SAN MARCOS 2:8 - Chatino Tataltepec

⁸ Pana nda Jesús cuentya ñi'ya̱ laca cha' nu nclyacua ti' ngu'. Nchcui' yu lo'o mstru bi' li': ―¿Ni cha' cuxi tsa nclyacua ti' ma̱ ndi'i̱ ma̱? ―nacui̱ Jesús ji'i̱ mstru bi'―.

SAN MARCOS 2:8 ပူးပေါင်းရင်းမြစ်များ

SAN MATEO 12:15

Pana ngua cuaya' ti' Jesús lcaa ña'a̱ cha' cuxi nu ntsu'u tyiquee ngu' fariseo, bi' cha' ndu'u yu ndyaa yu xa' se'i̱. Quiña'a̱ tsa ngu' ngutu'u lca'a̱ ngu' ji'i̱ yu, lo'o jua'a̱ ngua'ni yu cha' ndyaca tso'o lcaa ngu' quicha bi'.

SAN MATEO 16:7

Li' nchcui' ngu' nu ndyaca tsa'a̱ ji'i̱ lo'o tya'a ngu': ―Cha' ná lo'o xlyá teje' ndya'a̱ na, bi' cha' nchcui' nu cusu' cha' ji'i̱ scua̱ tiye' lo'o na ―nacui̱ ngu'.

SAN MATEO 9:4

Pana, ngua tii Jesús ji'i̱ lcaa lo cha' nu ntsu'u tyiquee ngu' bi'. ―¿Ni cha' chi̱i̱ nti' ma̱ ña'a̱ ma̱ 'na juani? ―nacui̱ Jesús ji'i̱ mstru bi'―.

SAN MARCOS 2:7

“¿Ni cha' nchcui' yu re jua'a̱?” ngulacua ti' ngu'. “Sca ti ycui' Ndyosi caca cua'ni clyu ti' ji'i̱ ñati̱ nu ntsu'u qui'ya ji'i̱. Sca qui'ya tlyu laca lo'o nchcui' nu qui'yu re cha' cuityi̱ yu qui'ya nu ntsu'u ji'i̱ ñati̱ chalyuu, cha' ná nchca ji'i̱ ni sca ñati̱ chalyuu cuityi̱ qui'ya nu ntsu'u ji'i̱ ñati̱.”

SAN MARCOS 2:9

Ná ndiya ti' ma̱ cha' cua nacui̱ na' ji'i̱ nu quicha re: “Cua ngua'ni clyu ti' na' jinu'u̱ ji'i̱ qui'ya nu ntsu'u hi̱”. ¿Ha tso'o la si chcui' na' lo'o nu quicha lacua: “Tyatu̱ nu'u̱, xatu'ba nu'u̱ catya̱ jinu'u̱ cha' tyaa lo'o ji'i̱ to' tyi”? ―nacui̱ Jesús―.

SAN MARCOS 7:21

Si chañi cha' ntsu'u cha' cuxi ne' cresiya ji'i̱ ñati̱, quiña'a̱ tsa cha' cuxi taca cua'ni ñati̱ bi' li': masi culacua cuxi ti' ngu', masi cua'ni suba' ngu' lo'o xa' ñati̱, masi tyu'u cha' ji'i̱ ngu' lo'o clyo'o xa' ñati̱, masi cujuii ngu' ji'i̱ tya'a ngu',

SAN LUCAS 24:38

Li' nchcui' Jesús lo'o ngu' bi': ―¿Ni cha' laca ntsi̱i̱ ma̱ ndi'i̱ ma̱? ―nacui̱―. ¿Ni cha' laca nclyacua tsa ti' ma̱? ―nacui̱ yu ji'i̱ ngu'―.

SAN LUCAS 5:22

Cua jlo ti' Jesús ni cha' laca nu nclyacua ti' ngu'. Li' nchcuane yu ji'i̱ ngu' bi': ―¿Ni cha' laca nti' ma̱ jua'a̱? ¿Ha nti' ma̱ cha' tucui la laca si ñacui̱ na' ji'i̱ nu quicha cua cha' cua'ni clyu ti' ycui' Ndyosi ji'i̱ qui'ya nu ntsu'u ji'i̱ yu? ¿Ha nti' ma̱ cha' yala la caca si ñacui̱ na' ji'i̱ nu quicha: “Tyatu̱ clya nu'u̱ tya'a̱ nu'u̱”? ¿Ni cña yala la cua'ni na' cuentya ji'i̱ yu cua lacua?

SAN LUCAS 6:8

Pana hora ti ngua cuayá' ti' Jesús lcaa ña'a̱ cha' nu nclyacua ti' ngu'. Li' nacui̱ Jesús ji'i̱ yu nu nchcu̱' ya' bi': ―Tyatu̱ clya nu'u̱, yaa tyu̱ cla'be laja ngu' jua ―nacui̱ Jesús ji'i̱ nu quicha bi'. Li' ndyatu̱ yu quicha bi', ndyaa yu cajua su nacui̱ Jesús ji'i̱ yu.

SAN JUAN 21:17

Cua ngua sna quiya' nu nchcuane Jesús ji'i̱: ―¿Ha chañi hi̱ cha' ntsu'u tyiquee nu'u̱ ña'a̱ 'na? Cua xñi'i̱ ti' Pedro cha' cua sna quiya' nchcuane Jesús ji'i̱ si chañi cha' ntsu'u tyiquee ña'a̱ ji'i̱ yu, bi' cha' nchcui' ndi'ya̱: ―Lcaa ca cha' jlo ti' nu'u̱, Xu'na ―nacui̱ Pedro ji'i̱ yu―. Cua jlo ti' nu'u̱ cha' ntsu'u tsa tyiquee na' ña'a̱ na' jinu'u̱. ―Culu'u nu'u̱ cha' 'na ji'i̱ ñati̱ 'na lacua ―nacui̱ Jesús ji'i̱―.

SAN JUAN 6:64

Pana tya ntsu'u xi ngu' tya'a ndya'a̱ ma̱ nu ná jlya ti' jna' ―nacui̱ Jesús li'. Tya lo'o nguxana ti cha', tya li' ngua tii Jesús tilaca laca nu ná jlya ti' ji'i̱ yu, tilaca laca nu cujui' cresiya ji'i̱ yu ca tiya' la.

LOS HECHOS 5:3

Nchcui' Pedro lo'o yu li': ―Ananías ―nacui̱―, ¿na laca ngua hi̱? ¿Ni cha' laca nda nu'u̱ chacuayá' ji'i̱ nu xña'a̱ nu naa Satanás cha' caca loo ne' cresiya jinu'u̱? Bi' laca nu ngua'ni cha' nguñilo'o nu'u̱ ji'i̱ Xtyi'i ycui' Ndyosi ―nacui̱ Pedro ji'i̱ yu bi'―. Nacui̱ nu'u̱ cha' nde laca lcaa cñi nu ngujui jinu'u̱ lo yuu bi', lo'o si'i lcaa cñi laca re.

LOS HECHOS 8:22

Culochu̱' nu'u̱ ji'i̱ cha' cuxi nu ntsu'u ne' cresiya jinu'u̱, cha' caca chcui' nu'u̱ lo'o ycui' Ndyosi cha' cui'ya Ni cha' clyu ti' jinu'u̱ ji'i̱ lcaa cha' cuxi nu ngua'ni nu'u̱.

HEBREOS 4:13

Ná taca tyu'u cuaana ti cha' tyiquee na, ni tsaca cha' nu ntsu'u ji'na, cha' ná ca cuayá' ti' ycui' Ndyosi ji'i̱ cha' bi'. Ná taca. Ña'a̱ Ni ji'i̱ lcaa ñati̱ nu cua ngüiñá Ni, nu cua ngusta Ni chalyuu; nchca tii Ni lcaa cha' nu ntsu'u ji'na. Ná taca cua'ni na ni sca cña ca slo ycui' Ndyosi cha' tyu'u cuatsi' ti sca cha', cha' nga'a̱ cha' xacui̱ na cha' ji'i̱ ycui' Ni cuentya ji'i̱ lcaa cña nu ngua'ni scaa na nde chalyuu, nu lo'o tye chalyuu ji'na.

APOCALIPSIS 2:23

hasta cujuii na' ji'i̱ ñati̱ nu ngusñi cha' ji'i̱ nu cuna'a̱ bi', nacui̱ Ni. Lo'o li' lcaa taju ñati̱ ji'i̱ Jesucristo lcua ti quichi̱, caja cha' ji'i̱ ngu' cha' cua ngua'ni tye na' ji'i̱ cha' cuxi bi'; li' taca jlya tso'o ti' ngu' cha' cua jlo ti' na' lcaa ña'a̱ cha' nu nclyacua ti' ñati̱ chalyuu. Lo'o li' ca cuayá' ti' lcaa ma̱ cha' la cui' ñi'ya̱ ngua'ni ma̱ cha' cuxi tya lo'o ya̱a̱ ma̱ chalyuu, jua'a̱ xcube' na' ji'i̱ ma̱, nacui̱ Jesús.