SAN MARCOS 5:30 - Chatino Tataltepec

³⁰ Pana hora ti ngua tii Jesús cha' cua ngua'ni yu jo'o ji'i̱ sca ñati̱, masi ná na'a̱ yu ji'i̱ nu quicha bi'. Li' nguxña'a̱ yu ji'i̱ nu ñati̱ quiña'a̱ nu lijya̱ nde chu̱' yu. ―¿Tilaca ndyala' ste' na'? ―nacui̱ yu ji'i̱ ngu'.

SAN MARCOS 5:30 ပူးပေါင်းရင်းမြစ်များ

SAN MARCOS 5:31

Li' ndube tsa ti' nu ngu' nu ndyaca tsa'a̱ ji'i̱. ―Tachaa tsa ndi'i̱ ngu' re slo na ―nacui̱ ngu' bi' ji'i̱ Jesús―. ¿Ni cha' laca nchcuane nu'u̱ ji'i̱ ngu', “Tilaca ndyala' 'na”?

SAN LUCAS 5:17

Ngua sca tsa̱ nclyu'u Jesús cha' ji'i̱ ycui' Ndyosi ji'i̱ tyu̱u̱ tya'a ñati̱. Quichi̱ tyi ngu' bi' laca lcaa quichi̱ sube ti nu ntsu'u nde Galilea, nu ntsu'u nde Judea, nu ndi'i̱ cacua ti quichi̱ Jerusalén. Laja nu tsa tlyu ti ñati̱ bi', cua ndi'i̱ tyu̱u̱ tya'a ngu' fariseo. (Tacati tsa ycui' ngu', nti' ngu'; lye tsa ndu'ni tyucuaa ti' ngu' ji'i̱ xa' ñati̱.) Lo'o jua'a̱ ndi'i̱ tyu̱u̱ tya'a mstru nu ngulu'u cha' jo'ó ne' laa. Ngua tii lcaa ngu' nu ndi'i̱ ca bi', cha' ycui' Ndyosi laca nu nxtyucua ji'i̱ Jesús lo'o ndyu'ni yu cha' ndyaca tso'o ngu' quicha.

SAN LUCAS 6:19

Lcaa ngu' bi' nti' ngu' sta ya' ngu' chu̱' Jesús; nti' ngu' cha' cua'ni yu jo'o ji'i̱ lcaa ñati̱ quicha bi', xqui'ya cha' tlyu tsa chacuayá' ntsu'u ji'i̱ yu. Ndyaca tso'o lcaa ngu' quicha bi' li'.

SAN LUCAS 8:46

Li' xa' nguxacui̱ Jesús cha' ji'i̱ ngu' chaca quiya': ―Chañi cha' cua ndyala' sca ñati̱ jna' ―nacui̱―. Ngua tii na' cha' juersa 'na ndyaa ngua'ni jo'o ji'i̱ sca ñati̱.

1 PEDRO 2:9

Pana cu'ma̱ ni, cua ngusubi ycui' Ndyosi ji'i̱ cu'ma̱ cha' caca ma̱ ña'a̱ tsaca taju ñati̱ nu ndyu'ni tlyu ji'i̱ ycui' Ni. Laca ma̱ ñi'ya̱ laca sca latya sti jo'ó nu cuentya ji'i̱ ycui' Ndyosi nu laca loo tsiya' ti; ñi'ya̱ tsaca taju ñati̱ lubii laca ma̱ cha' cua'ni tlyu ma̱ ji'i̱ ycui' Ndyosi lcaa tsa̱. Ndu'ni Ni lo'o ma̱: “Ñati̱ 'na laca ma̱”, nacui̱ Ni. Bi' cha' nti' tsa Ni cha' chcui' ma̱ lo'o lcaa ñati̱ lcaa ña'a̱ cha' tso'o nu ngua'ni ycui' Ndyosi lo'o ma̱; cua ngulo Ni ji'i̱ ma̱ ji'i̱ chalyuu cuxi su talya tsa ña'a̱, cha' tya'a̱ ma̱ ca su ndubi tsa xee ji'i̱ ycui' Ni.