SAN LUCAS 18:13 - Chatino Tataltepec

¹³ Pana nu qui'yu nu nclyo cñi cña loo ngu' ni, tyijyu' ti ndyatu̱ yu; ná ntsu'u tyiquee yu cha' sicua̱a̱ yu xi cloo yu nde cua̱, cha' xñi'i̱ tsa ti' yu ndu̱ yu ndyu'u̱ ti yu tyiquee yu laja lo'o nchcui' yu lo'o ycui' Ndyosi: “Cua'ni tya'na ti' nu'u̱ jna', Ndyosi Sti na', cha' ntsu'u tsa qui'ya jna'”, nacui̱ nu qui'yu bi'. Tsa bi' ti cha' nchcui' yu.

SAN LUCAS 18:13 ပူးပေါင်းရင်းမြစ်များ

SAN MATEO 10:3

lo'o jua'a̱ ngusubi yu ji'i̱ Felipe, lo'o ji'i̱ Bartolomé, lo'o ji'i̱ Tomás, lo'o ji'i̱ Mateo nu ngusñi cñi cña loo ngu' clyo; lo'o jua'a̱ ngusubi yu ji'i̱ Jacobo sñi' Alfeo, lo'o ji'i̱ Lebeo nu lo'o ndu'ni ngu' Tadeo ji'i̱;

SAN MATEO 6:5

’Lo'o chaca cha' ni, lo'o chcui' ma̱ lo'o ycui' Ndyosi, ná cua'ni ma̱ ñi'ya̱ nu ndu'ni ngu' nu tucua cha' ntsu'u tyiquee ngu'. Ndu̱ ngu' cuiñi bi' slo ñati̱ ne' laa ji'i̱ ngu' judío tya'a na, cha' nti' ngu' chcui' ngu' lo'o ycui' Ndyosi laja lo'o ña'a̱ ñati̱ ji'i̱ ngu' bi'; la cui' ti cha' bi' lo'o ndu̱ ngu' laja calle cha' chcui' ngu' lo'o ycui' Ni. Cha' liñi nchcui' na' lo'o ma̱: lcaa cha' tso'o nu tyacua ji'i̱ ngu' bi' ca slo ycui' Ndyosi nquicha', cua laca ngujui cha' bi' ji'i̱ ngu' nu lo'o cua na'a̱ ñati̱ chalyuu ti ji'i̱ ngu'.

SAN MATEO 9:13

Yaa clya ma̱ cua'a̱ jyaca̱ ma̱ ji'i̱ cha' nu nguscua jyo'o cusu' lo quityi, nu ndi'ya̱ nchcui': “Nti' na' cha' cua'ni tya'na ti' ma̱ ji'i̱ tya'a ñati̱ ma̱, nacui̱ ycui' Ni. Bi' nu tso'o la, masi ná ta ma̱ quiña'a̱ tsa msta̱ 'na; ni na'ni scu̱' ma̱, ná ndu'ni cha' ta ma̱ msta̱ 'na.” Jua'a̱ nscua lo quityi. Ná lijya̱ na' chalyuu cha' chcui' na' lo'o ñati̱ nu tso'o tsa ycui' ngu', nti' ngu'; cua lijya̱ na' chalyuu cha' chcui' na' lo'o ngu' nu jlo ti' cha' ntsu'u cha' cuxi tyiquee ngu', cha' caca tyuju'u ti' ngu' li'. Xtyanu ngu' ji'i̱ cha' cuxi bi' li'.

SAN MARCOS 11:25

La cui' jua'a̱, lcaa quiya' nu lo'o ndu̱ ma̱ cha' chcui' ma̱ lo'o ycui' Ndyosi, ntsu'u cha' cua'ni clyu ti' ma̱ ji'i̱ tya'a ñati̱ ma̱, si ntsu'u cha' ngusu'ba ñasi̱' ngu' ji'i̱ ma̱. Li' ycui' Ndyosi Sti ma̱ nu ntucua nde cua̱, caca ji'i̱ Ni cua'ni clyu ti' Ni ji'i̱ ma̱ ji'i̱ cha' cuxi nu ntsu'u ji'i̱ ma̱.

SAN LUCAS 17:12

Nu lo'o ndyalaa Jesús sca quichi̱ piti bi', li' ndyacua tya'a yu lo'o tii tya'a ngu' quicha nu cua lijya̱ ngu' slo yu; quicha nu ndyatsu' cuaña' ntsu'u ji'i̱ ngu' bi'. Pana tyijyu' ti ndyatu̱ ngu' slo Jesús,

SAN LUCAS 22:41

Li' ndu'utsu' Jesús nde slo ngu' ña'a̱ cuayá' nu tyalaa sca quee cu̱ na, ca bi' ndyatu̱ sti̱' Jesús cha' chcui' lo'o ycui' Ndyosi.

SAN LUCAS 23:48

Li' lcaa ñati̱ nu ndi'i̱ hora bi', nu na'a̱ lcaa cha' nu ngua bi', ndu'u ngu' ndyaa ngu' li'. Ndyu'u̱ tya ngu' tyiquee ngu' ndyaa ngu' cha' xñi'i̱ tsa ti' ngu'.

SAN LUCAS 5:8

Lo'o na'a̱ Simón Pedro lcaa cualya bi', ngua cuayá' ti' yu cha' xqui'ya Jesús ngujui cualya ji'i̱ ngu'. Hora ti ndyatu̱ sti̱' yu loo Jesús li', nchcui' yu lo'o: ―Tyu'u clya nu'u̱ nde slo na', Xu'na ―nacui̱ Simón ji'i̱―. Ntsu'u tsa xqui'ya na' cha' ñati̱ chalyuu ti laca na'.

LOS HECHOS 2:37

Lo'o ndyuna ngu' cha' nu nchcui' Pedro, ntyuju'u tsa ti' ngu' li'. Nchcuane ngu' ji'i̱ Pedro lo'o ji'i̱ lcaa ngu' nu ngua tsa'a̱ ji'i̱ Jesús tya clyo: ―¿Ñi'ya̱ cua'ni ya juani? ―nacui̱ ngu' ji'i̱ ngu' bi'.

ROMANOS 5:8

Pana jua'a̱ ngua'ni ycui' Ndyosi lo'o na, cha' culu'u Ni ji'na cha' ntsu'u tsa tyiquee Ni ña'a̱ Ni ji'na; nda Ni ji'i̱ Cristo cha' cajaa cuentya ji'na, masi tya ntsu'u tsa qui'ya ji'na.

2 CORINTIOS 7:11

Culacua xi ti' ma̱ ñi'ya̱ ndyaca ji'i̱ ma̱ juani, tya lo'o ngua'ni na' cha' ngua xñi'i̱ ti' ma̱ nu ngua li': tyucui tyiquee ma̱ nclyacua ti' ma̱ juani, cha' cua nti' tsa ma̱ juani cha' tyu'u lubii ma̱ ji'i̱ cha' bi'; tsa cla'be ngua ñasi̱' ma̱, tsa cla'be ti ndyutsi̱i̱ ma̱, pana ndyi'u tsa ti' ma̱ jna' li', ña'a̱ cuayá' nu lye tsa ngua ti' ma̱ cha' ña'a̱ loo ma̱ 'na chaca quiya'; yala ti ngua ti' ma̱ chcube' ma̱ ji'i̱ yu nu ngua'ni cha' cuxi bi'. Jua'a̱ nchca cuayá' ti' ya cha' nga'aa ndyanu yabe' ji'i̱ ma̱ xqui'ya cha' cuxi bi'.

1 TIMOTEO 1:15

Taca xñi tso'o ngu' cha' nu nchcui' ndi'ya̱: Cua ya̱a̱ Jesucristo nde chalyuu cha' cua'ni lyaá Ni ji'i̱ ñati̱ chalyuu nu ntsu'u qui'ya ji'i̱. Lo'o na', tlyu la xqui'ya na' que xa' la ñati̱, cha' cuxi tsa cña nu ngua'ni na' lo'o ñati̱ ji'i̱ Jesucristo nu ngua sa'ni la.

HEBREOS 4:16

Ná cutsi̱i̱ na tsiya' ti lacua, tyucui tyiquee na jña na sca cha' ji'i̱ ycui' Ndyosi ca su tlyu ca su laca Ni loo; chcui' na lo'o ycui' Ndyosi nu xcui' tso'o tsa ndu'ni lo'o ñati̱, cha' cui'ya Ni cha' clyu ti' ji'na, cha' xtyucua Ni ji'na, masi la cui' ca hora nu lyiji tsa cha' ji'na.

HEBREOS 8:12

Cua'ni clyu ti' na' ji'i̱ ngu' ji'i̱ qui'ya nu ntsu'u ji'i̱ ngu' li'; nga'aa culotu̱ na' qui'ya ji'i̱ ngu' li'. Jua'a̱ nchcui' quityi ji'i̱ ycui' Ndyosi bi'.