SAN MARCOS 9:24 - Chatino Tataltepec

²⁴ Hora ti nchcui' sti nu quicha bi' li': ―Jlya ti' na' jinu'u̱ ―nacui̱―, xtyucua nu'u̱ 'na cha' jlya la ti' na' jinu'u̱ hora nu lo'o nga'aa jlya tso'o ti' na' ―nacui̱ ji'i̱ Jesús.

SAN MARCOS 9:24 ပူးပေါင်းရင်းမြစ်များ

SAN MARCOS 9:23

―¿Ni cha' laca nacui̱ nu'u̱ 'na jua'a̱, si nchca 'na? ―nacui̱ Jesús ji'i̱―. Lcaa lo cña nchca ji'i̱ sca ñati̱ nu jlya ti' ji'i̱ ycui' Ndyosi ―nacui̱.

SAN MARCOS 9:25

Lo'o na'a̱ Jesús cha' quiña'a̱ la ñati̱ cua tyu'u ti'i̱ ti ngu' slo, li' ngulo yu cña ji'i̱ cui'i̱ cuxi bi': ―Cui'i̱ cuxi nu'u̱ ni, la cui' nu'u̱ laca nu ngua'ni cu'u̱ ji'i̱ nu quicha re ―nacui̱ Jesús―. Culo na' cña jinu'u̱ juani cha' tyu'u nu'u̱ ji'i̱ yu cuañi' re. Nga'aa xlyú nu'u̱ ji'i̱ yu tsiya' ti ―nacui̱ Jesús ji'i̱ cui'i̱ cuxi.

SAN LUCAS 17:5

Li' nacui̱ nu ngu' nu ndyaca tsa'a̱ ji'i̱ Jesús: ―Xtyucua nu'u̱ ji'i̱ ya cha' taca jlya la ti' ya cha' jinu'u̱ ―nacui̱ ngu' ji'i̱.

SAN LUCAS 7:38

Ndyaca'a̱ cho' cacua ti slo quiya' Jesús li'. Ndyunaa tsa cho', hasta ndyalú hitya cloo cho' chu̱' quiya' Jesús; lo'o quicha̱' hique cho' nsube' cho' chu̱' quiya' Jesús cha' xquityi ji'i̱ quiya' yu. Nchcuicha' cho' quiya' Jesús li', nda'a̱ cho' setye tyixi xtyi'i bi' chu̱' quiya' Jesús.

SAN LUCAS 7:44

Lo'o nxña'a̱ Jesús ca su nga'a̱ nu cuna'a̱ bi', li' xa' nchcui' lo'o nu Simón bi': ―Cui'ya nu'u̱ xi cuentya ñi'ya̱ nu ndyu'ni nu cuna'a̱ cua ―nacui̱―. Nu lo'o ndyalaa na' toni'i̱ jinu'u̱ tsa̱, ná nda nu'u̱ hitya tyaati̱ quiya' na'; pana nu cuna'a̱ cua ni, cua ngui'í̱ cho' quiya' na' lo'o hitya cloo cho', cua nguxquityi cho' quiya' na' lo'o quicha̱' que cho'.

LOS HECHOS 10:19

Laja li' quiña'a̱ tsa ngulacua ti' Pedro ni cha' nchcui' xcalá yu, lo'o li' nchcui' Xtyi'i ycui' Ndyosi lo'o yu: ―Cua ndyalaa sna tya'a ñati̱ nclyana ngu' jinu'u̱ ―nacui̱ Ni ji'i̱ Pedro ña'a̱ ntucua ti yu que ni'i̱―.

LOS HECHOS 10:31

Nchcui' yu bi' lo'o na': “Cornelio”, nacui̱ yu, “cua ndyuna ycui' Ndyosi cha' nu nchcui' nu'u̱ lo'o Ni, jua'a̱ cua na'a̱ ycui' Ni cha' tso'o tsa ndu'ni nu'u̱ lo'o ngu' ti'i; bi' cha' cua ndyi'u ti' ycui' Ndyosi jinu'u̱.

2 CORINTIOS 2:4

Nu lo'o nguscua na' quityi bi', quiña'a̱ tsa ngulacua ti' na' li'; xñi'i̱ tsa ti' na' ngua li', hasta ndyunaa na' xqui'ya cu'ma̱. Pana si'i cha' ca xñi'i̱ ti' cu'ma̱ nguscua na' quityi bi'; ngua ti' na' cha' ca cuayá' ti' cu'ma̱ cha' ntsu'u tsa tyiquee na' ña'a̱ na' ji'i̱ cu'ma̱, bi' cha' nguscua na' quityi bi'.

EFESIOS 2:8

na cua ngulaá na ji'i̱ nu cuxi, xqui'ya cha' jua'a̱ ti ndu'ni Ni cha' tso'o lo'o na lo'o ngusñi na cha' ji'i̱ Cristo. Ni si'i sca cña nu ngua'ni ycui' ca na laca bi', sca cha' tso'o nu ngua'ni ycui' Ndyosi cuentya ji'na jua'a̱ ti laca bi'.

FILIPENSES 1:29

Tso'o tsa laca cha' nda ycui' Ndyosi chacuayá' cha' ngusñi ma̱ cha' ji'i̱ Cristo; pana cua nscua cha' caja xi cha' ti'í ji'i̱ ma̱, nu lo'o cua ngusñi ma̱ cha' ji'i̱ Cristo bi'.

2 TESALONICENSES 1:11

Bi' cha' lcaa tsa̱ nchcui' ya lo'o ycui' Ndyosi Sti na cha' cua'ni Ni cña ne' cresiya ji'i̱ ma̱, cha' tso'o ti cua'ni ma̱ cña nu nda Ni ji'i̱ ma̱ tya lo'o ngusubi Ni ji'i̱ ma̱. Nchcui' ya lo'o Ni cha' xtyucua Ni ji'i̱ ma̱, cha' jua'a̱ cua'ni lyiji ma̱ lcaa cha' tso'o nu nclyacua ti' ma̱ cha' cua'ni ma̱ cuentya ji'i̱ ycui' Ni, lcaa lo cha' tso'o nu ndyu'ni ma̱ xqui'ya cha' ngusñi ma̱ cha' ji'i̱ ycui' Ndyosi.

2 TESALONICENSES 1:3

Cu'ma̱ tya'a ngusñi na cha' ji'i̱ Jesús, ntsu'u cha' tya ya xlya'be ji'i̱ ycui' Ndyosi lcaa quiya' lo'o chcui' ya lo'o Ni cuentya ji'i̱ cu'ma̱; ndu'ni tsa cha' cua'ni ya jua'a̱, xqui'ya cha' lcaa tsa̱ tachaa la ndyanu cha' ji'i̱ Jesús ne' cresiya ji'i̱ ma̱, lcaa tsa̱ ntsu'u la tyiquee ma̱ ña'a̱ ma̱ ji'i̱ tya'a ñati̱ ma̱.

2 TIMOTEO 1:4

Ntsu'u ti' na' cha' ngusi'ya nu'u̱ lo'o ndu'u na' ndyaa na', bi' cha' nti' tsa na' ña'a̱ na' jinu'u̱ chaca quiya' cha' ca chaa ti' na.

HEBREOS 12:17

Cua jlo ti' ma̱ ñi'ya̱ ngua ca tiya' la: nu lo'o ngua ti' yu cha' culacua̱ sti yu ji'i̱ yu, li' nga'aa ndaquiya' sti yu ji'i̱ cha' nu nda yu lo'o; nga'aa ngujui ñi'ya̱ nu tya'a̱chu̱' yu ji'i̱ cha' nu cua ngua'ni yu, masi ngusi'ya tsa yu lo'o ngüijña yu cha' bi' ji'i̱ sti yu.

HEBREOS 12:2

Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.

HEBREOS 5:7

Nu lo'o tya ndi'i̱ Jesús lo yuu chalyuu, tyu̱u̱ tsa quiya' ngusi'ya tsa yu lo'o nchcui' yu lo'o ycui' Ndyosi Sti yu; lye tsa ngua ti' cresiya ji'i̱ yu lo'o ngüijña yu cha' ji'i̱ Ni, cha' nchca tsa ji'i̱ ycui' Ndyosi. Ngua ji'i̱ Ni cua'a ji'i̱ ñati̱ cha' ná cujuii ngu' ji'i̱ Jesús nquicha'; pana ndyuna Ni cha' nu nchcui' Jesús lo'o Ni, cha' ntaja'a̱ yu cua'ni yu lcaa cña nu nti' ycui' Ndyosi Sti yu.