SAN LUCAS 17:6 - Chatino Tataltepec

⁶ ―Jlo ti' ma̱ cha' piti tsa sca si'yu cuxee ―nacui̱ Jesús ji'i̱ ngu'―, lo'o jua'a̱ cu'ma̱ ni, ná quiña'a̱ tsa cha' nchca ji'i̱ ma̱. Pana masi xti ti cha' jlya ti' ma̱ ji'i̱ ycui' Sti na', taca ñacui̱ ma̱ ji'i̱ yaca quityi re: “Tyu'utsu' nu'u̱ ca su ndu̱ re, yaa nu'u̱ tyu̱ nde lo hitya tyujo'o”. Lo'o li' ña'a̱ ma̱ cha' taquiya' yaca bi' cha' nu cua nchcui' ma̱ lo'o.

SAN LUCAS 17:6 ပူးပေါင်းရင်းမြစ်များ

SAN MATEO 14:29

―Ca̱a̱ nu'u̱ ca nde ―nacui̱ Jesús ji'i̱ Pedro li'. Lo'o li' ngutu'u Pedro ne' yaca ni'i̱, ndya'a̱ yu lo hitya cha' tyalaa yu ca su ndu̱ ycui' Jesús.

SAN MATEO 17:20

Li' nguxacui̱ Jesús cha' ji'i̱ ngu' bi': ―Xti ti cha' jlya ti' ma̱ ji'i̱ ycui' Ni, bi' cha' ná ngua ji'i̱ ma̱ ―nacui̱ Jesús ji'i̱ ngu' bi'―. Cha' liñi nchcui' na' lo'o ma̱ juani, cha' si chañi ca cha' jlya ti' ma̱ cha' ji'i̱ ycui' Ndyosi, masi tsa lo cua sca si'yu cuxee ti nu piti tsa, si jua'a̱ ti jlya ti' ma̱ cha' ji'i̱ Ni, li' taca chcui' ma̱ lo'o ca'ya cua̱ nde: “Tyu'utsu' nu'u̱ tyaa nu'u̱ chaca se'i̱ cajua la”, ñacui̱ ma̱ ji'i̱. Lo'o li' taquiya' ca'ya bi' cha' nu nchcui' ma̱ lo'o, tyu'utsu' ca'ya bi' tsaa chaca se'i̱ li'. Ná ntsu'u cha' nu ná caca cua'ni ma̱ si chañi ca cha' jlya ti' ma̱ 'na.

SAN MATEO 21:21

Li' nguxacui̱ Jesús cha' ji'i̱ ngu' bi': ―Cha' liñi nchcui' na' lo'o ma̱ juani ―nacui̱―. Si chañi cha' jlya ti' ma̱ ji'i̱ ycui' Ndyosi, si si'i cha' tucua ti cha' ntsu'u tyiquee ma̱ nchcui' ma̱ lo'o Ni, lo'o cu'ma̱ caca ji'i̱ ma̱ cua'ni ma̱ sca cha' tlyu jua'a̱. Si'i cha' quityi sca yaca ti chcui' ma̱ lo'o ycui' Ndyosi li', masi taca chcui' ma̱ lo'o ca'ya jua ndi'ya̱: “Tyu'utsu' nu'u̱, yaa xcua nu'u̱ nde lo hitya tyujo'o”, ñacui̱ ma̱ ji'i̱. Lo'o li' jua'a̱ caca ji'i̱, cha' tyu'utsu' ca'ya bi'.

SAN MARCOS 4:31

Caca bi' ñi'ya̱ laca sca ti si'yu cuxee nu ndyataa ngu'. Si'yu bi' laca nu si'yu sube la tyucui ña'a̱ chalyuu, cha' ná ntsu'u xa' si'yu nu sube la.

SAN MARCOS 9:23

―¿Ni cha' laca nacui̱ nu'u̱ 'na jua'a̱, si nchca 'na? ―nacui̱ Jesús ji'i̱―. Lcaa lo cña nchca ji'i̱ sca ñati̱ nu jlya ti' ji'i̱ ycui' Ndyosi ―nacui̱.

SAN LUCAS 13:19

Laca cha' bi' ñi'ya̱ nti' sca ti si'yu cuxee, nu ndyaa lo'o sca ñati̱ ji'i̱ ndyataa yu ji'i̱ ne' lo'o ji'i̱ yu. Lo'o li', lo'o cua ndyaluu la, sca yaca tonu tsa laca bi'. Li' nguxana ndyalaa quiñi cha' cuiñá ni' xlyati̱ laja sta̱' yaca bi', cha' tso'o tsa tonu yaca bi'.

SAN LUCAS 17:7

’¿Ñi'ya̱ nti' cu'ma̱ ni? ¿Ñi'ya̱ cua'ni ma̱ si ntsu'u sca msu ji'i̱ ma̱ nu ndyaa ne' quixi̱' cha' cula'a yuu cuentya ji'i̱ ma̱, masi ndyaa yu cha' cña'a̱si̱i̱ yu ji'i̱ bata ji'i̱ ma̱? Nde ngusi̱i̱ lo'o ndyalaa ca ti msu bi' ndyaa yu cña bi', ná tyiquee' ná chcui' ma̱ lo'o yu ndi'ya̱: “Tya̱a̱ clya cua'a̱ to' mesa cha' cua'ni nu'u̱ si̱i̱ juani”.

SAN LUCAS 19:4

Li' ngusna yu ndyatu̱ yu nde loo ngu'; cha' ña'a̱ cuaana ti yu ji'i̱ Jesús, ndyacuí̱ yu lo sca yaca quityi tyucui̱i̱ su nga'a̱ cha' tyeje tacui Jesús cacua ti.

SAN LUCAS 7:13

Lo'o na'a̱ Jesús nu Xu'na na ji'i̱ jyo'o bi', ngua tya'na ti' yu ji'i̱ nu cuna'a̱ ti'i xtya'a̱ jyo'o bi'. Li' nchcui' yu lo'o ma': ―Ná xi'ya nu'u̱ ―nacui̱.

SAN LUCAS 7:19

Li' ngusi'ya Juan ji'i̱ tucua tya'a ngu' tya'a ndya'a̱ yu bi'. Ngulo yu cña ji'i̱ ngu' cha' tsaa ngu', tsaa xcuane ngu' ji'i̱ Jesús si chañi cha' ycui' yu laca yu Cristo, nu ñati̱ tlyu nu cua ca̱a̱ ti; si tya ntsu'u cha' jatya la xi ngu' ña'a̱ cuayá' nu ca̱a̱ chaca ñati̱ nu cua tlyu la.

1 CORINTIOS 13:2

Ná ndu'ni cha' masi cacha' na lcaa cha' nu nda ycui' Ndyosi lo'o ñati̱, si ná ntsu'u tyiquee na ña'a̱ na ji'i̱ ngu'. Ná ndu'ni cha' masi jlo ti' na lcaa cha' ji'i̱ ycui' Ndyosi, masi tso'o tsa nchca cuayá' ti' na sca cha' nu ná ngujui ñi'ya̱ nu caca cuayá' ti' ñati̱ nu ngua sa'ni la; ná sca na laca na cuentya ji'i̱ ycui' Ndyosi si ná ntsu'u tyiquee na ña'a̱ na ji'i̱ ñati̱. La cui' ti masi jlya tsa ti' na ji'i̱ ycui' Ndyosi ñi'ya̱ nti' si caca cuityi̱ na ji'i̱ sca ca'ya cua̱, pana si ná ntsu'u tyiquee na ña'a̱ na ji'i̱ ñati̱, ná sca na laca na li'.