SAN MARCOS 2:17 - Chatino Tataltepec

¹⁷ Lo'o ndyuna Jesús cha' nu nchcui' nu ngu' tlyu bi', li' nacui̱ yu: ―Ná ntsu'u cha' caca jo'o ji'i̱ ñati̱ nu tso'o ti ti' ―nacui̱ Jesús ji'i̱ ngu'―, caca jo'o ji'i̱ ngu' quicha ―nacui̱―. Lo'o na' ni, ná lijya̱ na' cha' culu'u na' cha' tso'o ji'i̱ ycui' Ndyosi ji'i̱ ñati̱ nu nclyacua ti' cha' tso'o tsa ycui' ca ngu'; na cua lijya̱ na' ca nde cha' culu'u na' cha' tso'o bi' ji'i̱ ñati̱ nu jlo ti' cha' ntsu'u qui'ya ji'i̱ ngu' ―nacui̱ Jesús.

SAN MARCOS 2:17 ပူးပေါင်းရင်းမြစ်များ

SAN MATEO 18:10

’Ná tso'o si ná taquiya' ma̱ ji'i̱ sca ñati̱ 'na, masi ji'i̱ sca nu piti. Cha' liñi nchcui' na' lo'o ma̱, cha' ntsu'u xca̱ ca su ntucua ycui' Ni cuentya ji'i̱ lcaa ngu' sube bi'; lcaa hora ntsu'u chacuayá' chcui' xca̱ bi' lo'o ycui' Ndyosi Sti na' cuentya ji'i̱ nu ngu' sube ji'i̱.

SAN LUCAS 15:10

Chaa ti' nu cuna'a̱ bi', cha' cua nquije cñi ji'i̱; la cui' jua'a̱ ca slo ycui' Ndyosi, chaa tsa ti' ycui' Ni lo'o ñati̱ ji'i̱ Ni nde cua̱, masi sca ti ñati̱ chalyuu ca tyuju'u ti' ji'i̱ cha' cuxi nu ntsu'u ji'i̱, culochu̱' yu ji'i̱ cha' cuxi bi' li'.

SAN LUCAS 15:29

Li' nacui̱ yu ji'i̱ sti yu: “Jlo ti' nu'u̱ ni cua lcua yija̱ ndi'i̱ na' ndyu'ni na' cña jinu'u̱, lo'o ni sca quiya' ná ngua'ni xña'a̱ na' lo'o nu'u̱; lcaa cña nu ngulo nu'u̱ 'na, ngua'ni na' ji'i̱. Pana ni sca quiya' ná nda nu'u̱ masi sca chivo piti ti jna' cha' cua'ni na' ta'a lo'o tya'a tso'o na'.

SAN LUCAS 15:7

Ndi'ya̱ ñacui̱ na' ji'i̱ ma̱: ca chaa tsa ti' ycui' Ndyosi lo'o ñati̱ ji'i̱ Ni ca su ntucua ycui' Ni ―nacui̱ Jesús ji'i̱ ngu' fariseo li'―, ca chaa ti' ngu' bi' masi sca ti ñati̱ chalyuu ca tyuju'u ti' ji'i̱ cha' cuxi nu ntsu'u ji'i̱, culochu̱' yu ji'i̱ cha' cuxi bi' li'. Ná ntsu'u cha' culacua ti' Ni cuentya ji'i̱ nu jacuayala tyii ntucua caa tya'a ñati̱ tso'o nu ná ntsu'u cha' cuxi ji'i̱ ngu', nti' ngu'.

SAN LUCAS 16:15

Li' nguxtyacui Jesús cha' lo'o ngu' bi': ―Cu'ma̱ ―nacui̱ yu―, tso'o tsa ndu'ni ma̱ cha' ña'a̱ ti xa' ñati̱ ji'i̱ ma̱, pana cua jlo ti' ycui' Ndyosi lcaa ña'a̱ cha' nu ntsu'u tyiquee ma̱. Ñati̱ nu tlyu tsa ndu'ni ji'i̱ ycui' ca ngu', xtyanu ti'i̱ ycui' Ndyosi ji'i̱ ngu' bi'.

SAN LUCAS 19:10

Cua nda Ni 'na lijya̱a̱ cha' caca na' ñati̱ cha' clyana na' ji'i̱ ñati̱ nu nguna' chalyuu ji'i̱ xqui'ya nu cuxi, lo'o jua'a̱ cua'ni lyaá na' ji'i̱ ngu' bi'.

SAN JUAN 9:34

―Ngu' cuxi laca nu'u̱, pana nti' nu'u̱ culu'u xi cha' jo'ó ji'i̱ ya ―nacui̱ ngu' judío li'―. Cuxi nu'u̱ lo'o ngula nu'u̱, jua'a̱ cuxi ti nguluu nu'u̱ ―nacui̱ ngu'. Lo'o li' ngulo'o ngu' ji'i̱ nu qui'yu bi', nga'aa nda ngu' chacuayá' tsaa ne' laa tsiya' ti.

SAN JUAN 9:40

Ndu̱ xi ngu' fariseo slo Jesús lo'o nchcui' yu jua'a̱. ―¿Ha cuityi̱' cua lacua? ―nacui̱ ngu' ji'i̱ yu.

LOS HECHOS 20:21

Sca ti cuaya' nchcui' na' lo'o lcaa ngu', masi lo'o ngu' judío tya'a na', masi lo'o xa' la ñati̱; sca ti cha' ngulu'u na' ji'i̱ lcaa ma̱, cha' nga'a̱ cha' culochu̱' ma̱ ji'i̱ lcaa cha' cuxi nu ntsu'u ji'i̱ ma̱ lo'o xñi ma̱ cha' ji'i̱ Jesucristo nu Xu'na na.

LOS HECHOS 26:20

Clyo ngulu'u na' ji'i̱ ngu' judío tya'a na nu ndi'i̱ ca quichi̱ Damasco, cha' culochu̱' ngu' ji'i̱ lcaa cha' cuxi nu ntsu'u tsa tyiquee ngu' ji'i̱ tya sa'ni la, cha' xñi ngu' cha' ji'i̱ ycui' Ndyosi li'; lo'o jua'a̱ xcui' cha' tso'o ntsu'u cha' cua'ni ngu' li', cha' ca cuayá' ti' xa' ñati̱ cha' cua nguxcutsa'a̱ Ni cresiya ji'i̱ ngu' bi'. La cui' jua'a̱ ngulu'u na' ji'i̱ ngu' Jerusalén, lo'o ji'i̱ ngu' lcaa quichi̱ nu ndi'i̱ loyuu su cuentya Judea re. Lo'o li' ngulu'u na' cha' bi' ji'i̱ ngu' xa' tsu'.

TITO 2:14

Nu lo'o nda Jesús chacuayá' cha' ndyujuii ngu' ji'i̱, nda yu tyucui ña'a̱ ycui' ca yu cha' taca clyaá na ji'i̱ nu cuxi. Ngua'ni lubii Ni ji'i̱ cresiya ji'na li' cha' caca na ñati̱ ji'i̱ Ni, cha' tyaja'a̱ na cua'ni na xcui' cha' tso'o li'.