SAN MATEO 5:12 - Chatino Tataltepec

¹² Li' caca tso'o tyiquee ma̱, ca chaa ti' ma̱ cha' cua laca nguxco'o ycui' Ndyosi sca cha' tso'o nu tyacua ji'i̱ sa scaa ma̱ ca su ntucua ycui' Ni. La cui' jua'a̱ ngua lya' tsa ti' jyo'o cusu' sa'ni, nu lo'o na'a̱ ngu' ji'i̱ jyo'o cusu' nu ngua tu'ba ji'i̱ ycui' Ndyosi tyempo bi'.

SAN MATEO 5:12 ပူးပေါင်းရင်းမြစ်များ

SAN MATEO 16:27

Chañi cha' chaca quiya' ca̱a̱ na' nu cua nda Ni 'na lijya̱ na' cha' caca na' ñati̱, stu'ba ti ca̱a̱ na' lo'o lcaa xca̱ ji'i̱ ycui' Ndyosi; ndubi tsa ña'a̱ loo na' lo'o xee ji'i̱ ycui' Ndyosi Sti na' li'. Lo'o li' ta na' xcaya' ngu', ni cña nu cua ngua'ni scaa ngu' lo'o ya̱a̱ ngu' chalyuu.

SAN MATEO 6:16

’Lo'o chaca cha' ni: nu lo'o tyalaa tsa̱ ji'i̱ ma̱ lo'o ná cacu ma̱ xqui'ya cha' cua'ni tlyu ma̱ ji'i̱ ycui' Ni, ná tso'o si tyu'u cha' xñi'i̱ ti' tyiquee ma̱, ñi'ya̱ nu ndu'ni ngu' nu tucua cha' ntsu'u tyiquee ngu'. Nti' ngu' bi' cha' ña'a̱ ñati̱ ji'i̱ cha' tacati tsa nu ndu'ni ycui' ca ngu', cha' ná ndyacu ngu' tsa̱ bi'. Cha' liñi nchcui' na' lo'o ma̱, cha' cua laca ngujui cha' ji'i̱ ngu'; lcaa cha' tso'o nu tyacua ji'i̱ ngu' ca slo ycui' Ndyosi nquicha', cua ngujui cha' bi' ji'i̱ ngu' nu lo'o cua na'a̱ xa' ñati̱ chalyuu ti ji'i̱ ngu'.

SAN LUCAS 13:34

’Tya'na tsa cu'ma̱ ngu' Jerusalén, cha' tucui tsa cha' nu ntsu'u ji'i̱ ma̱. Tya sa'ni ndujuii ma̱ ji'i̱ ngu' nu laca tu'ba ji'i̱ ycui' Ndyosi, ngujui'i̱ ma̱ quee ji'i̱ ñati̱ nu ngua'a̱ lo Ni cña ji'i̱. Tyu̱u̱ tsa quiya' ngua ti' na' cha' cua'ni tyaca'a na' ji'i̱ ma̱, cha' ná ca cuxi ji'i̱ ma̱; ñi'ya̱ nti' sca su'u̱ nu nxuti'i̱ ji'i̱ sñi' ne' lu'be ni', jua'a̱ nti' na' cua'ni na' lo'o ma̱, pana ná nda ma̱ chacuayá' 'na tsiya' ti.

SAN LUCAS 6:23

tso'o tsa caca tyiquee ma̱ li', caca chaa ti' ma̱, masi cua'ni ngu' lcaa cha' lya' ti' lo'o ma̱ jua'a̱. Ná cube ti' ma̱, cua laca ndyu'u co'o ycui' Ndyosi sca cha' tso'o nu cua tlyu xi nu tyacua ji'i̱ scaa ma̱ ca su ntucua ycui' Ni ―nacui̱ Jesús li'―. La cui' jua'a̱ ngua tya sa'ni la, cha' lya' tsa ti' jyo'o cusu' ji'i̱ ñati̱ nu ngua tu'ba ji'i̱ ycui' Ndyosi cha' nchcui' Ni lo'o ñati̱ ―nacui̱ Jesús―.

SAN LUCAS 6:35

Pana nu cu'ma̱ ni, ntsu'u cha' tyu'u tso'o tyiquee ma̱ ña'a̱ ma̱ ji'i̱ tya'a cusu̱u̱ ma̱, cua'ni ma̱ cha' tso'o lo'o ngu' bi'. Ta ma̱ jñi' ngu', ná tu̱ ti' ma̱ si ta ngu' sca cha' tso'o ji'i̱ ma̱, si ná ta ngu'. Tlyu tsa cha' tso'o tyacua ji'i̱ ma̱ ca slo ycui' Ndyosi si tso'o ntsu'u tyiquee ma̱ ña'a̱ ma̱ ji'i̱ ngu', cha' jua'a̱ ndu'ni ñati̱ nu laca sñi' ycui' Ndyosi. Lo'o ycui' Ndyosi ni, tya'na ti' Ni ji'i̱ ngu', masi xña'a̱ ngu', masi ná ndya ngu' xlya'be ji'i̱ Ni;

LOS HECHOS 16:25

Nu lo'o ngua cla'be talya nga'a̱ Pablo lo'o Silas ne' chcua̱ bi'; nchcui' ngu' lo'o ycui' Ndyosi, ndyula tu'ba ngu' ji̱i̱ ji'i̱ ycui' Ni. Lo'o jua'a̱ ndyuna lcaa preso tya'a ntsu'u ngu' ne' chcua̱.

LOS HECHOS 5:41

Ndu'u ngu', chaa tsa ti' ngu' li', masi cua nchcube' ngu' nu laca loo bi' ji'i̱ ngu' xqui'ya cha' ngusñi ngu' cha' ji'i̱ Jesús.

ROMANOS 5:3

Masi juani tso'o ntsu'u tyiquee na laja lo'o ndi'i̱ na chalyuu; masi lya' tsa ti' ngu' ji'na, jlo ti' na cha' taca talo na lo'o nchcube' na jua'a̱.

1 CORINTIOS 3:8

Sca ti cuayá' ndu'ni ya lo'o tya'a ya, masi nda ya cha' lo'o cu'ma̱ su clyo, masi nclyu'u tso'o la ya cha' bi' ji'i̱ ma̱ ca tiya' la. Ycui' Ndyosi ni, tya ta la Ni cha' tso'o ji'i̱ ya, tsa ña'a̱ nu ndyu'ni tso'o ya cña ji'i̱ Ni.

2 CORINTIOS 4:17

Si'i na tlyu tsa cha' ti'í nu ndyacua ji'na chalyuu re juani, xti ti tyempo talo cha' ti'í bi'; pana tiya' la ni, tlyu tsa cha' tso'o nga'a̱ cha' tyacua ji'na ca slo ycui' Ndyosi, lo'o ná nga'a̱ cha' tye bi' tsiya' ti. Ná stu'ba cha' ti'í re lo'o cha' tso'o nu nga'a̱ cha' tyacua ji'na nde loo la.

FILIPENSES 1:29

Tso'o tsa laca cha' nda ycui' Ndyosi chacuayá' cha' ngusñi ma̱ cha' ji'i̱ Cristo; pana cua nscua cha' caja xi cha' ti'í ji'i̱ ma̱, nu lo'o cua ngusñi ma̱ cha' ji'i̱ Cristo bi'.

FILIPENSES 2:17

Jlo ti' na' cha' si'i cha' xca ti laca nu ngua'ni ma̱ lo'o ngusñi ma̱ cha' ji'i̱ ycui' Ndyosi; quiña'a̱ tsa na nguxtyanu ma̱, tyu̱u̱ quiya' cua nda ma̱ tyucui ña'a̱ ma̱ cha' caca ma̱ cña ji'i̱ Cristo, xqui'ya cha' cua ngusñi ma̱ cha' ji'i̱ Ni. Lo'o juani lo'o na' ni, cujuii ngu' 'na, nti' na'; chcuna' chalyuu 'na jua'a̱ ti cuentya ji'i̱ cu'ma̱. Pana ná ntsi̱i̱ na'; masi jua'a̱ caca 'na, chaa tsa ti' na' ndi'i̱i̱. Lo'o jua'a̱ nti' na' cha' ca chaa ti' cu'ma̱, cha' stu'ba ti ca chaa ti' na' lo'o cu'ma̱.

COLOSENSES 1:24

Tso'o nti' na' masi cua ngujui xi cha' ti'í 'na cuentya ji'i̱ cu'ma̱; tso'o nti' na' cha' cuentya ji'i̱ ca ta'a taju ñati̱ nu ngusñi cha' ji'i̱ Cristo lcaa quichi̱, bi' cha' ndyacua cha' ti'í bi' 'na. Nchcube' tsa Cristo nde chalyuu xqui'ya na, cha' laca na ñati̱ ji'i̱ ycui' yu; jua'a̱ ndyacua cha' ti'í 'na, cha' cua lijya̱ caca stu'ba la cha' ji'na lo'o ycui' Cristo lo'o cha' ti'í nu ndyaca ji'na nde chalyuu cha' ngusñi na cha' ji'i̱ Cristo.

COLOSENSES 3:24

Cua jlo ti' ma̱ cha' ycui' nu Xu'na na laca nu nguxco'o cha' tso'o nu tyacua ji'i̱ scaa ma̱ lo'o cua tye ti cha'. Cristo laca nu Xu'na ma̱ nu chañi ca; cuentya ji'i̱ ycui' Cristo bi', bi' cha' ndyu'ni ma̱ cña.

1 TESALONICENSES 2:15

Ñi'ya̱ lo'o ndyujuii ngu' judío cuxi nu nguti'i̱ nu ngua sa'ni la ji'i̱ jyo'o nu ngua tu'ba ji'i̱ ycui' Ndyosi, la cui' jua'a̱ cua ndyujuii nu ngu' judío cuxi bi' ji'i̱ ycui' Jesús nu Xu'na na cua tsubi'. Ca tiya' la li' lo'o ji'i̱ cuare ngulo'o nu ngu' judío bi'. Ná ndiya ti' ycui' Ndyosi cha' ndyu'ni ngu' bi' jua'a̱, cha' nxu̱u̱ tya'a ngu' bi' lo'o lcaa ñati̱.

HEBREOS 10:34

Lo'o jua'a̱ ndyaa na'a̱ ma̱ ji'i̱ ngu' tya'a ma̱ nu lo'o ntsu'u ngu' bi' ne' chcua̱, nguxtyucua ma̱ ji'i̱ ngu' bi' li'; masi nguaana xa' ñati̱ lcaa cha' tso'o nu ntsu'u ji'i̱ ma̱, ndalo tsa tyiquee ma̱ li'. Tso'o ntsu'u tyiquee ma̱, cha' cua jlo ti' ma̱ cha' tso'o la tsiya' ti laca nu cha' ji'i̱ Jesús nu cua ngusñi ma̱ bi'; jlo ti' ma̱ cha' ná tye chca cha' bi', cha' nu cua ndyuna ma̱ cuentya ji'i̱ Jesús.

HEBREOS 11:26

tso'o la stu'ba ti tyi'i̱ yu lo'o ngu' tya'a yu, masi chi̱i̱ nti' xa' ñati̱ ña'a̱ ji'i̱ yu, ngua ti' yu. Ñi'ya̱ nchcube' ycui' Cristo nde loo la, jua'a̱ nchcube' Moisés nu ngua li'; pana ná ndube ti' yu cha' culiya' ngu', nguxtyanu yu lcaa cha' tso'o nu ntsu'u ji'i̱ ngu' Egipto, cha' jlya ti' yu cha' tso'o la caca ji'i̱ ñati̱ ji'i̱ yu nde loo la xqui'ya ycui' Ndyosi.

HEBREOS 11:33

Jlya ti' lcaa ngu' bi' ji'i̱ ycui' Ndyosi, bi' cha' ngusu̱u̱ tya'a ngu' lo'o ñati̱ cuxi nde xa' chalyuu, ntiji̱loo ngu' ji'i̱ lcaa ñati̱ nu nguti'i̱ ca bi' li'; tso'o tsa cña ngua'ni ngu' bi', bi' cha' ngua'ni Ni cua ña'a̱ ca cha' nu nacui̱ Ni cha' cua'ni Ni cuentya ji'i̱ ngu' bi'. Ngua ji'i̱ ngu' bi' cua'a ji'i̱ cuichi tyaala cha' ná ndyacu ji'i̱ ngu';

HEBREOS 11:6

Ni sca na, ná taca cua'ni na cha' caca tyaala' ti' tyiquee ycui' Ndyosi, si ná chañi cha' jlya ti' na ji'i̱ Ni. Si nti' na cha' jyacua na ji'i̱ Ni cha' chcui' na lo'o Ni, li' nga'a̱ cha' jlya ti' na cha' lu'ú ycui' Ndyosi; nga'a̱ cha' jlya ti' na cha' taca xtyucua Ni ji'na lo'o jña na sca cha' ji'i̱ Ni.

SANTIAGO 1:2

Cu'ma̱ tya'a ngusñi na cha' ji'i̱ Cristo, si lye tsa nti' ma̱ xqui'ya cua ña'a̱ ca lo cha' ti'í nu ndyacua ji'i̱ ma̱, ná xñi'i̱ tsa culacua ti' ma̱ li'; pana tso'o tsa caca tyiquee ma̱ li',

SANTIAGO 5:10

Cu'ma̱ ngu' tya'a na, tyi'u ti' ma̱ ñi'ya̱ ngua ji'i̱ jyo'o cusu' ji'i̱ ma̱ nu ngua tu'ba ji'i̱ ycui' Ndyosi cua sa'ni la; tyiquee' tsa ndalo ñati̱ bi', masi lye tsa nchcube' ycui' ngu'.

1 PEDRO 4:13

Nga'a̱ cha' caca tso'o tyiquee ma̱ lo'o tyi'u ti' ma̱ cha' ñi'ya̱ ngua lya' ti' ngu' ji'i̱ ycui' Cristo, jua'a̱ ca lya' ti' ngu' ji'i̱ cu'ma̱ juani. Tlyu tsa laca Cristo cuentya ji'i̱ ycui' Ndyosi, lye tsa quiji'i̱ xee ji'i̱ Ni lo'o ca̱a̱ ycui' Cristo chaca quiya' nde loo la; li' ca chaa la ti' ma̱, ca tso'o la tyiquee ma̱.