SAN MARCOS 12:17 - Chatino Tataltepec

¹⁷ ―Tso'o ―nacui̱ Jesús li'―, ji'i̱ rey tlyu bi' tya ma̱ lcaa na nu nga'a̱ cha' ta ma̱ ji'i̱ lacua, lo'o jua'a̱ ji'i̱ ycui' Ndyosi tya ma̱ lcaa na nu ntsu'u cha' tya ma̱ ji'i̱ Ni. Ndube tsa ti' ngu' cha' nchca tsa ji'i̱ Jesús xtyacui cha' lo'o ngu' bi'.

SAN MARCOS 12:17 ပူးပေါင်းရင်းမြစ်များ

SAN MATEO 22:21

―Xtañi rey tlyu nu ndi'i̱ xa' tsu', bi' nga'a̱ chu̱' cñi cua ―nacui̱ ngu' li'. ―Tso'o ―nacui̱ Jesús li'―, ji'i̱ rey tlyu bi' tya ma̱ cñi cña loo nu nga'a̱ cha' ta ma̱ ji'i̱ lacua, lo'o jua'a̱ ji'i̱ ycui' Ndyosi tya ma̱ lcaa na nu ntsu'u cha' tya ma̱ ji'i̱ Ni.

SAN MATEO 22:22

Ndube tsa ti' ngu' bi' li', cha' nchca tsa ji'i̱ Jesús xtyacui cha' lo'o ngu'. Ndu'u ngu' bi' ndyaa ngu' li'.

SAN MATEO 22:33

Lo'o ndyuna nu quiña'a̱ tsa ñati̱ nu nga'a̱ slo cha' nu nclyu'u Jesús bi', ndube tsa ti' ngu' ji'i̱ cha' bi' li'.

SAN MATEO 22:46

Ná ntsu'u ni sca ñati̱ ca bi' nu ngua ji'i̱ xacui̱ cha' ji'i̱ Jesús li'. Lo'o jua'a̱ xa' la tsa̱ nde loo la nga'aa nchcuane ngu' cha' ji'i̱ yu tsiya' ti, cha' ntsi̱i̱ ngu' ji'i̱, ñi'ya̱ nu xacui̱ Jesús cha' ji'i̱ ngu'.

SAN MATEO 8:10

Ndube tsa ti' Jesús lo'o ndyuna cha' nu nchcui' capitán bi'. Li' nchcui' Jesús lo'o nu quiña'a̱ tsa ñati̱ nu lca'a̱ ji'i̱: ―Liñi tsa cha' nchcui' na' lo'o ma̱ juani ―nacui̱ Jesús ji'i̱ ngu'―. Bilya ña'a̱ na' tsiya' ti ji'i̱ sca ñati̱ nu tso'o tsa jlya ti' ji'i̱ ycui' Ndyosi, ñi'ya̱ jlya ti' nu capitán re; tyucui ña'a̱ nasiyu̱ Israel re ná ntsu'u ngu' nu jlya ti' jua'a̱.

SAN MARCOS 12:16

Li' nda ngu' sca cñi ji'i̱. Nchcuane Jesús ji'i̱ ngu' li': ―¿Tilaca nu ca ji'i̱ lcui̱ nu nga'a̱ chu̱' cñi re? ¿Ti ji'i̱ xtañi yu nu nscua chu̱' cñi re? ―nacui̱ Jesús ji'i̱ ngu'. ―Xtañi nu rey tlyu nu ndi'i̱ xa' tsu', bi' nga'a̱ chu̱' cñi cua ―nacui̱ ngu' li'.

SAN MARCOS 12:30

“Lo'o jua'a̱ ntsu'u cha' tyucui tyiquee ma̱ tyu'u cha' ji'i̱ ma̱ lo'o ycui' Ndyosi nu Xu'na ma̱, nu lo'o lubii ti cresiya ji'i̱ ma̱, jua'a̱ lo'o lcaa cha' nu nda'ya hique ma̱, jua'a̱ lo'o tyucui juersa ji'i̱ ma̱ tyu'u cha' ji'i̱ ma̱ lo'o Ni.”

SAN LUCAS 20:25

Nguxacui̱ ngu' cha' ji'i̱ yu li': ―Xtañi rey tlyu nu ndi'i̱ xa' tsu', bi' nga'a̱ chu̱' cñi cua ―nacui̱ ngu' li'. ―Tso'o ―nacui̱ Jesús li'―, ji'i̱ rey tlyu bi' tya ma̱ lcaa na nu nga'a̱ cha' ta ma̱ ji'i̱ lacua; jua'a̱ ji'i̱ ycui' Ndyosi tya ma̱ lcaa na nu ntsu'u cha' tya ma̱ ji'i̱ Ni.

ROMANOS 12:1

Cu'ma̱ ngu' tya'a ntsu'u cha' ji'na lo'o Cristo, xqui'ya cha' lye tsa ndu'ni tya'na ti' Ni ji'na, bi' cha' nchcui' na' lo'o ma̱ juani. Ta ma̱ tyucui ña'a̱ ma̱ ji'i̱ ycui' Ndyosi, cha' cua'ni ma̱ cua ña'a̱ ca cña nu nti' Ni cha' cua'ni ma̱ nde chalyuu; ta ma̱ tyucui ña'a̱ ma̱ ji'i̱ Ni cha' xcui' na tyi'i̱ ma̱ chalyuu cuentya ji'i̱ ycui' Ni, cha' laca ma̱ ñi'ya̱ nti' sca msta̱ lu'ú ti. La cui' jua'a̱ nti' ycui' Ndyosi, cha' laca ma̱ ñati̱ ji'i̱ Ni. Na cua laca ntsu'u cha' cua'ni ma̱ jua'a̱.

ROMANOS 13:7

Tya ma̱ ji'i̱ ngu' laca cña lcaa na nu ntsu'u chacuayá' ji'i̱ ngu' cha' jña ngu' ji'i̱ ma̱. Ná tyacui ma̱ cñi cña loo, ni ná tyacui ma̱ cñi ji'i̱ sca cña nu cua ngua'ni ngu'; tya ma̱ caya' bi' ji'i̱ ngu'. Lo'o jua'a̱ cua'ni tlyu ma̱ ji'i̱ ngu' bi', cua'ni chi̱ ma̱ loo ngu', tucuá ma̱ cña ji'i̱ ngu' bi'.

ROMANOS 6:13

Ni sca ti tsu' ya' ma̱, ni sca ti tsu' quiya' ma̱, ná ta ma̱ ji'i̱ cha' jña nu xña'a̱, cha' ná caca ma̱ msu ji'i̱ nu bi', cha' ná cua'ni ma̱ cha' cuxi lo'o. Xa' ña'a̱ culacua ti' ma̱ juani; ta ma̱ tyucui ña'a̱ ma̱ cha' caca ma̱ cuentya ji'i̱ ycui' Ndyosi, ñi'ya̱ laca si ngujuii ma̱ tsaca quiya', lo'o li' xa' ndyu'ú ma̱ chaca quiya'. Bi' cha' juani nga'a̱ cha' ta ma̱ tyucui ña'a̱ ma̱ cha' cua'ni ma̱ cña ji'i̱ ycui' Ndyosi, laja lo'o ndu'ni ma̱ cha' tso'o ca su ndi'i̱ ma̱.

1 PEDRO 2:17

Tso'o si tucuá ma̱ cha' nu nchcui' lcaa ñati̱. Lo'o jua'a̱ cua'ni ma̱ cha' tso'o ti caca tyiquee ma̱ ña'a̱ ma̱ ji'i̱ lcaa ñati̱ ji'i̱ Cristo, cha' tya'a ma̱ laca ngu' bi'. Ndu'ni cha' cutsi̱i̱ ma̱ xi ji'i̱ ycui' Ndyosi, lo'o jua'a̱ ndu'ni cha' cua'ni chi̱ ma̱ loo rey nu laca loo tsiya' ti chalyuu.