SAN LUCAS 6:25 - Chatino Tataltepec

²⁵ ’Lo'o jua'a̱ tya'na tsa cu'ma̱ nu tso'o tsa nguaala' ti' ma̱ nde chalyuu juani, cha' quiña'a̱ tsa cha' caca nu lyiji ji'i̱ ma̱ nde loo la ―nacui̱ Jesús―. ’Lo'o jua'a̱ tya'na tsa cu'ma̱ nu lye tsa nxtyí lo'o ma̱ ji'i̱ tya'a ñati̱ ma̱; ca tiya' la, li' lo'o cu'ma̱ xi'ya ma̱ cha' lye tsa caca xñi'i̱ ti' ma̱ ―nacui̱ Jesús―.

SAN LUCAS 6:25 ပူးပေါင်းရင်းမြစ်များ

SAN LUCAS 12:20

Li' nchcui' ycui' Ndyosi lo'o yu: “Tonto tsa nclyacua ti' nu'u̱. Talya ndyi ti cajaa nu'u̱”, nacui̱ Ni ji'i̱ nu culiya' bi'. “¿Ti ji'i̱ tyanu lcaa cha' tso'o nu cua nguxco'o ca ti nu'u̱, cha' caja jinu'u̱ nquicha'?” nacui̱ Ni ji'i̱ nu culiya' bi'.

SAN LUCAS 13:28

Xi'ya tsa ma̱ li', cacu la'ya ma̱ cha' lye tsa ñasi̱' ma̱. Ca xñi'i̱ tsa ti' ma̱ lo'o ña'a̱ ma̱ su ndi'i̱ quiña'a̱ tsa ñati̱ slo ycui' Ndyosi ca lo'o tye chalyuu; masi jyo'o Abraham, masi jyo'o Isaac, masi jyo'o Jacob, masi lcaa jyo'o cusu' nu ngua tu'ba ji'i̱ ycui' Ndyosi sa'ni la, ña'a̱ ma̱ ji'i̱ ngu' ndi'i̱ ngu' ca bi'. Lo'o cu'ma̱ ni, xtyanu Ni ji'i̱ ma̱ nde liya'.

SAN LUCAS 6:24

’Pana tya'na tsa cu'ma̱ ngu' culiya'; masi chaa tsa ti' ma̱ nquicha', cua laca ti tyempo caca chaa ti' ma̱ ―nacui̱―.

SAN LUCAS 6:26

’Lo'o jua'a̱ tya'na tsa cu'ma̱ lo'o tso'o tsa nchcui' lcaa ñati̱ ji'i̱ ma̱. La cui' jua'a̱ ngua'ni jyo'o cusu' ji'i̱ ma̱ nu ngua sa'ni, cha' tso'o tsa nchcui' ngu' ji'i̱ ngu' nu nchcui' cha' cuiñi ti ji'i̱ ycui' Ndyosi lo'o ngu'; ndiya tsa ti' ngu' ji'i̱ cha' cuiñi bi'. Jua'a̱ ngulu'u Jesús ji'i̱ lcaa ngu' nu ndyaca tsa'a̱ ji'i̱.

SAN LUCAS 8:53

Nxtyí lo'o ngu' ji'i̱ Jesús li', cha' jlo ti' ngu' cha' chañi cha' ngujuii nu piti bi'.

EFESIOS 5:4

Nga'aa ntsu'u cha' tyu'u cha' suba' tu'ba ma̱. La cui' ti ná chcui' ma̱ cha' tonto, ná chcui' ma̱ sca cha' nguna' ti lo'o tya'a ñati̱ ma̱. Tso'o la si tya ma̱ xlya'be ji'i̱ ycui' Ndyosi.

1 TESALONICENSES 5:3

“Ti̱ ti ndi'i̱ chalyuu, tso'o ti ndi'i̱ na”, ñacui̱ ngu'; pana la cui' hora bi' tye cha' ji'i̱ lcaa ñati̱ chalyuu, nga'aa caja mala xna ngu' li'. Ñi'ya̱ laca sca nu cuna'a̱ tana, cha' ná jlo ti' ni hora caca nu cala sñi', ni hora ca̱a̱ nu ti'í ji'i̱; jua'a̱ caca lo'o cua tyalaa ti hora bi' li', cha' ná jlo ti' na ni tsa̱ caca.

SANTIAGO 4:9

Ntsu'u cha' ca xñi'i̱ ti' ma̱ xqui'ya nu quiña'a̱ tsa cha' cuxi nu ntsu'u ne' cresiya ji'i̱ ma̱, bi' cha' ndu'ni cha' xi'ya ma̱, ndu'ni cha' cunaa ma̱ xqui'ya cha' cuxi bi'. Xi'ya ca ma̱ juani, masi nxtyí tsa ma̱ nquicha'; ca xñi'i̱ tsa ti' ma̱ juani, masi chaa tsa ti' ma̱ nquicha'.

APOCALIPSIS 3:17

Quiña'a̱ tsa cha' ntsu'u ji'i̱ ya, nacui̱ ma̱. Cua ngujui sca chalyuu tso'o ji'i̱ ya, bi' cha' nga'aa ntsu'u cha' nu lyiji ji'i̱ ya, nacui̱ ma̱. Pana ná nda ma̱ cuentya cha' tya'na tsa ma̱ nti' na' ña'a̱ na' ji'i̱ ma̱. Tso'o la si ca tyuju'u ti' ma̱, nti' na', cha' nga'aa ntsu'u cha' ji'i̱ ma̱ tsiya' ti; ntsu'u tsa cha' nu lyiji ji'i̱ ma̱ nti' na' ña'a̱ na' ji'i̱ ma̱, bi' cha' ná nchca culacua tso'o ti' ma̱ tsiya' ti.