' cha' tacati ngu', si ná ndube ti' ngu' ñi'ya̱ nchcui' ngu' lo'o ñati̱; na ñilo'o ngu' ji'i̱ ycui' ca ngu' cha' tacati ngu' li'.

SANTIAGO 1:4

Pana cui'ya ma̱ cuentya cha' talo ma̱ tyucui tyempo lo'o ndi'i̱ ma̱ chalyuu, ña'a̱ cuayá' nu tye cha' ti'í ji'i̱ ma̱, cha' caca ma̱ ñati̱ nu tyucui tyiquee, ñati̱ nu ná sca na lyiji ji'i̱ cha' ngusñi ma̱ cha' ji'i̱ Jesús.

SANTIAGO 2:10

Ñati̱ nu ndaquiya' lcaa cña nu ngulo ycui' Ndyosi ji'na cha' cua'ni na, lo'o li' ntsu'u masi sca ti cha' cuxi nu ndyu'ni ngu' bi', sca ti cuayá' ntsu'u qui'ya ji'i̱ ngu', ñi'ya̱ laca si ná ndaquiya' ngu' tsiya' ti ji'i̱ lcaa cña nu cua ngulo ycui' Ni ji'na.

1 PEDRO 3:10

Ndi'ya̱ nscua cha' lo quityi ji'i̱ ycui' Ndyosi: Lcaa ngu' nu nti' caja chalyuu tso'o ji'i̱ ngu', cha' ca chaa ti' ngu', nga'a̱ cha' cua'a ngu' bi' ji'i̱ ycui' ca ngu' cha' ná chcui' ngu' cha' cuxi; la cui' jua'a̱ ná tso'o si tyu'u cha' cuiñi tu'ba ngu' bi'.

1 PEDRO 5:10

Pana xti ti tsa̱ tyacua cha' ti'í ji'i̱ ma̱. Lo'o tye tsa̱ nu nchcube' ma̱, li' cua'ni ycui' Ndyosi cha' caca tso'o ma̱, cua'ni Ni cha' caca nguula ti' tyiquee ma̱ chaca quiya'; ta Ni juersa ji'i̱ ma̱, cha' xcui' tso'o tsa ndu'ni ycui' Ni lo'o na. Xqui'ya Cristo cua ngusubi Ni ji'na cha' taca tyi'i̱ na ca su tlyu su ntucua ycui' Ni.