SAN MATEO 23:4 - Chatino Tataltepec

⁴ Lo'o jua'a̱ nu ngu' fariseo bi' ni, nclyo ngu' cña ji'i̱ tya'a ngu' cha' tonu tsa yu'ba qui'ya ngu'; ti'i̱ tsa yu'ba nsta ngu' bi' scu̱ ñati̱, pana ycui' ca ngu' ni, ná sicua̱ ngu' yu'ba bi' tsiya' ti.

SAN MATEO 23:4 ပူးပေါင်းရင်းမြစ်များ

SAN MATEO 23:23

’¡Tya'na tsa cu'ma̱ ngu' mstru cha' jo'ó, lo'o jua'a̱ cu'ma̱ ngu' fariseo, cha' tucua cha' ntsu'u tyiquee ma̱! Tacati tsa ndu'ni ma̱ lo'o ycui' Ndyosi lo'o lcaa na xca ti nu ntsu'u ji'i̱ ma̱; si ntsu'u tii tya'a laca' tyunu' xlya ji'i̱ ma̱ ni, masi si'yu hañi, masi si'yu comino, hora ti nda ma̱ tsaca ji'i̱ ycui' Ndyosi li', masi ná ndaquiya' ma̱ ji'i̱ cha' nu ngulu'u Ni, nu ndulo la cha' ji'i̱. Cua nacui̱ ycui' Ndyosi cha' liñi ti cua'ni cuayá' ma̱ ji'i̱ ñati̱, lo'o jua'a̱ nacui̱ Ni cha' cua'ni tya'na ti' ma̱ ji'i̱ ñati̱, cha' jlya tso'o ti' ma̱ ji'i̱ ycui' Ni; pana ná nduna ma̱ cha' bi'. Ntsu'u cha' taquiya' ma̱ ji'i̱ cha' nu ndulo la bi', masi tya cua'ni ma̱ cha' tso'o ñi'ya̱ nu ndyu'ni ti ma̱ nu lo'o nda ma̱ msta̱ sube ti bi'.

SAN MATEO 23:3

Bi' cha' tso'o cua'a̱ jyaca̱ ma̱ ji'i̱ cha' nu nclu'u ngu' bi' ji'i̱ ma̱, tso'o taquiya' ma̱ ji'i̱ cha' nu nclu'u ngu' bi'; pana ná cua'ni ma̱ ñi'ya̱ nu ndu'ni ti ngu' bi'. Tso'o ti nclu'u ngu' cha' jo'ó bi', pana ná ndaquiya' ycui' ca ngu' cha' bi'.

SAN LUCAS 11:46

Nguxacui̱ Jesús cha' ji'i̱ yu bi' li': ―Lo'o cu'ma̱ ngu' mstru cha' jo'ó, tya'na tsa cu'ma̱. Ti'i̱ tsa cña nu nda ma̱ cha' cua'ni ñati̱, ña'a̱ cuayá' ná nchca ji'i̱ ngu' tsiya' ti cua'ni ngu' cña bi'. Lo'o cu'ma̱ ni, ná nda ma̱ xi ya' ma̱ ji'i̱ ngu' cha' xtyucua ma̱ ji'i̱ ngu'; ni sca tsu' ya' ma̱, ná xtyucua ma̱ ji'i̱ ngu'.

LOS HECHOS 15:10

Lo'o nu juani, ná ndiya ti' ma̱ cña nu ngua'ni ycui' Ni lo'o ngu' bi'; nti' ma̱ cha' cua'ni ngu' bi' lcaa cña ñi'ya̱ nu nguxtyanu jyo'o Moisés ji'na. Pana tucui tsa cña bi', ná ngua ji'na tsiya' ti cua'ni na lcaa cña bi'; ni lcaa jyo'o cusu' ji'na, ná ngua ji'i̱ ngu' cua'ni ngu' cña tucui bi'.

LOS HECHOS 15:28

Nguxtyucua Xtyi'i ycui' Ndyosi ji'i̱ cuare lo'o nchcui' ya lo'o tya'a ya, bi' cha' ndi'ya̱ ti chcui' ya lo'o ma̱ juani, cha' ná tso'o si culo ya xa' la cña tucui ji'i̱ ma̱:

GÁLATAS 6:13

Lo'o ycui' ngu' nu cua ngulacua̱ ngu' jua'a̱ ni, ná ndaquiya' ngu' ji'i̱ lcaa ca cña nu nscua lo cha' cusu' cha' cua'ni na bi'. Tsa bi' ti cha' nti' ngu', cha' caja ñi'ya̱ nu chcui' ngu' cha' tyixi lo'o tya'a ngu': Cua ngulacua̱ ngu' jua xqui'ya ycui' ya, ñacui̱ ngu' ji'i̱ tya'a ngu' li'.

1 JUAN 5:3

Si chañi cha' ntsu'u tyiquee na ña'a̱ na ji'i̱ Ni, taquiya' na ji'i̱ cha' nu chcui' Ni lo'o na li', cha' si'i sca cña nu tucui tsa laca cha' taquiya' na ji'i̱ scaa cha' nu nchcui' Ni.

APOCALIPSIS 2:24

Juani chcui' na' xi lo'o cu'ma̱ tya'a ngusñi ma̱ cha' jna', nu ndyanu ma̱ nde Tiatira, cu'ma̱ nu ná ngusñi ma̱ cha' cuxi nu nclyu'u nu cuna'a̱ cuxi bi': ná jlo ti' ma̱ cua'ni ma̱ cha' cuxi nu nacui̱ ngu' bi' cha' sca cha' nu tucui tsa nu ntsu'u ji'i̱ Satanás laca, lo'o jua'a̱ laca cha' cuxi bi'. Tso'o ndu'ni ma̱ lacua. Ná ta na' xa' cña nu cua'ni ma̱, nacui̱ Ni,