SAN MATEO 2:6 - Chatino Tataltepec

⁶ Quichi̱ sube ti laca Belén nu ntsu'u loyuu su cuentya Judea, nacui̱ ycui' Ni. Pana quichi̱ tyi sca ngu' tlyu tsa caca, masi quichi̱ sube laca juani, nacui̱ Ni. Caca nu qui'yu tlyu bi' loo, lo'o jua'a̱ ña'a̱si̱i̱ yu ji'i̱ ngu' Israel 'na. Jua'a̱ nscua lo quityi bi'.

SAN MATEO 2:6 ပူးပေါင်းရင်းမြစ်များ

SAN MATEO 2:1

La cui' tyempo lo'o ngula Jesús nde quichi̱ Belén, sca nu cusu' nu naa Herodes ngua loo ji'i̱ nasiyu̱ bi'. Ca loyuu su cuentya Judea, ca bi' ndi'i̱ quichi̱ Belén bi'. Lo'o li' ndyalaa xi ngu' tii nde Judea bi'; ngutu'u ngu' tii bi' xa' quichi̱ nde su ntyucua cuichaa, lo'o li' ndyalaa ngu' quichi̱ Jerusalén. Nchcui' ngu' tii bi' lo'o ngu' nu ndyacua tya'a lo'o ngu' tyucui̱i̱:

SAN MATEO 28:18

Li' ñaa Jesús cacua la, nchcui' lo'o ngu': ―Cua nda ycui' Ndyosi Sti na' lcaa chacuayá' 'na cha' laca na' loo ji'i̱ lcaa na, masi lcaa na nu ntsu'u ca slo ycui' Ni nde cua̱, masi lcaa na nu ntsu'u nde chalyuu ―nacui̱ Jesús ji'i̱ ngu'―.

SAN JUAN 21:16

Xa' nchcui' Jesús lo'o chaca quiya': ―Simón, sñi' Juan ―nacui̱―, ¿ha chañi cha' hi̱ cha' ntsu'u tyiquee nu'u̱ ña'a̱ 'na? ―Xu'na̱, cua jlo ti' nu'u̱ cha' ntsu'u tsa tyiquee na' ña'a̱a̱ jinu'u̱ ―nacui̱ Pedro ji'i̱ Jesús. ―Ña'a̱si̱i̱ nu'u̱ ji'i̱ ñati̱ 'na lacua ―nacui̱ Jesús ji'i̱ li'.

SAN JUAN 7:42

Lo quityi cusu' bi' nscua cha' sca ñati̱ tya'a ji'i̱ jyo'o David caca nu ñati̱ tlyu bi'; quichi̱ Belén cala yu bi', cha' quichi̱ tyi ngu' David laca bi'.

EFESIOS 1:22

Cua nda Ni lcaa na tsiya' ti ji'i̱ Cristo cha' culo yu cña ji'i̱. Lo'o li' xqui'ya cha' laca yu Xu'na lcaa ca chalyuu, bi' cha' ngusta Ni ji'i̱ Cristo cha' caca yu loo ji'i̱ lcaa taju ñati̱ nu ngusñi cha' ji'i̱ Cristo cua ña'a̱ ca quichi̱ su ndi'i̱ ngu'.

COLOSENSES 1:18

Ycui' yu laca yu loo ji'i̱ lcaa taju ñati̱ nu ndyu'ni tlyu ji'i̱ ycui' Ndyosi tsa tlyu ti, ycui' laca nu nda chalyuu ji'i̱ ngu' bi'. Tya clyo la cua ndyu'ú ycui' yu chaca quiya' lo'o cua ngujuii yu, cha' li' taca ji'i̱ yu tyucua yu ca su laca yu loo ji'i̱ lcaa lo cha'.

HEBREOS 7:14

Cua jlo ti' ngu' cha' Judá ngua xtañi Jesús tya lo'o ngula yu; pana nu lo'o nchcui' jyo'o Moisés tilaca nu caca sti jo'ó, ná nchcui' tsiya' ti ji'i̱ ngu' tya'a xtañi Judá bi'.

APOCALIPSIS 11:15

Li' cua ndya'a cati quiya' nguañi ngula'á xca̱ lo'o cui'chcua̱ ji'i̱. Nguañi nda xtyi'i tyu̱u̱ tya'a ñati̱ nde cua̱ li', nu ndi'ya̱ nchcui': Ca juani ndyanu tachaa cha' ji'i̱ ycui' nu Xu'na na, jua'a̱ ji'i̱ Cristo, cha' caca Ni loo ji'i̱ tyucui ña'a̱ chalyuu, nacui̱ ngu'. Lo'o juani ná nga'a̱ cha' tye cha' culo Ni cña chalyuu.

APOCALIPSIS 2:27

cha' cua nda ycui' Ndyosi Sti na' chacuayá' cha' caca na' loo; jua'a̱ tlyu tsa chacuayá' ta ycui' Ndyosi ji'i̱ ngu' bi' lo'o caca ngu' loo ji'i̱ ñati̱. Li' xcube' tsa ngu' ji'i̱ ñati̱ nu ná tyaja'a̱ taquiya' ji'i̱ cha' ji'i̱ ycui' Ndyosi.

APOCALIPSIS 7:17

Ña'a̱si̱i̱ nu ñi'ya̱ ña'a̱ xlya' bi' ji'i̱ ngu', cha' ndi'i̱ Ni la cui' ca su ntucua ycui' Ndyosi loo; bi' laca nu tsalo'o ji'i̱ ngu' su caja hitya co'o ngu' cha' caja chalyuu cucui ji'i̱ ngu' li'. Lo'o jua'a̱ xquityi Ni hitya cloo ngu' cha' nga'aa cunaa ngu' li'.