SAN MARCOS 4:31 - Chatino Tataltepec

³¹ Caca bi' ñi'ya̱ laca sca ti si'yu cuxee nu ndyataa ngu'. Si'yu bi' laca nu si'yu sube la tyucui ña'a̱ chalyuu, cha' ná ntsu'u xa' si'yu nu sube la.

SAN MARCOS 4:31 ပူးပေါင်းရင်းမြစ်များ

SAN MARCOS 4:30

Lo'o li' nda Jesús chaca cui̱i̱ lo'o ngu' bi': ―Chaca cha' chcui' na' lo'o ma̱ juani. Ta na' sca cui̱i̱ lo'o ma̱ ñi'ya̱ nu caca lo'o ycui' Ndyosi laca loo ne' cresiya ji'i̱ ñati̱ ―nacui̱ Jesús―.

SAN MARCOS 4:32

Pana lo'o cataa ngu' si'yu bi', yala ti tyucua, caluu yaca li' cha' caca sca yaca tlyu. Lo'o li' ca'ya quiñi laja sta̱' yaca bi', chca'a̱ cña' ni' su tyacala' laja laca' bi'.

SAN LUCAS 17:6

―Jlo ti' ma̱ cha' piti tsa sca si'yu cuxee ―nacui̱ Jesús ji'i̱ ngu'―, lo'o jua'a̱ cu'ma̱ ni, ná quiña'a̱ tsa cha' nchca ji'i̱ ma̱. Pana masi xti ti cha' jlya ti' ma̱ ji'i̱ ycui' Sti na', taca ñacui̱ ma̱ ji'i̱ yaca quityi re: “Tyu'utsu' nu'u̱ ca su ndu̱ re, yaa nu'u̱ tyu̱ nde lo hitya tyujo'o”. Lo'o li' ña'a̱ ma̱ cha' taquiya' yaca bi' cha' nu cua nchcui' ma̱ lo'o.

LOS HECHOS 19:20

Jua'a̱ ngua cha' quiña'a̱ la ñati̱ ngua cuayá' ti' cha' ji'i̱ ycui' nu Xu'na na, ngua cuayá' ti' ngu' cha' tlyu tsa laca cha' ji'i̱ ycui' nu Xu'na na.

LOS HECHOS 2:41

Lcaa ngu' nu jlya ti' cha' nu nchcui' Pedro lo'o ngu', ndyaa ngu' bi' cha' tyucuatya ngu' ji'i̱ ngu' bi' chacuayá' ji'i̱ Jesús. La cui' tsa̱ bi' nguxana sna mil tya'a ñati̱ ngusñi ngu' cha' ji'i̱ Jesucristo.

LOS HECHOS 21:20

Nu lo'o cua ndyuna ngu' cha' bi', li' ngua'ni tlyu ngu' ji'i̱ ycui' Ndyosi. Nchcui' ngu' lo'o Pablo li': ―Tso'o tsa lacua ―nacui̱ ngu' ji'i̱ yu―. Juani ni, jlo ti' nu'u̱ cha' cua ntsu'u tyu̱u̱ mil tya'a ngu' judío tya'a na nu ngusñi cha' ji'i̱ Jesús tya tsubi' la. Nacui̱ ngu' cha' ntsu'u cha' taquiya' lcaa na lo'o tya'a na cua ña'a̱ ca cha' cusu' nu nguxtyanu jyo'o Moisés ji'na cua sa'ni la ―nacui̱ ngu'―.

LOS HECHOS 4:4

Tso'o tsa ndyuna quiña'a̱ ñati̱ cha' ji'i̱ ycui' Ndyosi nu ngulu'u ngu' bi' ji'i̱ ngu', hora ti ngusñi ngu' cha' bi'. Cua ntsu'u ca'yu mil tya'a nu qui'yu ti nu ngusñi cha' ji'i̱ Jesucristo li'.

LOS HECHOS 5:14

Li' ndyuna tyu̱u̱ tya'a ñati̱ cha' ji'i̱ ycui' Jesucristo nu Xu'na na, jlya ti' ngu' cha' bi' li'. Stu'ba ti ngusñi ngu' cha' bi', masi nu cuna'a̱, masi nu qui'yu, ngusñi ngu' cha' ji'i̱ ycui' nu Xu'na na.

APOCALIPSIS 11:15

Li' cua ndya'a cati quiya' nguañi ngula'á xca̱ lo'o cui'chcua̱ ji'i̱. Nguañi nda xtyi'i tyu̱u̱ tya'a ñati̱ nde cua̱ li', nu ndi'ya̱ nchcui': Ca juani ndyanu tachaa cha' ji'i̱ ycui' nu Xu'na na, jua'a̱ ji'i̱ Cristo, cha' caca Ni loo ji'i̱ tyucui ña'a̱ chalyuu, nacui̱ ngu'. Lo'o juani ná nga'a̱ cha' tye cha' culo Ni cña chalyuu.