SAN MARCOS 1:27 - Chatino Tataltepec

²⁷ Ndyutsi̱i̱ tsa lcaa ngu' li'. Nchcui' ngu' lo'o tya'a ngu' ndi'ya̱: ―¿Ñi'ya̱ laca cha' re? ―nacui̱ ngu'―. ¿Ha xa' cha' nclyu'u nu jua ji'i̱ ñati̱? ―nacui̱ ngu'―. Nchca ji'i̱ yu jua culo yu cña, masi ji'i̱ cui'i̱ cuxi nclyo yu cña; hora ti nduna bi' cña nu ngulo yu ji'i̱, ndu'u nu cui'i̱ bi', ndyaa li'.

SAN MARCOS 1:27 ပူးပေါင်းရင်းမြစ်များ

SAN MATEO 15:31

Ndube tsa ti' ngu' quiña'a̱ lo'o na'a̱ ngu' cha' xa' nchcui' ngu' nu ngua cu'u̱, xa' ngua tso'o tyucui ña'a̱ ya' ngu' nu ngua cu' ya', xa' ndya'a̱ ngu' nu ngua quicha quiya', xa' tyaca̱' xee ña'a̱ ngu' nu ngua cuityi̱'. Li' lye tsa ndyu'ni tlyu ngu' ji'i̱ ycui' Ni nu laca ycui' Ndyosi ji'i̱ ngu' Israel xqui'ya cha' ndyaca tso'o lcaa ngu' quicha bi'.

SAN MATEO 8:9

Xu'na sendaru laca na'; laca na' loo ji'i̱ sca siyento tya'a sendaru, lo'o jua'a̱ ntsu'u nu laca loo jna'. Si culo na' cña ji'i̱ tsaca sendaru bi' ndi'ya̱: “Yaa clya nu'u̱”, hora ti tsaa yu, cha' nti' na' cha' tsaa yu. Jua'a̱ si chcui' na' lo'o chaca yu: “Ca̱a̱ nu'u̱ ca nde”, hora ti ca̱a̱ yu slo na' li'. Jua'a̱ si culo na' cña ji'i̱ msu 'na: “Cua'ni sca cña 'na”, ñacui̱ na' ji'i̱; hora ti cua'ni yu cña bi' 'na ―nacui̱ capitán ji'i̱ Jesús―. Jua'a̱ nu'u̱ ni, jlo ti' na' cha' taca jinu'u̱ culo cña cha' cati̱ quicha bi'.

SAN MATEO 9:33

Lo'o ngulo Jesús cui'i̱ cuxi ji'i̱ nu quicha bi', li' ngua nchcui' yu, masi cu'u̱ yu tsa̱ la. Ndube tsa ti' lcaa ñati̱ nu ndu̱ ndacua li'. ―Bilya ña'a̱ na sca cha' tlyu jua'a̱ ―nacui̱ ngu' ji'i̱ tya'a ngu'―. Ná ntsu'u ñati̱ tyucui ña'a̱ nasiyu̱ Israel re nu caca cua'ni jo'o jua'a̱ ―nacui̱ ngu'.

SAN MARCOS 1:26

Li' nguxalú cui'i̱ cuxi bi' ji'i̱ nu quicha. Cui̱i̱ ngusi'ya yu lo'o ngutu'u cui'i̱ bi' ndyaa li'.

SAN MARCOS 1:28

Yala ti nguañi cha' ji'i̱ Jesús lcaa quichi̱ nde loyuu su cuentya Galilea li'.

SAN MARCOS 10:24

Ndube tsa ti' ngu' nu ndyaca tsa'a̱ ji'i̱ yu li', cha' nchcui' yu jua'a̱ cha' ji'i̱ ngu' culiya'. Bi' cha' xa' nchcui' Jesús lo'o ngu': ―Cu'ma̱ ngu' cuañi' ―nacui̱ Jesús―, tucui tsa caca cha' caca ycui' Ndyosi loo ne' cresiya ji'i̱ ngu', si tiji̱' tsa ti' ngu' ji'i̱ lcaa cha' tso'o nu ntsu'u ji'i̱ ycui' ca ngu'.

SAN MARCOS 10:32

Xa' ndu'u ngu' ndyaa ngu' li', ndyaa Jesús lo'o nu ngu' tya'a ndya'a̱ yu tyucui̱i̱ tsaa ngu' nde Jerusalén. Nde loo ndyaa ycui' Jesús. Lye tsa ngulacua ti' ngu' tya'a ndya'a̱ yu, jua'a̱ nu xa' la ñati̱ nu ndya'a̱ lca'a̱ ji'i̱ ngu', ntsi̱i̱ tsa ngu'. Ndyaa lo'o Jesús ji'i̱ nu tii tyucuaa tya'a ngu' nu ndyaca tsa'a̱ ji'i̱, ndyaatsu' ngu' sca la'a ti cha' chcui' Jesús lo'o ngu' bi' ñi'ya̱ cha' nu caca ji'i̱ ycui' yu nde loo la.

SAN MARCOS 16:5

Ndyatí̱ ngu' nde ne' tyuquee, na'a̱ ngu' ji'i̱ sca nu qui'yu cuañi', ngua ti' ngu'; ngati̱ tsa ña'a̱ late' tyucui̱ cu' nu lacu' nu qui'yu bi' nu nga'a̱ la'a tsu' cui̱ su nscua jyo'o bi' nquicha'. Ndube tsa ti' nu ngu' cuna'a̱ bi' ña'a̱ ngu' ji'i̱.

SAN MARCOS 16:6

―Ná cutsi̱i̱ ma̱ ―nacui̱ nu qui'yu bi' ji'i̱ nu ngu' cuna'a̱ bi'―. Cua jlo ti' na' cha' ji'i̱ Jesús Nazaret nu ndyujuii ngu' ji'i̱ lo crusi nclyana ma̱. Pana nga'aa ntsiya jyo'o bi' ca nde, cha' cua ndyu'ú yu bi' chaca quiya'. Ca̱a̱ na'a̱ ma̱ xi ca nde su ngusta ngu' ji'i̱ jyo'o bi'.

SAN MARCOS 7:37

Ndube tsa ti' ngu' lo'o ndyuna ngu' ñi'ya̱ ngua cha' bi'. ―Tso'o tsa ndu'ni yu bi' ―nacui̱ ngu'―, lo'o ji'i̱ ngu' nu cu'u̱ jyaca̱ nchca ji'i̱ yu ndu'ni yu cha' ndyaca tso'o ngu'; hasta lo'o nchcui' ngu' quicha bi' chaca quiya' xqui'ya yu, masi ngua cu'u̱ tu'ba ngu'.

SAN LUCAS 4:36

Ngulacua tsa ti' ngu' li', nguxana nchcui' ngu' lo'o tya'a ngu': ―¿Macala ngujui cha' nu nchcui' Jesús cua? ―nacui̱ ngu'―. ¿Ni cha' laca cha' tso'o tsa ngujui chacuayá' ji'i̱ yu cua cha' culo yu cña ji'i̱ cui'i̱ cuxi? Hora ti nduna cui'i̱ cuxi cha' nu nchcui' yu lo'o, ndu'u cui'i̱ bi' ndyaa li' ―nacui̱ ngu' ji'i̱ tya'a ngu'.

SAN LUCAS 9:1

Nguxuti'i̱ Jesús ji'i̱ nu tii tyucuaa tya'a ngu' nu ndyaca tsa'a̱ bi', cha' ta yu chacuayá' ji'i̱ ngu' cha' culo ngu' ji'i̱ lcaa lo cui'i̱ cuxi nu ntsu'u ji'i̱ ñati̱, lo'o jua'a̱ cua'ni ngu' jo'o ji'i̱ lcaa lo quicha nu ntsu'u ji'i̱ ñati̱.

LOS HECHOS 17:19

Li' ngusñi ngu' ya' Pablo cha' tsaa lo'o ngu' ji'i̱ ca su ndyu'u ti'i̱ ngu' cusu' quichi̱ bi', sca yuu laja ti nu naa Areópago. ―Nti' ya cha' caca cuayá' ti' ya, ¿ñi'ya̱ ndyu'u cha' nu nclyu'u nu'u̱ ji'i̱ ya? ―nacui̱ ngu' ji'i̱ Pablo―. Sca cha' cucui laca cha' nu nchcui' nu'u̱ re;