SAN MARCOS 8:34 - Chatino Tataltepec

³⁴ Lo'o li' ngusi'ya Jesús ji'i̱ nu ngu' nu ndyaca tsa'a̱ ji'i̱, lo'o ji'i̱ nu quiña'a̱ tsa ñati̱ nu lca'a̱ ji'i̱ cha' tya̱a̱ ngu' slo yu. Nchcui' yu lo'o ngu' li': ―Si ntsu'u ngu' nu chañi cha' nti' ngu' tsaa ngu' lo'o na' ―nacui̱ yu―, nga'a̱ cha' xtyanu ngu' bi' lcaa cha' nu ntsu'u tsa tyiquee ngu' bi' ji'i̱, cha' tya'a̱ ngu' lo'o na' lcaa tsa̱, masi cujuii ñati̱ ji'i̱ ngu' bi' cuentya 'na.

SAN MARCOS 8:34 ပူးပေါင်းရင်းမြစ်များ

SAN MATEO 10:38

Lo'o jua'a̱ ná taca ñacui̱ ngu' cha' na' laca̱ Xu'na ngu', si ná nti' ngu' bi' tya'a̱ ngu' lo'o na' tyucui̱i̱ nu culu'u na' ji'i̱ ngu' cha' tsaa ngu'. Ntsu'u cha' xñi ngu' tyucui̱i̱ bi', masi cujuii xa' ñati̱ ji'i̱ ngu' bi' xqui'ya cha' jna'.

SAN MATEO 16:24

Li' ngulu'u la Jesús ji'i̱ nu ngu' nu ndyaca tsa'a̱ ji'i̱ bi': ―Si ntsu'u ñati̱ nu chañi cha' nti' ngu' tsaa ngu' lo'o na' ―nacui̱―, nga'a̱ cha' xtyanu ngu' bi' ji'i̱ lcaa cha' nu ntsu'u tsa tyiquee ngu' ji'i̱, cha' tya'a̱ ngu' lo'o na' lcaa tsa̱, masi cujuii ñati̱ ji'i̱ ngu' bi' xqui'ya na'.

SAN MATEO 27:32

Tyucui̱i̱ su ndyaa ngu', li' ndyacua tya'a ngu' lo'o sca nu qui'yu nu naa Simón; ngu' Cirene laca yu bi'. Lo'o li' ngulo sendaru cña ji'i̱ nu Simón bi', cha' qui'ya yu crusi bi' cuentya ji'i̱ Jesús.

SAN MARCOS 10:21

Ntsu'u tsa tyiquee Jesús ña'a̱ ji'i̱ nu qui'yu bi'. Xa' nchcui' yu lo'o li': ―Sca ti cña lyiji cua'ni nu'u̱ ―nacui̱ Jesús ji'i̱―. Yaa clya cujui' nu'u̱ lcaa cha' tso'o nu ntsu'u jinu'u̱, cha' tyu'u cñi ta nu'u̱ ji'i̱ ngu' ti'i li'; tyacua xi cha' tso'o jinu'u̱ nde loo la ca su ntucua ycui' Ndyosi. Li' xa' tya̱a̱ nu'u̱ ca slo na' cha' tya'a̱ nu'u̱ lo'o na'.

SAN MARCOS 7:14

Ngua chaca quiya' ngusi'ya Jesús ji'i̱ quiña'a̱ tsa ñati̱ nu lca'a̱ ji'i̱ cha' ca̱a̱ ngu' cacua la xi. ―Cua'a̱ jyaca̱ lcaa cu'ma̱ ji'i̱ cha' nu ta na' lo'o ma̱, cha' ca cuayá' ti' ma̱ sca cha' ―nacui̱ Jesús ji'i̱ ngu' li'―.

SAN LUCAS 13:24

―Chubi tsa toni'i̱ su tyatí̱ ma̱ ca bi', bi' cha' cua'ni yala ma̱ cha' quije tyucui̱i̱ ji'i̱ ma̱ nu tyalaa ca toni'i̱ bi'. Ndi'ya̱ ñacui̱ na' ji'i̱ ma̱: Ntsu'u quiña'a̱ tsa ñati̱ nu cua nchcui' cha' cua tyatí̱ ti ngu' toni'i̱ bi', pana na ndu'ni ti ngu' jua'a̱; ná nchca quije ji'i̱ ngu' tsiya' ti ñi'ya̱ caca nu tyatí̱ ngu' toni'i̱ bi'.

SAN LUCAS 14:33

Lo'o jua'a̱ cua ña'a̱ ca cu'ma̱ nu lye la ntsu'u tyiquee ma̱ ji'i̱ lcaa cha' tso'o nu ntsu'u ji'i̱ ma̱, ná taca caca ma̱ ñati̱ jna' li'.

SAN LUCAS 18:22

Nu lo'o ndyuna Jesús cha' bi', li' nacui̱: ―Chaca tya cha' tya lyiji cua'ni nu'u̱: yaa cujui' lcaa cha' tso'o nu ntsu'u jinu'u̱, cha' tyu'u cñi nu ta ji'i̱ ngu' ti'i; tyacua xi cha' tso'o jinu'u̱ nde loo la ca su ntucua ycui' Ndyosi li'. Lo'o cua ngua'ni nu'u̱ cña bi', li' taca tya'a̱ nu'u̱ lo'o na'.

SAN LUCAS 20:45

Lo'o li' nchcui' Jesús lo'o nu ngu' nu ndyaca tsa'a̱ ji'i̱. Lo'o jua'a̱ lcaa ñati̱ nu ndi'i̱ slo nchca'a̱ jyaca̱ ngu' ji'i̱ cha' nu nchcui' Jesús lo'o ngu' bi':

SAN LUCAS 9:23

Lo'o nteje tacui xi tyempo, li' nchcui' Jesús lo'o lcaa ngu': ―Si ntsu'u cu'ma̱ nu chañi cha' nti' ma̱ tsaa ma̱ lo'o na' ―nacui̱ yu―, nga'a̱ cha' xtyanu ma̱ lcaa cha' nu ntsu'u tsa tyiquee ma̱ ji'i̱, cha' tya'a̱ ma̱ lo'o na' lcaa tsa̱, masi cujuii ñati̱ ji'i̱ ma̱ xqui'ya na'.

SAN JUAN 10:27

Ñi'ya̱ ndu'ni xlya', jua'a̱ nduna ñati̱ 'na jna' lo'o nchcui' na' lo'o ngu'. Cua nslo na' ji'i̱ ngu', cua ndya'a̱ ngu' lo'o na'.

SAN JUAN 19:17

Li' ndaya' sendaru ji'i̱ Jesús, ndyaa lo'o ngu' ji'i̱ Jesús ca su cajaa yu. Ngüi'ya Jesús ji'i̱ crusi nu ji'i̱ ycui' ca yu, ndyaa yu li'. Ndyaa lo'o ngu' ji'i̱ yu nde su naa Gólgota cha'cña ji'i̱ ngu' judío, nu jua'a̱ nti' tyu'u cha'cña bi': Su nscua tyijya̱ hique jyo'o.

LOS HECHOS 14:22

Ca ta'a quichi̱ su ndyaa ngu' bi', nchcui' ngu' lo'o ñati̱ ji'i̱ Jesucristo cha' tso'o la tyatí̱ tyiquee ngu' lo cha' ji'i̱ Jesús, cha' tlyu cua'ni tyiquee ngu', cha' ná cutsi̱i̱ ngu' tsiya' ti. ―Cua'ni lya' ti' ngu' ji'na tu'ni ―nacui̱ Pablo lo'o Bernabé ji'i̱ ngu'―, lo'o jua'a̱ xcube' ngu' ji'na; pana lo'o cua nteje tacui cha' bi', li' tsaa na tyi'i̱ na su laca ycui' Ndyosi loo.

ROMANOS 6:6

Cuxi tsa ñati̱ ngua na; pana juani laca na ñi'ya̱ laca si lo'o na ngujuii na lo sca crusi lo'o ngujuii ycui' Jesús, cha' ngüityi̱ yu tsiya' ti cha' cuxi nu ntsu'u ne' cresiya ji'na li'. Bi' cha' juani nga'aa caca ji'i̱ cha' cuxi bi' caca loo ji'na chaca quiya'.

ROMANOS 8:17

Nu lo'o cua laca na sñi' ycui' Ni, lo'o ji'na tyacua lcaa cha' tso'o nu ta Ni li', lcaa ña'a̱ cha' nu cua nda Ni ji'i̱ Cristo; pana si cua nti' na cha' stu'ba ti tyi'i̱ na lo'o Cristo ca su tlyu ca su ntucua Ni, li' ntsu'u cha' talo na lo'o ndyu'ni lya' ti' ngu' ji'na nde chalyuu ti, ñi'ya̱ ndalo ycui' Cristo lo'o ngua'ni lya' ti' ngu' ji'i̱ yu.

1 CORINTIOS 15:31

Lo'o na', cua ña'a̱ ca tsa̱ cua cajaa ti na' xqui'ya Cristo; pana ná talo na' cua'ni na' cña bi' si ná ndyu'ú Jesús chaca quiya'. Lo'o juani tso'o tsa ntsu'u tyiquee na' cha' ngusñi ma̱ cha' ji'i̱ Jesucristo nu Xu'na na, tyu̱u̱ tya'a cu'ma̱ ca quichi̱ Corinto bi'.

1 CORINTIOS 8:13

Lo'o jua'a̱ na', tso'o la masi ná cacu na' cuaña' nu cua nscua slo jo'ó, cha' jua'a̱ ná cua'ni ngu' tya'a na' cha' cuxi xqui'ya na' li'. Ná nti' na' cha' tyu'utsu' ngu' tya'a na' ji'i̱ tyucui̱i̱ liñi.

1 CORINTIOS 9:19

Ntsu'u chacuayá' cua'ni na' ni cña laca nu nti' na' cua'ni na'. Ná tucui ndatsaa 'na cha' cua'ni na' cña ji'i̱ ngu' nquicha'; pana nti' na' cha' quiña'a̱ la ñati̱ xñi ngu' cha' ji'i̱ Cristo, bi' cha' nda na' chacuayá' ji'i̱ cua ña'a̱ ca ngu' cha' tatsaa ngu' 'na.

GÁLATAS 2:20

Cuentya ji'i̱ cha' cusu' bi' laca na' ñi'ya̱ laca si cua ngujuii na', ñi'ya̱ laca si stu'ba ti nga'a̱ na' lo crusi lo'o Jesús; juani nga'aa si'i ycui' ca ti na' laca na' loo ne' cresiya 'na, cha' Cristo laca nu laca loo ne' cresiya 'na juani. Ndi'i̱ tso'o ti na' chalyuu juani sca ti xqui'ya cha' jlya ti' na' ji'i̱ cña nu cua ngua'ni ycui' Jesús, nu sca ti Sñi' ycui' Ndyosi; bi' laca nu ntsu'u tsa tyiquee ña'a̱ jna', bi' laca nu cua nda chacuayá' ji'i̱ ngu' cha' cujuii ngu' ji'i̱ ycui' yu cuentya jna'.

GÁLATAS 5:24

Cua ngujuii Cristo lo crusi cha' cati̱ qui'ya nu ntsu'u ji'na; bi' cha' cua ngua'ni tye na ji'i̱ lcaa cha' cuxi nu ntsu'u ne' cresiya ji'na tya tsubi' la, lcaa na nu ndacui ti' na ji'i̱ nquicha', ngua'ni tye na ji'i̱ xqui'ya cha' ntsu'u cha' ji'na lo'o ycui' Cristo. Lo'o jua'a̱ lcaa cha' nu tiji̱' ti' na ji'i̱, cua nguxtyanu na ji'i̱ cha' cuxi bi' juani.

GÁLATAS 6:14

Pana nu na' ni, sca ti cha' tso'o ntsu'u chalyuu nti' na', cha' nu ngujuii ycui' Jesucristo nu Xu'na na lo crusi cuentya ji'na; bi' cha' nga'aa nti' na' ta na' xa' la cha' lo'o ñati̱. Lo'o jua'a̱ xqui'ya cha' ngujuii ycui' Cristo, nga'aa caca tatsaa nu cuxi nu ntsu'u chalyuu jna', cha' nga'aa ntsu'u cha' jna' lo'o cha' cuxi nu ntsu'u chalyuu juani.

FILIPENSES 3:10

Lo'o juani ni, tsa bi' ti cha' nti' na', cha' tyuloo lyiji na' ji'i̱ Cristo, cha' ca tii na' cha' tya ndyu'ni ycui' Ndyosi cña lo'o na' lo'o la cui' tya'a juersa nu cua ntsu'u ji'i̱ Ni lo'o ngua'ni Ni cha' ndyu'ú Jesús chaca quiya'. Ná ndu'ni cha' masi jua'a̱ chcube' na' ñi'ya̱ nu cua nchcube' ycui' Jesús, masi chcuna' chalyuu 'na tsiya' ti ñi'ya̱ lo'o cua ngujuii ycui' Cristo lo crusi.

FILIPENSES 3:7

Sa'ni la ngua ti' na' cha' tso'o tsa ñati̱ laca na' xqui'ya cha' cusu' bi', pana juani nga'aa nclyacua ti' na' ji'i̱ cha' bi' xqui'ya Cristo.

COLOSENSES 1:24

Tso'o nti' na' masi cua ngujui xi cha' ti'í 'na cuentya ji'i̱ cu'ma̱; tso'o nti' na' cha' cuentya ji'i̱ ca ta'a taju ñati̱ nu ngusñi cha' ji'i̱ Cristo lcaa quichi̱, bi' cha' ndyacua cha' ti'í bi' 'na. Nchcube' tsa Cristo nde chalyuu xqui'ya na, cha' laca na ñati̱ ji'i̱ ycui' yu; jua'a̱ ndyacua cha' ti'í 'na, cha' cua lijya̱ caca stu'ba la cha' ji'na lo'o ycui' Cristo lo'o cha' ti'í nu ndyaca ji'na nde chalyuu cha' ngusñi na cha' ji'i̱ Cristo.

COLOSENSES 3:5

Cua'ni tye ma̱ lcaa cha' cuxi nu ndiya tsa ti' ma̱ ji'i̱ lacua: nga'aa cua'ni cuxi ma̱ lo'o clyo'o xa' ñati̱, nga'aa cua'ni ma̱ cha' suba' lo'o tya'a ñati̱ ma̱, nga'aa tyacui' ti' ma̱ ña'a̱ ma̱ ji'i̱ tya'a ñati̱ ma̱, cua'ni tye ma̱ ji'i̱ lcaa lo cha' cuxi nu ndijña tsa ti' tyiquee ma̱ cha' cua'ni ma̱ ji'i̱, nga'aa tyacui ti' ma̱ ji'i̱ scaa cha' tso'o nu ntsu'u chalyuu. Sca na nu ndacui ti' na ji'i̱ ni, stu'ba ti cuxi laca cha' bi' ñi'ya̱ nti' si cua'ni tlyu na ji'i̱ sca lcui̱ jo'ó ti;

2 TESALONICENSES 3:11

Pana juani cua ngujui cha' ji'i̱ ya cha' ntsu'u xi ngu' tya'a ma̱ nu ná tso'o ndu'ni; nga'aa ndyu'ni ngu' bi' cña, ndya'a̱ ngu' nchcui' ngu' cha' cuiñi ti lo'o tya'a ngu', xqui'ya cha' taja ngu'.

TITO 2:12

jua'a̱ cua ngulu'u Ni ji'na ñi'ya̱ taca tyi'i̱ tso'o ti na nde chalyuu. Nti' Ni cha' cua'a na ji'i̱ ycui' ca na, cha' tso'o ti cua'ni na lo'o tya'a ñati̱ na. Taca cua'ni tlyu na ji'i̱ ycui' Ndyosi nu lo'o cua ngulochu̱' na ji'i̱ lcaa cha' cuxi nu ná ndiya ti' Ni ji'i̱, nu lo'o nga'aa ndu'ni na lcaa cha' suba' nu ndiya ti' ñati̱ chalyuu ti.

HEBREOS 13:13

Lo'o jua'a̱ na, tso'o si ná cutsi̱i̱ na, masi tsalo'o ngu' ji'na cha' xcube' ngu' ji'na cuentya ji'i̱ Jesús; stu'ba ti caca ji'na nde chalyuu, ñi'ya̱ nu ngua ji'i̱ Jesús lo'o lya' tsa ti' ngu' ji'i̱ yu.

1 PEDRO 4:1

Lo'o ndyi'u ti' ma̱ cha' nchcube' Cristo nde chalyuu, li' caca nguula la ti' ma̱ cha' talo tyiquee ma̱ lo'o chcube' cu'ma̱; ñi'ya̱ nu ndalo tyiquee ycui' Cristo, jua'a̱ taca talo tyiquee ma̱ lo'o chcube' ma̱ li'. Nga'aa caca cua'ni cha' cuxi ngana ji'i̱ ma̱ si lo'o cu'ma̱ chcube' ma̱ jua'a̱.

1 PEDRO 4:13

Nga'a̱ cha' caca tso'o tyiquee ma̱ lo'o tyi'u ti' ma̱ cha' ñi'ya̱ ngua lya' ti' ngu' ji'i̱ ycui' Cristo, jua'a̱ ca lya' ti' ngu' ji'i̱ cu'ma̱ juani. Tlyu tsa laca Cristo cuentya ji'i̱ ycui' Ndyosi, lye tsa quiji'i̱ xee ji'i̱ Ni lo'o ca̱a̱ ycui' Cristo chaca quiya' nde loo la; li' ca chaa la ti' ma̱, ca tso'o la tyiquee ma̱.

2 PEDRO 1:14

cha' cua jlo ti' na' cha' cua tye ti cha' jna' nde chalyuu; cua ndacha' Jesucristo nu Xu'na na 'na cha' cua ngulala ti cajaa na'.

1 JUAN 3:16

Nu lo'o cube ti' na cha' cuentya ji'na ntaja'a̱ Cristo ngujuii yu lo crusi, cha' ntsu'u tsa tyiquee Ni ña'a̱ Ni ji'na, li' ca cuayá' ti' na ña'a̱ cha' nu tso'o la cua'ni na, si ntsu'u tyiquee na ña'a̱ na ji'i̱ tya'a ngusñi na cha' ji'i̱ Ni. Tso'o si tyaja'a̱ na xtyucua na ji'i̱ tya'a na jua'a̱, masi hasta cajaa ycui' na cuentya ji'i̱ ngu' tya'a na.

APOCALIPSIS 2:10

Ná cutsi̱i̱ ma̱ ji'i̱ cha' ti'í nu caca ji'i̱ ma̱ nde loo la, masi cua'ni nu xña'a̱ cha' tyu̱u̱ tya'a ma̱ tsaa ma̱ xi ne' chcua̱. Cua nti' yu cua'ni cuayá' yu ji'i̱ ma̱ si ña'a̱ ti tya nxñi ma̱ cha' jna'. Pana tii ti tsa̱ xcube' yu ji'i̱ ma̱, nacui̱ Ni. Ña'a̱ ti tyucui tyiquee ma̱ xñi ma̱ cha' ji'i̱ ycui' Ndyosi Sti na', masi cajaa ma̱, cha' ná nga'a̱ cha' tye chalyuu nu ta na' ji'i̱ ma̱ nde loo la li'.