SAN LUCAS 9:19 - Chatino Tataltepec

¹⁹ ―Ntsu'u ngu' nu nchcui' cha' jyo'o Juan nu ntyucuatya ji'i̱ ngu' tya tsubi' la laca nu'u̱ ―nacui̱ ngu' ji'i̱―, lo'o jua'a̱ ntsu'u ngu' nu nchcui' cha' jyo'o Elías laca nu'u̱, jua'a̱ ntsu'u xi xa' la ngu' nu nchcui' cha' nu'u̱ laca sca jyo'o cusu' nu ngua tu'ba ji'i̱ ycui' Ndyosi sa'ni la; cua sa'ni tsa ngujuii ñati̱ bi', pana juani ndyu'ú chaca quiya' nacui̱ ngu' bi'.

SAN LUCAS 9:19 ပူးပေါင်းရင်းမြစ်များ

SAN MATEO 14:2

Li' nchcui' nu laca loo bi' lo'o msu ji'i̱: ―La cui' jyo'o Juan nu ntyucuatya ji'i̱ ngu', la cui' bi' laca nu qui'yu jua ―nacui̱ Herodes―. Cua ngujuii yu, pana ndyu'ú yu chaca quiya' nti' na', bi' cha' nchca ji'i̱ yu cua'ni cha' tlyu jua'a̱.

SAN MATEO 3:1

Lo'o ngua tyempo, li' nguxana Juan nda yu cui̱i̱ lo'o ngu' nu ndya'a̱ slo yu su ndi'i̱ yu ycui' ti yu ne' quixi̱'; ntyucuatya yu ji'i̱ ngu' li'. La cui' loyuu su cuentya Judea ndi'i̱ yu; pana btyi tsa yuu su ndi'i̱ Juan, ndi'i̱ tsa quee, lo'o ná ndi'i̱ xa' ñati̱ cajua.

SAN MARCOS 6:14

Tyempo bi' cua ndyuna rey Herodes cha' ji'i̱ cha' tlyu nu cua ndyu'ni Jesús; lcaa quichi̱ nguañi cha' bi', cha' scaa cha' nchcui' scaa ñati̱ ji'i̱ Jesús. Pana ndi'ya̱ ngua ti' ycui' rey bi': ―Jyo'o Juan nu ntyucuatya ji'i̱ ngu' tsubi' la, bi' laca Jesús re― nacui̱ Herodes bi'―. Ndyujuii ngu' ji'i̱ Juan bi', pana juani cua ndyu'ú chaca quiya', bi' cha' nchca ji'i̱ cua'ni cha' tlyu jua'a̱ ―nacui̱ rey.

SAN MARCOS 6:15

―Si'i bi' ―nacui̱ xa' ñati̱―. Jyo'o Elías laca nu qui'yu re. ―Si'i jua'a̱ ―nacui̱ xa' la ñati̱―. Sca ñati̱ nu laca tu'ba ji'i̱ ycui' Ndyosi laca yu re, ñi'ya̱ nu jyo'o cusu' nu nguti'i̱ sa'ni la nu ngua tu'ba ji'i̱ ycui' Ni.

SAN LUCAS 9:18

Ngua sca tsa̱ ndi'i̱ Jesús ycui' ti nchcui' yu lo'o ycui' Ndyosi. Li' lijya̱ ngu' nu ndyaca tsa'a̱ ji'i̱ ca slo yu. Nchcuane Jesús ji'i̱ ngu' bi' li': ―¿Tilaca ta laca na' nacui̱ ngu'? ―nacui̱ Jesús ji'i̱ ngu' bi'.

SAN LUCAS 9:20

―Cu'ma̱ ni ―nacui̱ Jesús ji'i̱ ngu' bi' li'―, ¿tilaca laca na' nti' cu'ma̱? Li' nacui̱ Pedro ji'i̱: ―Cristo nu nda ycui' Ndyosi ji'i̱ lijya̱ nde chalyuu, bi' laca nu'u̱ ―nacui̱ Pedro ji'i̱.

SAN JUAN 1:21

―¿Tilaca laca nu'u̱ lacua? ―nacui̱ ngu'―. ¿Ha jyo'o Elías laca nu'u̱? ―Si'i bi' laca na' ―nacui̱ Juan. ―Cua tyu'u tucua ti sca nu cusu' nu chcui' cha' ji'i̱ ycui' Ndyosi lo'o ya, nti' ya ―nacui̱ ngu'―. ¿Ha si'i nu bi' laca nu'u̱? ―Si'i na' ―nacui̱ Juan li'.

SAN JUAN 1:25

Nchcui' ngu' bi' lo'o Juan li': ―¿Ni cha' laca ndu̱ nu'u̱ ntyucuatya nu'u̱ ji'i̱ ngu' si si'i nu ñati̱ tlyu bi' laca nu'u̱, si si'i jyo'o Elías laca nu'u̱, si si'i nu cusu' nu chcui' cha' ji'i̱ ycui' Ndyosi laca nu'u̱?

SAN JUAN 7:40

Lo'o ndyuna ngu' quichi̱ cha' bi', ntsu'u ngu' nu nchcui' ji'i̱ Jesús ndi'ya̱: ―Chañi cha' yu jua laca nu cusu' nu cua ca̱a̱ ti cha' chcui' cha' ji'i̱ ycui' Ndyosi lo'o na.

SAN JUAN 9:17

Li' xa' nchcuane ngu' ji'i̱ nu ngua cuityi̱' bi': ―Nu'u̱ ni, ¿ñi'ya̱ chcui' ta nu'u̱ cha' ji'i̱ yu bi' juani, cha' cua ngua'ni yu jo'o ji'i̱ cloo nu'u̱? Li' nguxacui̱ nu qui'yu bi' cha' ji'i̱ ngu': ―Sca nu cusu' nu nda cha' ji'i̱ ycui' Ndyosi lo'o ñati̱, jua'a̱ laca yu bi' ―nacui̱.