SAN MARCOS 10:14 - Chatino Tataltepec

¹⁴ Lo'o na'a̱ Jesús ñi'ya̱ nu ndyu'ni ngu' nu ndyaca tsa'a̱ ji'i̱, ná ndiya ti' yu cha' ndyu'ni ngu' jua'a̱: ―Ta ma̱ chacuayá' ji'i̱ nu sube cha' ca̱a̱ ngu' ca slo na' ―nacui̱ Jesús ji'i̱ ngu' bi'―. Ná cua'a ma̱ chacuayá' ji'i̱ nu sube bi', cha' ca̱a̱ ngu' slo na'. Ñi'ya̱ laca lo'o jlya ti' nu sube ji'i̱ sti ngu', la cui' jua'a̱ ntsu'u cha' jlya ti' ñati̱ ji'i̱ ycui' Ndyosi, nu lo'o laca Ni loo ne' cresiya ji'i̱ ngu'.

SAN MARCOS 10:14 ပူးပေါင်းရင်းမြစ်များ

SAN MATEO 18:10

’Ná tso'o si ná taquiya' ma̱ ji'i̱ sca ñati̱ 'na, masi ji'i̱ sca nu piti. Cha' liñi nchcui' na' lo'o ma̱, cha' ntsu'u xca̱ ca su ntucua ycui' Ni cuentya ji'i̱ lcaa ngu' sube bi'; lcaa hora ntsu'u chacuayá' chcui' xca̱ bi' lo'o ycui' Ndyosi Sti na' cuentya ji'i̱ nu ngu' sube ji'i̱.

SAN MATEO 18:4

Sca ñati̱ nu laca ñi'ya̱ laca nu piti re, sca ñati̱ nu ná tyixi tyiquee, nu ná nti' tyiji̱loo ji'i̱ tya'a cha' caca ycui' sca ñati̱ tlyu, bi' laca nu ndulo la cha' ji'i̱ ca su laca ycui' Ndyosi loo.

SAN MATEO 19:14

pana hora ti nchcui' Jesús lo'o ngu' nu ndyaca tsa'a̱ ji'i̱ li': ―Ta ma̱ chacuayá' ji'i̱ nu sube cha' ca̱a̱ ngu' slo na' ―nacui̱ Jesús ji'i̱ ngu' bi'―. Ná cua'a ma̱ ji'i̱ nu sube bi'. Ñi'ya̱ laca lo'o jlya ti' nu sube ji'i̱ sti ngu', la cui' jua'a̱ ntsu'u cha' jlya ti' ñati̱ ji'i̱ ycui' Ndyosi nu lo'o caca Ni loo ne' cresiya ji'i̱ ngu'.

SAN MATEO 5:10

’Lo'o jua'a̱ tso'o ntsu'u tyiquee ñati̱ si talo tyiquee ji'i̱ xa' ñati̱, masi lya' ti' ngu' ji'i̱, masi ti'í ti' ngu' ji'i̱, xqui'ya cha' tso'o nu ndu'ni cuentya ji'i̱ ycui' Ni. Tso'o ntsu'u tyiquee ñati̱ bi' si talo tyiquee ji'i̱ ngu', cha' jua'a̱ laca ycui' Ndyosi loo ne' cresiya ji'i̱ ñati̱ bi'.

SAN MATEO 5:3

―Tso'o ntsu'u tyiquee ñati̱ si jlo ti' cha' sca ti lo'o ycui' Ndyosi caca cua'ni ngu' cha' tso'o ―nacui̱ Jesús―. Caca ycui' Ndyosi loo ne' cresiya ji'i̱ ngu' bi', pana ná caca ji'i̱ ngu' si jua'a̱ ti ngu'.

SAN MARCOS 3:5

Ñasi̱' xi Jesús ña'a̱ yu ji'i̱ ngu' bi', jua'a̱ xñi'i̱ xi ti' yu cha' ná ntaja'a̱ ngu' cui'ya ngu' cuentya ji'i̱ cha' nu nclyu'u yu ji'i̱ ngu'. Li' nchcui' yu lo'o nu quicha bi': ―Xquiñi nu'u̱ ya' ―nacui̱ Jesús ji'i̱. Nguxquiñi yu ya' yu li', lo'o hora ti ngua tso'o ya' yu.

SAN MARCOS 8:33

Li' nguxtyacui Jesús su ndu̱ ti, nxña'a̱ yu ji'i̱ nu ngu' nu ndyaca tsa'a̱ ji'i̱; ndacu̱' yu tsiya' ti cha' nu nchcui' Pedro li'. ―Tyu'utsu' nu'u̱ 'na, Satanás ―nacui̱ yu ji'i̱ Pedro―, cha' nga'aa tacu̱' loo nu'u̱ cha' 'na. Si'i ñi'ya̱ nu nclacua ti' ycui' Ndyosi nclyacua ti' nu'u̱ juani, sca cha' nu ndya'a̱ tyiquee ñati̱ chalyuu ti nclyacua ti' nu'u̱ ―nacui̱ Jesús ji'i̱ Pedro.

SAN JUAN 3:3

Li' nchcui' Jesús lo'o: ―Liñi tsa cha' nu ta na' lo'o nu'u̱ juani: ndu'ni ycui' Ndyosi Sti na' cha' cala ñati̱ chaca quiya', si nti' ngu' xñi ngu' cha' ji'i̱ ycui' Ni cha' caca Ni loo ne' cresiya ji'i̱ ngu' ―nacui̱.

SAN JUAN 3:5

―Ta na' sca cha' liñi lo'o nu'u̱ juani ―nacui̱ Jesús―. Ñati̱ laca nu nclya lo'o ndu'ni cala ñati̱ chalyuu ji'i̱, pana Xtyi'i ycui' Ndyosi laca nu ndu'ni cha' cha'a̱ cresiya ji'i̱ ngu' ―nacui̱ Jesús―. Ntsu'u cha' caca cucui cresiya ji'i̱ ma̱ si cua nti' ma̱ cha' culo ycui' Ndyosi cña ji'i̱ ma̱. Ntsu'u cha' tyu'u ma̱ lo hitya, lo'o jua'a̱ ntsu'u cha' tyanu Xtyi'i ycui' Ndyosi ne' cresiya ji'i̱ ma̱ ―nacui̱ Jesús ji'i̱ Nicodemo―.

LOS HECHOS 2:39

Liñi tsa cha' nu nda ycui' Ndyosi lo'o ma̱ lo'o nchcui' Ni cha' tyanu Xtyi'i ycui' Ni ne' cresiya ji'i̱ ma̱, lo'o ne' cresiya ji'i̱ sñi' ma̱ tyanu Xtyi'i ycui' Ni, lo'o ne' cresiya ji'i̱ ngu' nu ndi'i̱ tyijyu' tyanu Ni; tyanu Ni ne' cresiya ji'i̱ lcaa ñati̱ nu cua ngusubi ycui' Ndyosi ji'i̱.

LOS HECHOS 3:25

Lcaa na laca na tya'a ñati̱ ji'i̱ jyo'o cusu' nu nguscua quityi ji'i̱ ycui' Ndyosi bi'; na cua ngüiñi cha' ji'i̱ Ni lo'o jyo'o cusu' ji'na bi', lo'o jua'a̱ ngua cha' ndyanu cha' bi' cuentya ji'na juani, cha' tya'a ñati̱ ji'i̱ jyo'o cusu' bi' laca na. Ndi'ya̱ nchcui' ycui' Ndyosi lo'o Abraham, nu jyo'o cusu' ji'na bi': “Sca ñati̱ tya'a nu'u̱ nu tyi'i̱ chalyuu nde loo la”, nacui̱ Ni ji'i̱, “bi' laca nu cua'ni cho'o cresiya ji'i̱ lcaa lo ñati̱ chalyuu”.

ROMANOS 11:16

Cuentya ji'i̱ ngu' judío ni, na ji'i̱ ycui' Ndyosi laca sca xlyá nu ndya' tya clyo, lo'o li' si cua nda ngu' tsa lo cua ji'i̱ Ni, na ji'i̱ ycui' Ni laca ña'a̱ tsaca ngulu' scua̱ xlyá bi'. La cui' jua'a̱ laca lo'o sca yaca nu ndyataa ngu' cha' caca cuentya ji'i̱ ycui' Ndyosi; lo'o caluu yaca bi', lo'o cuentya ji'i̱ ycui' Ni caca lcaa sta̱' yaca bi'. Ndi'ya̱ ndyu'u tyucuaa cha' bi', cha' ñi'ya̱ ngua jyo'o Abraham ñati̱ ji'i̱ ycui' Ndyosi cha' ngusñi yu cha' ji'i̱ Ni, jua'a̱ laca lcaa ñati̱ chalyuu ñati̱ ji'i̱ ycui' Ndyosi, nu lo'o xñi ngu' cha' ji'i̱ Ni.

ROMANOS 11:28

Tya'a cusu̱u̱ ycui' Ndyosi laca ngu' judío juani, xqui'ya cha' ná jlya ti' ngu' cha' chañi cha' cua ngua'ni lyaá Ni ji'i̱ ngu'; bi' cha' cua ngujui la xi tyempo ji'i̱ cu'ma̱ ngu' xa' tsu', cha' xñi ma̱ cha' ji'i̱ Jesucristo xqui'ya ngu' judío. Pana ña'a̱ ti tya ntsu'u tsa tyiquee ycui' Ndyosi ña'a̱ Ni ji'i̱ ngu' bi', xqui'ya cha' cua ngusubi Ni ji'i̱ jyo'o cusu' ji'i̱ ngu' bi' tya clyo cha' caca ngu' ñati̱ ji'i̱ Ni.

1 CORINTIOS 14:20

Cu'ma̱ tya'a ngusñi na cha' ji'i̱ Cristo, tso'o la si ná jlo ti' ma̱ tsiya' ti na ca laca sca cha' cuxi; ñi'ya̱ laca nu sube, jua'a̱ caca ma̱ cha' ná jlo ti' ngu' sube cha' bi'. Pana nga'aa culacua ti' ma̱ ñi'ya̱ nu nclacua ti' nu sube; juani culacua tso'o ti' ma̱, ñi'ya̱ nclacua ti' ngu' cusu'.

1 CORINTIOS 7:14

Ntucuá ycui' Ndyosi ji'i̱ cha' nu nchcui' ngu' cuna'a̱ bi' lo'o ycui' Ni cuentya ji'i̱ clyo'o ngu', tso'o cha' bi' cuentya ji'i̱ ycui' Ndyosi cha' clyo'o laca ngu'. Lo'o jua'a̱ nu ngu' cuna'a̱ nu tya lyiji xñi cha' ji'i̱ Jesús, tya'a cha' nu cua ngusñi clyo'o, ntucuá ycui' Ndyosi ji'i̱ cha' nu nchcui' nu qui'yu bi' lo'o ycui' Ni cuentya ji'i̱ clyo'o ngu'; tso'o cha' bi' cuentya ji'i̱ Ni cha' clyo'o laca ngu'. Nga'a̱ cha' caca jua'a̱ xqui'ya nu sube sñi' ma̱. Nga'aa laca ngu' sube bi' ñi'ya̱ nu laca sñi' xa' ñati̱ nu ná ndaquiya' ji'i̱ ycui' Ndyosi tsiya' ti, cha' cua ngusñi Ni cuentya ji'i̱ nu sube bi' xqui'ya cu'ma̱.

EFESIOS 4:26

Lo'o ntsu'u quiya' ñasi̱' ma̱ xi, cui'ya ma̱ cuentya cha' ná tyanu qui'ya ji'i̱ ma̱ li'; ná tso'o si caca ñasi̱' ti' ma̱ tyucui tsa̱, tsa tyeje tacui ti cha' cua'ni ma̱ ji'i̱.

2 TIMOTEO 1:5

Ntsu'u ti' na' cha' chañi cha' ngusñi nu'u̱ cha' ji'i̱ Jesús. Xtya'a̱ cusu' nu'u̱, nu ma' Loida ni, bi' laca nu cua ngusñi cha' bi' tya clyo; lo'o li' ma' Eunice xtya'a̱ nu'u̱ cua ngusñi cha' bi'; la cui' jua'a̱ nu'u̱, tso'o tsa ngusñi nu'u̱ cha' ji'i̱ Jesús.

2 TIMOTEO 3:15

Tya cuañi' tsa nu'u̱ lo'o nguxana nu'u̱ ndyaca tsa'a̱ nu'u̱ lo quityi ji'i̱ ycui' Ndyosi; quityi bi' laca nu culu'u liñi ji'na ñi'ya̱ taca clyaá na ji'i̱ nu cuxi, si xñi tso'o na cha' ji'i̱ Jesucristo.

1 PEDRO 2:2

Ñi'ya̱ laca sca cubi' cuañi' nu ngula ca ti, jua'a̱ laca cu'ma̱ cuentya ji'i̱ ycui' Ndyosi, cha' tsubi' ti ngusñi ma̱ cha' ji'i̱ ycui' Ni. Lu'ba ti ntyi' cubi' cuañi' cha' ntyute' tsa; si ná cati' lu'ba ti, ná caluu cubi' tsiya' ti. Lo'o jua'a̱ cu'ma̱ ni, tso'o la si cua'ni cña ti' ma̱ cha' ca tsa'a̱ la ma̱ cha' ji'i̱ ycui' Ndyosi, cha' ñi'ya̱ nti' styi', jua'a̱ laca cha' ji'i̱ ycui' Ndyosi cuentya ji'i̱ ma̱. Cua'ni bi' cha' caca nguula la ti' tyiquee ma̱ cuentya ji'i̱ ycui' Ndyosi, cha' taca clyaá ma̱ ji'i̱ cha' cuxi.

APOCALIPSIS 14:5

Ná ntucua cha' cuiñi tu'ba ngu' bi' tsiya' ti, cha' ná ntsu'u cha' cuxi ji'i̱ ngu' bi' tsiya' ti.