SAN MATEO 4:25 - Chatino Tataltepec

²⁵ Bi' cha' ndu'u lca'a̱ quiña'a̱ tsa ñati̱ ji'i̱, masi ngu' Galilea, masi ngu' lcaa quichi̱ nde Decápolis, masi ngu' quichi̱ Jerusalén, masi ngu' xa' quichi̱ nde loyuu su cuentya Judea, masi ngu' quichi̱ chaca tsu' sta'a̱ Jordán. Quiña'a̱ tsa quichi̱ ngutu'u ngu' ndyaa lca'a̱ ngu' ji'i̱ Jesús li'.

SAN MATEO 4:25 ပူးပေါင်းရင်းမြစ်များ

SAN MATEO 12:15

Pana ngua cuaya' ti' Jesús lcaa ña'a̱ cha' cuxi nu ntsu'u tyiquee ngu' fariseo, bi' cha' ndu'u yu ndyaa yu xa' se'i̱. Quiña'a̱ tsa ngu' ngutu'u lca'a̱ ngu' ji'i̱ yu, lo'o jua'a̱ ngua'ni yu cha' ndyaca tso'o lcaa ngu' quicha bi'.

SAN MATEO 19:2

lo'o quiña'a̱ tsa ñati̱ ndya'a̱ lca'a̱ ji'i̱ yu cha' cua'ni yu jo'o ji'i̱ lcaa nu quicha nu lijya̱ lo'o ngu' bi'; ngua'ni Jesús jo'o ji'i̱ ngu' quicha bi', ngua tso'o ngu' bi' li'.

SAN MATEO 4:15

Ntsu'u loyuu su cuentya Zabulón lo'o su cuentya Neftalí ca chaca tsu' sta'a̱ Jordán. Tyeje tacui na loyuu bi', li' tyalaa na to' tyujo'o, cha' loyuu bi' laca Galilea su ndi'i̱ ñati̱ nu si'i ngu' judío laca.

SAN MATEO 5:1

Na'a̱ Jesús cha' quiña'a̱ tsa ñati̱ lijya̱ ngu' slo yu, bi' cha' ndyacui̱ yu ndyaa la yu nde sii' cua'a̱, ndyaca'a̱ yu xi cajua. Lo'o ndyu'u ti'i̱ ngu' nu ndyaca tsa'a̱ ji'i̱ slo,

SAN MATEO 8:1

Lo'o li' ngua'ya Jesús ca'ya bi'. Quiña'a̱ tsa ñati̱ ndya'a̱ lca'a̱ ji'i̱.

SAN MARCOS 5:20

Lo'o li' ndu'u ndyaa nu qui'yu bi' lcaa quichi̱ nde Decápolis, nda cha' lo'o ngu', lcaa lo cha' ñi'ya̱ nu ngua'ni Jesús lo'o. Ndube tsa ti' lcaa ngu' bi' li'.

SAN MARCOS 6:2

Ndyatí̱ Jesús ndyaa ne' laa quichi̱ bi' tsa̱ nu ndi'i̱ cña' ngu', tsa̱ ta'a bi'. Li' ngulu'u yu ji'i̱ ngu'. Ndube tsa ti' ngu' nu ndi'i̱ ne' laa bi' lo'o ndyuna ngu' cha' nu nchcui' Jesús lo'o ngu'. ―¿Mala ngua tsa'a̱ yu re lcaa cha' nu nchcui' yu? ―nacui̱ ngu'―. ¿Ñi'ya̱ ngua cha' ngua cuayá' tso'o ti' yu? ¿Ha tii yu? ―nacui̱ ngu'―. ¿Ni cha' laca cha' nchca ji'i̱ yu cua'ni yu cha' tlyu? ―nacui̱ ngu' ji'i̱ tya'a ngu'―.

SAN MARCOS 7:31

Lo'o li' ndu'u ngu' quichi̱ Tiro, ñaa ngu', nteje tacui ngu' quichi̱ Sidón, nteje tacui ngu' nde Decápolis, la cui' loyuu su nscua tii tya'a quichi̱. Li' nguxtyu̱u̱ ngu' ya̱a̱ nde to' tayu' Galilea.

SAN LUCAS 6:17

Li' nguxtyu̱u̱ Jesús ngua'ya sii' cua'a̱ bi' lo'o nu taju ñati̱ bi' ji'i̱, nguti'i̱ xi nde sca su nati̱' lo'o nu tyu̱u̱ tya'a ñati̱ nu ndyaca tsa'a̱ ji'i̱ bi'. Lo'o jua'a̱ ndyalaa quiña'a̱ tsa xa' la ñati̱ slo Jesús, ngu' nu ndu'u loyuu su cuentya Judea, lo'o jua'a̱ ngu' nu ndu'u nde quichi̱ Jerusalén, lo'o jua'a̱ ngu' nu ndu'u to' tyujo'o su ndi'i̱ quichi̱ Tiro, su ndi'i̱ quichi̱ Sidón. Cua ndyalaa ngu' ca bi', cha' cuna ngu' cha' nu nchcui' Jesús lo'o ngu'; jua'a̱ nti' ngu' cha' cua'ni Jesús jo'o ji'i̱ quicha nu ntsu'u ji'i̱ ngu'.

SAN LUCAS 6:19

Lcaa ngu' bi' nti' ngu' sta ya' ngu' chu̱' Jesús; nti' ngu' cha' cua'ni yu jo'o ji'i̱ lcaa ñati̱ quicha bi', xqui'ya cha' tlyu tsa chacuayá' ntsu'u ji'i̱ yu. Ndyaca tso'o lcaa ngu' quicha bi' li'.