SAN LUCAS 5:29 - Chatino Tataltepec

²⁹ Tiya' la li' ngua'ni Leví sca ta'a tlyu ca to' tyi yu, cha' cua'ni chi̱ yu loo Jesús. Lo'o jua'a̱ ndyalaa tyu̱u̱ tya'a ngu' slo, tya'a ndyu'ni Leví cña nclyo cñi cña loo ñati̱; jua'a̱ ndi'i̱ xi xa' la ñati̱.

SAN LUCAS 5:29 ပူးပေါင်းရင်းမြစ်များ

SAN MATEO 11:19

Lo'o li' lijya̱ na' nu cua nda Ni 'na lijya̱a̱ cha' caca na' ñati̱, ndacu na' lcaa lo na lo'o ma̱, ndyi'yu na' lcaa lo na lo'o ma̱, lo'o li' nchcui' ma̱ 'na: “¡Ña'a̱ ma̱ ña'a̱! Ndacu tsa yu jua, cu'bi tsa yu”, nacui̱ ma̱ ji'i̱ tya'a ma̱. “Ná tso'o yu jua cha' tya'a tso'o yu laca ngu' nu nxñi cñi cña loo na, lo'o jua'a̱ xi xa' la ngu' cuxi laca tya'a tso'o yu”, nacui̱ ma̱ 'na. Nacui̱ ma̱ jua'a̱ cha' ná tso'o cha' nu nchcui' na', nti' ma̱; pana caca cuayá' ti' ma̱ nde loo la cha' liñi tsa cha' nu nchcui' ngu' nu nacui̱ cha' cuentya ji'i̱ ycui' Ndyosi laca na'.

SAN MATEO 5:46

La cui' ti ná tso'o si xcui' ji'i̱ ngu' tya'a tso'o ti ma̱ tso'o ntsu'u tyiquee ma̱ ña'a̱ ma̱ ji'i̱. Si'i na tso'o la taquiya' ycui' Ndyosi ji'i̱ ma̱ si jua'a̱ ti ndu'ni ma̱, cha' jua'a̱ ndu'ni cua ña'a̱ ca ñati̱; masi ñati̱ tso'o, masi ñati̱ cuxi, masi ngu' msu ji'i̱ ngu' xa' tsu' nu cuiñi ti nxñi quiña'a̱ tsa cñi cña loo ji'i̱ ma̱, lcaa ngu' bi' ndu'ni tyaca'a ngu' ji'i̱ tya'a tso'o ti ngu'.

SAN MATEO 9:10

Tiya' la li' nga'a̱ Jesús nde ne' ni'i̱ ji'i̱ Mateo, ntucua yu to' mesa cha' ndyacu yu. Lo'o li' quiña'a̱ la ñati̱ ndyalaa slo Mateo cha' cacu ngu' lo'o. Ndi'i̱ ngu' tya'a ndu'ni cña lo'o Mateo, lo'o xa' la ñati̱ nu nacui̱ ngu' ji'i̱ cha' ná tso'o ñati̱ bi', lo'o nu ngu' nu ndyaca tsa'a̱ ji'i̱ Jesús; stu'ba ti ndyacu lcaa ngu' bi'.

SAN MATEO 9:9

Ndu'u Jesús ndyaa, lo'o li' cua tyeje tacui ti to' ni'i̱ su ntucua Mateo nxñi cñi cña loo ngu'. Nchcui' Jesús lo'o nu Mateo bi' li': ―Tyu'u lca'a̱ nu'u̱ 'na ―nacui̱ Jesús ji'i̱. Hora ti ndyatu̱ Mateo, nguxtyanu cña ji'i̱, ndyaa lca'a̱ ji'i̱ Jesús li'.

SAN MARCOS 2:15

Ca tiya' la ndyacu Jesús to' tyi Leví. Stu'ba ndyacu yu lo'o tyu̱u̱ tya'a ngu' cuxi, jua'a̱ lo'o tyu̱u̱ tya'a ngu' tya'a ndyu'ni cña lo'o Leví, nu quiña'a̱ tsa cñi cña loo nxñi ji'i̱ ñati̱ cuentya ji'i̱ ngu' xa' tsu' bi'; quiña'a̱ tsa ngu' bi' nti' ngu' cuna ngu' cha' nu nchcui' Jesús. Nga'a̱ Jesús ni'i̱ bi' lo'o nu ngu' nu ndyaca tsa'a̱ ji'i̱.

SAN LUCAS 15:1

Lcaa nu msu ji'i̱ ngu' xa' tsu' nu cuiñi ti nxñi quiña'a̱ tsa cñi cña loo ngu' bi' ni, ñaa ngu' slo Jesús cha' cuna ngu' ni cha' nda yu; jua'a̱ xa' la ngu' cuxi, ñaa ngu' slo Jesús li'.

SAN JUAN 12:2

Li' nda ngu' sca si̱i̱ ji'i̱ Jesús, cha' tso'o tsa nti' ngu' cha' ndyalaa yu slo ngu'. Nda Marta na ndyacu ngu' li', lo'o jua'a̱ stu'ba ti ntucua Lázaro lo'o ngu' su ndyacu ngu' si̱i̱ lo'o Jesús.

1 CORINTIOS 10:27

Ná cube ti' ma̱ si chcui' sca ñati̱ lo'o ma̱ cha' cacu ma̱ xi slo ngu', masi sca ñati̱ nu ná ntsu'u cha' ji'i̱ lo'o ycui' Ndyosi laca bi'. Tso'o si tsaa ma̱ slo ngu' bi' si nti' ma̱ lacua. Lo'o li' cacu ma̱ ji'i̱ na laca nu ta ngu' ji'i̱ ma̱; ná ntsu'u cha' cube ti' ma̱ ji'i̱ na bi', si tso'o, si ná tso'o laca bi' cuentya ji'i̱ ma̱.