SAN MARCOS 4:34 - Chatino Tataltepec

³⁴ Xcui' lo'o cui̱i̱ ti ngulu'u Jesús ji'i̱ ñati̱ quiña'a̱, masi ná nda tso'o ngu' cuentya ñi'ya̱ cha' nda cui̱i̱ bi'; pana tiya' la ngulu'u tso'o yu cha' bi' ji'i̱ nu ngu' nu ndyaca tsa'a̱ ji'i̱ yu.

SAN MARCOS 4:34 ပူးပေါင်းရင်းမြစ်များ

SAN MATEO 13:34

Ngulu'u Jesús ji'i̱ nu quiña'a̱ tsa ñati̱ nu ndi'i̱ cajua jua'a̱, cha' xcui' cui̱i̱ ti nchcui' Jesús lo'o ngu' bi'; ná ngulu'u yu ni sca cha' ji'i̱ ñati̱ bi' si ná lo'o sca cui̱i̱ nda yu.

SAN MARCOS 4:10

Ca tiya' la lo'o cua ndu'u ñati̱ bi' ndyaa tsa tlyu ti, li' lijya̱ nu tii tyucuaa tya'a ngu' nu ndyaca tsa'a̱ ji'i̱ Jesús slo yu, lo'o jua'a̱ ñaa xa' la tya'a tso'o ngu' slo Jesús. Li' nchcuane ngu' ji'i̱ Jesús: ―¿Ñi'ya̱ ntsu'u cha' nu nda nu'u̱ nu ngua tsa̱ ti? ―nacui̱ ngu' bi' ji'i̱ Jesús.

SAN MARCOS 4:33

Jua'a̱ ti ngulu'u Jesús cha' ji'i̱ ngu'; nda yu xi cui̱i̱ lo'o ngu', cha' culu'u cha' ji'i̱ ycui' Ndyosi ji'i̱ ngu', ña'a̱ cuayá' nu ta tso'o ngu' cuentya ñi'ya̱ ntsu'u cha' ji'i̱ ycui' Ni.

SAN LUCAS 24:27

Li' nguxana Jesús ngulu'u yu cha' ji'i̱ ngu', ña'a̱ cha' nu cua nscua lo quityi cusu' cha' ji'i̱ ycui' yu. Nguxana ngu' lo'o quityi nu nguscua jyo'o Moisés, lo'o li' nchcui' ngu' lo lcaa quityi nu nguscua ngu' nu ngua tu'ba ji'i̱ ycui' Ndyosi nu ngua sa'ni.

SAN JUAN 10:6

Bi' ngua sca cha' nu nchcui' ne' ti Jesús lo'o ngu', pana ná ngua cuayá' ti' ngu' tsiya' ti ñi'ya̱ ndyu'u cha' nu nchcui' Jesús lo'o ngu' li'.

SAN JUAN 16:25

’Xcui' cui̱i̱ ti nda na' lo'o ma̱ ―nacui̱ Jesús―, cha' caca cuayá' ti' ma̱ scaa cha'; pana tyalaa sca tsa̱ lo'o nga'aa si'i cui̱i̱ ti chcui' na' lo'o ma̱ li', liñi ti ta na' cha' lo'o ma̱ cha' ji'i̱ ycui' Ndyosi Sti na'.

LOS HECHOS 28:23

Li' ngüiñi cha' ji'i̱ ngu' ni tsa̱ tyu'u ti'i̱ lcaa ngu' slo Pablo. Tsa̱ bi' quiña'a̱ tsa ñati̱ ndyu'u ti'i̱ slo yu. Tyucui tsa̱ ngulu'u yu ji'i̱ ngu'; ngulu'u yu ñi'ya̱ nu nclyo ycui' Ndyosi cña, ñi'ya̱ ngua cha' nu nguscua jyo'o Moisés cuentya ji'i̱ Ni, ñi'ya̱ ngua cha' nu nguscua jyo'o cusu' nu ngua tu'ba ji'i̱ Ni lo quityi lo'o nchcui' ngu' cha' ji'i̱ Jesús.