SAN LUCAS 16:26 - Chatino Tataltepec

²⁶ Tya ntsu'u la cha' ji'i̱ cuare nde su ndi'i̱ ya, ntsu'u sca laja cua'a̱ tlyu cla'be laja su ndi'i̱ cuare lo'o cu'ma̱; bi' cha' si ntsu'u ngu' nu nti' tsaa nde slo cu'ma̱, ná caca ji'i̱ ngu' tyaa ngu'. Lo'o jua'a̱ cu'ma̱ nu ntsu'u ma̱ nde jua, ná caca ji'i̱ ma̱ tya̱a̱ ma̱ ca nde.”

SAN LUCAS 16:26 ပူးပေါင်းရင်းမြစ်များ

SAN MATEO 25:46

Lo'o li' tyaa ngu' bi' ca bilyaa su ná tye cha' chcube' ngu'; pana ngu' nu lubii tyiquee ni, caja chalyuu nu ná nga'a̱ cha' tye tsiya' ti ji'i̱ ngu' bi'.

SAN LUCAS 12:59

Cha' liñi nchcui' na' lo'o ma̱, cha' nga'aa tyu'u ma̱ tsiya' ti ña'a̱ cuayá' nu ta ma̱ lcaa ca centavo nu ndijña ñati̱ bi' ji'i̱ ma̱.

SAN LUCAS 16:25

Li' nacui̱ jyo'o Abraham ji'i̱: “Sñi'”, nacui̱, “tso'o tsa ngua hi̱ lo'o nguti'i̱ nu'u̱ nde chalyuu. Lo'o Lázaro re ni, si'i jua'a̱ ngua ji'i̱ yu, cha' lye tsa nchcube' yu su nguti'i̱ yu chalyuu. Bi' cha' caja su tso'o tyi'i̱ yu ca nde juani; lo'o nu'u̱ ni, nga'a̱ cha' chcube' nu'u̱.

SAN LUCAS 16:27

Li' tya'na tsa nchcui' nu culiya' bi' lo'o: “Cua'ni nu'u̱ sca cha' tso'o lo'o na', Abraham sti na'”, nacui̱ nu culiya' bi'. “Ta ji'i̱ Lázaro cha' tsaa yu to' tyi sti na',

SAN JUAN 3:36

Lo'o xñi ñati̱ cha' ji'i̱ Jesús, Sñi' ycui' Ndyosi, ná nga'a̱ cha' tye chalyuu tso'o nu ta Ni ji'i̱ ngu' bi'. Pana ñati̱ nu ná taquiya' tsiya' ti ji'i̱ cha' nu nchcui' Jesús, ná ta Ni chalyuu tso'o ji'i̱ ngu' bi'; xcube' tsa Ni ji'i̱ ngu' bi' li'.

APOCALIPSIS 20:10

Lo'o li' tyucua ya' Ni ji'i̱ nu xña'a̱ nu ngüiñilo'o ji'i̱ ngu' tya clyo, tyalo'o Ni ji'i̱ lo tayu' su ntsu'u quii' ndyaqui̱ lo'o yuu sufri; la cui' se'i̱ laca su cua nchcua̱a̱ Ni ji'i̱ nu na'ni chiya'a̱ ña'a̱ bi', su cua nchcua̱a̱ Ni ji'i̱ nu cuiñi nu nacui̱ cha' tu'ba ji'i̱ ycui' Ndyosi laca. Tsa̱ lo'o talya ná tye cha' ti'í tsa chcube' ngu' ca bi'.

APOCALIPSIS 22:11

Nu lo'o bilya tye chalyuu tya cua'ni cuxi lcaa ñati̱ nu nti' cua'ni cha' cuxi, lo'o jua'a̱ nga'aa caja tyempo ji'i̱ ngu' cha' xtyanu ngu' ji'i̱ cha' cuxi bi' li'; lcaa nu ndu'ni suba' juani, nga'aa caja tyempo cha' xtyanu ngu' ji'i̱ cha' cuxi bi' li'. Lcaa ñati̱ nu tso'o ndu'ni juani, tya ntsu'u cha' cua'ni la ngu' cña tso'o ña'a̱ cuayá' nu tye chalyuu; lcaa ngu' nu lubii ndi'i̱ chalyuu, tya ntsu'u cha' cua'ni la ngu' cha' tso'o ―nacui̱ xca̱ bi'.